E Mafai Ona E Manumalo i le Faalogona o le Tuua Toʻatasi

E iai ea se tasi e mafai ona faapea mai e leʻi oo lava o ia i le tigā o le lagona tuua toʻatasi? E tele ni vala e māfua ai ona oso aʻe iā i tatou sea faalogona. Ae e sili ona matuitui le tigā o lea faalogona mo tagata e leʻi faaipoipo, i latou ua feoti a latou paaga faaipoipo, po o i latou foʻi ua tatalaina a latou faaipoipoga ma o latou taʻitoʻalua.

Mo se faataʻitaʻiga, ua fai mai se tamaʻitaʻi talavou e suafa iā Frances e faapea: “E oo ane i le taimi ua 23 ai oʻu tausaga, e foliga mai ua taufai fai uma toʻalua o aʻu uō, ae toe ai lava na o aʻu.” * E faasolosolo ina faateteleina lea lagona o le tuua toʻatasi a o faagasolo tausaga ma faapena ai foʻi ona faaitiitia le avanoa e faaipoipo ai. E pei o le faamatalaga a Sandra o lē ua toeitiiti atoa le 50 o ona tausaga: “E leʻi iai saʻu fuafuaga ou te nofofua, ma o loo ou manaʻo pea e fai soʻu aiga pe a maua.” Ua faapea mai foʻi Angela lea ua 50 ma ona tupu ona tausaga: “E leʻi faia saʻu filifiliga e nofofua ae o le tulaga lava lenā o lea ua oo i ai. E tau leai ni uso nofofua i le vaipanoa lea na tofia aʻu ou te paeonia faapito ai.”

O le tulaga e ao ona ave i ai le faamālō ona o le tele o tamaʻitaʻi Kerisiano ua filifili e nofofua ona o lo latou usitai ma le faamaoni i le fautuaga a Ieova, ia faaipoipo “tau lava i le ua i le Alii.” (1 Korinito 7:39) Ua mafai e nisi ona faamasani i le tulaga nofofua, ae o isi, a o faagasolo tausaga o le olaga, ua faateteleina ai foʻi le faanaunauga mo le fia faaipoipo ma le fia faia o se fanau. “Ona o le leai o saʻu paaga faaipoipo, ua ou lagonaina ai pea le faalogona gaogao,” o le faamatalaga lea a Sandra.

Ua avea nisi vala, e pei o le tausiaina o mātua ua matutua, ma tulaga e faateteleina ai le lagona o le tuua toʻatasi. Ua faapea mai Sandra: “Talu ai ou te leʻi faaipoipo, ua manatu ai loʻu aiga e tatau ona ou tausia o matou mātua ua matutua. Sa tele lava la ina ou amoina lea avega tauave mo le 20 tausaga, e ui e toʻaono i matou o le fanauga. E sili atu ona faigofie le olaga pe ana iai soʻu toʻalua e fesoasoani mai.”

O loo taʻua foʻi e Frances se isi vala ua faaopoopo i lona faalogona tuua toʻatasi. Fai mai a ia: “O nisi taimi, e fesili mai ai tagata, ‘O le ā le mea ua e lē faaipoipo ai?’ O ituaiga o faamatalaga ia e oo mai ai le lagona e faapea, o soʻu sesē ua ala ai ona leai soʻu toʻalua. E toeitiiti lava o faaipoipoga uma ou te alu i ai, e fesili mai ai lava se isi i le fesili lea ua ou fiu ai lava, ‘O afea la e fai ai sau faaipoipoga?’ E oso aʻe ai loa le manatu e faapea, ‘Afai e lē o fia mananaʻo ni uso taʻumatuaina iā te aʻu, masalo ai ona e lē o iā te aʻu uiga ia o loo moomia i se Kerisiano pe ʻai lava ona ou te lē aulelei.’ “E mafai faapefea ona manumalo i faalogona o le tuua toʻatasi? E mafai faapefea e isi tagata ona avatu se fesoasoani, pe afai e iai se auala e mafai ona fesoasoani atu ai?

 Faalagolago iā Ieova

Ua faapea mai le pese a le faisalamo: “Ia e tuuina atu ia Ieova o mea e te popole vale ai [“avega,”NW]; o ia lava na te tausia oe; na te le tuuna e faavavau le amiotonu ia faagaeetia.” (Salamo 55:22) E tusa ai ma le gagana Eperu o le uiga moni o le upu “avega,” o le tulaga o loo iai o tatou olaga ma o loo faasino tonu i popolega e oo iā i tatou ona o lo tatou tulaga. Ua sili atu ona silafia e Ieova nai lo o se isi lava ia avega o loo iā i tatou, ma e mafai ona ia aumaia le malosi e faatautaia ai. Na mafaia ona faafetaiaʻia e Angela lona faalogona o le tuua toʻatasi ona o lona faalagolago tele iā Ieova le Atua. E uiga i lana galuega paeonia sa ia manatuaina e faapea: “E mamao lava le mea sa ma nonofo ai ma laʻu paga mai le mea sa iai le faapotopotoga i le taimi faatoʻā amata ai ona ou paeonia. Na ma iloa ai ona faalagolago atoatoa iā Ieova, ma ua matuā aogā lenei mea i loʻu olaga atoa. Pe afai e oo ifo ni manatu e lē ati aʻe ia te aʻu, ou te talanoa atu iā Ieova ma e mautinoa lona fesoasoani mai. Ua avea pea le Salamo e 23 ma faamāfanafanaga tele, ma ua fai lava ma aʻu masani loʻu faitau soo i ai.”

Sa fai lava si faigatā o le avega na amoina e Paulo. E tusa e faatolu ona ia ‘aioi atu i le Alii ona o lea mea matuitui i le tino ina ia alu ese ia te ia.’ E leʻi faavavega ona maua e Paulo se fesoasoani, ae na folafola atu iā te ia e faapea o le a faamalosia o ia e le alofa tunoa o le Atua. (2 Korinito 12:7-9) Na aʻoaʻoina foʻi e Paulo le uiga o le lotomalie. Na ia tusia mulimuli ane e faapea: “Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua aʻoaʻoina ai aʻu ia ou maʻona, ma ou fia ʻai, ia faulai mai mea, ma ia oge mea. Ou te mafaia mea uma lava ona o ia ua faamalosi mai ia te au.”—Filipi 4:12, 13, LF.

E mafai faapefea e se tasi ona maua le malosi o le Atua pe a lagona le lotovaivai ma tuua toʻatasi? Na tusi mai faapea Paulo: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4: 6, 7) Ua faaaogāina e Sandra lenei fautuaga. Ua ia faamatalaina e faapea: “Talu ai o aʻu e nofofua, e tele ai lava ina ou faifaimea na o aʻu. E maua ai la le tele o le avanoa e tatalo ai iā Ieova. Ou te lagona lava le māfana atu iā te ia ma ou te saʻoloto e talanoa atu iā te ia e faatatau i oʻu faafitauli faapea foʻi ma mea o loo faafiafiaina ai aʻu.” Ua faapea mai foʻi Frances: “O se taua tele loʻu tauivi pea ma lagona lē ati aʻe. Ae e ese le aogā o le tatalaina atu o oʻu faalogona iā Ieova. Ou te mautinoa lava o loo naunau mai Ieova i so o se mea e aafia ai loʻu lelei e lē gata i le itu faaleagaga ae faapea foʻi i faalogona.”—1 Timoteo 5:5.

“Ia Outou Fesui i a Outou Avega e Ave”

E lē tau amoina na o oe lau avega auā o lea o loo iai lo tatou ʻauuso. Ua faapea mai le timaʻiga a Paulo: “Ia outou fesui i a outou avega e ave, ma ia faapea ona outou faia le tulafono a Keriso.” (Kalatia 6:2) E mafai ona tatou maua “upu lelei” e faalaeiauina ai, lea e māmā ai le amo o le lagona tuua toʻatasi, e ala i a tatou faatasitasiga ma uso Kerisiano.—Faataoto 12:25.

Seʻi manatu foʻi i le mea o loo taʻua e le Tusi Paia e faatatau i le afafine o le faamasino Isaraelu o Iefata. A o leʻi oo ina ia faatoʻilaloina ʻau a Amoni ia sa faasagatau ane, na ia folafolaina atu ai le tuuina atu iā Ieova o le tagata muamua lava o lona aiga e alu ane e faamālō iā te ia. E iʻu ane, o lona lava afafine. (Faamasino 11:30, 31, 34-36) Sa malie le afafine o Iefata e faataunuuina lea tautoga ma sa auauna i le malumalu i Sailo mo lona olaga atoa, e ui lava o le uiga o lea tulaga o le a ia lē faaipoipo ai ma o le a misia ai foʻi le faia o se aiga e pei ona masani ai. Po o lona uiga ea la, e leʻi faatāuaina e isi lana faataulagaina? Sa matuā tāua lava, auā foʻi: “O lea tausaga ma lea tausaga ua o ai afafine o Isaraelu e vivii i le afafine o Iefata le Kiliata e taifa aso i tausaga.” (Faamasino 11:40) Ioe, e mafai ona faamalosia isi pe a avatu i ai le faamālō. O lea la, aua neʻi galo ona faamālō atu i ē ua tatau i ai.

E lelei foʻi ona tatou manatunatu i le faataʻitaʻiga a Iesu. Sa masani ona faatasitasi Iesu ma Maria ma Mareta e ui lava e lē o se tū masani lea  a Iutaia le talatalanoa o tane ma fafine. Atonu o i laʻua o ni fafine ua feoti a la tane pe e leʻi faaipoipo foʻi. Na naunau atu Iesu ina ia la maua aogā faaleagaga o le avea o ia ma a la uō. (Luka 10:38-42) E mafai ona tatou faataʻitaʻi atu i le faaaʻoaʻoga a Iesu, e ala i le valaaulia o o tatou tuafāfine faaleagaga e leʻi faia ni aiga i faatasitasiga faasamasamanoa ma e ala foʻi i le faia o fuafuaga e talaʻi ma i latou. (Roma 12:13) Pe e latou te talisapaia ea lo tatou manatu atu? Na faapea mai se tasi o tuafafine: “Ou te iloa lava le alolofa ma le talisapaia o aʻu e le ʻauuso, ae e iā te aʻu le loto faafetai pe a latou uaʻi faapitoa mai iā te aʻu.”

Ua faapea le faamatalaga a Sandra: “Ua iā i matou se manaʻoga tele ina ia alofaina, ma ia avea o se vaega o le aiga o uso ma tuafāfine faaleagaga ona e leʻi faia ni o matou aiga.” E mautinoa lava le alofa o Ieova iā i latou ia, ma afai o loo tatou faaalia atu lo tatou alolofa ma le faatāuaina o i latou, o loo tatou galulue faatasi foʻi la ma Ieova. (1 Peteru 5:6, 7) E mātauina e Ieova lea uiga o le manatunatu mo isi, auā “o le ua alofa i le tagata mativa, na te avatua ana mea ia Ieova; e tauia mai foi e ia [Ieova le Atua] ana mea na avatu ia te ia.”—Faataoto 19:17.

“E Taitasi ma Ave i Lana Lava Avega”

E mafai ona maua se fesoasoani mai i isi ma e avea foʻi la latou lagolagosua ma faalaeiauga, ae e “e taitasi ma ave i lana lava avega.” (Kalatia 6:5) Peitaʻi ane, e iai ni vala e tatau ona tatou faaeteete i ai a o amoina la tatou avega. Mo se faataʻitaʻiga, afai e tatou te lē fia faatasi ma faauō atu i isi, e mafai ona lofitūina i tatou e le faalogona tuua toʻatasi. Ae i le isi itu, e mafai ona tatou manumalo i le lagona tuua toʻatasi e ala i le alofa. (1 Korinito 13:7, 8) E tusa lava po o le ā lo tatou tulaga o iai, ae o se tasi o auala e sili ona maua ai le fiafia, o le foaʻi atu lea i isi. (Galuega 20:35) Na faapea mai se tasi tuafafine paeonia e galue malosi: “E tau leai se taimi e oo ai iā te aʻu le lagona o le tuua toʻatasi. Afai ua iā te aʻu le lagona o loo oʻu aogā ma pisi, e lē oo iā te aʻu se faalogona o le tuua toʻatasi.”

E ao ona tatou faaeteete ina neʻi o tatou faia se faiga uō e lē lelei talu ai le lagona tuua toʻatasi. Mo se faataʻitaʻiga, o se tulaga faanoanoa tele pe afai e avea lo tatou faanaunauga mo le fia faaipoipo ma mea e galo ai faafitauli e oo mai ona o le nonofo ma se tasi e tatou te lē tapuaʻi faatasi, ae sili atu i lenā, o le a lē usitaia ai le faatonuga mai le Tusi Paia ina ia ʻalofia lea tulaga! (2 Korinito 6:14) Na faapea mai se fafine Kerisiano ua tatalaina lana faaipoipoga: “E tasi lava le mea e sili atu ona leaga nai lo o le nofofua. O le sesē lea o le tagata e faaipoipo atu i ai.”

E tatau lava ona onosaia se faafitauli mo sina taimi, pe afai e leai se vaifofō. E mafai ona onosaia le faalogona o le tuua toʻatasi e ala i le fesoasoani mai iā Ieova. Ia iā i tatou le mautinoa e faapea o le a iai se aso e faamalieina ai o tatou manaʻoga i le auala silisili, a o tatou faaauau ona auauna iā Ieova.—Salamo 145:16.

[Faamatalaga pito i lalo]

[Ata i le itulau 28]

E mafai ona tatou manumalo i le lagona o le tuua toʻatasi e ala i le foaʻi atu i isi