Fesili Mai le ʻAufaitau

Pe na avea le tulaga lē lelei atoatoa o le tamaʻitaʻi taupou o Maria ma mea na oo ai ni āuga lē lelei i le afuafuaina mai o Iesu?

E tusa ai o le “fanau mai o Iesu” ua faapea mai ai faamaumauga faagaeeina: “Sa faufautane lona tina o Maria ia Iosefa, ua iloa ua to o ia i le Agaga Paia, a o lei faatasi i laua.” (Mataio 1:18) O le mea moni, na faia e le agaga paia o le Atua se vaega tāua i le maʻitaga o Maria.

Ae peitaʻi, e faapefea Maria? Pe na iai ea se aogā o lona fuāsela i le afuafuaina o lona maʻitaga. I le iloiloina o le folafolaga a le Atua iā Aperaamo, Isaako, Iakopo, Iuta, ma le tupu o Tavita—o augātamā o Maria—o le tamaitiiti o le a fanau mai e tatau ona avea ma sē e tupuga moni mai lava iā i latou. (Kenese 22:18; 26:24; 28:10-14; 49:10; 2 Samuelu 7:16) O le ā se isi auala e mafai ai ona avea le tama na fanau mai iā Maria ma suli moni e pei ona folafolaina mai e le Atua? E tatau ai ona avea o ia ma sana tama moni lava.—Luka 3:23-34.

Na faailoa atu le agelu a Ieova i le tamaʻitaʻi taupou o Maria ma faapea atu: “Maria e, aua e te fefe; auā ua alofaina mai oe e le Atua. Faauta foi, o le a to oe, ma e fanauina se tama tane, e te faaigoa ia te ia o Iesu.” (Luka 1:30, 31) Ina ia afuafua se pepe e tatau ona amata ona tupu le fuāsela. E foliga mai la, na faapogaia e Ieova le Atua le amataina o le tupu o se fuāsela i le faaautagata o Maria, e ala i le auina mai o le soifua o lona Alo pele e toʻatasi mai le lagi i le lalolagi.—Kalatia 4:4.

Pe na mafai e se pepe na afuafua mai i lenei auala i se fafine lē lelei atoatoa, ona lelei atoatoa ma aunoa ma se agasala i lona tino faaletino? Ae e faapefea le tulafono o le tuufaasolo mai o le lē lelei atoatoa pe afai e tuuina se ola e lelei atoatoa i sē e lē lelei atoatoa? Ia manatua foʻi o le agaga paia sa galue i le auina mai o le malosi o le ola lelei atoatoa o le Alo o le Atua ma māfua ai le afuafuaina. Na faalēaogāina ai so o se tulaga lē lelei atoatoa na iai i le fuāsela o Maria, ma na maua mai ai sela fanautama e lelei atoatoa mai lava i le amataga o lona afuafuaina.

E tusa lava po o le ā le tulaga na iai, ua mafai ona tatou iloa o le gaoioiga a le agaga paia i lenā taimi na faamautinoa ai le faataunuuina o lana fuafuaga. Na faamatala atu e le agelu o Kaperielu iā Maria: “E afio ifo le Agaga Paia i luga ia te oe, e faamalumalu ifo foi ia te oe le mana o le Silisili ese; o le mea lea e taʻua ai le tama paia e fanau mai, o le Alo o le Atua.” (Luka 1:35) Ioe, na pei lava le agaga paia o le Atua o se pa puipui, ina ia lē mafai ai e se tulaga lē lelei atoatoa po o ni aafiaga leaga ona faaleagaina ai le pepe mai lona afuafua ma faasolo mai ai.

E manino lava la, na tuuina atu e Iesu i lona Tamā faalelagi le faafetai mo lona ola lelei atoatoa faaletagata, ae lē i se tagata. Na ‘saunia e Ieova le tino’ mo ia, ma o Iesu—mai lona afuafua ma faasolo mai ai—sa matuā ‘lē ponā, sa taumamao ma ē agasala.’—Eperu 7:26; 10:5.

[Ata i le itulau 19]

“O le a to oe, ma e fanauina se tama tane”