Pe Moni le Taʻitaʻiga a Keriso iā te Oe?

“Aua foʻi neʻi taʻua outou o ‘taʻitaʻi,’ auā e toʻatasi lo outou Taʻitaʻi, o le Keriso lea.”—MATAIO 23:10, NW.

1. Ua na o ai lava le Taʻitaʻi o Kerisiano moni?

O LE Aso Lua, iā Nisani 11. E tusa toe tolu lava aso o totoe, ona maliu loa lea o Iesu Keriso. O lana asiasiga mulimuli lenā i le malumalu. I lea aso, na fofoga mai ai e Iesu se aʻoaʻoga tāua i le motu o tagata na potopoto ai i inā faapea ma ona soo. Na ia fetalai: “Aua neʻi taʻua outou o rapi; auā e toatasi la outou aʻoaʻo; a o outou uma o le au uso outou. Aua foi neʻi tou taʻua se tasi i le lalolagi o lo outou tamā; auā e toatasi lo outou Tamā, o i le lagi ia. [“Aua foʻi neʻi taʻua outou o ‘taʻitaʻi,’ auā e toʻatasi lo outou Taʻitaʻi, o le Keriso lea,” NW].” (Mataio 23:8-10, LF) E manino lava la, o Iesu Keriso, o le Taʻitaʻi lea o Kerisiano moni.

2, 3. O ā ni āuga i o tatou olaga, pe a anaana iā Ieova ma talia le Taʻitaʻi ua ia tofia mai?

² Maʻeu ni āuga aogā e oo i o tatou olaga ona o le taʻitaʻiga a Iesu, pe afai tatou te taliaina! I le valoiaina o le afio mai o lenei Taʻitaʻi, na folafola ai e Ieova le Atua e ala mai i le perofeta o Isaia e faapea: “E! Outou uma o e fia inu, o mai ia i le vai, atoa ma outou ua leai ni tupe, o mai ia, ina faatau ma aai; ia outou o mai lava, ma faatau le uaina ma le suāsusu, a e leai se tupe, e leai foi se tau e faatau aʻi. . . . Seʻi matuā faalogologo mai ia ia te au, ma outou aai i mea lelei, e fiafia foi o outou loto i mea lololo. . . . Faauta, ua ou avatua o ia e fai ma molimau i le nuu, o le taʻimua ma le pule i le nuu.”—Isaia 55:1-4.

³ Sa faaaogā e Isaia mea faasuavaia masani—le vai, le suāsusu, ma le uaina—e fai ma faatusatusaga e faaalia ai le auala e aafia ai o tatou olaga totino, pe a tatou anaana iā Ieova ma mulimuli i le Taʻitaʻi ma le Pule ua ia foaʻi mai iā i tatou. O le iʻuga e faafouina ai. E pei lava o le taumafaina o se ipuvai mālū i se aso vevela. E matuā faamalieina ai lo tatou galala mo le upu moni ma le amiotonu. E pei ona aogā le suāsusu e maua ai e pepe le malosi ma fesoasoani i lo latou tuputupu aʻe, e faapena foʻi i le ‘suāsusu o le upu,’ ona faamalosia ai i tatou ma atili ai ona tatou tuputupu aʻe faaleagaga i la tatou faiā ma le Atua. (1 Peteru 2:1-3) Ma o ai e mafai ona faafiti mai i le mea moni faapea, o le uaina e maua ai le olioli i taimi e faafiafia ai? I se faatusatusaga, o le tapuaʻi atu i le Atua moni ma mulimuli i tulagāaao o lana Taʻitaʻi na ia tofia, e mafai ai ona avea le soifuaga o se mea e matuā “olioli ai lava.” (Teuteronome 16:15) E tāua tele la mo i tatou uma—o talavou ma ē matutua, o tane ma fafine—ona faaali atu e moni le taʻitaʻiga a Keriso iā i tatou. Ae faapefea la ona tatou faataʻitaʻia i o tatou olaga i aso taʻitasi e faapea, o le Mesia o lo tatou Taʻitaʻi lea?

Talavou e—Ia Outou ‘Tutupu Aʻe i le Poto’

4. (a) O le ā na tupu ina ua asiasi atu Iesu i le 12 o ona tausaga i Ierusalema, i le taimi o le Paseka? (e) Na faapefea ona lelei le malamalamaga sa iā Iesu i le na o le 12 o ona tausaga?

⁴ Seʻi manatu i le faaaʻoaʻoga na faataatia e lo tatou Taʻitaʻi mo talavou. E ui ina lē tele ni mea o iloa e uiga i le soifuaga o Iesu a o avea ma tamaitiiti, ae tasi le mea na tupu o loo matuā manino mai. Ina ua 12 tausaga o Iesu, na ave ai o ia e ona mātua i sa latou malaga faaletausaga i Ierusalema mo le Paseka. I lenā taimi, sa matuā sagaʻi atu ai o ia i se talanoaga faale-Tusi Paia na faia, ma oo ai ina toe foʻi lona aiga ae galo ai o ia i inā. I le tolu o aso mulimuli ane, na maua atu ai o ia e ona mātua o Iosefa ma Maria i le malumalu, “o nofo i totonu o le au aʻoaʻo, o loo faalogologo  ia te i latou, ma taufesili ia te i latou.” E lē gata i lea, “ua matuā ofo uma lava e na faalogo ia te ia i lona poto ma ana upu e tali.” Seʻi faaata i lou mafaufau, e na o le 12 tausaga o Iesu i lea taimi, ae lē gata ina mafai ona ia fesiligia ni fesili faatupu manatu e taulaʻi atu i mea faaleagaga, ae sa mafai foʻi ona ia tuuina atu ni tali e sili ona atamai! E mautinoa la, sa ia maua le fesoasoani mai toleniga a ona mātua.—Luka 2:41-50.

5. E mafai faapefea ona iloilo totoʻa e talavou o latou manatu e faatatau i le suʻesuʻega faale-Tusi Paia a le aiga?

⁵ Atonu o oe o se talavou. Pe afai o ou mātua o ni auauna faamaoni a le Atua, e mautinoa la o loo iai sa outou polokalame faifai pea o suʻesuʻega faale-Tusi Paia a lo outou aiga. O le ā sou manatu i le suʻesuʻega a le aiga? Aiseā e te lē manatunatu ai i fesili nei: ‘Po o oʻu lagolagoina ea ma loʻu loto atoa le faatulagaga mo le suʻesuʻega faale-Tusi Paia i totonu o loʻu aiga? Po o oʻu lagolagosua atu i ai, i loʻu lē faia o se mea e toe āfaina ai le taimi ua uma ona faatulagaina mo lea fuafuaga?’ (Filipi 3:16) ‘Po o aʻu ea o se tasi o loo faia se sao olaola i le suʻesuʻega? Pe a talafeagai, po o oʻu faia ea ni fesili e faatatau i le mataupu o loo suʻesuʻeina, ma fai ni aʻu tali e tusa ai o lona faatatauga? A o oʻu agaʻigaʻi i luma faaleagaga, pe o oʻu atiina aʻe ea se naunau mo “mea aano [e] mo tagata taʻumatuaina”?’—Eperu 5:13, 14, NW.

6, 7. O le ā le tāua i talavou o se polokalame o le faitauina o le Tusi Paia i aso taʻitasi?

⁶ E tāua tele foʻi se polokalame o le faitauga Tusi Paia i aso taʻitasi. Na pese le faisalamo e faapenei: “Amuia le tagata e le savali i le filifiliga a e amio leaga, . . . a e naunau o ia i le tulafono a Ieova; e mafaufau foi o ia i lana tulafono i le ao atoa ma le po.” (Salamo 1:1, 2) O Iosua, o lē na sosoo ane i le tofiga lea sa iā Mose, ‘sa ia faitauina le tusi o le tulafono i se leolemu i le ao atoa ma le po.’ O inā na mafai ai ona ia gaoioi ma le atamai, ma taulau manuia ai i le tauaveina o lona tofiga mai le Atua. (Iosua 1:8) Na fetalai mai lo tatou Taʻitaʻi o Iesu Keriso: “Ua tusia, E le na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) Pe afai tatou te manaʻomia taumafa faaletino i aso taʻitasi, maʻeu la le sili atu ona tatou manaʻomia o taumafa faaleagaga i se tulaga faifai pea!

⁷ Ona o le amanaʻiaina e Nikola, o se teine e 13 ona tausaga, o ona manaʻoga faaleagaga, na amata ai ona ia faitauina le Tusi Paia i aso taʻitasi. * O le taimi nei la, i le 16 o ona tausaga, ua faatasi ona ia faitauina le Tusi Paia atoa, ma ua toeitiiti foʻi ʻafa le Tusi Paia i lana faitauga faalua. E faigofie lava lana auala o loo fai. Ua fai mai a ia: “Ua fai ma aʻu filifiliga maumauaʻi le faitauina a itiiti mai e tasi se mataupu i le aso.” Ua faapefea ona fesoasoani iā te ia lana faitauga Tusi Paia i aso taʻitasi? Ua ia tali mai: “E anoanoaʻi  aafiaga leaga i aso nei. O aso taʻitasi ou te fetaiaʻi ai ma omiga i le aʻoga ma isi mea e luʻia ai loʻu faatuatua. O loʻu faitauina o le Tusi Paia i aso taʻitasi, ua mafai ai ona vave loʻu manatuaina o poloaʻiga ma mataupu silisili o le Tusi Paia, e faalaeiauina ai aʻu e tetee atu i nei omiga. O le iʻuga, ua atili ai ona ou māfana atu iā Ieova ma Iesu.”

8. O le ā sa fai ma masani a Iesu e faatatau i le sunako, ma e mafai faapefea ona faataʻitaʻi atu talavou iā te ia?

⁸ Sa fai ma masani a Iesu lona faalogologo ma fai sona sao i le faitauina o le Tusi Paia i le sunako. (Luka 4:16; Galuega 15:21) Maʻeu se lelei mo talavou pe a mulimuli atu i lenā faaaʻoaʻoga, e ala i le auai e lē aunoa i sauniga faa-Kerisiano, o inā o loo faitau ma suʻesuʻeina ai le Tusi Paia! I le faaleoina o se agaga faafetai mo na sauniga, ua faapea mai ai le talavou o Lisati e 14 ona tausaga: “E tāua tele sauniga iā te aʻu. O inā e faamanatu mai ai pea iā te aʻu mea e lelei ma mea e leaga, o amioga e mamā ma amioga e lē mamā, o uiga e tutusa ma uiga o Keriso, ma uiga e lē tutusa ma uiga o Keriso. E lē tau manaʻomia fua ona ou aʻoaʻoina nei mea e ala i loʻu faatinoina, ae iʻu ai i se tulaga e mafatia ai.” Ioe, “e faamaoni poloaiga a Ieova, e faapotoina ai le ua faigofie.” (Salamo 19:7) Ua fai foʻi ma filifiliga maumauaʻi a Nikola le auai atu i sauniga uma e lima a le faapotopotoga i vaiaso taʻitasi. E na te faaaluina foʻi pe tusa o le lua i le tolu itula e sauniuni ai mo na sauniga.—Efeso 5:15, 16.

9. E mafai faapefea e talavou ona ‘tutupu aʻe i le poto’?

⁹ O le taimi o le talavou o se avanoa lelei lea e maua ai ‘le poto e uiga i le Atua moni e toʻatasi, ma lē ua ia auina mai, o Iesu Keriso lea.’ (Ioane 17:3, NW) Atonu e te silafia ni talavou o loo faaalu le tele o o latou taimi e faitau ai i tusi komi, matamata i le televise, taaalo i taaloga i vitiō, pe saʻiliʻili solo i le Initineti. Aiseā e te faataʻitaʻi ai fua iā i latou, ae o lenā e mafai ona e faataʻitaʻi i le faaaʻoaʻoga e atoatoa ona lelei a lo tatou Taʻitaʻi? A o avea o ia o se tamaitiiti, sa ia fiafia e aʻoaʻoina mea e faatatau iā Ieova. Ma o le ā le iʻuga? Ona o lona naunau i mea faaleagaga, ‘na tuputupu aʻe ai le poto o Iesu.’ (Luka 2:52) E te mafaia foʻi ona faia faapea.

“Ia Usiusitai le Tasi i le Tasi”

10. O le ā e mafai ai ona avea le olaga faaleaiga o se puna o le filemu ma le fiafia?

¹⁰ E mafai ona avea le aiga ma maluapapa o le filemu ma le lotomalie, po o le avea ma nofoaga o femisaʻiga ma feʻainaʻiga. (Faataoto 21:19; 26:21) O lo tatou taliaina o le taʻitaʻiga a Keriso, e mafai ai ona maua le filemu ma le fiafiaga i totonu o le aiga. O le mea moni, o le faaaʻoaʻoga a Iesu, ua avea lenā ma faataʻitaʻiga mo faiā faaleaiga. Ua taʻu mai e le Tusi Paia: “Ia usiusitai le tasi i le tasi ma le mataʻu ia Keriso. O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foi o le ulu ia o le ekalesia, o ia foi o le Faaola o le tino. . . . O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai o ia e ia e fai mona sui.” (Efeso 5:21-25) Na tusi atu le aposetolo o Paulo i le faapotopotoga i Kolose: “O outou le fanau, ia outou faalogo i o outou mātua i mea uma; auā o le mea mālie lea i le Alii.”—Kolose 3:18-20.

11. E mafai faapefea e se tane ona ia faaalia e moni le taʻitaʻiga a Keriso iā te ia?

¹¹ O le usitaia o lenei fautuaga, e tatau ai i le tane ona taʻimua i le aiga, e tatau i le avā ona lagolagosua faamaoni atu iā te ia, ma le fanau ia usiusitai i o latou mātua. Peitaʻi, o le tulaga ulu o le tamāloa, e faatoʻā iʻu i le fiafia pe afai e taulimaina  i se tulaga talafeagai. E tatau i se tane atamai ona ia aʻoaʻoina le auala e faatino ai lona tulaga ulu, e ala i lona faataʻitaʻi atu i lona lava Ulu ma lona Taʻitaʻi, o Keriso Iesu. (1 Korinito 11:3) E ui sa mulimuli ane avea Iesu ma “ulu o mea uma lava mo le ekalesia,” ae na afio mai o ia i le lalolagi, “e [lē] . . . ina ia auauna mai tagata ia te ia, a ia auauna atu ia.” (Efeso 1:22; Mataio 20:28) E faapena foʻi le auala e faatinoina ai e se tane Kerisiano lona tulaga ulu, e lē manatu faapito mo ni ona lava lelei, ae ina ia tausia manaʻoga o lana avā ma le fanau—ioe, le aiga atoa. (1 Korinito 13:4, 5) E na te taumafai e faataʻitaʻi i uiga faale-Atua a lona ulu, o Iesu Keriso. I le pei o Iesu, e tatau ona agamalu o ia ma lotomaulalo. (Mataio 11:28-30) E lē faigatā ona ia fai atu upu e pei o le, “ou te faamalie atu” po o le, “e saʻo oe,” pe a sesē o ia. O lana faaaʻoaʻoga lelei e atili faigofie ai mo se avā ona avea ma “fesoasoani,” o sē “e tatau” ma o sē e “mafuta” atu i lenā tane, e aʻoaʻoina mea mai iā te ia ma galulue soosoo tauʻau ma ia.—Kenese 2:20; Malaki 2:14.

12. O le ā e mafai ona fesoasoani i se avā ina ia usitaia le mataupu silisili o le tulaga ulu?

¹² O le vaega a le avā, o le gauaʻi atu lea i lana tane. Ae peitaʻi, afai e aafia o ia i le agaga o le lalolagi, e oo ai ina amata ona ia manatu faatauvaa i le mataupu silisili o le tulaga ulu, ma o le a lē mamafa foʻi iā te ia le manatu o le gauaʻi atu i se tamāloa. E lē o faapea mai le Tusi Paia e tatau i le tane ona pulepuletutū, peitaʻi o loo faatonuina ai avā ina ia gauaʻi atu i a latou tane. (Efeso 5:24) O loo faatonuina e le Tusi Paia le tane po o le tamā ina ia faatino lona tiute tauave i totonu o le aiga. Ma pe a faatatauina nei fautuaga, ona maua lea o le filemu ma le maopoopo i totonu o le aiga.—Filipi 2:5.

13. O le ā le faaaʻoaʻoga o le gauaʻi atu ua saunia mai e Iesu mo fanau?

¹³ E tatau i fanau ona usiusitai i o latou mātua. Sa faataatia e Iesu se faaaʻoaʻoga e sili ona lelei i lenei vala. Ina ua mavae le mea sa tupu i le malumalu, lea na galo ai i inā mo aso e tolu le tama e 12 tausaga o Iesu, ‘ona latou o ifo lea ma ona mātua, ua oo i Nasareta, ua anaana pea o ia ia te i laʻua.’ (Luka 2:51) O le gauaʻi atu o fanau i o latou mātua e mafai ai ona maua se aiga e filemu ma autasi. Pe afai e gauaʻi atu tagata uma o le aiga i le taʻitaʻiga a Keriso, o le a iʻu ai i se aiga fiafia.

14, 15. O le ā e mafai ona tatou taulau manuia ai pe a fesagaʻi ma se faafitauli i le aiga? Taʻu mai se faaaʻoaʻoga.

¹⁴ E tusa lava pe tulaʻi mai ni tulaga faigatā i totonu o le aiga, ae o le ki i le taulau manuia, o le faataʻitaʻi atu lea iā Iesu ma talia ana taʻiala. Mo se faaaʻoaʻoga, ina ua faaipoipo Ieremia e 35 ona tausaga ma Lana, o se tinā e iai sana tama teine ua sefulu ma ona tupu ona tausaga, sa tulaʻi mai se faafitauli na leai se tasi o i laʻua na mafaufauina o le a tupu. Ua faamatala mai e Ieremia: “Sa ou iloa, ina ia avea aʻu o se ulu e lelei, sa manaʻomia ona ou faatatauina mataupu silisili o le Tusi Paia na sa taulau manuia ai isi aiga. Peitaʻi e leʻi umi ae ou iloa, ua tatau ona ou faatatauina faatasi ma le matuā atamai ma le faautautaga mamao.” Sa manatu le afafinefai, ua fai Ieremia ma faalavelave i lo la va ma lona tinā, ma sa matuā ita tele ai le teine iā Ieremia. Sa manaʻomia e Ieremia le faautauta ina ia malamalama ai, o lenei uiga na aafia ai le auala e tautala ma gaoioi ai le teine. Na faapefea ona ia taulimaina le faafitauli? Ua tali mai Ieremia: “Sa ma taufai malilie uma ma Lana, o le a tuu atu iā Lana mo lenā vaitaimi, le avega tauave faamātua o le aʻoaʻiina o le teine, ae o le a ou taulaʻi atu i le atiina aʻe o se faiā lelei ma loʻu afafinefai. Mulimuli ane, na oo lenei gaoioiga i ni iʻuga lelei.”

¹⁵ Pe a fesagaʻi ma faafitauli i le aiga, e tatou te manaʻomia le faautautaga ina ia iloa ai le māfuaaga o faamatalaga ma gaoioiga o loo fai e tagata o le aiga. E tatou te manaʻomia foʻi le atamai e faatatau tonu ai mataupu silisili faale-Atua. Mo se faaaʻoaʻoga, sa silafia lelei e Iesu le māfuaaga na paʻi ane ai iā te ia le fafine na puapuagatia i le puna toto, ma sa ia feutagaʻi ai ma lenā fafine i se uiga atamai ma le alofa mutimutivale. (Levitiko 15:25-27; Mareko 5:30-34) O le atamai ma le faautauta, o uiga na e iloatino ai lo tatou Taʻitaʻi. (Faataoto 8:12) E tatou te fiafia pe afai tatou te gaoioi i le auala na ia gaoioi ai.

 ‘Ia Muaʻi Saʻili Pea le Malo’

16. O le ā e tatau ona faaautū i ai o tatou olaga, ma na faapefea ona faaalia e Iesu lenei mea e ala i lana faaaʻoaʻoga?

¹⁶ Sa matuā faamanino mai lava e Iesu le mea e tatau ona faaautū i ai soifuaga o i latou e taliaina lana taʻitaʻiga. Na ia fetalai mai: ʻA ia outou muai saili pea le malo o le Atua ma lana amiotonu.’ (Mataio 6:33, LF) Ma e ala i lana faaaʻoaʻoga, na ia faaalia mai ai iā i tatou le auala e faia ai lenei mea. I le faaiʻuga o le 40 aso o le anapogi, le mafaufau loloto, ma le tatalo ina ua mavae lona papatisoga, na fetaiaʻi ai Iesu ma se faaosoosoga. Na ofo ane e Satani le Tiapolo se tulaga pule iā te ia e pule ai i “malo uma o le lalolagi.” Seʻi manatu i se soifuaga na semanū e maua e Iesu pe ana ia taliaina le ofo a le Tiapolo! Peitaʻi, sa uaʻi atu Keriso i le faia o le finagalo o lona Tamā. Na ia silafia foʻi, o se soifuaga faapena i le lalolagi a Satani e mo na o sina taimi puupuu. Na vave lava ona ia teena le ofo a le Tiapolo i lona fetalai atu i ai: “Ua tusia, E te ifo atu i le Alii lou Atua, ua na o ia lava e te auauna i ai.” E leʻi leva talu ona mavae lenā mea, ae ‘afua loa ona talaʻi atu Iesu ma faapea atu, “Ina salamo ia outou; auā ua latalata mai le malo o le lagi.”’ (Mataio 4:2, 8-10, 17) Mo le taimi na totoe o lona soifuaga i le lalolagi, na avea ai Keriso o sē e folafola atu faataimi atoa le Malo o le Atua.

17. E mafai faapefea ona tatou faaalia, o loo faamuamua i o tatou olaga manaʻoga o le Malo?

¹⁷ E lelei pe a tatou faataʻitaʻi atu i lo tatou Taʻitaʻi, ma ia lē faatagaina le lalolagi a Satani e maileia i tatou, ina ia avea le mauaina o se galuega e telē le totogi, e fai ma o tatou sini autū i le olaga. (Mareko 1:17-21) Ua matuā aunoa i tatou ma se faautauta pe afai ua tatou saisaitia i le saʻiliga o mea a lenei lalolagi, ma oo ai ina faatulagalua manaʻoga o le Malo! Ua faamoemoe mai Iesu iā i tatou mo le faia o le galuega o le talaʻia o le Malo ma le saʻilia o ni soo. (Mataio 24:14; 28:19, 20) Ioe, atonu e iai o tatou aiga ma isi tiute tauave e tatau ona tausia. Ae pe tatou te lē fiafia ea e faaaogā afiafi ma faaiʻuga o vaiaso, e faatino ai la tatou tiute tauave faa-Kerisiano o le talaʻi ma aʻoaʻo atu? Ma e maʻeu se faamalosiauina ai o i tatou talu ai a o faagasolo le tausaga faaleauaunaga o le 2001, sa mafai e se toʻa 780,000 ona auauna o ni faifeʻau faataimi atoa, po o ni paeonia!

18. O le ā e mafai ai ona tatou mauaina le fiafia i le faiva?

¹⁸ I tala a Evagelia, o loo faaata mai ai Iesu o se tagata o loo faatinoina ni galuega, ma o se tagata foʻi e iai ona faalogona alofa māfana. I lona tagaʻi atu i manaʻoga faaleagaga o ē sa latou faatasi, na mutimutivale ai lona alofa iā i latou  ma naunau e fia fesoasoani atu i ai. (Mareko 6:31-34) E avea la tatou faiva o se mea e olioli ai, pe a tatou faia ona o le alofa mo isi, ma se faanaunauga moni e fesoasoani iā i latou. Ae faapefea ona tatou mauaina lenā faanaunauga? Na fai mai se tauleʻaleʻa e suafa iā Iasoni: “A o sefulu ma ona tupu oʻu tausaga, sa ou leʻi fiafia tele i le faiva.” O le ā na mafai ai ona ia faatupu aʻe se naunau mo lenei galuega? Ua tali mai Iasoni: “I lo matou aiga, o taeao o Aso Toonai sa faapitoa lava ona faaaogā mo le auaunaga i le fanua. Sa lelei lenā fuafuaga iā te aʻu, auā na avea loʻu alu soo i le faiva ma itu na atili ai ona ou vaaia le aogā o mea o loo faataulauina ai, ma atili ai foʻi ona ou fiafia i ai.” E tatau foʻi ona tatou faia ma le filigā e lē aunoa se sao i le faiva.

19. O le ā e tatau ona avea ma a tatou filifiliga maumauaʻi e tusa ai o le taʻitaʻiga a Keriso?

¹⁹ E mautinoa le faafouina ma le tauia, pe a talia le taʻitaʻiga a Keriso. Pe a tatou faia lenā mea, ona avea lea o le talavou o se taimi e tuputupu aʻe ai i le poto ma le atamai. O le a avea le olaga faaleaiga o se puna o le filemu ma le fiafia, ma avea le faiva o se galuega e maua ai le olioli ma le lotomalie. O lea la, seʻi o tatou matuā maumauaʻi e faaali atu le moni o le taʻitaʻiga a Keriso iā i tatou, e ala i o tatou olaga i aso taʻitasi, ma i a tatou filifiliga e fai. (Kolose 3:23, 24) Ae peitaʻi, ua saunia e Iesu Keriso le taʻitaʻiga e ala mai i se isi foʻi vala—le faapotopotoga Kerisiano. O le a talanoaina i le mataupu o loo sosoo mai le auala e mafai ai ona aogā iā i tatou lenā sauniuniga.

[Faamatalaga pito i lalo]

Pe E te Manatua?

• E faapefea ona tatou manuia, pe a tatou mulimuli atu i lo tatou Taʻitaʻi na tofia e le Atua?

• E mafai faapefea e talavou ona latou faaalia lo latou mananaʻo e mulimuli i le taʻitaʻiga a Iesu?

• O le ā le aafiaga o le taʻitaʻiga a Keriso i soifuaga faaleaiga o i latou e gauaʻi atu i ai?

• E mafai faapefea e la tatou faiva ona faaali atu ai, e moni le taʻitaʻiga a Keriso iā i tatou?

[Fesili mo le Suʻesuʻega]

[Ata i le itulau 9]

O le talavou, o le taimi lelei lea e maua ai le poto e uiga i le Atua faapea lo tatou Taʻitaʻi tofia

[Ata i le itulau 10]

O le gauaʻi atu i le taʻitaʻiga a Keriso e faaauilumaina ai le fiafiaga i le aiga

[Ata i le itulau 12]

Na muaʻi saʻilia e Iesu le Malo. Ae ā oe?