E Talileleia e le Atua Atunuu Uma

I LE uluaʻi malaga a Ioane i Mali, sa matuā ootia o ia i le agaga talimālō na faaali ane e Mamadou ma lona aiga. A o saofaʻi Ioane i luga o le eleele ma taumafai e ʻai mai le ipu e tasi o loo aai uma ai i latou ma le aiga, sa ia tau manatu po o le ā se auala e sili ona lelei e avatu ai i le aiga o loo talimālō iā te ia, se meaalofa e sili ona tāua—le tala lelei o le Malo mai le Afioga a le Atua, le Tusi Paia. E ui sa malamalama o ia i le gagana Falani lea na tautatala ai tagata i Mali, ae sa mafaufau Ioane i se auala e mafai ona ia talanoa atu ai i se aiga, e matuā ese lava la latou tapuaʻiga, ma e ese foʻi le auala sa latou mafaufau ai.

E mautinoa lava, sa mafaufau Ioane i le tala o loo taʻua i le Tusi Paia, e uiga i le aai o Papelu. O inā na faafenumiaʻi ai e le Atua le gagana a tagata fouvale. (Kenese 11:1-9) O le iʻuga, na aliaʻe le tele o tagata ma a latou gagana eseese, o lotu, ma ituaiga eseese o mafaufauga, i vaipanoa eseese o le lalolagi. I aso nei, a o taatele le femalagaaʻi solo o tagata, ua fesagaʻi ai le toʻatele ma se luʻi e tai tutusa ma le luʻi na fesagaʻi ma Ioane, e oo lava i o latou lava atunuu: E faapefea ona faaalia atu lo latou faamoemoe faale-Tusi Paia i tagata e eseese talaaga na latou tupuga mai ai?

Se Faaaʻoaʻoga Anamua

I le pei o isi perofeta i Isaraelu, sa tautala patino atu Iona i le fanauga a Isaraelu. Sa ia valoia e faapea, e iai se taimi o le a matuā faia ai e le malo fouvale o ituaiga e sefulu ni gaoioiga e faalumaina ai le Atua. (2 Tupu 14:23-25) Seʻi e mafaufau i le tali atu a Iona ina ua ia maua se tofiga faapitoa e tuua ai lona atunuu, ae alu atu i Asuria e talaʻi i tagata sa nonofo i Nineva, o tagata sa ese la latou tapuaʻiga ma la latou aganuu. Atonu pe sa lē malamalama Iona i le gagana a tagata Nineva, pe lē matuā manino lelei ai foʻi lana tautala. Po o le ā lava le tulaga sa iai, ae foliga mai na matuā faigatā iā Iona lea tofiga, o lea na ia sola ese ai.—Iona 1:1-3.

E manino lava, sa tatau ona iloa e Iona, e ati le silafaga a Ieova le Atua, ma e na te suʻesuʻeina le loto. (1 Samuelu 16:7) Ina ua uma ona toe laveaʻia faavavega Iona mai le sami, ona toe poloaʻia faalua lea o ia e Ieova ina ia talaʻi atu i tagata o loo nonofo i Nineva. Sa usitai Iona, ma o le iʻuga, na salamō tagata Nineva. Peitaʻi, sa leʻi saʻo pea le vaaiga a Iona. Ona faia lea e Ieova se gaoioiga na avea ma lesona malosi, ina ia aʻoaʻo atu ai iā Iona e faapea, sa tatau ona suia lona manatu. Na fesili atu Ieova iā Iona: “Ou te le alofa ea i Nineva le aai tele, o loo i ai tagata e sili ona toatele i le selau afe ma afe e lua fulu, o e le iloa o latou lima taumatau po o latou lima tauagavale”? (Iona 4:5-11) Ae faapefea i tatou i aso nei? E mafai faapefea ona tatou fesoasoani i tagata e ese ni talaaga e tupuga mai ai?

 Le Taliaina o Tagata Samaria ma i Latou e Lē o ni Iutaia

I le uluaʻi senituri, na poloaʻia ai e Iesu ona soo ina ia latou saʻilia tagata o nuu uma e fai ma soo. (Mataio 28:19) Sa leʻi faigofie iā i latou lenā mea. O soo o Iesu o ni tagata Iutaia, ma na pei i latou o Iona, sa na o tagata e tutusa talaaga ma aganuu na latou tupuga faatasi mai, na masani ona talanoa atu i ai. O lona uiga la, sa fesagaʻi foʻi i latou ma ni omiga ona o uiga faailogatagata sa taatele i lenā vaitaimi. Peitaʻi, sa taʻitaʻia e Ieova mea, ina ia faasolosolo ai pea ona malamalama ana auauna i lona finagalo mo i latou.

O le laasaga muamua lava, o le foʻiaina lea o uiga faailogatagata i le va o Iutaia ma Samaria. Sa lē faifaimea faatasi tagata Iutaia ma tagata Samaria. Peitaʻi, e sili atu ma le faatasi ni taimi na sauniunia ai e Iesu se auala, ina ia taliaina ai e tagata Samaria le tala lelei i le lumanaʻi. Sa ia faaalia lona lē faailogatagata, e ala i le talanoa atu i se fafine Samaria. (Ioane 4:7-26) I se tasi taimi, sa ia faia ai se tala faatusa e uiga i se Samaria agalelei. O inā na ia taʻu atu ai i se tagata Iutaia mapolotu e faapea, e iai isi tagata e ese mai i tagata Iutaia, sa mafai ona latou faaali atu le alofa i tuaoi. (Luka 10:25-37) Ina ua oo i le taimi a Ieova e na te aumaia ai tagata Samaria i totonu o le faapotopotoga Kerisiano, ona talaʻi atu lea o Filipi, Peteru ma Ioane— o i latou uma nei e tupuga mai Iutaia—i tagata sa nonofo i Samaria. Na avea la latou feʻau ma itu na maua ai le olioli tele i lenā aai.—Galuega 8:4-8, 14-17.

Pe afai sa faigatā mo Kerisiano Iutaia ona alolofa atu i tagata Samaria, o ē sa tau iai ni o latou sootaga faaleaiga i tagata Iutaia, atonu foʻi la sa sili atu ona faigatā mo i latou le faaalia o le alofa i tagata e lē o ni Iutaia, po o tagata o Nuu Ese, o ē sa ʻinoʻino ma feita i ai tagata Iutaia. E ui i lea, ina ua maliu Iesu, sa mafai loa ona aveesea le papupuni lenā sa iai i le va o Kerisiano Iutaia ma tagata o Nuu Ese. (Efeso 2:13, 14) Ina ia fesoasoani iā Peteru e talia lenei faatulagaga fou, sa faaali atu ai e Ieova iā te ia se faaaliga, lea na Ia taʻu atu ai iā te ia e ‘aua le taʻua e sa mea, ua faamamāina e le Atua.’ Ona taʻitaʻiina atu lea o ia e le agaga o Ieova i se tagata o Nuu Ese e igoa iā Konelio. Ina ua malamalama Peteru i le finagalo o le Atua—e lē tatau ona ia taʻua lenei tagata o nuu ese e lē mamā, auā ua faamamāina o ia e le Atua—ona ia faapea mai lea ina ua faagaeeina e le agaga: “E moni, ua ou iloa e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu, ua talia i latou e ia.” (Galuega 10:9-35) Sa matuā ofo Peteru ina ua faaalia e le Atua lona taliaina o Konelio ma lona aiga, e ala i le liligiina ifo o lona agaga paia iā i latou!

Paulo—Le Ipu na Filifilia mo Nuu Ese

O le faiva a Paulo o se faaaʻoaʻoga mataʻina lenā o le auala o loo faasolosolo ona sauniunia ai e Ieova ana auauna ina ia latou alolofa ma fesoasoani atu i tagata o ituaiga uma. I le taimi na liliuina ai Paulo, na fetalai Iesu e faapea, o le a fai Paulo ma ipu ua filifilia e momoliina atu Lona suafa i nuu ese. (Galuega 9:15) Ona alu atu lea o Paulo i Arapi, pe atonu ina ia mafaufau loloto ai i le fuafuaga a le Atua e faaaogā o ia i le folafolaina  atu o le tala lelei i nuu ese.—Kalatia 1:15-17.

I le taimi o lana uluaʻi malaga faamisionare, sa faaalia e Paulo lona aasa e talaʻi atu i tagata e lē o ni Iutaia. (Galuega 13:46-48) Sa faamanuia Ieova i le galuega a Paulo, o inā na faamaonia ai, sa faia e le aposetolo mea e tusa ai ma le faatulagaga a Ieova. Na faaalia e Paulo lona matuā talisapaia o le silafaga a Ieova, ina ua ia lototele e faasaʻo Peteru, o lē sa faaalia se agaga faailogatagata i lona lē auaufaatasi ma ona uso e lē o ni Iutaia.—Kalatia 2:11-14.

O se faamaoniga atili o le taʻitaʻia e le Atua o taumafaiga a Paulo, ua vaaia lea i lana malaga lona lua faamisionare, ina ua taofia e le agaga paia Paulo mai le talaʻi atu i le itumalo Roma o Pitunia. (Galuega 16:7) Sa manino mai e leʻi talafeagai le taimi. Peitaʻi, mulimuli ane, na oo ina avea nisi tagata Pitunia o ni Kerisiano. (1 Peteru 1:1) Na vaaia i se faaaliga, le augani atu o se tagata Maketonia iā Paulo, ma faapea atu: “Sau ia i Maketonia, ma fesoasoani mai ia te i matou.” Na manatu ai loa Paulo ua tatau ona toe suia lona ala, ina ia mafai ona ia folafola atu le tala lelei i lenā itumalo Roma.—Galuega 16:9, 10.

Sa matuā tofotofoina le tomai o Paulo e fetuutuunaʻi ai, ina ua talaʻi atu i tagata o Atenai. Sa faasāina e le tulafono a Eleni ma Roma ona faaofi mai ni atua ese ma ni tu fou faalotu. O le alofa o Paulo i tagata na māfua ai ona ia mafaufau loloto i a latou gaoioiga faalotu. I Atenai, sa ia vaaia ai se fata o loo tusia ai upu nei, “Mo le Atua e Le Iloa.” Na ia taʻua lenei faaupuga i lana galuega molimau atu. (Galuega 17:22, 23) O se auala lelei tele lea e faaofi atu ai lana feʻau i se uiga agalelei ma le faaaloalo!

Maʻeu se fiafia atonu sa iai iā Paulo ina ua ia toe mafaufau i iʻuga o lana galuega faaaposetolo i nuu ese! Sa ia fesoasoani e faavaeina faapotopotoga na faia aʻe i le anoanoaʻi o Kerisiano ma tagata e lē o ni Iutaia na tupuga mai i Korinito, Filipi, Tesalonia, ma aai i Kalatia. Sa ia fesoasoani i tane ma fafine faatuatua, e pei o Tamari, Taionusio, Sekio Paulo, ma Tito. Maʻeu se faaeaga o le vaai atu i tagata o ē sa lē iloa Ieova, ma lē iloa le Tusi Paia, ae ua latou taliaina le upu moni o le Faa-Kerisiano! E tusa ai o lana matafaioi o le fesoasoani atu i tagata e lē o  ni Iutaia ina ia latou iloa le upu moni, na taʻua ai e Paulo e faapea: “A e faapea ona ou loto malosi e talaʻi le tala lelei i mea sa le taʻua ai le suafa o Keriso; . . . A e peitai e faapei ona tusia, E vaavaai i latou o e na le talaʻiina i ai le tala ia te ia; e lagona e i latou o e na le faalogo atu i ai.” (Roma 15:20, 21) Pe mafai ona faia so tatou sao i le faalauiloaina atu o le tala lelei i tagata e lē tutusa aganuu ma tupuga ma i tatou?

Ia Fesoasoani Atu i Tagata Uma o le Lalolagi

Sa tatalo Solomona iā Ieova e uiga i tagata e lē ni Isaraelu, o ē o le a ō ane e tapuaʻi i le malumalu i Ierusalema. Na ia ole atu: “Ia e faafofoga mai mai le lagi, o le mea o loo e afio ai, ma e faia e tusa ma mea uma e valaau atu ai le tagata ese ia te oe; ina ia iloa lou suafa e nuu uma lava i le lalolagi.” (1 Tupu 8:41-43) E faitau afe i latou o loo folafolaina le Malo i le tele o atunuu i aso nei, ua latou toe faaleoina atu na lagona. Ua latou feiloaʻi atu i tagata e pei o tagata Nineva, o ē i se gagana faaleagaga, ua latou “le iloa o latou lima taumatau po o latou lima tauagavale.” O loo naunau tagata talaʻi o le Malo e faia so latou sao, i le faataunuuga o valoaga e faatatau i le aoaoina o tagata tapuaʻi moni mai le tele o atunuu eseese.—Isaia 2:2, 3; Mika 4:1-3.

E pei lava ona talia e tagata mai atunuu o loo faapea mai o i latou o Kerisiano le feʻau o le faamoemoe a le Tusi Paia, ua faapena foʻi ona faia e tagata mai isi talaaga faalotu. E tatau faapefea i lenei mea ona aafia totino ai oe? Ia e iloiloina oe lava i se tulaga faamaoni. Pe afai e te lagona o loo mauaa pea i lou loto ni lagona faailogatagata, ia liaʻi ese loa ae faatupu aʻe le alofa. * Aua e te teena tagata o loo finagalo le Atua e taliaina.—Ioane 3:16.

Ia sauniuni lelei lou mafaufau a o e leʻi talanoa atu i tagata e ese se talaaga e tupuga mai ai. Ia e faamasani i o latou talitonuga, i mea o loo atugalu ai ma ituaiga o mafaufauga o loo iā i latou; ona e saʻili lea o se mataupu e tou te masani uma ai. Ia faaalia uiga lelei ma le lagona māfana i isi. Ia ʻalofia le faia o se finauga, ia fetuutuunaʻi ma ia iā te oe se uiga mautinoa. (Luka 9:52-56) O lou faia faapea, o le a e faafiafiaina ai Ieova, “o lē finagalo ina ia faaolaina o tagata uma lava, ma ia oo ina iloa lelei le upu moni.”—1 Timoteo 2:4.

E tatou te matuā fiafia lava i le iai i a tatou faapotopotoga o tagata e eseese talaaga e tupuga mai ai! (Isaia 56:6, 7) Maʻeu se faamāfanafanaloto i aso nei i le faalogo atu e lē gata i igoa e pei o Maria, Ioane, Setefano ma Tomasi, ae faapena foʻi i igoa e pei o Mamadou, Jegan, Reza, ma Chan! E moni lava, “ua faaavanoa mo [i tatou] le faitotoa lautele ma le matuā aoga.” (1 Korinito 16:9) Seʻi o tatou faaaogāina avanoa ua tatou maua, e faasafua atu ai le valaaulia ua ofoina mai e Ieova, o le Atua e lē faailogatagata ina ia talia ai tagata o atunuu uma!

[Faamatalaga pito i lalo]

[Ata i le itulau 23]

Sa talaʻi atu e Paulo le tala lelei i tagata i so o se mea e ala i le fetuutuunaʻi atu

. . . i Atenai

. . . i Filipi

. . . a o faimalaga