Ia Faaauau Ona Auauna iā Ieova ma se Loto Mau
Ia Faaauau Ona Auauna iā Ieova ma se Loto Mau
“Le Atua e, ua mau loʻu loto, ua mau lava loʻu loto.”—SALAMO 57:7.
1. Aiseā e mafai ai ona iā i tatou le mautinoa e pei ona sa iā Tavita?
O IEOVA e mafai ai ona tatou mau i le faatuatuaga faa-Kerisiano, ina ia mafai ai ona tatou pipii atu i le Faa-Kerisiano moni i le avea ai o ana auauna tuuina atu. (Roma 14:4) O lea, e mafai ona iā i tatou le mautinoa pei ona sa i le faisalamo o Tavita, o lē na iai se uunaʻiga e pese ai faapea: “Le Atua e, ua mau loʻu nei loto.” (Salamo 108:1) Pe afai e mau o tatou loto, o le a uunaʻia ai i tatou e faataunuuina lo tatou tuuina atu i le Atua. O le vaai atu iā te ia mo le taʻitaʻiga ma le malosi, e mafai ai ona tatou lē maluelue, ma ia tumau i lo tatou maumauaʻi ma talitonuga i le avea ai o ni ē e tausia le faamaoni ma “alualu lo [tatou] faamalosi i le galuega a le Alii ma le le aunoa.”—1 Korinito 15:58.
2, 3. O le ā le tāua o timaʻiga a Paulo o loo faamauina i le 1 Korinito 16:13?
2 O timaʻiga na tuuina atu i soo o Iesu i Korinito anamua o loo faatatau atu foʻi i Kerisiano i aso nei, na taʻua ai e le aposetolo o Paulo e faapea: “Ina mataala ia outou, ia outou tumau i le faatuatua, ia outou faatamatane, ia faamalolosi outou.” (1 Korinito 16:13) I le gagana Eleni o nei faatonuga taʻitasi o loo faaupuina e faatatau i le taimi nei, lea o loo uunaʻia ai ni gaoioiga faifai pea. O le ā le tāua o lenei fautuaga?
3 E mafai ona tatou “mataala” faaleagaga e ala i le tetee atu i le Tiapolo ae faalatalata atu i le Atua. (Iakopo 4:7, 8) O le faalagolago iā Ieova o le a mafai ai ona tatou tumau i le autasi ma ‘tumau i le faatuatua faa-Kerisiano.’ O le faaupuga tatou, o loo aofia ai le toʻatele o fafine o ē o loo “faatamatane” e ala i le auauna i le Atua ma le faamalosi o ni ē e faalauiloa le Malo. (Salamo 68:11) E tatou te “faamalolosi” e ala i le faaauau pea ona vaai atu i lo tatou Tamā faalelagi mo le malosi e faia ai lona finagalo.—Filipi 4:13.
4. O ā ni laasaga sa uia ina ia tatou papatisoina ai e avea o ni Kerisiano?
4 E tatou te faaalia ua tatou taliaina le upu moni i le taimi na tatou faia ai se tuuina atu atoatoa iā Ieova ma faailogaina e ala i le faatofuina i le vai. O ā ni laasaga na tatou uia ina ia mafai ai ona tatou papatiso? Muamua lava, na tatou ave i fale le poto saʻo o le Afioga a le Atua. (Ioane 17:3) Na faatupu aʻe ai e lenā tulaga le faatuatua ma uunaʻia ai i tatou e salamō, ma faaalia le faanoanoa moni i mea sesē na faia i le taimi ua teʻa. (Galuega 3:19; Eperu 11:6) Na sosoo ai ma lo tatou liliu, ona ua tatou fulitua i gaoioiga sesē ina ia saʻilia ai se olaga e ōgatusa ma le finagalo o le Atua. (Roma 12:2; Efeso 4:23, 24) Na sosoo ai ma le tuuina atu atoatoa iā Ieova e ala i le tatalo. (Mataio 16:24; 1 Peteru 2:21) Na tatou faatoga atu i le Atua mo se lotofuatiaifo lelei ma papatisoina e avea ma faailoga o lo tatou tuuina atu iā te ia. (1 Peteru 3:21) O le manatunatu i nei laasaga o le a fesoasoani iā i tatou e tumau ai ona taulaʻi atu i le manaʻoga mo taumafaiga faifai pea ina ia ola e tusa ai ma lo tatou tuuina atu ma faaauau ona auauna iā Ieova ma se loto mau.
Faaauau Lau Saʻiliga mo le Poto Saʻo
5. Aiseā e tatau ai ona tatou faaauau ona aveina i fale le poto Faale-Tusi Paia.
5 Ina ia ola e tusa o lo tatou tuuina atu i le Atua, e tatau ona tatou faaauau ona mauaina le poto o le Tusi Paia lea e atiina aʻe ai le faatuatua. Maʻeu se fiafia i le aveina i fale o meaʻai faaleagaga ina ua tatou faatoʻā iloa upu moni a le Atua! (Mataio 24:45-47) Sa susua na “taumafataga” —ma na tausia lelei ai i tatou faaleagaga. O lea ua matuā tāua ai lava ona faaauau ona ave i fale meaʻai paleni faaleagaga ina ia tausia ai se loto mau i le avea ai o ni auauna tuuina atu a Ieova.
6. Atonu sa faapefea ona e mauaina se fesoasoani e atiina aʻe ai se lototalisapaia mo upu moni o le Tusi Paia?
6 E manaʻomia ni taumafaiga ina ia mauaina atili le poto o le Tusi Paia. E pei o le saʻilia o ni ʻoa o loo natia—o se mea o loo manaʻomia ai ni taumafaiga malolosi. Ae maʻeu se tauia o le mauaina ai o “le poto i le Atua”! (Faataoto 2:1-6) Ina ua lua muaʻi suʻesuʻeina le Tusi Paia ma se tagata talaʻi o le Malo, atonu na faaaogāina e le alii po o se tamaʻitaʻi le tusi o Le Poto e Taʻitaʻia ai i le Ola e Faavavau. Atonu sa umi se taimi na faaaluina e talanoa ai mataupu taʻitasi, atonu pe sili atu ma le tasi se suʻesuʻega. Na e mauaina aogā ina ua faitauina ma faamatalaina mau o loo faasino mai i mataupu. Pe a faigatā ona malamalama i le manatu, ona faamatalaina lea. Sa sauniuni lelei lē o loo faafoeina lau suʻesuʻega, tatalo mo le agaga paia o le Atua, ma fesoasoani iā te oe e atiina aʻe se lototalisapaia mo le upu moni.
7. O le ā e taʻuagavaaina ai se tagata e aʻoaʻoina upu moni a le Atua i isi?
7 Sa talafeagai lenei taumafaiga ona sa tusi mai Paulo e faapea: “O le ua aʻoaʻoina i le upu, ia tufa atu e ia mea lelei uma lava i le ua aʻoaʻo mai.” (Kalatia 6:6) Ua faaalia e le mau i le gagana Eleni i inei e faapea, sa tā mau i le mafaufau ma le loto o lē ua “aʻoaʻoina i le upu” ia aʻoaʻoga o le Afioga a le Atua. O le aʻoaʻoina o oe i lenā auala ua taʻuagavaaina ai oe e avea ma faiaʻoga i isi. (Galuega 18:25) Ina ia e faamaoni i lou tuuina atu, e tatau ona e tausia lou malosi faaleagaga ma le loto mau e ala i le faaauau ona suʻesuʻeina o le Afioga a le Atua.—1 Timoteo 4:13; Tito 1:13; 2:2.
Ia Manatua Lou Salamō ma Lou Liliu
8. E mafai faapefea ona tausia le amioatua?
8 Pe e te manatua le fiafia na e lagonaina ina ua e aʻoaʻoina le upu moni, salamō, ma oo ai ina lagonaina le faamagaloga a le Atua e faavae i le faatuatua i le taulaga togiola a Iesu? (Salamo 32:1-5; Roma 5:8; 1 Peteru 3:18) E mautinoa lava e te lē manaʻo e toe foʻi atu i se olaga agasala. (2 Peteru 2:20-22) E aofia ai i mea o loo e manaʻomia e ausia ai ou sini, o le tatalo lea e lē aunoa iā Ieova o le a fesoasoani iā te oe e tausia ai le amioatua, ma ola ai e tusa ma lou tuuina atu, ma faaauau ona auauna iā Ieova ma le faamaoni.—2 Peteru 3:11, 12.
9. Ona o lea ua fulitua i gaoioiga agasala, o le ā le ala e tatau ona tatou saʻilia?
9 Ona ua māeʻa ona liliu e ala i le fulitua i gaoioiga agasala, ia faaauau pea la ona saʻilia le fesoasoani a le Atua i le tausia o lou loto mau. O le faia faapea e pei lava o lou alu atu i le ala sesē ae o lou tilofaʻia o se faafanua maufaatuatuaina ua amata ai loa ona e faimalaga atu i le ala saʻo. Aua lava neʻi e sē ese mai le ala. Ia faalagolago pea i le taʻitaʻiga a le Atua, ma maumauaʻi e tumau i le ala o le ola.—Isaia 30:20, 21; Mataio 7:13, 14.
Aua Lava Neʻi Galo Lou Tuuina Atu ma le Papatisoga
10. O ā manatu e tatau ona teu i o tatou mafaufau e tusa ai ma lo tatou tuuina atu i le Atua?
10 Ia manatua ua uma ona e faia se tuuina atu iā Ieova i le tatalo, faatasi ai ma le faamoemoe i se auaunaga faamaoni e faavavau. (Iuta 20, 21) O le tuuina atu ua faailogaina ai se tuuesea, po o le vavae ese, mo se fuafuaga paia. (Levitiko 15:31; 22:2) O lou tuuina atu sa lē o se ioega sa faia mo na o sina taimi po o se feagaiga ma tagata. O se tuuina atu e tumau i Lē Pule Silisili Ese Aoao, ma o le ola ai e tusa ma le tuuina atu e manaʻomia ai le faamaoni i le Atua i le olaga atoa. Ioe, “pe ola pe oti i tatou, o tagata lava o le Alii i tatou.” (Roma 14:7, 8) O lo tatou fiafiaga e faalagolago i lo tatou usiusitai atu i lona finagalo ma lo tatou faaauau ona auauna atu iā te ia ma se loto mau.
11. Aiseā e tatau ai ona e manatuaina lou papatisoga ma lona uiga?
11 Ia manatua pea lou papatisoga lea e faailogaina ai lou tuuina atu ma le loto atoa i le Atua. E lē o se papatisoga na faia faamalosi, o oe lava sa faia lau filifiliga. Po ua e filifili maumaututū la e fai le mea e te manaʻo i ai ina ia ōgatusa ma le finagalo o le Atua i lou olaga atoa? Sa e faia se talosaga i le Atua mo se lotofuatiaifo lelei ma papatisoina e faailoga ai lou tuuina atu iā te ia. Ia tausia pea lenā lotofuatiaifo lelei e ala i le faatinoina o lou tuuina atu, ona e mauaina ai lea o le matalasi o faamanuiaga a Ieova.—Faataoto 10:22.
E Iai se Vaegafai a Lou Loto
12, 13. E faapefea ona fesootaʻi atu le faia o le mea e manaʻo i ai o tatou loto i le tuuina atu ma le papatisoga?
12 Ioe, o le tuuina atu ma le papatisoga ua aumaia ai faamanuiaga matagofie i le faitau miliona o tagata i le lalolagi atoa. Pe a tatou faailogaina lo tatou tuuina atu i le Atua e ala i le papatisoga i le vai, ua tatou oti e tusa ai ma o tatou ala tuai o le olaga ae tatou te lē o lafoaʻia ai mea e manaʻo i ai o tatou loto. I le avea ai ma tagata talitonu ua uma ona aʻoaʻoina lelei, ua tatou faia moni ai lava le mea e manaʻo i ai o tatou loto ina ua tatou faia se tuuina atu i le Atua i le tatalo ma papatisoina. O le tuuina atu o o tatou ola i le Atua ma papatisoina e manaʻomia ai ona tatou faamautinoa po o le ā le finagalo o le Atua, ona tatou filifili lea ma le loto i ai e fai. (Efeso 5:17) O lea ua tatou faataʻitaʻi ai iā Iesu, o lē na faatinoina lona finagalo ina ua tuu e ia lana galuega o se kamuta, ae papatisoina ma tuutoina atu atoatoa o ia i le faia o le finagalo o lona Tamā i le lagi.—Salamo 40:7, 8; Ioane 6:38-40.
13 Sa fuafuaina e Ieova le Atua lona Alo ina ia “faaatoatoaina [“e ala,” NW] i tiga.” O lea sa tatau ai iā Iesu ona faatinoina lona finagalo ina ia tumau ai ma le faamaoni i na puapuaga. Ina ia faataunuuina lenā fuafuaga, na ia ‘tatalo ma aioi atu ma le tagi tele ma loimata, na faafofogaina foi o ia ona o lona migao.’ (Eperu 2:10, 18; 5:7, 8, LF) Afai e tatou te faaalia lea lava mataʻu ma le migao i le Atua, e tatou te mautinoa foʻi e “faafofogaina,” i tatou ma e lē masalomia o le a aumaia e Ieova se loto mau iā i tatou i le avea ai o ana Molimau tuuina atu.—Isaia 43:10.
E Mafai Ona E Tausia se Loto Mau
14. Aiseā e tatau ai ona tatou faitauina le Tusi Paia i aso taʻitasi?
14 O le ā o le a fesoasoani iā te oe e tausia ai se loto mau ma ola ai e tusa ma lou tuuina atu i le Atua? Ina ia faateleina le poto e tusa ai ma le Afioga a le Atua, ia faitau le Tusi Paia i aso taʻitasi. O le mea lenei o loo timaʻi ai i tatou e “le auauna faamaoni ma le mafaufau” ia faia pea lava pea. Ua aumaia na fautuaga ona o le ola e tusa ai ma lo tatou tuuina atu, e manaʻomia ai lo tatou savavali pea i upu moni a le Atua. Pe ana faapea e lagolagoina ma le loto i ai e le faalapotopotoga a Ieova aʻoaʻoga sesē, semanū e lē avatuina la se fautuaga i Molimau a Ieova ma i latou o loo latou talaʻi atu i ai e faitau le Tusi Paia.
15. (a) O le ā e ao ona mafaufauina pe a faia ni filifiliga? (e) Aiseā e mafai ai ona faapea atu o se galuega totogi, o se galuega lea e lona lua lona tāua i se Kerisiano?
15 Pe a faia ni filifiliga, ia mafaufau pea i le auala o le a aafia ai le faatinoina o lou tuuina atu iā Ieova. Atonu e fesootaʻi atu i lau galuega totogi o loo fai. Pe e te taumafai ea e avea lau galuega ma mea e fesoasoani ai iā te oe e faaauilumaina ai le tapuaʻiga moni? E ui ina iloa e pule o galuega faapea o Kerisiano tuuina atu e faamoemoeina tele ma faimea māeʻa, ae e latou te mātauina foʻi faapea o Molimau a Ieova e lē o pulea i faanaunauga mo le saʻilia o manuia i le lalolagi ma e lē tauvā ma isi mo le mauaina o tulaga e totogi tetele. O le māfuaaga ona o le sini o Molimau a Ieova e lē o le mauaina o le tamaoaiga, le taʻutaʻua, le mamalu, po o le pule. O le mea e sili ona tāua iā i latou o loo ola e ōgatusa ma lo latou tuuina atu i le Atua, o le faia lea o le finagalo o le Atua. O galuega totogi o loo mafai ai ona latou mauaina mea e manaʻomia i le olaga o se galuega e maulalo ifo teisi, ma o se galuega e lona lua lona tāua. I le pei o le aposetolo o Paulo, o la latou galuega faifai pea, po o le galuega autū, o le faiva lea faa-Kerisiano. (Galuega 18:3, 4; 2 Tesalonia 3:7, 8; 1 Timoteo 5:8) Po o e faamuamuaina ea manaʻoga o le Malo i lou olaga?—Mataio 6:25-33.
16. O le ā e mafai ona tatou faia pe a avea le soona popole ma mea ua faigatā ai ona tatou ola e tusa ma lo tatou tuuina atu i le Atua?
16 O nisi atonu na toetoe lava a lofitūina i le tele o popolega eseese a o leʻi aʻoaʻoina le upu moni. Ae maʻeu le faatumuina o o latou loto i le olioli, le lotofaafetai, ma le alofa mo le Atua ina ua latou mauaina le faamoemoe o le Malo! O le manatunatu i faamanuiaga ua latou olioli ai talu mai lenā taimi o le a mafai ai ona fesoasoani iā i latou e ola e ōgatusa ma lo latou tuuina atu iā Ieova. I le isi itu, e faapefea pe afai e fetineiaʻiina ‘le afioga a le Atua,’ ona o le soona popole i faafitauli o loo taatele i le olaga i lenei faiga o mea, e pei lava ona taofia e vao tuitui fatu mai le matua o o latou fua? (Luka 8:7, 11, 14; Mataio 13:22; Mareko 4:18, 19) Afai ua e lagonaina ua amata ona tupu lenei mea iā te oe po o lou aiga, ia tuu atu iā Ieova mea e te popole vale ai ma tatalo ina ia fesoasoani iā te oe ia tupu aʻe i le alofa ma le lotofaafetai. Afai e te tuu atu iā te ia mea e te popole vale ai, o le a ia tausia oe ma avatu iā te oe le malosi e faaauau ai ona auauna iā te ia ma le fiafia ma se loto mau.—Salamo 55:22; Filipi 4:6, 7; Faaaliga 2:4.
17. E mafai faapefea ona faafetaiaʻia tofotofoga faigatā?
17 Ia faaauau ona tatalo iā Ieova le Atua e lē aunoa, e pei lava ona e tatalo a o faia lou tuuina atu iā te ia. (Salamo 65:2) Pe a tofotofoina e faia se mea sesē po o le fesagaʻi ma tofotofoga mataʻutia, ia saʻili atu mo le taʻitaʻiga a le Atua faatasi ma lana fesoasoani ina ia mulimuli ai. Ia teu i le mafaufau le manaʻomia o le faatuatua, ona na tusi le soo o Iakopo e faapea: “A e afai ua leai se poto ‘e faafetaiaʻia ai se tofotofoga’ i so outou, ina ole atu ia i le Atua, o le foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu ma le faatuatua, aua lava neʻi masalosalo; auā o lē masalosalo e tusa ia ma le peau o le sami ua sousou i le matagi ma felafolafoaiina. Aua lava neʻi manatu lea tagata na te maua se mea e tasi mai le Alii; o le tagata faalotolotolua e faaletumau ia i ona ala uma.” (Iakopo 1:5-8) Afai ua foliga mai ua lofitūina e tofotofoga, e mafai ona tatou mautinoa le mea lenei: “Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lava oono.”—1 Korinito 10:13, LT.
18. O le ā e mafai ona tatou faia pe afai ua faavaivaia e se agasala matuiā e lē o iloa e isi, la tatou filifiliga e ola e tusa ai ma lo tatou tuuina atu iā Ieova?
18 E faapefea pe afai o loo faalavelavea lou lotofuatiaifo i se agasala matuiā e lē o iloa e isi, ma ua faavaivaia ai lau filifiliga e ola e tusa ai o lou tuuina atu i le Atua? Afai ua e salamō, e mafai ona faamāfanafanaina oe i le iloa faapea o Ieova e na te “le inosia le loto momomo ma le nutimomoia.” (Salamo 51:17) Saʻili le fesoasoani a toeaina Kerisiano alolofa, i le iloaina faapea o i latou—i le faataʻitaʻi atu iā Ieova—o le a lē manatu māmā i lou faanaunauga ina ia toe faafoʻisia se faiā lelei ma lou Tamā faalelagi. (Salamo 103:10-14; Iakopo 5:13-15) O lea, o le toe faafouina o le malosi faaleagaga ma se loto mau, o le a mafai ai ona e faalauleleia ala o ou vae, ma mafai ai ona ola e tusa ma lou tuuina atu i le Atua.—Eperu 12:12, 13.
Faaauau Ona Auauna ma se Loto Mau
19, 20. Aiseā e tāua tele ai lo tatou ola e tusa ma lo tatou tuuina atu?
19 I nei aso faigatā, e tatau ona tatou taumafai malosi e ola e tusa ma lo tatou tuuina atu ma auauna i le Atua ma se loto mau. Na fetalai Iesu e faapea: “O lē tumau seia oo i le gataaga, e faaolaina lea.” (Mataio 24:13) Talu ai o loo tatou ola i “aso e gata ai,” e ono oo mai le iʻuga i so o se taimi. (2 Timoteo 3:1) E lē gata i lea, e leai ma se tasi o i tatou e mautinoa o le a tatou ola a taeao. (Iakopo 4:13, 14) O lea e tāua tele ai ona tatou faaauau ona ola e tusa ma lo tatou tuuina atu, i le asō!
20 Na faamamafa e le aposetolo o Peteru lenei tulaga i lana tusi e lua. Na ia faaalia faapea e pei lava ona faaumatia i latou o ē faalēmataʻu i le Lolo, e faapena foʻi le lalolagi faafaatusa, po o le sosaiete o tagata amioleaga, o le a faaumatia i le “aso o le Alii.” O lea na alaga ai Peteru e faapea: “Pe faapefea la outou amio e tatau ai i le amio lelei ma le amio Atua”! Na ia timaʻi foʻi iā i latou e faapea: “Le au pele e, ia outou faaeteete ia te outou, auā ua muai iloa e outou, neʻi taʻitaʻieseina outou, ‘e aʻoaʻo sesē ma tagata faalēmataʻu’ tou te pauu ai i le mea sa outou tumau ai.” (2 Peteru 3:5-17, NW) Pagā le faanoanoa o le a iai pe a taʻitaʻieseina se tagata ua papatiso ma oo atu ina iʻu lona ola a o avea ma sē e lē o taulau ona tausia se loto mau!
21, 22. Ua faapefea ona moni upu o le Salamo 57:7 i le tulaga o Tavita faapea ma Kerisiano moni?
21 O lau filifiliga maumaututū e ola e tusa ai ma lou tuuina atu i le Atua e mafai ona faamalosia pe a teu i lou mafaufau le aso fiafia o lou papatisoga, ma saʻilia le fesoasoani a le Atua ina ia faafiafiaina lona finagalo i au upu ma gaoioiga. (Faataoto 27:11) E faamaoni pea Ieova i ona tagata, ma e mautinoa lava e tatau ona tatou faamaoni atu iā te ia. (Salamo 94:14) Na ia faaalia le alofa ma lagona ootia e ala i le lē faataulauina o fuafuaga a le fili ae laveaʻiina Tavita. O le faaalia o le lotofaafetai mo lenei mea, na folafola ai e Tavita le tumau, ma le lē maluelue o lona alofa mo Lē na Laveaʻiina o ia. Na ia pese ma faalogona loloto e faapea: “Le Atua e, ua mau loʻu loto, ua mau lava loʻu loto; ou te pese lava, ma ou fai pesega.”—Salamo 57:7.
22 I le pei o Tavita, e lē maluelue lava Kerisiano moni mai lo latou tuutoina i le Atua. E faatasi ai ma se loto mau, ua latou iloa o lo latou laveaʻiina ma le faasaoina e mai iā Ieova, o lē o loo latou pese atu i ai viiga. Afai o loo mau lou loto, o le a faalagolago atu la i le Atua, ma o le a mafai ona faataunuuina lou tuuina atu ona o lana fesoasoani. Ioe, e mafai ona e pei o “le tagata amiotonu” lea na pese ai le faisalamo e faapea: “E le mataʻu o ia i le tala leaga; ua mau lona loto, o loo faalagolago ia Ieova.” (Salamo 112:6, 7) O le faatuatua i le Atua ma faalagolago atoatoa atu iā te ia, e mafai ai ona e ola e tusa ma lou tuuina atu ma faaauau ona auauna iā Ieova ma se loto mau.
Pe E te Manatua?
• Aiseā e tatau ai ona tatou faaauau pea ona ave i fale le poto saʻo o le Tusi Paia?
• Aiseā e tatau ai ona tatou manatua lo tatou salamō ma lo tatou liliu?
• E faapefea ona aogā iā i tatou le manatuaina o lo tatou tuuina atu ma le papatisoga?
• O le ā o le a fesoasoani iā i tatou e faaauau ai pea ona auauna iā Ieova ma se loto mau?
[Fesili mo le Suʻesuʻega]
[Ata i le itulau 18]
Po o tausia ea lou malosi faaleagaga e ala i le faitauina o le Afioga a le Atua i aso taʻitasi?
[Ata i le itulau 18]
O le faia o le faiva faa-Kerisiano ma a tatou galuega autū, e fesoasoani iā i tatou e auauna ai pea iā Ieova ma se loto mau