Lipoti a Ē Faalauiloa le Malo

“Na Ou Manaʻo e Auauna i le Atua”

“LOU nuu e, ia outou o ese ia te ia.” O le valaau lenā a se agelu na faalogo i ai le aposetolo o Ioane i le uluaʻi senituri T.A. I o tatou aso, e faitau miliona ē loto faamaoni ua tali mai ma sosola ese ai mai iā “Papelonia le aai tele,” le emepaea o lotu sesē a le lalolagi. (Faaaliga 18:1-4) O se tasi o i latou na o Wilner mai Haiti, lea o loo faamatalaina mai le mea lenei na tupu iā te ia.

“Na ou fanau i le 1956 i se aiga lotu Katoliko aʻiaʻi i le taulaga laʻitiiti o St. Marc, i Haiti. Seʻi manatu la i le olioli o lo matou aiga ina ua filifilia aʻu faatasi ai ma le isi toʻalua mai lo matou taulaga, ina ia auai atu i se seminario i St. Michel de l’Atalaye, i Haiti lava. Ae i le 1980, na auina atu ai i matou i Stavelot, i Peleseuma, mo nisi aʻoaʻoga faaopoopo. O i inā na matou toe auai atu ai foʻi i se iunivesite a le Katoliko.

“I le taimi muamua, sa faagaeetia aʻu i le auai atu i le aʻoga faapatele. Ae i se tasi aso i le potuʻai, na fai mai ai le patele e vaaia la matou vaega, ina ia ou faatali atu mo ni nai minute, ona o loo iai se mea o loo fia talanoa mai ai. Seʻi mafaufau i lou teʻi ina ua ia sasaa mai ma le lē mataofiofia ona faanaunauga faaleituaiga iā te aʻu! Na ou teena lana faatauanau ae ua ou lagona lava le matuā lē fiafia. Na ou tusi atu i loʻu aiga e tusa ai ma le mea na tupu ma ou tuua ai loa le aʻoga i ni nai masina mulimuli ane ai, e ui lava ina latou lē fiafia. Na maua se mea ou te nofo ai i lea lava nuu ma amata ai loa ona ou suʻesuʻe mo se isi galuega.

Ina ua ou toe foʻi atu i St. Marc, ua ou lē toe fiafia ai lava i le Lotu Katoliko. E ui i lea, na ou manaʻo lava e auauna i le Atua, ae sa ou lē iloaina le mea a fai. Na ou auai atu ai i le lotu Aso Fitu, le lotu Ebenezer, ma le lotu Mamona. Sa matuā fetosoaʻiina lava aʻu faaleagaga.

“Na ou manatua ai le taimi lea a o oʻu auai i le seminario i Peleseuma, na masani ai ona ou faitauina le Tusi Paia a Crampon. I inā na ou iloa ai e iai le suafa o le Atua. I le faaaogāina la o lona suafa, na ou tatalo ai ma le faatauanau i le Atua e fesoasoani mai iā te aʻu ina ia maua le lotu moni.

“E leʻi umi lava ae siitia atu loa ni Molimau a Ieova se toʻalua i lo matou vaipanoa. E filemu, faaaloalo i isi, ma mamalu i laʻua i a la gaoioiga. Na ou maofa i le auala na ola ai i laʻua. I le isi aso na valaaulia ai aʻu e se tasi o Molimau a Ieova e auai i le Faamanatuga faaletausaga o le maliu o Keriso. Na ou matuā fiafia lava i le sauniga ma ou manaʻo ai e faia sau suʻesuʻega faale-Tusi Paia e lē aunoa ma Molimau a Ieova. I le pe ā ma le ono masina, na ou mautinoa ai ua ou maua le auala e auauna ai i le Atua. Na tuuina atu lou ola iā Ieova ma papatisoina ai iā Novema 20, 1988.”

Mulimuli ane, na auai atu Wilner i le auaunaga faataimi atoa. I aso nei, o loo auauna ai o ia o se toeaina i le faapotopotoga. O loo auauna fiafia o ia ma lana avā faatasi ma le la fanau e toʻalua i le faapotopotoga.

[Ata i le itulau 9]

E ala i le faitauina o le Tusi Paia, na iloaina ai e Wilner o le suafa o le Atua o Ieova