Pe e Tatau Ona Faavae Aʻe le Faatuatua i Faamatalaga Moni?

“Ua tusi mai le taiulu o se seminario faafaifeʻau i le Iunaite Setete e faapea: “E toʻatele tagata lotu ua māfua ona fiafia i lotu ona o le manaʻo e ʻalofia le tau mafaufau i ai.”Ua ia faaopoopo mai e faapea: “Ua na ona latou mananaʻo e taliaina mea uma ona ‘o le faatuatua.’”

O LE faauigaga o lea manatu e faapea o le toʻatele o tagata o loo maumauaʻi i talitonuga faalelotu e lē o mafaufau loloto i le māfuaaga e latou te talitonu ai i mea o latou faia pe faamata e iai se faavae talafeagai faale-Tusi Paia mo lo latou faatuatuaga. E lētioa ona faatalatū tagata e talanoa e faatatau i lotu.

O le tulaga e faanoanoa ai, o na faiga e pei o le faaaogāina o faatusa faalelotu ma le taulotoina o tatalo, e lē avea o se fesoasoani ina ia maua ai le malamalamaga saʻo. O nei faiga, faatasi ai ma le matagofie o fausaga o malumalu ma o latou faamalama tioata felanulanuaʻi, ma musika e faagaee ai, ua avea na ma mea o loo faavae aʻe ai le faatuatua o tagata lotu. E ui ina faapea mai nisi lotu o loo faavae o latou talitonuga i le Tusi Paia, ae o la latou feʻau o le ‘talitonu iā Iesu ma faasaoina ai oe’ e lē o faamamafaina ai le suʻesuʻeina o le Tusi Paia ma le faamaoni. Ua liliu atu isi i le talaʻia o se tala lelei o le faaaogāina o mataupu silisili e foʻia ai faafitauli masani po o Evagelia o Faiga Faapolotiki. O le ā le iʻuga o nei mea uma?

E tusa ai ma le tulaga na iai Amerika i Mātū, na faapea mai ai se tasi tusitala i mataupu faalelotu: “Ua tele ina leai se uigā . . . i le faa-Kerisiano [ma] o i latou o loo mulimuli i ai e lē o lava le aʻoaʻoina e tusa ai o le talitonuga.” Na oo ina faamatalaina e se tasi e suʻesuʻeina manatu faaalia o tagata e faapea o Amerika “o se atunuu e lē tele so latou malamalama i le Tusi Paia.” I se tulaga tutusa, ua iloa foʻi le moni o nei iloiloga i isi foʻi atunuu o loo olaola ai le Faa-Kerisiano. Ua faapena ona faalētāua ai e le tele o lotu e lē faa-Kerisiano se mafaufau lelei ae ua na ona faamamafa o pese, tatalo ua masani ona tauloto i sauniga faalelotu, ma auala eseese e mafaufau loloto ai i mea faalelotu, na i lo le mafaufau lelei lea e atiina aʻe ai.

Peitaʻi, i aso faisoo o le olaga, e masani lava i tagata e lē o matuā mafaufau loloto i le saʻo ma le moni o o latou talitonuga faalelotu ona matuā mafaufau totoʻa i isi mea. Pe e te lē ono manatu i le ese o se tasi na te faia ni saʻiliʻiliga se tele mo le na o le faatauina o se taavale—lea e iai se aso e iʻu ina lē aogā ai—ae e tusa ai ma lana lotu o le a faapea mai: ‘Pe afai sa lelei i oʻu mātua, e lelei foʻi la mo aʻu’?

Pe afai tatou te naunau moni lava e faafiafia le Atua, pe e lē tatau ai ea la ona tatou iloiloina ma le faamaoni le saʻo o mea o loo tatou talitonu i ai e faatatau iā te ia? Na tautala le aposetolo o Paulo e faatatau i ni tagata lotu o ona aso na “maelega i la le Atua, a e le tusa ma le malamalama.” (Roma 10:2, LF) E mafai ona faatusa i latou na i se tagata vali fale na galue mamafa e  vali se fale ae sesē vali na ia faaaogāina ona sa lē taulau ona ia faalogo i taʻiala a lē e ona le fale. Atonu na fiafia le vali fale i lana galuega, ae pe o le a taliaina ea e lē e ona le fale?

O le ā e taliaina e le Atua e tusa ai o le tapuaʻiga moni? Ua tali mai le Tusi Paia: “Auā o le mea lelei lea ma le mālie i luma o le Atua lo tatou Faaola, o lē finagalo ina ia faaolaina o tagata uma lava, ma ia oo ina iloa lelei le upu moni.” (1 Timoteo 2:3, 4) Atonu e manatu nisi e lē mafai ona mauaina lenā poto i lotu i aso nei. Ae seʻi mafaufau foʻi, afai o le finagalo o le Atua ina ia maua e tagata le poto saʻo o le upu moni, pe e talafeagai ea la ona ia natia iā i latou? E lē tusa ai lenā ma le Tusi Paia, lea ua faapea mai: “Afai e te saili atu ia te ia, ona e maua ai lea o ia.”—1 Nofoaiga a Tupu 28:9.

Ua faapefea ona faailoa mai e le Atua ia lava iā i latou o loo saʻili ma le faamaoni iā te ia? O le isi mataupu o loo sosoo mai o le a maua ai le tali.