Saʻili i le Atua ma Lou Loto ma le Mafaufau

Ua faalaeiauina e le Faa-Kerisiano moni le faaaogāina uma o le loto ma le mafaufau e faatupu aʻe ai le faatuatua lea e fiafia i ai le Atua.

O LE mea moni, na aʻoaʻoina e lē na amataina le Faa-Kerisiano, o Iesu Keriso, e tatau ona tatou alolofa i le Atua i o tatou “manatu atoa,” po o le mafaufau, e faaopoopo atu i o tatou “loto atoa” ma “agaga atoa.” (Mataio 22:37) Ioe, e tatau ona faia e o tatou tomai faalemafaufau se vaega autū i la tatou tapuaʻiga.

Ina ua ia valaaulia lana ʻaufaalogologo e tomanatu i ana aʻoaʻoga, na masani ona faapea atu Iesu, “Pe ni a fa outou?” (Mataio 17:25; 18:12; 21:28; 22:42) I se uiga faapena, na tusi atu ai le aposetolo o Peteru i uso talitonu ina ia “fafagu i o latou tomai faalemafaufau lelei.” (2 Peteru 3:1, NW) O le aposetolo o Paulo, o se uluaʻi misionare na aupito sili ona tele mea na malaga i ai, na ia apoapoaʻia Kerisiano ina ia faaaogā o latou “tomai faalemafaufau” (NW) ma “ia [latou] suesue pe se a le finagalo o le Atua, o mea ua lelei, ma le malie, ma le atoatoa.” (Roma 12:1, 2) E na o se iloiloga māeʻaeʻa ma le faaeteete o o latou talitonuga, e mafai ai e Kerisiano ona faatupuina aʻe le faatuatua e fiafia i ai le Atua ma mafai ai e i latou ona faafetaiaʻia tofotofoga o le olaga.—Eperu 11:1, 6.

Ina ia fesoasoani i isi e atiina aʻe lenā faatuatua, na ‘felafolafoaʻi ai uluaʻi faievagelia Kerisiano ma i latou i Tusi, ua faamatala ma faasino atu’ mea na latou aʻoaʻoina atu. (Galuega 17:1-3, LF) O lenā iloiloga talafeagai na iʻu ai i se tali lelei mai iā i latou o ē loto faamaoni. Mo se faaaʻoaʻoga, o le toʻatele o tagata i le aai o Maketonia i Perea na “latou talia le upu ma le fiafia tele, ua saili i Tusi i lea aso ma lea aso, pe moni ia mea [na faamatalaina e Paulo  ma ana ʻaumea].” (Galuega 17:11) E lua ni mea e aogā ona mātauina i inei. Muamua, sa naunau tagata Perea e faalogo i le Afioga a le Atua; lona lua, na latou leʻi faalogo ma ioe loa faapea e saʻo mea na latou faalogo i ai, ae na latou toe suʻe i mea o loo i le Tusi Paia pe moni. Na taʻuleleia ma le lotomaulalo e le misionare Kerisiano o Luka tagata Perea ona o lenei tulaga, ma taʻua i latou o ē e “fefulifulisaʻi faalemafaufau.” (NW) Pe e te faaalia le fefulifulisaʻi faalemafaufau pe a iloiloina mataupu faaleagaga?

E Galulue Faatasi le Loto ma le Mafaufau

E pei ona taʻua muamua, o le tapuaʻiga moni e aofia ai le mafaufau ma le loto. (Mareko 12:30) Ia toe tomanatu i le faataitaiga i le mataupu o loo muamua atu e uiga i se tagata vali fale na faaaogāina ni vali sesē e valiina ai se fale. Pe ana faapea e faalogo lelei o ia i faatonuga a lona pule, e ono mafai ona tuu atoa lona loto i lana galuega ma ia mautinoa ai le fiafia o lē e ona le fale i lana galuega. O le tulaga lava lea e tasi e faatatau i la tatou tapuaʻiga.

Na faapea mai Iesu: “O e tapuai faamaoni e tapuai i le Tamā i le agaga ma le faamaoni.” (Ioane 4:23) O lea na tusi atu ai le aposetolo o Paulo: “O le mea lea o i maua foi ma te lei mapu ai lava i le tatalo mo outou, . . . ma te aioi atu foi ina ia atoatoa ona outou iloa lelei o lona finagalo i le poto uma atoa ma le mafaufau faaleagaga; ia outou savavali e tusa ma le Alii, ina ia fiafia mai o ia.” (Kolose 1:9, 10) O lenā “iloa lelei” e mafai ai e tagata faamaoni taʻitoʻatasi ona tuu atu o latou loto ma agaga i la latou tapuaʻiga faatasi ai ma le mautinoa atoatoa ona o loo latou “tapuai ma le iloa.”—Ioane 4:22.

Ona o nei māfuaaga, e lē papatisoina ai e Molimau a Ieova pepe po o tagata faatoʻā faaalia le fiafia o ē e leʻi suʻesuʻeina totoʻa le Tusi Paia. Na poloaʻiina e Iesu ona soo: “Ia outou o atu e fai nuu uma lava ma soo . . . aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) Seʻi vaganā ua mauaina le poto saʻo o le finagalo o le Atua ona faatoʻā mafai ai lea e tagata suʻesuʻe o le Tusi Paia faamaoni ona faia se filifiliga atamai e faatatau i le mataupu tau tapuaʻiga. Pe o e taumafai e mauaina lenā poto saʻo?

Malamalama i le Tatalo a le Alii

Ina ia iloa le eseesega o le mauaina o se poto saʻo o le Tusi Paia ma le iai o sina iloa itiiti i mea o loo taʻua ai, seʻi o tatou iloiloina le tatalo ua masani ai o, Lo Matou Tamā, po o le Tatalo a le Alii, o loo faamauina i le Mataio 6:9-13.

Ua taulotoina soo e le faitau miliona o tagata le tatalo faaaʻoaʻo a Iesu i le lotu. Ae e toʻafia ua latou aʻoaʻoina lona uiga, aemaise lava le vaega muamua o le tatalo e faatatau i le suafa o le Atua ma le Malo? O nei mataupu e matuā tāua lava ma o le mea lea o loo faamuamua ai e Iesu i le tatalo.

Ua amataina faapea: “Lo matou Tamā e, o i le lagi, Ia paia lou suafa.” Ia mātau na faapea mai Iesu e tatalo ina ia faapaiaina le suafa o le Atua. I le toʻatele o tagata, ua lāgā ai ni fesili se lua: Muamua, O ai le suafa o le Atua? O lona lua, aiseā e manaʻomia ai ona faapaiaina?

Ua mafai ona maua le tali o le fesili muamua i le silia ma le 7,000 taimi i le Tusi Paia i ona uluaʻi gagana na tusia ai. O se tasi o ia tali o loo i le Salamo 83:18: “Ina ia iloa e i latou, o oe, e ou le suafa o Ieova, na o oe lava o le Silisili ese i le lalolagi uma.” E tusa ai o le suafa tauatua, o Ieova, ua faapea mai le Esoto 3:15: “O loʻu igoa lena e faavavau, o laʻu faamanatuga lena i lea tupulaga ma lea tupulaga.” * Ae aiseā e manaʻomia ai ona faapaiaina le suafa o le Atua, e sili atu ona mamā ma paia? Auā ua faalumaina ma faaleagaina talu mai lava le amataga o le talafaasolopito o le tagata.

 I Etena, na taʻu atu ai e le Atua iā Atamu ma Eva o le a la feoti pe afai la te aai i le laau faasāina. (Kenese 2:17) Na tetee atu ma le lē fefe Satani i le Atua, i lona faapea atu iā Eva: “Lua te le oti lava.” O lea la na tuuaʻia ai e Satani le Atua e faapea e pepelo. Peitaʻi, sa leʻi mālōlō ai o ia i inā. Na ia toe atili faalumaina le suafa o le Atua, i le taʻuina atu iā Eva e faapea e lē tonu le Atua i lona taofia o le poto e tāua mai iā te ia. “Auā ua silafia e le Atua, o le aso lua te aai ai [mai le laau e iloa ai le lelei ma le leaga], e pupula ai o oulua mata; ona avea ai lea o oulua e pei ni atua o loo iloa le lelei ma le leaga.” Pagā se taufaaleaga!—Kenese 3:4, 5.

E ala i le ʻaina o le laau faasāina, na ʻau atu ai Atamu ma Eva iā Satani. O le toʻatele o tagata talu mai lenā taimi, ua toe faaopoopoina atu i lenā faalumaina mai le amataga e ala i le teena ma le iloa po o le lē iloa foʻi o tapulaa amiotonu a le Atua. (1 Ioane 5:19) O loo faaleagaina pea e tagata le Atua e ala i le tuuaʻia o ia ona o o latou puapuaga—e ui lava atonu e māfua ona o o latou lava ala leaga. Ua faapea mai le Faataoto 19:3: “O le valea o le tagata e faapiopio ai lona ala; ua ita foi lona loto ia [Ieova].” Pe ua e mātauina la le māfuaaga na tatalo ai Iesu, o lē na alofa ma le faamaoni i lona Tamā, ina ia faapaiaina lona suafa?

“Ia Oo Mai Lou Malo”

Ina ua uma ona ia tatalo e faapaia le suafa o le Atua, na faapea mai ai Iesu: “Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:10) E tusa ai o lenā fuaitau, tatou te ono fesili ai: ‘O le ā le Malo o le Atua? Ae o le ā le vaega e faia e le oo mai o le malo i le faataunuuina o le finagalo o le Atua i le lalolagi?’

I le Tusi Paia, o le upu “malo” o lona uiga o “se pulega a se tupu.” O lea la i se tulaga talafeagai ai, e faasino atu le Malo o le Atua i se pulega, po o se malo e pulea e le Atua faatasi ai ma se tupu ua ia filifilia. O lenei Tupu e lē o se isi e ese mai iā Iesu Keriso lea na toe faatūina— le “Tupu o tupu, ma le Alii o alii.” (Faaaliga 19:16; Tanielu 7:13, 14) E tusa ai o le Malo Faa-Mesia o le Atua i aao o Iesu Keriso, na tusi atu ai le perofeta o Tanielu: “O ona po o ia tupu [malo faaletagata o loo pule nei] e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau,” o lona uiga e faavavau.—Tanielu 2:44.

Ioe, o le a pulea atoatoa e le Malo o le Atua le lalolagi, o le a aveesea ai ē amio leaga uma ma pule “e faavavau.” I lenei auala, ua avea ai le Malo o le Atua ma auala e faapaiaina ai e Ieova lona suafa, faamamāina ese ai pepelo uma ia o loo faalumaina ai a Satani ma tagata amioleaga.—Esekielu 36:23.

I le pei o malo uma, e iai foʻi tagatānuu o le Malo o le Atua. O ai i latou nei? Ua tali mai le Tusi Paia: “A o e agamalu, e fai mo latou le nuu; e faafiafia foi i latou ia te i latou ona o le manuia e tele.” (Salamo 37:11) I se tulaga talitutusa, na faapea mai ai Iesu: “Amuia ē agamalu; auā e fai mo latou tofi le nuu.” O le mea moni, o nei tagata ua latou maua le poto saʻo o le Atua, lea e manaʻomia mo le ola.—Mataio 5:5; Ioane 17:3.

Pe e mafai ona faaata i lou mafaufau le faatumulia o le lalolagi i tagata agamalu, lotomaulalo e alolofa moni i le Atua ma isi? (1 Ioane 4:7, 8) O le mea lenā na tatalo i ai Iesu ina ua ia faapea mai: “Ia oo mai lou malo, Ia faia lou finagalo, I le lalolagi e pei ona faia i le lagi.” Pe e te talisapaia le māfuaaga na aʻoaʻoina ai e Iesu ona soo ina ia tatalo faapena? O le mea e sili ona tāua, pe o e mātauina le auala o taaʻina totino ai lou olaga i le faataunuuga o lenā tatalo?

E Faitau Miliona ua Iloiloina le Tusi Paia

Na valoia mai e Iesu se taumafaiga malosi tau aʻoaʻoga faaleagaga e faataunuuina i le lalolagi aoao, lea o le a faasilasilaina ai le oo mai o le Malo o le Atua. Na ia faapea mai: “E talaʻiina atu foi lenei tala lelei o le malo i le atu laulau  uma, e fai ma molimau i nuu uma; ona oo mai ai lea o le gataaga [o lenei lalolagi o loo iai, po o le faiga o mea].”—Mataio 24:14.

I le lalolagi atoa, pe tusa ma le ono miliona o Molimau a Ieova o loo faia ai se sao i le folafolaina o le tala lelei i o latou tuaoi. Ua latou valaauliaina oe ina ia e aʻoaʻoina atili e faatatau i le Atua ma lona Malo e ala i le ‘sailiili totoʻa i Tusi,’ e faaaogā ai ou tomai faalemafaufau. O le faia faapea o le a faamalosia ai lou faatuatua ma olioli ai i le faamoemoe o le ola i le lalolagi parataiso, lea o le a “tumu [ai] le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:6-9.

[Faamatalaga pito i lalo]

 [Pusa/Ata i le itulau 8]

FAAAʻOAʻO I LE FAIAʻOGA SILI

Na masani ona aʻoaʻo atu Iesu e ala i le faauaʻi atu i ni mataupu patino o le Tusi Paia. Mo se faaaʻoaʻoga, ina ua mavae lona toetū mai, na ia faamatalaina ai lana matafaioi i le fuafuaga a le Atua i ona soo e toʻalua, o ē sa faafaigatā ona malamalama i lona maliu. Ua faapea mai le Luka 24:27: “Ona faamatala ai lea e ia ia te i laua o mea ua tusia ia te ia i Tusi uma, ua amata mai ia Mose atoa ma le au perofeta uma.”

Mātau na filifilia e Iesu se mataupu patino—‘o ia lava,’ le Mesia—ma sa ia sii maia mau i “Tusi uma” i lana talanoaga. E tusa na tuufaatasia ai e Iesu ni mau fetaui o le Tusi Paia e pei o ni vaega taʻitasi o se paso, e mafai ai e ona soo ona iloa manino le uiga o le upu moni faaleagaga. (2 Timoteo 1:13) O le iʻuga, e lē gata sa latou malamalama ae na matuā uunaʻia ai i latou. Ua faapea mai le tala: “Ona la fetautalatalaʻi lea, ‘E lei mu ea o ta loto i totonu ia i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua?’”—Luka 24:32.

Ua taumafai Molimau a Ieova e faataʻitaʻi i metotia a Iesu i la latou faiva. O ā latou fesoasoani autū mo suʻesuʻega o le polosiua lea, O le ā e Manaomia e le Atua Mai ia i Tatou? ma le tusi o Le Poto e Taʻitaʻia ai i le Ola e Faavavau. Ua talanoaina ai i inei le tele o mataupu mananaia faale-Tusi Paia e pei o le: “O ai le Atua?,” “Aiseā ua Faatagaina ai e le Atua Puapuaga?,” “E Mafai Faapefea Ona e Mauaina le Lotu Moni?,” “O Aso Nei o Aso e Gata Ai!,” ma le “Atiina Aʻe o se Aiga e Viia ai le Atua.” I lesona taʻitasi o loo iai le tele o mau.

E mafai ona e faafesootaʻia Molimau a Ieova i lou vaipanoa, po o le tusi atu i le tuatusi i le itulau e 2 o lenei mekasini mo se suʻesuʻega faale-Tusi Paia i le aiga e uiga i nei mataupu po o isi e aunoa ma se totogi.

[Ata]

Ia pāʻia le loto o lau tagata suʻesuʻe e ala i le faauaʻi atu i ni mataupu patino o le Tusi Paia

[Ata i le itulau 7]

Pe ua e maua le uiga o le tatalo faaaʻoaʻo a Iesu?

“Lo matou Tama e, o i le lagi, ia paia lou suafa. . .”

“Ia oo mai lou malo [faa-Mesia] . . . ”

“Ia faia lou finagalo, I le lalolagi e pei ona faia i le lagi”