Fesili Mai le ʻAufaitau

Pe saʻo ona faalatalata atu i le Atua i le tatalo e aunoa ma se faaupuga faapea “i le suafa o Iesu”?

Ua faasino mai e le Tusi Paia o Kerisiano e mananaʻo e faalatalata atu iā Ieova i le tatalo, e tatau ona faia faapea i le suafa o Iesu. Na tulei atu Iesu i ona soo e faapea: “E le alu atu lava se tasi i le Tamā, pe a le ui mai ia te au.” Sa ia toe faaopoopo mai: “O mea uma foʻi tou te ole atu ai i loʻu igoa ou te faia lava; ina ia viia le Tamā ona o le Atalii. Afai tou te ole atu i se mea i loʻu igoa, ou te faia lava.”—Ioane 14:6, 13, 14.

I le faasino atu i le tulaga tuese o Iesu, na faapea mai le Cyclopedia of Biblical, Theological, and Ecclesiastical Literature: Ua na o le Atua e taulaʻi atu i ai a tatou tatalo, e ala atu iā Iesu Keriso le Puluvaga. O le mea lea, o tatalo uma i sagato (tagata paia) po o agelu e le gata e lē aogā, ae e lē taʻuleagaina ai foʻi. O tapuaʻiga uma i so o se foafoaga ola, po o le ā lava le mamalu o lenā foafoaga, o le ifoga i tupua, ma e matuā faasāina i tulafono paia a le Atua.”

Ae ā pe afai faatoʻā uma lava ona maua e se tagata se taui lelei o se mea na tupu ona faapea atu lea, “Faafetai tele Ieova’’ e aunoa ma le toe faaopoopo atu i ai “i le suafa o Iesu”? Pe ua lē talafeagai ea lea tulaga? E leai. Seʻi faapea ua faafuaseʻi ona fesagaʻi se Kerisiano ma se faalavelave faafuaseʻi ona valaau lea: “Ieova e, fesoasoani mai iā te aʻu!” E lē faapea o le a musu ai Ieova e fesoasoani talu ai ua lē faapea atu lana auauna, “i le suafa o Iesu.”

Ae peitaʻi e ao ona manatua, e lē faapea o so o se taimi lava e te talanoa leotele atu ai i le Atua ona faapea lea o loo e tatalo. Mo se faataʻitaʻiga, ina ua uma ona faamasinoina e Ieova i le fasiotiaina o Apelu, na faapea atu ai Kaino: “Ua sili laʻu agasala, ou te le lavatia. Faauta, ua e tiaʻi aʻu i le aso nei ai le fogāeleele; o le a lilo aʻu ai ou fofoga; o le a avea aʻu ma maumausolo ma faasevasevaloaina i le lalolagi; ai se maua aʻu e fasiotia aʻu e ia.” (Kenese 4:13, 14) E ui o Ieova na faaautū i ai lana faamatalaga, ae sa faasaga atu le faapasae aʻe o ona faalogona o le faitio agaʻi i iʻuga o le agasala.

Ua taʻu mai e le Tusi Paia iā i tatou e faapea: “E tetee atu le Atua i e faamaualuga, a e foaʻi mai le alofa tunoa i e faamaulalo.” O le talanoa atu faasamasamanoa i le Silisili Ese e pei ua na o se isi lava tagata, ua mautinoa ai le leai o se faaalia o le lotomaulalo. (Iakopo 4:6; Salamo 47:2; Faaaliga 14:7) O le lē faaaloalo foʻi le iloa o le mea o loo fai mai ai le Afioga a le Atua e uiga i le vaega a Iesu, ae o lea ua tatalo lava e aunoa ma le amanaʻiaina o Iesu Keriso.—Luka 1:32, 33.

E lē o le uiga o lenei mea faapea o loo faatalitalia e Ieova se ituaiga o auala faapitoa e faaaogā pe a tatou tatalo. O le mea e sili ona tāua o le tulaga o o tatou loto. (1 Samuelu 16:7)I le uluaʻi senituri T.A., o se taʻitaʻi ʻau o fitafita Roma e suafa iā Konelio sa “tatalo i le Atua e lē aunoa.” O Konelio o se tagata o Nuu Ese e lē peritomeina ma e leʻi tuuina atu iā Ieova. E ui atonu e na te leʻi ofoina atu ana tatalo e ala i le suafa o Iesu, ae na oo aʻe ana tatalo e “fai ma faamanatuga i luma o le Atua.” Aiseā? Talu ai ona o “lē suesue i loto’’ na tagaʻi atu iā Konelio o ia o se “tagata amio Atua ma le mataʻu i le Atua.” (Galuega 10:2, 4; Faataoto 17:3, NW ) I lona mauaina o le malamalama o “Iesu o le Nasareta,” na maua ai loa e Konelio le agaga paia ma avea o se soo papatisoina o Iesu.—Galuega 10:30-48.

O le manatu tāua la, e lē o tagata e filifilia po o ā tatalo e faafofoga i ai Ieova. Afai i nisi o taimi e faailoa atu ai e se Kerisiano se mea iā Ieova ae galo ona fai le faaupuga, “i le suafa o Iesu,” e leai se māfuaaga o le a faamamafa ai pea i lou loto lenā mea. Ua silafia lelei e Ieova mea e gata mai ai lo tatou mafai ma o loo finagalo o ia e fesoasoani mai iā i tatou. (Salamo 103:12-14) E mafai ona tatou mautinoa faapea afai e tatou te faatuatua i le ‘Alo o le Atua . . . e faafofoga mai o ia ia te i tatou pe afai tatou te ole atu i soo se mea e tusa ma lona finagalo.’ (1 Ioane 5:13, 14) Peitaʻi ane, e ao i Kerisiano moni ona latou amanaʻia le vaega faale-Tusi Paia a Iesu o loo fai i fuafuaga a Ieova, aemaise lava pe a fai i latou ma sui e tatalo ai mo isi i le lautele. Ma e latou te taumafai lava ma le usiusitai e ava ia Iesu e ala i le auala atu ai o tatalo i le Atua.