Le Taimi e Tatau ai Ona Sola Ese

E MASANI lava ona mātauliagofie le lalolagi i aso nei i le agaga o le fia malosi ma le feluʻiaʻi po o le taufaaosooso foʻi. O se tagata e sola ese mai na tulaga e masani ona manatu i ai e vaivai pe palaai. Atonu e oo lava ina avea ai o ia ma taulaʻiga o tauemuga

Peitaʻi e faamanino mai i le Tusi Paia faapea e iai taimi e atamai ai, toe lototele, le sola ese. E tusa ma mea moni, a o leʻi auina atu ona soo i le faiva, sa taʻu atu i ai e Iesu iā i latou e faapea: “Pe a latou faasauā ia te outou i le tasi aai, ia outou sosola i se tasi.” (Mataio 10:23) Ioe, o soo o Iesu e ao ona sosola ese mai ē o sauāina i latou. E lē tatau ona latou faia ni taua faalotu, pe taumafai e faaliliuina faamalosi nisi. O loo iā i latou le feʻau o le filemu. (Mataio 10:11-14; Galuega 10:34-37) O lea, na i lo le faatagaina o le ita e faatupu aʻe, e ao ona sosola ese Kerisiano ina ia faamamao ese mai iā i latou o loo finau vale. I le faia faapea, o le a faatumauina ai pea lo latou lotofuatiaifo lelei ma la latou faiā tautele ma Ieova.—2 Korinito 4:1, 2.

O loo maua i le Tusi Paia i le tusi o Faataoto se faataʻitaʻiga tuufaafeagai. O loo taʻua ai se tama talavou faapea, na i lo le sola ese ina ua fesagaʻi ma se faaosoosoga, sa ia mulimuli atu i se fafine talitane e pei o se “povi ua alu a fasia.” O le iʻuga? O mala, talu ai ona ua lolo atu i le faaosoosoga o loo aafia ai lona ola.—Faataoto 7:5-8, 21-23.

Ae faapefea pe afai lua te fesagaʻi ma se faaosoosoga o le faia o le feusuaʻiga lē mamā po o le fetaiaʻi ma se isi tulaga faigatā? E tusa ai ma le Afioga a le Atua, o le gaoioiga saʻo o le sola ese loa lava mai lenā nofoaga i le taimi lava lenā.—Faataoto 4:14, 15; 1 Korinito 6:18; 2 Timoteo 2:22.