O Tulafono a le Atua e mo lo Tatou Lelei
O Tulafono a le Atua e mo lo Tatou Lelei
“Ua tele lava loʻu naunau i lau tulafono.”—SALAMO 119:97.
1. O le ā le uiga taatele agaʻi i le usiusitai i tulafono a le Atua?
O LE usiusitai i tulafono a le Atua, e lē o toe fiafia i ai le toʻatele o tagata i aso nei. I le toʻatele, o le gauaʻi atu i se pule e maualuga atu e lē o vaaia ua foliga mai e lē aogā. Ua tatou ola i se vaitaimi o le fesuiaʻiga o mea, ua lē maʻoti tapulaa o le saʻo ma le sesē, ma tulaga ua lē faigofie ai ona faapea atu o le mea lea e saʻo pe sesē. (Faataoto 17:15; Isaia 5:20) Ua faailoaina mai le auala o loo mafaufau ai tagata i le tele o atunuu i le mātauina lea o se suʻesuʻega na faia talu ai nei e faapea “o le toʻatele o tagata Amerika e mananaʻo e filifili e i latou lava le mea e saʻo, ma le mea e lelei ma tāua.” E latou te fiafia i se “Atua e tuu mai le faitalia i le tagata. E lē fiafia i ni faasāsāga. E latou te lē mananaʻo i ni pule maualuga e talitonu i le faia o amioga lelei, po o se isi talitonuga.” Na mātauina e se tagata e suʻesuʻe i uiga o tagata e faapea, i aso nei “ua faatalitalia tagata e latou te filifili mo i latou lava le uiga o le ola i se olaga e faimeatonu ma e mamā.” Na ia faaauau mai e faapea: “O so o se ituaiga o pulega e maualuga aʻe, e tatau ona faafetaui atu ana faatonuga i manaʻoga o tagata.”
2. E faapefea ona fesootaʻi lelei le taimi na uluaʻi taʻua ai tulafono i le Tusi Paia ma faamanuiaga ma faamaoniga a le Atua?
2 Talu ai ua toʻatele tagata ua latou fesiligia le aogā o tulafono a Ieova, e manaʻomia ai la ona tatou faamalosia lo tatou talitonuga faapea, o tapulaa a le Atua e mo lo tatou lelei. E lelei ona tatou iloiloina faamatalaga ia na faatoʻā taʻua ai lava tulafono i le Tusi Paia. I le Kenese 26:5, e tatou te faitau ai i fetalaiga a le Atua e faapea: ‘Na tausia e Aperaamo aʻu sauniga, ma aʻu poloaiga, ma aʻu faatonuga, ma aʻu tulafono.’ Na fofogaina atu na upu i le faitau senituri a o leʻi tuuina atu e Ieova le tulafono ma ona vala eseese i ē na tupuga mai iā Aperaamo. Na faapefea ona tauia e le Atua le usiusitai o Aperaamo, e aofia ai ma le usiusitai i Ana tulafono? Na folafola atu e Ieova le Atua iā te ia e faapea: “O lau fanau foi e manuia ai atu nuu uma lava o le lalolagi.” (Kenese 22:18) O le usiusitai i tulafono a le Atua e fesootaʻi lelei ma faamanuiaga ma faamaoniga a le Atua.
3. (a) O ā lagona na faaalia e se tasi o faisalamo e faatatau i tulafono a Ieova? (e) O ā fesili e lelei ona tatou uaʻi atu i ai?
3 O se tasi o faisalamo—e foliga mai o se aloalii o Iuta ma o sē e avea mulimuli ane ma tupu—na ia faailoa mai se lagona lea e lē masani ona fesootaʻi atu i le mataupu o tulafono. Na ia alaga i le Atua e faapea: “Ua tele lava loʻu naunau i lau tulafono.” (Salamo 119:97) Sa lē avea lenā alaga e na o ni faalogona na mapuna aʻe. Ae o se faaupuga e faaalia ai le naunau mo le finagalo o le Atua e pei ona faatulaga i lana tulafono. Na faapena foʻi lagona o le Alo lelei atoatoa o le Atua o Iesu Keriso. Na faamatalaina faavaloaga Iesu e faapea: “Loʻu Atua e, ou te fiafia e fai lou finagalo; o loo i totonu lava ia te au lau tulafono.” (Salamo 40:8; Eperu 10:9) Ae faapefea i tatou? Pe e tatou te mauaina ea le fiafia i le faia o le finagalo o le Atua? Po ua tatou talitonu maumauaʻi ea i le aogā o tulafono a Ieova? O le ā le vaega o loo faia e le usiusitai i tulafono a le Atua i la tatou tapuaʻiga, i o tatou olaga i aso taʻitasi, i a tatou filifiliga, ma a tatou faiā ma isi? O se mea lelei lo tatou malamalama i le māfuaaga ua iai i le Atua le aiā e faia ma faamalosia ai tulafono, ina ia mafai ai ona naunau i ana tulafono.
O Ieova—O le Faitulafono Tonu
4. Aiseā ua avea ai Ieova ma Faitulafono tonu e silisili?
4 O le avea ai ma Lē na Foafoaina Mea, o Ieova o le Faitulafono tonu e silisili i le vateatea aoao. (Faaaliga 4:11) Na taʻua e le perofeta o Isaia e faapea: “O Ieova o lo tatou fai tulafono.” (Isaia 33:22) Ua ia faataatia tulafono o le vateatea e pulea ai ana foafoaga, i mea e iai le ola ma mea e leai ni ola. (Iopu 38:4-38; 39:1-12; Salamo 104:5-19) Ona o tagata o ni foafoaga a le Atua, e latou te usiusitai atu ai i tulafono o le vateatea a Ieova. Ae e ui lava o loo iai i le tagata le filifiliga saʻoloto ma mafai ona ia mafaufauina mea i se uiga talafeagai, ae e faatoʻā fiafia lava pe a gauaʻi atu i tulafono tau i amioga tatau ma tulafono e faatatau atu i le tapuaʻiga i le Atua.—Roma 12:1; 1 Korinito 2:14-16.
5. Ua faapefea ona faamaonia le moni o le mataupu silisili o loo i le Kalatia 6:7 e tusa ai o tulafono a le Atua?
5 E pei ona tatou iloaina, o tulafono o le vateatea a Ieova e lē mafai ona lepetia. (Ieremia 33:20, 21) Afai e tetee i ai se tagata i nisi o tulafono o le vateatea, e pei o le tulafono o le kalave, e oo ai iā te ia ni aafiaga. I se tulaga tutusa, o tulafono tau amio a le Atua e lē masuia ma e lē mafai ona faia e se tasi se auala ina ia sao mai ai, po o le solia foʻi e aunoa ma se faasalaga. Ua faamalosia na tulafono e pei lava o ana tulafono faalenatura, e ui atonu e lē vave oo mai ni ona aafiaga. “E le ulagia le Atua, auā o le mea e luluina e le tagata, o le mea lava lea e seleseleina mai ai e ia.”—Kalatia 6:7; 1 Timoteo 5:24.
E Tele Mataupu o Loo Aofia i le Tulafono a Ieova
6. O ā vala eseese o loo aofia i tulafono a le Atua?
6 Sa avea le Tulafono a Mose ma se faaaliga mataʻina o tulafono a le Atua. (Roma 7:12) Mulimuli ane, na suia ai e Ieova le Atua le Tulafono faa-Mose i “le tulafono a Keriso.” * (Kalatia 6:2; 1 Korinito 9:21) Ona o i tatou o ni Kerisiano o loo i lalo o “le tulafono o le saʻolotoga ua atoatoa ona lelei,” ua tatou talisapaia faapea e lē o faatapulaaina e le Atua ana faatonuga i ni vala patino o o tatou olaga, e pei o talitonuga tau aʻoaʻoga po o sauniga faaletapuaʻiga. O ana tapulaa e aofia ai vala uma o le olaga, e aofia ai mataupu faaleaiga, feutagaʻiga faapisinisi, o le auala e amioaʻi i le feagai ai ma i latou o le isi ituaiga, o manatu e faatatau i uso Kerisiano, ma le auai i le tapuaʻiga moni.—Iakopo 1:25, 27.
7. Aumai ni faaaʻoaʻoga o tulafono tāua a le Atua.
7 Mo se faaaʻoaʻoga, ua faapea mai le Tusi Paia: “O e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua.” (1 Korinito 6:9, 10) Ioe, o le mulilua ma le faitaaga e lē na o ni “mea e tafafao ai.” O faiga faatauatane e lē na o se “isi ituaiga o olaga e ola ai.” O nei gaoioiga o le solia lea o tulafono a Ieova. E faapena foʻi ma tulaga e iai le gaoi, pepelo, ma le taufaaleaga. (Salamo 101:5; Kolose 3:9; 1 Peteru 4:15) Na taʻusalaina e Iakopo le mitamita vale, ae o loo fautua mai Paulo iā i tatou ia ʻalofia talanoaga valea ma tausuaga matagā. (Efeso 5:4; Iakopo 4:16) Mo Kerisiano, o nei tulafono uma tau amio, o ni vaega o le tulafono atoatoa a le Atua.—Salamo 19:7.
8. (a) O le ā le uiga o tulafono a Ieova? (e) O le ā le uiga autū o loo i le upu Eperu mo le “tulafono”?
8 O na tulafono autū o loo i le Afioga a Ieova o loo faaalia ai faapea, o ana tulafono ua lē na o se lisi o tulafono e ao ona matuā pipii atu i ai. Ua faia aʻe ai le faavae mo se olaga paleni lelei ma fuatele mai, ma ua aogā i vala uma tau amio. O tulafono a le Atua e ati aʻe ai, e amiotonu, ma e aogā. (Salamo 119:72) O le upu “tulafono” e pei ona faaaogāina e le faisalamo, o loo faaliliuina mai i le upu Eperu toh·rahʹ. Ua faapea mai se tasi tagata aʻoga o le Tusi Paia: “O lenei upu o loo faia aʻe mai se veape o lona uiga ia faatonu, ia taʻitaʻi, ia faasino, ia agaʻi i luma. O lona . . . uiga la, o se tulafono tau amio.” I le faisalamo, o le tulafono o se meaalofa mai le Atua. Pe e lē tatau ea la ona tatou faatāuaina foʻi faapena, ma ia aafia ai le auala o loo tatou ola ai?
9, 10. (a) Aiseā e tatou te manaʻomia ai taʻiala maufaatuatuaina? (e) E na o lē fea auala e tatou te mauaina ai se olaga fiafia ma taulau manuia?
9 E manaʻomia e foafoaga ola uma le faasinoga ma taʻiala maufaatuatuaina. Ua moni lenei tulaga iā Iesu ma isi agelu, o ē e maualuluga aʻe i lo tagata. (Salamo 8:5; Ioane 5:30; 6:38; Eperu 2:7; Faaaliga 22:8, 9) Afai e mafai e nei foafoagaola lelei atoatoa ona maua aogā mai taʻiala a le Atua, po ua lē sili atu la ona aogā le mauaina e tagata lē lelei atoatoa o taʻiala mai le Atua! O le talafaasolopito o le tagata ma mea ua tutupu iā i tatou ua faamaonia ai le moni o mea na mātauina e le perofeta o Ieremia e faapea: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.”—Ieremia 10:23.
10 Afai e tatou te mananaʻo e mauaina se olaga fiafia ma taulau manuia, e tatau ona tatou faatuatua atu i le Atua mo taʻiala. Na iloaina e le tupu o Solomona le lamatia o le ola e tusa ma tapulaa a le tagata lava ia, e ola tutoʻatasi mai taʻiala a le Atua: “O i ai le ala ua tonu i le manatu o le tagata; a o lona taunuuga, o ala ia e oti ai.”—Faataoto 14:12.
Māfuaaga mo le Talisapaia o Tulafono a Ieova
11. Aiseā e tatau ai ona tatou naunau e malamalama i tulafono a le Atua?
11 E lelei ona tatou atiina aʻe se faanaunauga loloto ina ia malamalama i tulafono a Ieova. Na faaalia e le faisalamo lenā faanaunauga ina ua ia faapea mai: “Ia e faapupula mai oʻu mata, ia ou vaai lava i mea e ofo ai i lau tulafono.” (Salamo 119:18) O le tele e tatou te iloa ai le Atua ma ona ala, o le loloto lenā o lo tatou malamalama i upu a Isaia e faapea: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai. E! ana uai mai ou taliga i aʻu poloaiga.” (Isaia 48:17, 18) O le faanaunauga moni o Ieova ia ʻalofia e ona tagata ia mala ma olioli ai i le ola e ala i le uaʻi atu i ana tulafono. Seʻi o tatou iloiloina nisi o māfuaaga e sili ona tāua e tatau ai ona tatou talisapaia tulafono a le Atua.
12. Talu ai e malamalama Ieova iā i tatou, e faapefea ona avea ai o ia ma Faitulafono e sili ona lelei?
12 O tulafono a le Atua e sau mai se Tasi e silafia lelei i tatou. Talu ai o Ieova o Lē na Foafoaina i tatou, e talafeagai ai la lona matuā silafiaina lelei o tagata. (Salamo139:1, 2; Galuega 17:24-28) O uō vavalalata, o tauaiga, e oo lava i mātua, e lē iloa lelei i tatou e pei ona silafia ai e Ieova. Auā foʻi, e sili atu le silafia o i tatou e le Atua na i lo i tatou lava! E maoaʻe le silafia a Lē na Foafoaina i tatou i o tatou manaʻoga faaleagaga, tau i faalogona, faalemafaufau, ma le faaletino. A o taulaʻi mai lana silasila iā i tatou, e na te faaalia se malamalamaga loloto e faatatau i le auala o loo faia aʻe ai i tatou, o o tatou manaʻoga, ma o tatou faanaunauga. E silafia lelei e Ieova le mea e gata mai ai lo tatou mafai, ae e na te silafia foʻi mea aogā e tatou te ono mafai ona fai. Ua faapea mai le faisalamo: “Ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:14) O lea, e mafai ona iā i tatou se lagona o le saogalemu faaleagaga a o tatou taumafai e savavali i ana tulafono, ma tatou loto malilie e gauaʻi atu i le taʻitaʻiga a le Atua.—Faataoto 3:19-26.
13. Aiseā e tatou te mautinoa ai faapea e manatu mamafa moni mai lava Ieova i le mea e sili ona lelei mo i tatou?
13 O Tulafono a le Atua e sau mai i Lē e alofa iā i tatou. E matuā manatu mamafa le Atua e faatatau i lo tatou lelei tumau. E ui ina sa matuā faigatā mo ia, ae sa ia auina mai lona Alo “e fai ma togiola e sui aʻi tagata e toatele.” (Mataio 20:28) Pe sa leʻi folafola mai ea e Ieova faapea e ‘na te le tuuina atu i tatou i le tofotofoga e sili i se mea ua tatou lavatia’? (1 Korinito 10:13, LT) Pe e lē o faamautinoa mai ea e le Tusi Paia iā i tatou faapea e ‘manatu mai o ia ia i tatou’? (1 Peteru 5:7) E leai se tasi e sili atu ona naunau mai ma le alofa i le sauniaina o taʻiala aogā mo foafoaga faaletagata na i lo o Ieova. E na te silafia le mea e lelei mo i tatou ma le mea e aumaia ai le fiafia po o le faanoanoa. E ui lava ina tatou lē lelei atoatoa ma faia mea sesē, ae afai e tatou te faia le amiotonu, e na te faaalia lona alofa iā i tatou i auala e iʻu atu ai i le ola ma faamanuiaga.—Esekielu 33:11.
14. O le ā le auala tāua ua ese mai ai tulafono a le Atua mai manatu o tagata?
14 O le lē masuia o tulafono a le Atua e faamāfanafana ai. I taimi faigatā o loo tatou ola ai, ua avea Ieova ma papa e mautū, auā e soifua mai le vavau e oo i le faavavau. (Salamo 90:2) Ua ia fetalai iā te ia e faapea: “O aʻu o Ieova, ou te le liliu.” (Malaki 3:6) O tapulaa a le Atua o loo faamauina i le Tusi Paia, e maufaatuatuaina atoatoa—e lē pei o manatu faaletagata e fesuisuiaʻi pea lava pea. (Iakopo 1:17) Mo se faaaʻoaʻoga, mo le tele o tausaga na faaauilumaina ai e tagata e suʻesuʻe i le mafaufau ma uiga o tagata ia le tuufau o fanau, ae mulimuli ane suia mafaufau o nisi ma taʻutino mai faapea na sesē a latou fautuaga. O tapulaa ma taʻiala a le lalolagi i lenei mataupu e fesuisuiaʻi e pei e felueaʻi e le savili. Peitaʻi, o Afioga a Ieova e lē fesuisuiaʻi. Ua saunia e le Tusi Paia fautuaga i le auala e tausia aʻe ai fanau i le alofa mo le faitau senituri. Na tusi le aposetolo o Paulo: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii.” (Efeso 6:4) Maʻeu le faamāfanafanaina i le iloa faapea e mafai ona tatou faalagolago i tapulaa a Ieova; ma e lē mafai lava ona suia!
Faamanuiaga mo i Latou e Usiusitai i Tulafono a le Atua
15, 16. (a) O le ā o le a iʻu i ai pe a tatou faatatauina tapulaa a Ieova? (e) E mafai faapefea ona faamaonia o tulafono a le Atua o ni taʻiala lelei i faaipoipoga?
15 E ala i lana perofeta o Isaia, na fetalai mai ai le Atua: ‘O laʻu upu e alu atu ai loʻu gutu . . . e manuia.’ (Isaia 55:11) E faapena foʻi la ona mautinoa, pe afai tatou te matuā taumafai e mulimuli i tapulaa o loo i lana Afioga, o le a tatou taulau manuia, faia mea aogā, ma maua ai le fiafia.
16 Manatu i le auala ua avea ai tulafono a le Atua ma taʻiala lelei i se faaipoipoga e taulau manuia. “Ia faamamaluina le faaipoipoga e tagata uma,” o le tusi mai lea a Paulo, “o le moega foi o le ulugalii ia leai sona leaga; auā e faamasinoina e le Atua o e faitaaga ma e mulilulua.” (Eperu 13:4, LF) O le ulugalii faaipoipo e tatau ona faaaloalo ma alofa le tasi i le isi: “Ia taitasi outou ma alofa i lana lava avā faapei o ia lava ia te ia; o le fafine foi ia ava o ia i lana tane.” (Efeso 5:33) O le ituaiga o alofa e manaʻomia lea o loo faamatalaina i le 1 Korinito 13:4-8 (LF): “E onosai le alofa, e agamalu, e le losilosi le alofa, e le mitamita vale le alofa, e le faafefeteina, e le amio matagā, e le sailia e ia ana lava mea, e le faaitaitagofie, e le faitau leaga ua tuuina mai e nisi, e le fiafia i le amio leaga, a e fiafia i le faamaoni. O le alofa e lavātia mea uma, e leai se mea e gata mai ai lona faatuatua, ma lona faamoemoe ma lona onosai. E le uma le alofa.” Pe a iai lenā ituaiga o alofa i se faaipoipoga, o le a tumau pea lea faaipoipoga.
17. O ā aogā ua maua mai le faatatauina o tapulaa a Ieova i le faaaogāina o le ʻava malosi?
17 O le isi faamaoniga o le aogā o tapulaa a Ieova, o le mea moni faapea e na te taʻusalaina le onā. E na te lē faamaonia foʻi le ‘inu tele i le uaina.’ (1 Timoteo 3:3, 8; Roma 13:13) O le toʻatele o ē e lē amanaʻiaina tapulaa a le Atua i lenei mataupu, e pagatia i faamaʻi e māfua mai pe e faateleina foʻi e ala i le inu tele i le ʻava malosi. O le lē manatu mamafa i fautuaga a le Tusi Paia i le pulea o le inu, ua oo atu ai nisi i le fai ma amio le inu tele e “fesoasoani iā i latou e mapu i ai.” E tele faafitauli e oo i ai ona o le soona inu, e aofia ai le lē faaaloalogia e isi, ua faigatā ai faiā i le aiga po o le malepe ai foʻi o le aiga, faamaʻimau ai tupe, ma le maumau ai o se galuega. (Faataoto 23:19-21, 29-35) Pe e lē o se puipuiga ea la ia tapulaa a Ieova e tusa ai ma le faaaogāina o le ʻava malosi?
18. Po o aogā ea tulafono a le Atua i tulaga tau tupe? Faamatala.
18 Ua faamaonia foʻi le aogā o tapulaa a le Atua i tulaga tau tupe. Ua uunaʻia e le Tusi Paia Kerisiano ina ia faamaoni ma tōʻaaga. (Luka 16:10; Efeso 4:28; Kolose 3:23) Talu ai ua latou mulimuli i lenei fautuaga, ua toʻatele ai Kerisiano ua siitia o latou tulaga i galuega po o le tumau pea i a latou galuega a o vaea ese isi. Ua iai foʻi aogā ua oo i ai i tulaga tau tupe pe a ʻalofia e se tagata ni masaniga e lē faale-Tusi Paia ma amioga ua pulea ai i latou e pei o taaloga faitupe, ulaula, ma le faaaogāsesēina o fualaau faasāina. E mautinoa e mafai ona e mafaufau i nisi faaaʻoaʻoga o le aogā o tapulaa a le Atua i le tulaga tau i le tamaoaiga.
19, 20. Aiseā o se auala atamai ai le talia ma pipii mau atu i tulafono a le Atua?
19 E faigofie i tagata lē lelei atoatoa ona see ese mai i tulafono ma tapulaa a le Atua. Seʻi manatu i tagata Isaraelu i le Mauga o Sinai. Na fetalai atu le Atua iā i latou: “Afai tou te matuā faalogo mai i loʻu leo, ma tausiusi i laʻu feagaiga, ona fai lea outou ma oloa tāua moʻu, e sili i nuu uma.” Na latou tali mai: “Matou te faia lava mea uma ua fetalai mai ai Ieova.” Peitaʻi, pagā le ese o le auala na latou filifili e mulimuli i ai! (Esoto 19:5, 8; Salamo 106:12-43) Ae ina ia ese ai i tatou mai lenā auala seʻi o tatou taliaina ma pipii atu i tapulaa a le Atua.
20 O se auala atamai ma aumaia ai le fiafia, o le pipii mau atu lea i tulafono lē mafaatusalia a Ieova ua saunia e fesoasoani e taʻitaʻia ai o tatou olaga. (Salamo 19:7-11) Ina ia faia ma le manuia lenei mea, e tatou te manaʻomia foʻi ona talisapaia le tāua o mataupu silisili a le Atua. O le manatu lea o loo i le mataupu o loo sosoo mai.
[Faamatalaga pito i lalo]
^ pala. 6 Mo se talanoaga auʻiliʻili o “le tulafono a Keriso,” tagaʻi i Le Olomatamata, Setema 1, 1996, itulau 14-24.
Pe E te Manatua?
• Aiseā e mafai ai ona tatou faatuatua faapea o tulafono a le Atua e mo lo tatou lelei?
• O ā māfuaaga e tatau ai ona tatou talisapaia tulafono a Ieova?
• O ā auala ua aogā ai tulafono a le Atua?
[Fesili mo le Suʻesuʻega]
[Ata i le itulau 13]
Sa matuā faamanuiaina Aperaamo ona o le usiusitai i tulafono a Ieova
[Ata i le itulau 15]
O popolega o le olaga pisi i aso nei ua taʻitaʻieseina ai le toʻatele mai tulafono a le Atua
[Ata i le itulau 17]
I le pei o se molī o le āva i luga o se papa, o tulafono a le Atua e tumau ma e lē masuia