Pe E te Manatua?

Pe na e talisapaia le faitauina o lomiga talu ai nei o Le Olomatamata? Ia seʻi vaai la pe mafai ona e taliina fesili o loo mulimuli mai:

• O le ā le polokalame totino e aofia ai le Lauga i luga o le Mauga e te ono faaaogāina e faaitiitia ai mafatiaga?

E mafai ona e faitauina i aso taʻitasi se tasi o aʻoaʻoga faavae a Iesu lea o loo taʻua i lenā lauga po o se aʻoaʻoga faavae i se isi vaega o Evagelia. E ala i le manatunatu loloto i na aʻoaʻoga ma taumafai e faatatauina totino, o le a mafai ona e iloa ai le faateleina o le fiafia ae faaitiitia mafatiaga.—12/15, itulau 12-14.

• O ā māfuaaga lelei e tolu mo le toleniina e toeaina o le faapotopotoga o auauna o le faiva ina ia taulimaina avega tauave faaopoopo?

Ona o le faatuputupulaʻia o le faitau aofaʻi o Molimau a Ieova, ua manaʻomia ai nisi tane maufaatuatuaina e fesoasoani i tagata faatoʻā papatiso e agaʻigaʻi i luma. Ua faatapulaaina nei e le tulaga matua ma faafitauli tau i le soifua mālōlōina mea e mafai ona faia e nisi ua loa ona avea ma toeaina. Ma o nisi o toeaina agavaa o loo tauaveina avega tauave e ese mai i a latou faapotopotoga, o lea ua lē mafai ai ona faia ni mea se tele i a latou faapotopotoga e pei ona sa mafai muamua.—1/1, itulau 29.

• E faapefea ona talitonu tagata i atua e lē moni?

E toʻatele o loo tapuaʻi i atua a a latou lotu, ae atonu o nei atua e leai ni ola e pei o Paala i aso o Elia ia e lē mafai ona laveaʻiina i latou. (1 Tupu 18:26, 29; Salamo 135:15-17) O isi ua latou faatāuaina tagata faafiafia po o tagata e taʻutaʻua i taaloga, o ē e lē mafai ona latou aumaia se faamoemoe moni mo le lumanaʻi. I lona tuufaafeagai, o loo soifua moni lava Ieova ma e faataunuuina ana fuafuaga.—1/15, itulau 3-5.

• O le ā e mafai ona tatou aʻoaʻoina mai i le tali atu a Kaino i le lapataʻiga a le Atua?

Ua tuuina mai e le Atua iā i tatou le filifiliga saʻoloto, ma e mafai ona tatou filifili e faia le mea saʻo na i lo le liliu ese mai le faia o le mea lelei, e pei ona sa faia e Kaino. Ua faailoa mai foʻi e faamatalaga a le Tusi Paia e faapea e faaooina mai e Ieova ana faamasinoga i luga o tagata lē salamō.—1/15, itulau 22-23.

• Aiseā e tāua faapitoa ai lava le tumamā i aso nei?

I le fesuisuiaʻi o le auala o loo soifua ai tagata, ua itiiti ai se taimi e faaaluina e faamamāina ai o latou fale na i lo le mea sa masani ai. O le lē amanaʻiaina o le tumamā i meaʻai ma vai, e mafai ona aumaia ai ni lamatiaga i le soifua mālōlōina. E lē gata i le tumamā faaletino, ua faamamafa mai foʻi e le Tusi Paia le uaʻi atu i le mamā faaleagaga, tau amio, ma le mafaufau.—2/1, itulau 3-6.

• E tusa ai ma molimau na soifua a o leʻi oo i le vaitaimi o uluaʻi Kerisiano, na faapea mai ai Paulo e “le faaatoatoaina i latou pe a le i ai i tatou.” E faapefea? (Eperu 11:40)

A o faagasolo le Meleniuma o loo fotuaʻi mai, o le a faasafua atu ai e Iesu ma ona uso faauuina i le lagi, o ē o loo auauna o ni tupu ma faitaulaga, ia aogā o le togiola i ē na toe faatutūina aʻe. O na tagata faamaoni e pei ona taʻua i le mataupu e 11 o le Eperu o le a mulimuli ane “faaatoatoaina.”—2/1, itulau 23.

• O le ā le uiga o le manatu o Paulo ina ua ia taʻu atu i tagata Eperu: “Ua outou lē tetee atu e oo i le faasasaaina o outou toto”? (Eperu 12:4)

Na ia uiga i le tetee atu e oo lava i le tulaga e maliu ai. E iai faaaʻoaʻoga i le talafaasolopito o i latou na faamaoni lava seʻia oo i le oti. E ui sa leʻi tofotofoina tagata Eperu lea na tusi atu iai Paulo i lenā tulaga, ae sa manaʻomia ona latou agaʻigaʻi i luma i le taʻumatuaina ma atiina aʻe lo latou faatuatua e tutumau po o le ā lava e ono tulaʻi mai.—2/15, itulau 29.

• Aiseā e sili atu ai le ʻalofia o le faapea atu o le alofa mutimutivale o Ieova e faafeoloolo ai lona faamasinotonu?

I nisi gagana, o le “faafeoloolo” e mafai ona uiga atu i le faaitiitia po o le taofiofia. O Ieova o le Atua o le faamasinotonu ma le alofa mutimutivale, ma o lona faaalia o na uiga, e tau fai galulue faatasi. (Esoto 34:6, 7; Teuteronome 32:4; Salamo 116:5; 145:9) O le faamasinotonu o Ieova e lē manaʻomia ai ona faavaivaia pe faafeoloolo e le alofa mutimutivale.—3/1, itulau 30.

• Pe e talafeagai mo se Kerisiano ona atualalaina le tino o se tasi e pele ua maliu?

O le atualalaina o se auala lea e faasaoina ai se tino maliu. O nisi i aso anamua na mulimuli i lenei faiga ona o ni māfuaaga faalelotu. Ae e lē o le tulaga lenā mo tagata tapuaʻi moni. (Failauga 9:5; Galuega 24:15) O le atualalaina ua na ona faatuai ai o le toe foʻi atu o le tino i le efuefu. (Kenese 3:19) Peitaʻi, o le a lē āfaina pe afai e manaʻomia i le tulafono ona atualalaina, pe e mananaʻo i ai nisi tagata o le aiga, pe ona e manaʻomia ona e tatau ona malaga mai nisi mai se nofoaga mamao i se falelauasiga.—3/15, itulau 29-31.

• O ā faaaʻoaʻoga faale-Tusi Paia ua aʻoaʻoina ai i tatou, e talileleia e le Atua tagata mai i nuu uma?

Na auina atu e Ieova le perofeta o Iona e lapataʻi tagata Nineva, ma na uunaʻia e le Atua o ia e taliaina lo latou tulaga salamō. E ala i upu ma faaaʻoaʻoga, na faalaeiauina ai e Iesu le faaalia o le alofa i tagata Samaria. Na faia le sao o le aposetolo o Peteru ma le aposetolo o Paulo i le avatuina o le tala lelei i tagata e lē o ni Iutaia. Mai na faaaʻoaʻoga, ua mafai ai ona tatou vaaia le manaʻoga mo le taumafai e fesoasoani i tagata e eseese uma o latou talaaga.—4/1, itulau 21-24.