E Anoanoaʻi Tulaga Lē Atoatoa o le Malosi o le Tino

NA AVE faamalosia Christian o lē o loo nofo i se atunuu o Aferika e ni fitafita ina ia faamalosia o ia e auai i le vaegāʻau, ae na lē lolo atu i ai Christian ona o lona lotofuatiaifo ua aʻoaʻoina i le Tusi Paia. O lea na aveina ai loa o ia e fitafita i se nofoaga o fitafita, ma i inā na fanaina ai lona vae e se tasi o i latou ina ua māeʻa le sasaina o ia mo aso e fā. Na mafai ona oo atu Christian i se falemaʻi, ae na tipi ese le vaega o lona vae lea e i lalo ifo o lona tuli. I se isi atunuu o Aferika, e oo lava i tamaiti laiti ua mumutu o latou lima po o vae, ona na tatipi ese e ni tagata fouvale na faaauupegaina. Ae mai Cambodia e oo atu i atunuu i Balkan, ma mai i Afghanistan e oo atu i Angola, ua faaauau ai ona aafia o ē iti ma tagata matutua i ni manuʻaga tumau ma ni tulaga lē atoatoa o le malosi o le tino ona na lavevea ai i ni maina o loo tatao i le eleele.

O isi foʻi māfuaaga o tulaga lē atoatoa o le malosi o le tino, o faalavelave faafuaseʻi ma faamaʻi e pei o le maʻi suka. E oo lava i kasa oona i le siʻosiʻomaga e mafai ona māfua ai le lē atoatoa o le malosi o le tino. Mo se faaaʻoaʻoga, i vaipanoa tuaoi i se tasi aai o Europa i Sasaʻe, ua fananau ai le toʻatele o tamaiti e aunoa ma ni vaega pito i lalo o o latou lima. Ua na o sina vaega itiiti o loo tautau ai i lalo ifo o le tulilima. Ua faamaonia ai e lenā tulaga le aafiaga na fananau mai ma i latou na māfua ona o le soona faaaogāina o vailaau. E lē mafaitaulia isi foʻi tagata o loo atoatoa pea o latou vae ma lima ae ua lē o toe gaoioi ona ua pepē po o isi lava aafiaga. O le mea moni, e anoanoaʻi tulaga lē atoatoa o le malosi o le tino.

Po o le ā lava le pogai, e mafai ona matuā mafatia tele ai se tasi ona o tulaga lē atoatoa o le malosi o le tino. Na tipiesea le vaega pito i lalo o le vae agavale o Junior i le 20 o ona tausaga. Na ia faapea mai mulimuli ane ai: “Na iai le tele o mafatiaga tau i faalogona iā te aʻu. Na ou tagi soo auā o le a lē toe iai sou vae. Sa ou lē iloaina le mea o le a fai. Na lē sagatonu loʻu mafaufau.” Peitaʻi, na iai le taimi na iloa ai le suia o uiga o Junior. Na amata ona ia suʻesuʻeina le Tusi Paia ma aʻoaʻoina mea e lē gata na fesoasoani ai iā te ia e faafetaiaʻia ai lona tulaga faigatā, ae na tuuina atu ai iā te ia se faamoemoe matagofie o se lumanaʻi fiafia i le lalolagi. Pe afai o oe o sē e lē atoatoa le malosi o le tino, pe e te lē fiafia ea e mauaina lenā faamoemoe?

Pe afai o le tulaga lenā, faamolemole seʻi faitau le mataupu o loo mulimuli mai. E matou te valaauliaina oe e suʻe i mau o le Tusi Paia o loo faasino mai ina ia mafai ai ona e iloa lava e oe, ia mea o loo saunia e Lē na Foafoaina Mea mo i latou o loo aʻoaʻoina lana fuafuaga ma fetuutuunaʻi i ai o latou olaga.