E Viia Ieova i le Ausiaina o Mea Mana‘omia e le Atua
E Viia Ieova i le Ausiaina o Mea Manaʻomia e le Atua
“Ou te faaneenee atu foi ia te ia i le viiga”—SALAMO 69:30.
1. (a) Aiseā ua alagatatau ai ona faaneeneeina Ieova? (e) E mafai faapefea ona tatou faaneenee atu iā te ia ma le viiga?
O IEOVA le Atua e ona le malosi uma lava, o le Pule Silisili Ese Aoao, ma Lē na Foafoaina i tatou. E matuā talafeagai ai la ona faaneeneeina lona suafa ma ana fuafuaga. O le faaneeneeina o Ieova, o lona uiga o le faasilisiliina lea o ia, ia faamamaluina, ma ia matuā viiviia o ia e ala i upu ma mea e fai. Ina ia faia faapea faatasi ai ma “le viiga,” e manaʻomia ona tatou maua pea le lotofaafetai mo mea ua ia faia mo i tatou i le taimi nei, faapea foʻi ma mea o le a ia faia i le lumanaʻi. O loo faaalia i le Faaaliga 4:11 (LF) le agaga e manaʻomia ona iā i tatou. O i inā o loo faailoa mai ai e foafoagaola agaga faamaoni e faapea: “Lo matou Alii e, ma lo matou Atua, e tatau lava oe ina ia tuuina atu ia te oe le viiga, ma le faaneeneega, ma le mana; aua na e faia mea uma lava, ona o lou finagalo foi e i ai i latou ma ua faia.” E faapefea ona tatou faaneenee atu iā Ieova? E ala lea i lo tatou saʻilia o le poto e faatatau iā te ia, ona faia lea o le mea ua ia manaʻomia mai iā i tatou. E tatau ona iā i tatou le lagona lea na i le faisalamo ina ua ia faapea mai: “Ia e aʻoaʻo mai ia te au e fai lou finagalo; auā o oe lava loʻu Atua.”—Salamo 143:10.
2. Pe faapefea ona feutagaʻi Ieova ma i latou o loo faaneeneeina o ia ma ē e lē o faia faapea?
2 E faatāuaina e Ieova i latou o loo faaneeneeina o ia. O le māfuaaga lenā ua taʻua ai o ia o lē “na te tauia mai o e matuā saili ia te ia.” (Eperu 11:6) O le ā le taui? Na faapea atu Iesu i lana tatalo i lona Tamā faalelagi: “O le ola faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) Ioe, o i latou e ‘faaneeneeina [Ieova] i le viiga’ o le a ‘fai le nuu mo i latou, ma e nonofo ai pea.’ (Salamo 37:29) Ae “e le iu i se lelei le ua amio leaga.” (Faataoto 24:20) I nei aso mulimuli, ua faanatinati lava le manaʻoga ina ia faaneeneeina Ieova talu ai ua toeitiiti ona ia faaumatia lea o ē amioleaga ae faasaoina ē amiotonu. “E mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:17; Faataoto 2:21, 22.
3. Aiseā e ao ai ona tatou uaʻi atu i le tusi a Malaki?
3 O loo i le Tusi Paia le finagalo o Ieova, auā “o Tusi Paia uma lava e mai le Agaga o le Atua ia.” (2 Timoteo 3:16) O loo iai i lana Afioga le tele o faamaumauga i le auala o loo faamanuiaina ai e Ieova i latou e faaneeneeina o ia ma le mea e oo iā i latou e lē o faia faapea. O se tasi o na faamatalaga o loo faatatau i le mea na tupu i Isaraelu i le vaitaimi o le perofeta o Malaki. Na tusia e Malaki lenei tusi o loo faaigoaina i lona igoa a o avea Neemia ma kovana o Iuta, pe tusa o le tausaga e 443 T.L.M. O lenei tusi e mamana ma faagaeetia ai, ma e iai faamatalaga ma valoaga ia na ‘tusia e fai ma apoapoaiga mo i tatou o e ua aulia mai ai tausaga e gata ai.’ (1 Korinito 10:11) O le uaʻi atu i upu a Malaki o le a fesoasoani lea iā i tatou e sauniuni ai mo “le aso o Ieova e sili, ma le matautia” pe a ia faaumatiaina lenei faiga o mea amioleaga.—Malaki 4:5.
4. O ā manatu e ono o loo tataʻi atu i ai i tatou i le Malaki mataupu 1?
4 Ua faapefea ona fesoasoani mai le tusi a Malaki, lea na tusia i le silia ma le 2,400 tausaga ua tuanaʻi, iā i tatou i lenei senituri lona 21 ina ia sauniuni ai mo le aso sili ma le mataʻutia o Ieova? A itiiti mai, e tusa ma le ono ni manatu ua tataʻi atu i ai i tatou e le mataupu muamua. O nei manatu e tāua tele i lo tatou faaneeneeina o Ieova faatasi ai ma le viiga ina ia mafai ona tatou maua lona finagalo malie ma le ola e faavavau: (1) E alofa Ieova i ona tagata. (2) E ao ona tatou faaalia le talisapaia mo mea paia. (3) E faatalitalia e Ieova lo tatou avatuina o le mea sili ua tatou mafaia. (4) O le tapuaʻiga moni e uunaʻia e le alofa e lē manatu faapito, ma e lē matapeʻapeʻa. (5) O le ituaiga o auaunaga e talia e le Atua, e lē o se avega mamafa o faiga e masani ai. (6) E taʻitoʻatasi i tatou uma ma lana e tala atu i le Atua. O lea la, i lenei mataupu muamua o mataupu e tolu e faatatau i le tusi o Malaki, seʻi o tatou manatunatu i nei vala taʻitasi a o tatou iloiloina le Malaki mataupu 1.
E Alofa Ieova i Ona Tagata
5, 6. (a) Aiseā na alofa ai Ieova iā Iakopo? (e) Pe afai tatou te faataʻitaʻi i le faamaoni o Iakopo, o le ā e tatou te faatalitalia?
5 O loo faamaninoina mai i fuaiupu amata le alofa o Ieova. E amata le tusi i upu nei: “O le avega [“faalauiloaga,” NW] o le afioga a Ieova ia Isaraelu.” E lē gata i lea, na fetalai le Atua: “Ua ou alofa atu ia te outou.” Ua taʻua e Ieova se faataʻitaʻiga i le fuaiupu lava lea: “Ua ou alofa ia Iakopo.” O Iakopo o se tagata sa faatuatua iā Ieova. Na oo ina suia e Ieova le igoa o Iakopo iā Isaraelu, ma na avea o ia ma augātamā o le nuu o Isaraelu. Na alofagia e Ieova Iakopo ona o ia o se tagata faatuatua. O i latou o le nuu o Isaraelu na faaalia lea uiga iā Ieova e pei ona sa iā Iakopo, na alofagia foʻi e Ia.—Malaki 1:1, 2.
6 Afai tatou te alolofa iā Ieova ma tutumau pea ma le faamaoni faatasi ma ona tagata, e mafai ona faamāfanafanaina i tatou i le faamatalaga i le 1 Samuelu 12:22 e faapea: ‘E le lafoaʻia e Ieova i lona nuu ona o lona suafa mamalu.’ E alofa Ieova i ona tagata ma e na te tauia i latou i se taimi mulimuli ane i le ola e faavavau. O lea ua tatou faitau ai e faapea: “Ia e faatuatua ia Ieova, ma e faia amio lelei; ia e nofo i le nuu, ma tausisi i le faamaoni. Ia e fiafia lava oe ia Ieova, ona foaiina lea e ia ia te oe o mea e manao i ai lou loto.” (Salamo 37:3, 4) O lo tatou alolofa iā Ieova o loo aofia ai se vala lona lua lea ua tataʻi atu i ai i tatou i le Malaki mataupu 1.
Faaalia le Talisapaia mo Mea Paia
7. Aiseā na ʻinoʻino ai Ieova iā Esau?
7 E pei ona tatou faitau ai i le Malaki 1:2, 3, ina ua uma ona fetalai mai Ieova, “Ua ou alofa ia Iakopo,” ona ia faapea mai lea “ma ou ʻinoʻino ia Esau.” Aiseā ua faapea ai? Talu ai ona sa faaneeneeina e Iakopo Ieova, ae o lona uso e la te masaga, o Esau, e na te leʻi faia faapea. Sa igoa foʻi Esau iā Etoma. I le Malaki 1:4, o loo taʻua ai le nuu o Etoma o le laueleele o e amio leaga, ma sa faamalaiaina tagata sa nonofo ai. O le igoa o Etoma (o lona uiga “Mūmū”) na faaigoa ai Esau ina ua ia faatau atu lona tofi tāua o le ulumatua mo sina sitiū mūmū. “O lea na faaleaogaina ai e Esau le tofi o le ulumatua,” e pei ona fai mai ai le Kenese 25:34. Na pulunaunau atu le aposetolo o Paulo i ona uso talitonu ia faaeteete ina ‘neʻi iai se faitaaga, po o se faatalale i mea paia, pei o Esau, o le na avatu lona tofi o le ulumatua e faatau aʻi le ʻai e tasi.’—Eperu 12:14-16.
8. Aiseā ua faatusaina ai e Paulo Esau i sē e faitaaga?
8 Aiseā na faafesootaʻi ai e Paulo le gaoioiga na faia e Esau ma le faitaaga? Auā o le iai o le ituaiga mafaufauga lea sa iā Esau e mafai ona tataʻi atu ai se tasi i le lē taulau ona talisapaia o mea paia. O lea tulaga e mafai ona iʻu ai i agasala matuiā, e pei o le faitaaga. O lea la, e mafai ona tatou fesili ifo iā i tatou lava: ‘Po o faaosoosoina ea aʻu i nisi taimi ina ia faafesuiaʻi loʻu tofi faa-Kerisiano—le ola e faavavau—ma se mea faatauvaa e lē tumau e pei o se ipu sitiū? Po o oʻu faatalalē ea i mea paia e aunoa ma loʻu iloaina?’ Sa iā Esau se faanaunauga na lē mataofia ina ia faamalieina se faanaunauga o le tino. Na ia fai atu iā Iakopo: “[“Ia faavave,” NW], au mai sina mea mūmū soʻu ʻaina.” (Kenese 25:30) O le tulaga faanoanoa ona o nisi o auauna a le Atua, e tusa o le uiga lenā o a latou faamatalaga e faapea: “Popole fua! Aiseā e faatali ai seʻi faaipoipo lelei?” Ua avea le faanaunauga e faamalieina i feusuaʻiga faaleituaiga, e tusa lava po o le ā le mea e tupu mai ai, ua pei e na o se ipu sitiū faatauvaa iā i latou.
9. E faapefea ona tatou faatumauina lo tatou mataʻu ma le migao iā Ieova?
9 Tau ina ia aua lava neʻi o tatou faatalalē i mea paia e ala i le manatu faatauvaa i le tulaga mamā, faamaoni, atoa ma lo tatou tofi faaleagaga. Na i lo le pei o Esau, ia tatou pei o Iakopo faamaoni ma faatumauina le mataʻu ma le migao i le Atua e ala i le faaalia o le matuā talisapaia o mea paia. E mafai faapefea ona tatou faia lea tulaga? E ala i lo tatou matuā taumafai ia ausia mea e manaʻomia e Ieova. O le faia faapea ua tataʻi atu ai i tatou i le manatu lona tolu o loo taʻua i le Malaki mataupu 1. O le ā lenā manatu?
Avatu iā Ieova le Mea Sili Tatou te Mafaia
10. Na faapefea ona faaalia le manatu faatauvaa o faitaulaga i le laoʻai a Ieova?
10 E leʻi ofoina atu e faitaulaga o Iuta sa auauna i le malumalu ia taulaga sili ona lelei iā Ieova. Ua faapea mai le Malaki 1:6-8: “E ava le atalii i lona tamā, e ava foi le auauna i lona alii; afai o aʻu o le tamā, o ifea ni oʻu ava? afai foi o aʻu o le alii, o ifea loʻu matautia? ua fetalai mai ai Ieova o ʻau ia te outou faitaulaga o e ʻinoʻino i loʻu igoa.” Na fesili mai le ʻaufaitaulaga e faapea: “Ua matou ʻinoʻino i lou suafa i ni a?” Na tali mai Ieova: “Ina ua outou au mai o mea e ʻai ua leaga i laʻu fata faitaulaga.” Na fesili mai le ʻaufaitaulaga: “Ua leaga oe iā te i matou i ni a?” Na fetalai atu Ieova iā i latou: “Ina ua outou fai ane, O le laoai a Ieova, o le mea faatauvaa lava lea.” Sa faaalia e na faitaulaga lo latou manatu faatauvaa i le laoʻai a Ieova i taimi uma lava latou te ofo atu ai se taulaga e lē lelei, i le faapea ane: “E le leaga.”
11. (a) O le ā le fetalaiga a Ieova e faatatau i taulaga e lē lelei? (e) Ua faapefea ona tuuaʻia tagata lautele?
11 Na fetalai mai loa lea o Ieova e tusa o na taulaga leaga: “Seʻi avatu ia i le alii e pule [“kovana,” NW] ia te oe; pe fiafia mai ea o ia ia te oe? pe talia
mai oe e ia?” E leai, e mautinoa lava e lē fiafia mai lo latou kovana i na ituaiga meaalofa. E sili atu ai la ona lē taliaina na taulaga leaga e le Pule Silisili Ese Aoao! Sa lē na o faitaulaga sa tuuaʻia. E moni sa latou faaalia le ʻinoʻino iā Ieova e ala i le ofoina atu o na taulaga. Ae po o lona uiga ea sa lē tuuaʻia ai tagata lautele? Sa matuā tuuaʻia lava! Manatua foʻi, o i latou lava na aumaia manu tauaso, pipili, ma mamaʻi, i le ʻaufaitaulaga ina ia fai ai taulaga iā Ieova. Pagā se agasala ina a telē!12. Ua faapefea ona tatou maua le fesoasoani ina ia avatu ai iā Ieova le mea e sili tatou te mafaia?
12 O le avatuina iā Ieova o le mea sili tatou te mafaia o se tasi lea o auala e faaalia ai tatou te alolofa moni lava iā te ia. (Mataio 22:37, 38) I le lē pei o faitaulaga lē usiusitai i aso o Malaki, ua aumaia e le faalapotopotoga a Ieova ia faatonuga lelei faale-Tusi Paia e fesoasoani ai iā i tatou ina ia faaneeneeina Ieova ma le viiga e ala i le ausia o mea e manaʻomia e le Atua. E fesootaʻi lenei vala ma le manatu tāua lona fā lea e mafai ona maua mai i le Malaki mataupu 1.
O le Alofa e Uunaʻia ai le Tapuaʻiga Moni, ae Lē o le Matapeʻapeʻa
13. O le ā na faia e faitaulaga e iloa ai le uunaʻia o i latou e le matapeʻapeʻa?
13 O faitaulaga i aso o Malaki sa matapeʻapeʻa, lē alolofa, ma mananaʻo i tupe. E faapefea ona tatou iloa lenā mea? O loo faapea mai le Malaki 1:10: “O ai lava so outou na te punitia fua faitotoa? Tou te le tafu fua le afi i laʻu fata faitaulaga; e leai lava soʻu fiafia ia te outou, ua fetalai mai ai Ieova o ʻau; ou te le talia foi se taulaga ai o outou lima.” O le mea moni, sa oo lava ina tāpā e na faitaulaga matapeʻapeʻa se totogi mo le tapunia o faitotoʻa ma le tafuina o afi mo taulaga, o ni auaunaga pito i faigofie o auaunaga na faia i le malumalu! E lētioa a lē fiafia Ieova i taulaga na latou faia!
14. Aiseā ua mafai ai ona tatou fai atu o Molimau a Ieova o loo uunaʻia e le alofa?
14 O le matapeʻapeʻa atoa ma le manatu faapito o faitaulaga agasala i Ierusalema anamua, atonu ua matuā faamanatu mai ai iā i tatou e faapea o ē matapeʻapeʻa e lē fai mo latou tofi le malo o le Atua. (1 Korinito 6:9, 10) O lo tatou manatunatu i auala sa faia ai le auaunaga a na faitaulaga manatu faapito, ua faateleina ai lo tatou talisapaia o le galuega talaʻi o loo faia e Molimau a Ieova i le lalolagi aoao. E tauofo; ma tatou te lē taitai ona tāpā se totogi mo la tatou faiva. Leai, “auā o i matou nei, e le pei o le toatele o e o faafilogia le afioga a [“e lē o suʻeina ni a tatou mea e ala i,” NW] le afioga a le Atua.” (2 Korinito 2:17) I le pei o Paulo, e mafai e i tatou taʻitoʻatasi ona fai atu ma le faamaoni: “Na ou talaʻiina atu [“ma le fiafia,” NW ] ia te outou le tala lelei a le Atua ma le le tauia mai.” (2 Korinito 11:7) Ia mātau, sa ‘talaʻiina ma le fiafia le tala lelei’ e Paulo. Ua tataʻi atu ai i tatou e lenā manatu i le vala lona lima i le Malaki mataupu 1.
O le Auaunaga i le Atua e Lē o se Tū e Masani ai e Mamafa Naʻuā
15, 16. (a) O le ā le uiga na iai i faitaulaga e tusa ai o le osia o taulaga? (e) Ua faapefea ona ofoina atu e Molimau a Ieova a latou taulaga?
15 Sa manatu faitaulaga lē faamaoni i Isaraelu anamua i le osia o taulaga, o se faiga masani ua fiu ai. Ua avea o se avega mamafa iā i latou. E pei ona mātauina i le Malaki 1:13, na fetalai atu le Atua iā i latou: “Ua outou fai ane, Aue, o le mea tiga naua! ma outou ʻinoʻino i ai.” Sa ʻinoʻino, pe sa manatu faatauvaa na faitaulaga i mea paia a le Atua. E ao ona tatou tatalo ina ia aua lava neʻi o tatou pei o i latou. Na i lo le faia faapea, tau ina ia tatou faaalia pea le agaga o loo faaalia i upu o le 1 Ioane 5:3 e faapea: “O lenei lava le alofa i le Atua, ia tatou tausi i ana poloaiga; e lē mamafa foi ana poloaiga.”
16 Ia tatou fiafia i le ofoina atu o taulaga faaleagaga i le Atua, aua lava neʻi o tatou manatu i ai o se avega ua lē lavā fai. Ia tatou usitaʻi i upu faavaloaga nei: “Ia outou faapea atu ia te ia [Ieova], Ia e ave ese agasala uma, ma talileleia mai, matou te avatua lava taulaga o matou laugutu.” (Hosea 14:2) O le faaupuga “taulaga o matou laugutu” ua faailoa mai ai o taulaga faaleagaga, o upu ia tatou te tautatala ai i le viiaina o Ieova ma ana fuafuaga. Ua faapea mai le Eperu 13:15: “O lenei, o ia [Iesu Keriso] tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.” Maʻeu lo tatou fiafia talu ai o a tatou taulaga faaleagaga, e lē na o ni tū e masani ai, peitaʻi o le faatinoina ma le lotoatoa o lo tatou alofa mo le Atua! O lenei mea ua tataʻi atu ai tatou i le manatu lona ono lea e mafai ona mauaina mai i le Malaki mataupu 1.
E Taʻitoʻatasi ma Lana e Tala Atu
17, 18. (a) Aiseā na faamalaiaina ai e Ieova le “tagata pepelo”? (e) O le ā sa leʻi manatuaina e i latou e tala pepelo?
17 I aso o Malaki sa paʻū i le tagata lava ia lana avega tauave e tusa o ana gaoioiga sa fai, e faapena foʻi i tatou. (Roma 14:12; Kalatia 6:5) I le ōgatusa ma lenei mea, na taʻua i le Malaki 1:14 e faapea: “Ia faafanoina le tagata pepelo ua i ai le poa [e lelei] i lona lafu, a ua tauto o ia ma fai taulaga i le Alii i le mea leaga.” O se tagata sa iai se lafumanu, o lona uiga e sili atu i le tasi le manu na iai, ma e tele ni manu e mafai ona ia filifili mai ai. I le filifilia la o se manu mo le taulaga, e lē tatau ona ia filifilia se manu e tauaso, pipili, pe e maʻi foʻi. Afai sa ia filifilia se manu leaga faapena, ua faaalia ai la lona manatu faatauvaa i le faatulagaga a Ieova mo le osia o taulaga, auā e mautinoa lava lona mauaina o se manu e lē o iai se faalētonu!
18 Ua talafeagai ai la le faamalaiaina e Ieova o le tagata faitogafiti o lē sa iai se manu poʻa e lelei, ae na i lo le aumaia o le manu lelei, atonu ua ia aumaia pe tau tosoina mai se manu tauaso, pipili, pe maʻi, i le faitaulaga e faia ai le taulaga. Ae e aunoa lava ma se mea o taʻua ai se faitaulaga o faamatala atu ai le Tulafono ma faamalamalama i ai e faapea e lē taliaina se manu leaga faapena. (Levitiko 22:17-20) E iloa uma e tagata e mafaufau e faapea e matuā tulaga leaga lava mo i latou pe a latou avatu sea ituaiga meaalofa i lo latou kovana. E ao ona manatua, o loo latou feutagaʻi ma Lē e Silisili Ese, o Ieova, o lē e matuā sili lona mamalu na i lo se kovana faaletagata! O le auala lenei sa faaupu mai ai e Malaki 1:14: “O le Tupu sili lava aʻu, ua fetalai mai ai Ieova o ʻau; e matautia lava loʻu igoa i nuu ese.”
19. O le ā o loo tatou moomoo i ai, ma o le ā e tatau ona tatou faia?
19 I le avea ai ma auauna faamaoni a le Atua, o loo tatou moomoo i le aso o le a faamamaluina ai e le fanau uma a tagata le Tupu Silisili, o Ieova. I lea taimi, o le a “tumu le lalolagi i le malamalama o Ieova, e pei ona ufitia o le iliti tai i le suāsami.” (Isaia 11:9) Ae i le taimi nei, ia tatou taumafai e ausiaina mea e manaʻomia e Ieova e ala i le faataʻitaʻi i le faisalamo o lē na faapea mai: “Ou te faaneenee atu foi ia te ia i le viiga.” (Salamo 69:30) Ina ia taunuu lenā tulaga, o loo i le valoaga a Malaki nisi fautuaga e mafai ona tele ni ona aogā iā i tatou. O lea la seʻi o tatou iloiloina totoʻa isi vaega o le tusi o Malaki i isi mataupu e lua o loo sosoo mai.
Pe E te Manatua?
• Aiseā e ao ai ona tatou faaneeneeina Ieova?
• I aso o Malaki, aiseā na lē taliaina ai e Ieova taulaga na faia e le ʻaufaitaulaga?
• E faapefea ona tatou ofoina atu iā Ieova se taulaga o viiga?
• O le ā le uunaʻiga e tatau ona iai i le tapuaʻiga moni?
[Fesili mo le Suʻesuʻega]
[Ata i le itulau 9]
Na faasino mai le valoaga a Malaki i o tatou aso
[Ata i le itulau 10]
E leʻi talisapaia e Esau mea faaleagaga
[Ata i le itulau 11]
Na ofoina atu e faitaulaga ma tagata taulaga lē lelei
[Ata i le itulau 12]
I le lalolagi aoao, o loo ofoina atu e Molimau a Ieova taulaga o viiga e aunoa ma le tapā o se totogi