Le Auala na Fesoasoani ai se Atalii i Lona Tamā

NA AAFIA Semisi mai Egelani i le 32 o ona tausaga i se faafitauli ogaoga o le mafaufau ma iʻu ai ina tau faalētonu lana tautala. E ui i lea, sa auai atu pea o ia i sauniga a Molimau a Ieova faatasi ai ma lona tinā ma lona tuafafine mo le tele o tausaga. Peitaʻi, sa leʻi faaalia lava se naunau tele o lona tamā i o latou talitonuga. I se tasi afiafi ina ua tuua mai se sauniga lea sa faataʻitaʻi ai le auala e valaaulia ai se tagata masani i le Faamanatuga o le maliu o Keriso, na faanatinati ai ona alu atu Semisi i lona potu. Na mulimuli atu i ai lona tinā iā te ia ona o le fia iloa ma maua atu ai o loo ia suʻeina solo lomiga tuai o mekasini o Le Olomatamata ma le Ala Mai! Na ia fili mai se lomiga o loo iai le ata o le tusi valaaulia o le Faamanatuga i le pito i tua ma faanatinati atu loa i lona tamā. Na ia faasino muamua atu i le ata ona ia tusi atu lea i lona tamā ma faapea atu: “Oe!” Ua tau fai fetepaʻi lona tamā ma lona tinā i le teteʻi ina ua la iloaina o lea ua valaaulia e Semisi lona tamā i le Faamanatuga. Na faapea mai lona tamā atonu o le a ia auai atu i ai.

I le afiafi o le Faamanatuga, na alu atu ai Semisi i le mea o loo tautau ai ofu o lona tamā, ma fili mai se ofuvae uumi ma tuuina atu i lona tamā ma fai atu ana taga ina ia ofu. Na tali mai i ai lona tamā e lē alu i le sauniga. O lea, na ō atu ai na o Semisi ma lona tinā i le Maota o le Malo.

Peitaʻi, mulimuli ane, na oo ai ina faateteleina le faafaigatā o Semisi pe a taumafai lona tinā e sauni o ia latou te ō i sauniga a le faapotopotoga, ua manaʻo e nonofo i le fale ma lona tamā. O lea i le tasi taeao o le Aso Sa, na toe musu ai foʻi Semisi e usitaʻi i lona tinā a o taumafai e sauni o ia mo le sauniga. Na matuā teʻi lava le tinā ina ua faliu mai le tamā ma faapea atu i lona atalii: “Semisi, a ou alu i le sauniga nei, e te alu?” Na pupula fiafia atu mata o Semisi. Na oso atu o ia ma fusi lona tamā ma faapea atu: “Ioe!” ma o lea na ō atu ai loa le toʻatolu lea i le Maota o le Malo.

Mai lenā lava aso, na faaauau ai pea ona auai atu le tamā o Semisi i sauniga uma i Aso Sa, ma e leʻi umi ae ia faailoa atu e faapea pe afai e manaʻo e agaʻigaʻi i luma e ao ona ia auai atu foʻi i isi sauniga. (Eperu 10:24, 25) O le mea lea na ia faia, ma i le lua masina mulimuli ane ai, na amata ai ona ia suʻesuʻeina le Tusi Paia e lē aunoa. Na vave ona ia agaʻigaʻi i luma, ma faia suiga manaʻomia i lona olaga, ma e leʻi umi ae amata loa ona faia sona sao i le galuega talaʻi o le Malo. Ina ua mavae le tausaga e tasi talu ona ia suʻesuʻeina le Tusi Paia, na ia tuuina atu loa lona ola iā Ieova ma faailogaina ai e ala i le faatofuina i le vai. O loo auauna nei o ia o se auauna o le faiva i lana faapotopotoga. I le taimi nei, ua auauna ai ma le autasi tagata uma o le aiga iā Ieova.