Po ua E Lava Sauni?

NA FAAILOA atu e Iesu Keriso i ona soo le faamoemoe o le ola e faavavau, ae na ia faalaeiauina foʻi i latou e faapea, i le avea ma Kerisiano, e tatau ona lava sauni i latou. Sa ia faataʻitaʻia le manatu i lona fesili atu: “O ai foi so outou ua fia fai se ʻolo, e le muai nofo i lalo e faitau tupe e totogi aʻi, [pe muamua faitau le tau] po ua lava ana mea e faauma ai?” (Luka 14:28) O le ā le tau na uiga i ai Iesu?

E fetaiaʻi Kerisiano uma lava ma tulaga faigatā—o nisi e matuā matuiā. (Salamo 34:19; Mataio 10:36) O lea la, e manaʻomia ai ona tatou sauniuni faalemafaufau ma le faaleagaga ina ia lē faateʻia i tatou pe a fesagaʻi ma teteega po o isi faafitauli. Ua tatau ona leva ona tatou sauniuni mo na luʻi e tusa ai ma le avea o i tatou ma soo o Keriso, i le iloaina faapea o le taui, o le laveaʻiina lea mai le agasala ma le oti e sili mamao atu lona aogā na i lo o so o se mea e mafai ona tatou maua mai lenei lalolagi. Ioe, e leai se mea ua faatagaina e le Atua, e oo lava i le oti, e mafai ona āfaina ai i tatou e faavavau pe afai e faaauau pea ona tatou auauna iā te ia.—2 Korinito 4:16-18; Filipi 3:8.

E mafai faapefea ona malosi faapena lo tatou faatuatua? O taimi uma lava e tatou te faia ai se faaiʻuga saʻo, tutū mausalī i amioga faa-Kerisiano, po o le faia o se gaoioiga e ōgatusa ma le finagalo o le Atua, e matuā malosi ai lo tatou faatuatua, aemaise lava pe afai e uunaʻia i tatou e faia se mea sesē. Pe afai e oo moni iā i tatou faamanuiaga mai iā Ieova ona o lo tatou uia o se ala faamaoni, o le a faamalosia la ma faalolotoina ai lo tatou faatuatua. I lenā auala, ua tatou mulimuli ai i le faaaʻoaʻoga a Iesu, o ona uluaʻi soo, faapea tane ma fafine faatuatua uma o ē i le faagasologa mai o tausaga, sa ʻlava sauniuni’ mo le avea o ni auauna a le Atua.—Mareko 1:16-20; Eperu 11:4, 7, 17, 24, 25, 32-38.