E Manaʻomia Ona Tatou Iloa po o Ai le Atua

PE E lē faagaeetia oe i le vaaia o le feʻilafi o fetu o le lagi i se pō maninoa? Pe e lē avea le manogi o fugalaau felanulanuaʻi ma mea e olioli ai? Pe e te lē fiafia e faalogologo i pesega a manufelelei ma le gasē o laulaau i le agi mālū o le savili? Ae maʻeu le faatosinaloto o tafolā lapopoʻa ma isi meaola o loo aināina ai le sami! Ae e iai foʻi tagata ua iai tomai faalemafaufau faatasi ai ma faiʻai e maoaʻe le lavelave. E faapefea ona e faamatalaina le tupuga mai o mea matagofie uma o loo siʻomiaina ai i tatou?

E talitonu nisi e faapea o nei mea uma na tupuga mai i se puna na teʻi lava ua iai e aunoa ma le fuafuaina. Ae afai o le tulaga lenā, aiseā la e talitonu ai tagata i le Atua? Aiseā o le a manaʻomia ai e ni foafoaga na tuufaatasia e ni vailaau eseese e aunoa ma se fuafuaina ni manaʻoga mo mea faaleagaga?

“Ua mauaa lotu i olaga o tagata ma ua iai le poto masani o vaega uma o tagata mai so o se tulaga tau tamaoaiga ma talaaga tau aʻoaʻoga e uiga i lotu.” O lenei faamatalaga ua taaofaʻi faatasi ai le suʻesuʻega sa faaalia e Polofesa Alister Hardy i lana tusi The Spiritual Nature of Man. O suʻesuʻega talu ai nei o le faiʻai na tataʻiina atu ai ni saienitisi tau i neula o le tino e faapea, o tagata atonu na “foafoaina aʻe ai i totonu” se faanaunauga mo lotu. Ua faapea mai le tusi ua faaulutalaina Is God the Only Reality?: “O saʻiliʻiliga i le uiga o lotu . . . o se mea lea e masani ona tupu i aganuu uma ma so o se ituaiga matua lava talu mai le amataga o le tagata.”

Seʻi iloiloina le faaiʻuga na faia e se tagata aʻoaʻoina i le pe ā ma le 2,000 tausaga ua mavae. Na ia tusi e faapea: “E taitasi fale ma saunia e se tasi; a o le na te saunia mea uma lava o le Atua lea.” (Eperu 3:4) O le mea moni, ua taʻua mai e le fuaiupu muamua lava o le Tusi Paia faapea: “Na faia e le Atua le lagi ma le lalolagi i le amataga.”—Kenese 1:1.

E ui i lea, o ai la le Atua? E eseese manatu o tagata i lenei fesili. Ina ua fesiligia po o ai le Atua, na tali mai se talavou Iapani e igoa iā Yoshi e faapea: “Ou te lē mautinoa. O aʻu ou te lotu Puta, ma e leai se tāua iā te aʻu o le iloaina po o ai le Atua.” E ui i lea, na taʻutino mai e Yoshi le avea o Puta lava ia ma atua i le toʻatele. O se faipisinisi e igoa iā Niki ua 60 ma ona tupu ona tausaga e talitonu i le Atua ma e manatu iā te ia o se malosi silisili ese. Ina ua talosagaina e faamatala mai po o le ā lona silafia e uiga i le Atua, na tali mai Niki ina ua mavae se taimi umi o faatali: “O se fesili faigatā tele lea, laʻu uō e. Pau le mea e mafai ona ou taʻu atu e iai le Atua. O loo soifua o ia.”

 O nisi tagata ua “tapuaʻi ma auauna i mea na foafoaina e le Atua na i lo o Lē na Foafoaina nei mea.” (Roma 1:25, Today’s English Version) E faitau miliona tagata ua tapuaʻi i o latou tuaa ua maliliu, i le talitonu e faapea ua faigatā ona faalatalata atu i le Atua ona ua mamao tele lona afioaga. I le lotu Hinitū, e tele o latou atua ma atua fafine. Na tapuaʻia atua eseese, e pei o Seu ma Hereme i aso o aposetolo o Iesu Keriso. (Galuega 14:11, 12) E tele lotu o Kerisinetoma ua aʻoaʻoina e faapea o le Atua o se Tolutasi, e faia aʻe i le Atua le Tamā, le Atua le Alo, ma le Atua le Agaga Paia.

O le mea moni, ua taʻua i le Tusi Paia “ua i ai ‘atua’ e toatele.” Peitaʻi, ua toe faapea mai: “Ua ia te i tatou le Atua e toatasi o le Tamā ia, e fua mai ia te ia mea uma.” (1 Korinito 8:5, 6) Ioe, e na o le toʻatasi lava le Atua moni. Ae o ai la o ia? E faapeʻī o ia? E tāua mo i tatou ona iloaina tali i nei fesili. Na tatalo atu Iesu iā te Ia lea: “O le ola e faavavau foi lenei, ia latou iloa [“mauaina pea o le poto e uiga iā te,” NW ] oe le Atua moni e toatasi, atoa ma le ua e auina mai, o Iesu Keriso lea.” (Ioane17:3) E iai le māfuaaga e talitonu ai faapea o lo tatou lelei e faavavau, e faalagolago lea i lo tatou iloaina o le upu moni e uiga i le Atua.

[Ata i le itulau 3]

O ā ni faamatalaga e uiga i lo latou tupuaga mai?

[Faamatalaga i Ata]

Tafolā: Faaaloaloga a le Tourism Queensland

 [Faamatalaga i Ata i le itulau 2]

FAAVAA: Index Stock Photography © 2002