E Taʻitaʻia e le Faamaoni Ē e Amiotonu

“O LE tagata ua fanau mai i le fafine, ua saasaa ona aso, mona ua tumu i le atuatuvale.” (Iopu 14:1) E foliga mai o tigā ma mafatiaga o ni mea e masani ai le soifuaga faaletagata. O lea, e oo lava i aso faisoo o le olaga e mafai ona tumu i mea e popole ma vevesi ai! O le ā o le a taʻitaʻiina ai ma le manuia i tatou mai nei tulaga faigatā ma fesoasoani ai ina ia tatou iai i se tulaga amiotonu ma le Atua?

Seʻi iloilo foʻi le faaaʻoaʻoga a se tagata mauʻoa e igoa iā Iopu, o lē na soifua i le pe ā ma le 3,500 tausaga ua mavae i le nofoaga lea ua taʻua nei o Arapi. Pagā se mala na faaooina atu e Satani i lenei tagata e mataʻu i le Atua! Na leiloloa uma ana lafumanu ma na mafatia i le maliliu o lana fanau pele. E leʻi umi lava lenā, ae taia e Satani Iopu i se maʻi papala e amata mai lava i lona tumuaʻi seʻia oo atu i ona alofivae. (Iopu, mataupu 1, 2) Sa leʻi malamalama Iopu i le māfuaaga ua tutupu ai nei mala iā te ia. Peitaʻi, ‘sa le agasala Iopu i ona laugutu.’ (Iopu 2:10) “Seia oo lava i loʻu oti ou te le faateaina lava laʻu amio sao [“loʻu faamaoni,” NW].” (Iopu 27:5) Ioe, o le faamaoni o Iopu na taʻitaʻia mai ai o ia i ona tofotofoga.

O le faamaoni ua faamatalaina o le mamā ma le atoatoa tau amio e aofia ai le lē mataʻuleagaina ma le lē ponā i le silafaga a le Atua. Peitaʻi, e lē o le uiga faapea e ao ona lelei atoatoa le tautala ma gaoioiga a tagata lē lelei atoatoa, o ē e lē mafai ona ausia atoatoa tapulaa a le Atua. Na i lo lea, o le faamaoni o le tagata e uiga atu i le atoatoa po o le loto atoa e tuutoina atu iā Ieova ma lona finagalo ma lana fuafuaga. E taʻitaʻia e lenā tuutoina i le Atua ē e amio saʻo i so o se tulaga ma taimi uma. Ua faailoaina mai e le vaega muamua o le mataupu e 11 o le tusi o le Tusi Paia o Faataoto le auala e mafai ai ona taʻitaʻiina e lo tatou faamaoni i tatou i vala eseese o le soifuaga ma faamautinoa mai iā i tatou faamanuiaga o le a iʻu i ai. O lea, seʻi o tatou suʻe ma le matuā naunau atu i mea o loo faamauina ai.

O le Faamaoni e Taʻitaʻia ai e Faia i le Auala Saʻo Faiga Faapisinisi

I le faaaogāina o upu faafatusolo na i lo o faaupuga faaletulafono e faamamafaina ai le mataupu silisili o le faia o le mea saʻo, ua faapea mai ai le tupu o Isaraelu anamua o Solomona: “O fua faatāutau faaaimago e inosia ia e Ieova; a o le maa e fua aʻi e atoatoa, o lona lea fiafia.” (Faataoto 11:1) O le taimi muamua lenei mai taimi e fā e aliaʻi mai ai i le tusi o Faataoto le fua faatautau ma maa e fua aʻi, ia e faaaogā e faailoa mai e finagalo Ieova ina ia faamaoni ona  tagata tapuaʻi i a latou feutagaʻiga faapisinisi.—Faataoto 16:11; 20:10, 23.

O le tamaoaiga o i latou e maua mai i se fua faatautau faaaimamago—po o le lē faia i le auala saʻo—atonu e faatosina. Ae pe o le a tatou mananaʻo moni ai lava e lafoaʻia tapulaa a le Atua o le lelei ma le leaga e ala i le uia o ni auala lē tonu i faiga faapisinisi? E leai pe afai e taʻitaʻia i tatou e le faamaoni. E tatou te ʻalofia le fai mea lē saʻo, ona o le maa e fua aʻi atoatoa, o le fua talafeagai e faaataina ai le amio saʻo, lea e faafiafiaina ai Ieova.

“O i ai le Poto i E Faamaulalo”

Ua faapea mai atili le tupu o Solomona: “A sau le faamaualuga, ona sau ai lea o le mā; a o i ai le poto i e faamaulalo.” (Faataoto 11:2) O le faamaualuga—pe e faaalia ona o le mimita, le lē usitaʻi, po o le matauʻa—e aumaia ai lava le faalumaina. I le isi itu, o le iloaina ma le lotomaulalo o le mea e gata mai ai lo tatou mafai, o se auala lea o le atamai. Maʻeu le lelei ona faataʻitaʻia mai e faaaʻoaʻoga o le Tusi Paia le moni o lenei faataoto!

Na taʻitaʻia e Koru, o se tagata o le ʻau sā Levī se ʻaufouvale faasaga i le pule a auauna tofia a Ieova o Mose ma Arona. O le ā le iʻuga o lenā gaoioiga faamaualuga? ‘Na faamaga le gutu o le eleele ma folo’ aʻi nisi o tagata fouvale, a o faaumatiaina e ala i le afi isi e aofia ai ma Koru. (Numera 16:1-3, 16-35; 26:10; Teuteronome 11:6) Pagā se faalumaina! Seʻi mafaufau foʻi iā Usa, o lē na aapa atu ma le faamaualuga e taofi le atolaau o le feagaiga ina nei paʻū i lalo. Na fasiotia ai lava o ia i lenā taimi. (2 Samuelu 6:3-8) Maʻeu le tāua o lo tatou ʻalofia o le faamaualuga!

O le tagata lotomaulalo ma le agamalu e lē faalumaina o ia tusa lava pe na te faia se mea sesē. O Iopu sa lē lelei atoatoa e ui lava sa avea o ia ma faaaʻoaʻoga lelei i le tele o itu. Na faaalia mai i ona tofotofoga se vaivaiga matuiā sa i nisi o ona mafaufauga. I le puipuia o ia mai ē na tuuaʻia o ia, na oo ai Iopu i se tulaga lē paleni. Na oo foʻi ina faailoa mai e ia faapea e sili atu lona amiotonu na i lo le Atua. (Iopu 35:2, 3) Na faapefea ona faasaʻoina e Ieova mafaufauga o Iopu?

I le faasino atu i le lalolagi, le sami, le lagi e feʻilafi ai fetu, o nisi o meaola, ma isi foafoaga ofoofogia, na tuuina atu ai e Ieova iā Iopu se lesona o le faatauvaa o le tagata pe a faatusatusa atu i le maualuga o le Atua. (Iopu, mataupu 38-41) Sa leʻi taʻua lava i le fetalaiga a Ieova le māfuaaga na puapuagatia ai Iopu. Sa leʻi manaʻomia ona ia taʻua fua. Sa agamalu Iopu. Na ia amanaʻiaina ma le lotomaulalo lo la eseesega tele ma le Atua, lona ia lava tulaga le lē lelei atoatoa ma ona vaivaiga ma le amiotonu a Ieova ma lona mana. Na ia faapea mai: “Ua ou ʻinoʻino ai ia te au, ua ou salamō foi i le efuefu ma le lefulefu.” (Iopu 42:6) O le faamaoni o Iopu na taʻitaʻiina atu ai o ia e nofosauni e taliaina le aʻoaʻiga. Ae faapefea i tatou? E ala i le taʻitaʻiina e le faamaoni, pe o le a tatou nofosauni ai ea e taliaina aʻoaʻiga po o faasaʻoga pe a manaʻomia?

Sa agamalu foʻi Mose ma lotomaulalo. Ina ua lē lavatia e ia ona taulimaina faafitauli o isi, na ofoina atu ai e Ietero, le tamā o lana avā se vaifofō aogā: O le faasafua atu lea o avega tauave i isi tane agavaa. I lona iloaina o mea e gata mai ai lona mafai, na taliaina ai ma le atamai e Mose le fautuaga. (Esoto 18:17-26; Numera  12:3) O se tagata agamalu e lē faatalatū i le faasafuaina atu o le pule i isi, pe e lē fefe neʻi mamulu atu le pule e ala i le faasoa atu o avega tauave talafeagai i isi tane ua agavaa. (Numera 11:16, 17, 26-29) Na i lo lea, e naunau o ia e fesoasoani atu iā i latou ina ia agaʻigaʻi i luma faaleagaga. (1 Timoteo 4:15) Pe e lē tatau ea foʻi ona tatou faia faapea?

‘E Saʻo le Ala o Le e Amiotonu’

Ia mātau foʻi, o le faamaoni e lē puipuia ai pea lē e amio saʻo mai lamatiaga ma mala, ua faapea mai Solomona: “O le amio sao a e ua amiotonu e taʻitaʻiina ai i latou; a o le faapiopio o e amioletonu e fano ai i latou.” (Faataoto 11:3) O le mea moni, o le faamaoni e taʻitaʻiina ai lē e amio saʻo e faia le mea ua tonu i le silafaga a le Atua, e oo lava foʻi i tulaga faigatā, ma e aumaia ai aogā tumau mulimuli ane ai. Na musu Iopu e lafoaʻia lona faamaoni, ma na “faamanuia e Ieova o le gataaga o Iopu i lona amataga.” (Iopu 42:12) O i latou e fai mea faaʻoleʻole atonu e latou te manatu ua latou manuia i mea na tigāina ai isi tagata ma atonu e foliga mai e tamaoaiga ai mo se taimi. Peitaʻi, mulimuli ane o le a faaleagaina ai i latou lava i lo latou lē faamaoni.

Ua faapea mai le tupu atamai: “E le aoga le oloa i le aso o le toasa; a o le amiotonu, e laveai lea nai le oti.” (Faataoto 11:4) Pagā le valea o le pologa e saʻili meafaitino ae lē taulau ai ona faaavanoa le taimi mo suʻesuʻega totino, tatalo, auai i sauniga, ma le faiva i le fanua—o gaoioiga ia e sili ona faalolotoina ai lo tatou alofa mo le Atua ma faamalosia ai lo tatou tuutoina atu iā te ia! E lē avea le tele o le tamaoaiga e laveaʻiina ai i le puapuaga tele o loo fotuaʻi mai. (Mataio 24:21) O le a laveaʻiina na o le amiotonu a ē e amio saʻo. (Faaaliga 7:9, 14) O lea e atamai ai ona tatou amanaʻiaina le augani a Sefanaia: “Manū o lei oo mai ia te outou le aso o le toasa o Ieova. Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu.” (Sefanaia 2:2, 3) O lea seʻi avea nei ma o tatou sini le ‘⁠ava ia Ieova i a tatou oa.’—Faataoto 3:9.

I le faamamafaina atili o le tāua o le tuliloaina o le amiotonu, ua faaeseese ai e Solomona le iʻuga o lē e amiotonu ma le tagata amioleaga, i le faapea mai: “O le amiotonu a le ua sao e faalauleleiina ai lona ala; a o lana amio leaga, e paū ai le ua amio leaga. O le amiotonu a e amio saʻo e laveaiina ai i latou; a o e faapiopio, e maua i latou i a latou amio paaa. A oti le tagata amio leaga, ua fano lona faatuatuaga; e fano foi le faamoemoe o le tagata amioletonu. E laveaiina lē amiotonu ai le puapuaga; a e sau lē amio leaga e sui aʻi o ia.” (Faataoto 11:5-8) O le tagata e amiotonu e lē paʻū o ia i lona lava ala pe e maileia foʻi i ana feutagaʻiga. E saʻo lona ala. I le iʻuga, e laveaʻiina le tagata amio saʻo mai le puapuaga. O le tagata amioleaga atonu e foliga mai e malosi, ae e lē laveaʻiina i latou faapea.

“Ua Olioli le Aai”

E iai āuga o le faamaoni o ē amio saʻo ma mea leaga e fai e i latou e amioleaga i isi tagata. “O le gutu o le faalematau e fano ai lē la te tuaoi; a o le poto e laveaiina aʻi ē amiotonu.” (Faataoto 11:9) O ai o le a na faafitia le mea moni e faapea o le taufaaleaga, faitala e faaleaga aʻi, upumasoā, ma talanoaga lē aogā e faaleaga aʻi isi? I le isi itu, o le tautala a le tagata amiotonu, e mamā, e mafaufauina lelei, ma e manatu mamafa. E laveaʻiina o ia e ala i le poto, auā o lona faamaoni e foaʻiina atu ai iā te ia manatu e faamaonia ai e pepelo lē o loo tuuaʻia o ia.

Ua faapea mai atili le tupu: “Ua olioli le aai pe a manuia e amiotonu; e ofo fiafia foi pe a fano e amio leaga.” (Faataoto 11:10) E masani lava ona alofagia tagata amiotonu e isi, ma e faagaeetia ai o latou tuaoi ona o i latou—e fiafia ma olioli.  E leai se tasi e mitamita ona o se tagata “amio leaga.” Pe a feoti tagata amioleaga, e lē masani ona faavauvau ai tagata i le lautele. E mautinoa o le a lē toe iai se faanoanoa pe a ‘vavaeeseina e amio leaga ai le laueleele ma liaiina e amio pepelo’ e Ieova. (Faataoto 2:21, 22) Na i lo lenā, o le a olioli i latou ona ua tafiesea tagata amioleaga. Ae faapefea i tatou? E lelei ona tatou iloiloina pe o saosaolaumea le auala o loo tatou amioaʻi ai i le olioli o isi.

“E Faamamaluina ai le Aai”

I se faaeseesega atili o iʻuga o le tagata amio saʻo ma le tagata amioleaga i se nuu, ua taʻua ai e Solomona e faapea: “O le faamanuia o e amio saʻo e faamamaluina ai le aai; a o gutu o e amio leaga, e lepetia ai.”—Faataoto 11:11.

O tagata o se aai e mulimuli i le ala saʻo, e faatupuina ai le filemu ma le tulaga sololelei, ma e faalaeiauina ai isi o lenā vaipanoa. O lea, o se aai e faamamaluina—e faatamaoaigaina. O i latou o ē e tautala taufaaleaga, faatigā, ma faia tala e lē moni e mafai ona faatupuina ai fevesiaʻiga, le lē fiafia, le lē autasi, ma faafitauli. E faapitoa ona moni lenei tulaga pe afai o nei tagata o loo i ni tulaga aloaʻia. E pagatia lenā aai i le lē maopoopo, faiga piʻopiʻo, ma e paʻū tau amio ma atonu foʻi i le tulaga tau tupe.

E tutusa pau lava foʻi le faatatauga o le mataupu e 11 o loo taʻua i le Faataoto 11:11 i tagata o Ieova a o latou auaufaatasi ai o le tasi ma le isi i a latou faapotopotoga e pei o ni aai. O se faapotopotoga e iai tagata faaleagaga—o ē amio saʻo lea e taʻitaʻiina e ala i lo latou faamaoni—o le a iai so latou aafiaga i se faapotopotoga e fiafia, maelega, ma lotofesoasoani ona tagata, lea e viia ai le Atua. E faamanuiaina e Ieova le faapotopotoga, ma e olaola faaleagaga. E iai taimi, o i latou atonu e lē fiafia ma lē faamalieina, o ē vaavaai masei ma tautatala taufaaleaga e uiga i le auala o loo faia ai mea, e pei o ni “aa oona” e mafai ona salalau atu ma faaleagaina ai isi o ē sa leʻi aafia muamua. (Eperu 12:15) O tagata faapena e masani ona mananaʻo i se pule e sili atu ma tulaga taualoa. E latou te faatupuina tala e faapea e lē o iai se faamasinotonu, e faailogalanu, po o tulaga faapena i totonu o le faapotopotoga pe i le vaega a toeaina. O le mea moni, ua faatupuina e o latou gutu fevaevaeaʻiga i le faapotopotoga. Pe e lē tatau ea ona tatou faataligatuli i a latou faamatalaga ma taumafai e avea ma tagata faaleagaga o ē e faatupuina le filemu ma le autasi i totonu o le faapotopotoga?

Ua faaauau ona faapea mai Solomona: “O le ua leai sona mafaufau na te ʻinoʻino i lē la te tuaoi; a ua faalologo le tagata mafaufau. O lē fealuai ma feaveaveai, na te faaali upu faalilo; a o le ua loto faamaoni na te tanutanumai le upu.”—Faataoto 11:12, 13.

Pagā se matuā faaleagaina ai e se tasi o lē e leai se faautauta, pe e “leai o sona mafaufau”! E tautala pea ma le lē le pulea i se tulaga e taufaaleaga po o le faatigā. E tatau i toeaina ua tofia ona taofia vave na ituaiga o aafiaga. E lē pei o “le ua leai sona mafaufau,” o le tagata e faautauta e iloa le taimi e lē tautala ai. Na i lo le faaleagaina o lona tulaga maufaatuatuaina, e na te faaliloina lava se mea. I le iloaina e faapea o se laulaufaiva e lē pulea e mafai ona faapogaia ai le faaleagaina, o le tagata faautauta la e “loto faamaoni.” E faamaoni o ia i uso talitonu ma na te lē faaali atu mataupu faalilolilo lea e mafai ona lamatia ai i latou. Maʻeu se faamanuiaga i le iai i le faapotopotoga o i latou e tausisia le faamaoni!

Ina ia fesoasoani iā i tatou e savavali i le ala o ē amiotonu ua saunia ai e Ieova le anoanoaʻi o meaʻai faaleagaga i lalo o le taʻitaʻiga a le  “auauna faamaoni ma le mafaufau.” (Mataio 24:45) O loo tatou maua foʻi le tele o le fesoasoani totino e ala mai i toeaina Kerisiano i a tatou faapotopotoga e pei o ni aai. (Efeso 4:11-13) E tatou te matuā lotofaafetai mo nei sauniuniga, auā “a leai se pule, ua malaia le nuu; a o le toatele o faipule, e saogalemu ai.” (Faataoto 11:14) Tusa lava po o le ā le tulaga e ono tulaʻi mai, seʻi o tatou maumauaʻi e ‘savavali ma le faamaoni.’—Salamo 26:1.

[Faamatalaga faaopoopo i le itulau 26]

Pagā le valea o le pologa e saʻili meafaitino ae lafoaʻia ai gaoioiga faatiokarate!

[Ata i le itulau 24]

Na taʻitaʻiina Iopu e ala i lona faamaoni, ma na faamanuiaina o ia e Ieova

[Ata i le itulau 25]

Na oti Usa ona o lona faamaualuga