Faaalia le Alofa Agalelei iā i Latou o Loo Manaʻomia

“Ia alofa agalelei o le tasi i le tasi.”—SAKARIA 7:9, NW.

1, 2. (a) Aiseā e ao ai ona tatou faaalia le alofa agalelei? (e) O ā fesili o le a tatou iloiloina?

UA TOMATAUINA i tatou e le Afioga a le Atua ina ia naunau i le “alofa” [“alofa agalelei,” NW]. (Mika 6:8, faaopoopoga i le pito i lalo, NW) O loo aumaia ai foʻi māfuaaga e ao ai ona tatou faia faapena. O se tasi o māfuaaga, “o le tagata alofa [“alofa agalelei,” NW] ua agalelei o ia ia te ia lava.” (Faataoto 11:17) Maʻeu le moni! O le faaalia o le alofa agalelei, po o le alofa faamaoni, e mafai ona atiina aʻe ai ni faiā māfana ma tumau ma isi. O le iʻuga, o le a tatou maua ai ni uō faamaoni—lea o le a avea moni o se taui tautele!—Faataoto 18:24.

² E lē gata i lenā, ua taʻu mai e le Tusi Paia iā i tatou: “O le ua tausisi i le amiotonu ma le alofa [“alofa agalelei,” NW], e maua e ia le ola.” (Faataoto 21:21) Ioe, o lo tatou tausisi i le alofa agalelei, o le a alofagia ai i tatou e le Atua ma o le a tatou maua ai le avanoa e olioli ai i faamanuiaga i le lumanaʻi, e aofia ai le ola e faavavau. Ae e mafai faapefea ona tatou faaalia le alofa agalelei? O ai e ao ona tatou faasafua atu i ai? Ma pe e eseese le alofa agalelei mai le agalelei masani faaletagata po o le agalelei taatele?

Agalelei Faaletagata ma le Alofa Agalelei

3. E faapefea ona eseese le alofa agalelei mai le agalelei faaletagata?

³ E tele auala e eseese ai le agalelei masani  faaletagata ma le alofa agalelei. Mo se faaaʻoaʻoga, o i latou e faaalia le agalelei faaletagata e masani ona latou faia faapena e aunoa ma se piitaga vavalalata, po o se faiā totino ma tagata o loo latou agalelei i ai. Peitaʻi, a tatou faaalia le alofa agalelei i se tasi, tatou te faapipii atu ma le alofa i tatou lava i lenā tagata. I le Tusi Paia, atonu sa faavae aʻe faailoaga o le alofa agalelei i le va o tagata, i ni faiā ua uma ona osia. (Kenese 20:13; 2 Samuelu 3:8; 16:17) Pe atonu sa faavae i ni faiā e māfua mai i ni gaoioiga muamua o le alofa agalelei. (Iosua 2:1, 12-14; 1 Samuelu 15:6; 2 Samuelu 10:1, 2) Ina ia faataʻitaʻia lea eseesega, seʻi o tatou faatusatusaina ni faaaʻoaʻoga faale-Tusi Paia se lua, o le tasi mo le agalelei ma le tasi mo le alofa agalelei ua faaalia i le va o tagata.

4, 5. Ua faapefea i faaaʻoaʻoga faale-Tusi Paia e lua o loo sii mai, ona faataʻitaʻia ai le eseesega i le va o le agalelei faaletagata ma le alofa agalelei?

⁴ O se tasi o faaaʻoaʻoga o le agalelei faaletagata, e fesootaʻi atu i se vaega o tagata sa faavaatuʻia, e aofia ai le aposetolo o Paulo. Na tafefea atu i latou i le matafaga o le motu o Melita. (Galuega 27:37–28:1) E ui ina sa leʻi iai muamua se sootaga a tagata Melita ma le ʻaumalaga na pagatia, pe na osia muamua foʻi se faiā ma i latou, ae sa talimālō fiafia le motu i na tagata ese, i le faaalia iā te i latou o le “agalelei faaletagata e sili atu.” (Galuega 28:2, 7) Sa avea lo latou talimālō o se agalelei, ae o se mea sa leʻi fuafuaina ma sa faaalia i tagata ese. O le mea lea, sa avea ai o se agalelei faaletagata.

⁵ I se tulaga talitutusa, seʻi manatu i le agaga talimālō sa faaalia e le Tupu o Tavita iā Mefiposeta, le atalii o lana uō o Ionatana. Na folafola atu e Tavita iā Mefiposeta e faapea: “A o oe, ta te aai faatasi ma aʻu i laʻu laoai e le aunoa.” I le faamatalaina o le pogai o lona faia o lenei fuafuaga, na taʻu atu ai e Tavita iā te ia: “Auā ou te agalelei [“alofa agalelei,” NW] lava ia te oe, ona o Ionatana lou tamā.” (2 Samuelu 9:6, 7, 13) O le talimālō aʻiaʻi o Tavita, e mafai ona faasino atu i ai o se faailoaga o le alofa agalelei, ae lē na o se agalelei faaletagata, auā o se faamaoniga lea o lona faamaoni i se faiā na osia muamua. (1 Samuelu 18:3; 20:15, 42) I se tulaga faapena i aso nei, ua faaali ai e auauna a le Atua le agalelei faaletagata i tagata lautele. E ui i lea, latou te faaalia foʻi ma le onosai le alofa agalelei, po o le alofa faamaoni, iā i latou o ē o loo latou maua faatasi se faiā faamaonia ma le Atua.—Mataio 5:45; Kalatia 6:10.

6. O ā vala o le alofa agalelei na faaalia i le va o tagata o loo faamatilatila i le Afioga a le Atua?

⁶ Ina ia faamanino atili nisi o vala faaopoopo o le alofa agalelei, o le a seʻi o tatou iloiloina puupuu ni tala faale-Tusi Paia se tolu o loo faaaogā ai lenei uiga. Mai nei tala, o le a tatou mātauina ai faapea o le alofa agalelei na faasafua atu e tagata (1) sa faaalia i ni gaoioiga patino, (2) na faasafua atu ma le lotomalie, ma le(3) sa faapitoa ona faaalia atu iā i latou o ē na manaʻomia. E lē gata i lenā, o nei tala o loo faataʻitaʻia ai le auala atonu tatou te faaalia ai le alofa agalelei i aso nei.

Faaalia e se Tamā le Alofa Agalelei

7. O le ā na taʻu atu e le auauna a Aperaamo iā Petueli ma Lapana, ma o le ā le mataupu na faamatilatila e le auauna?

⁷ O loo faamatala i le Kenese 24:28-67 le isi vaega o le tala e uiga i le auauna a Aperaamo, lea na taʻua i le mataupu muamua. Ina ua uma ona feiloaʻi ma Repeka, na valaaulia ai le auauna i le fale o le tamā o Repeka, o Petueli. (Fuaiupu 28-32) O inā na toe faamatala auʻiliʻili atu ai e le auauna lana saʻiliga mo se avā a le atalii o Aperaamo. (Fuaiupu 33-47) Na ia faamatilatila lona manatu e faapea, o lona taulau manuia o se faailoga lea mai iā Ieova, “o le na taʻitaʻi ia te au i le ala tonu, e au mai le afafine o le uso o loʻu matai e fai ma avā a lona atalii.” (Fuaiupu 48) E lē taumatea sa faamoemoe le auauna e faapea, o lona toe taʻu atu ma le faamaoni o le mea na tupu o le a faatalitonu ai Petueli ma lona atalii o Lapana e faapea ua faamanuiaina e Ieova lenei tofiga. I le faaiʻuga, na faapea atu ai le auauna: “O lenei foi, tou te taʻu mai, pe tou te alofa [“alofa agalelei,” NW] ma faamaoni i loʻu matai; a e afai e leai, taʻu mai ia te au, ina ia ou faasaga i le  itu taumatau poo le itu tauagavale.”—Fuaiupu 49.

8. O le ā sa tali atu ai Petueli i le mataupu e uiga iā Repeka?

⁸ Ua uma ona faaalia e Ieova le alofa agalelei iā Aperaamo. (Kenese 24:12, 14, 27) Po o le a lotomalie ea Petueli ina ia faia faapena e ala i le faatagaina o Repeka ina ia ō ma le auauna a Aperaamo? Po o le a fesoasoani ea le alofa agalelei o le tagata i le alofa agalelei o le Atua ina ia faataunuu atoatoa ai lana fuafuaga? Po o le mea ua lē aogā atoa le malaga umi a le auauna? Atonu na matuā faalaeiauina le auauna a Aperaamo ina ua ia faalogo atu o faapea mai Lapana ma Petueli: “Ua tupu mai ia Ieova lena mea.” (Fuaiupu 50) Sa la iloa le taulimaina e Ieova o le mataupu ma vave taliaina ai lana faaiʻuga. O le mea na sosoo ai, sa faailoa atu e Petueli lona alofa agalelei i le faaopoopo atu: “Faauta, o Repeka o i ou luma ia; ina o ia oulua ma ia, ia fai o ia ma avā a le atalii o lou matai, e pei ona fetalai mai ai o Ieova.” (Fuaiupu 51) Na lotomalie Repeka e ō faatasi ma le auauna a Aperaamo, ma e leʻi umi ae avea loa o ia ma avā faapelepele a Isaako.—Fuaiupu 49, 52-58, 67.

Faaalia e se Atalii le Alofa Agalelei

9, 10. (a) O le ā na talosaga atu i ai Iakopo i lona atalii o Iosefa ina ia faia mo ia? (e) Sa faapefea ona faaalia e Iosefa le alofa agalelei i lona tamā?

⁹ Na maua foʻi e le atalii o le atalii o Aperaamo o Iakopo le alofa agalelei. E pei ona taʻu mai e le Kenese mataupu e 47, o le taimi lenā sa ola aʻe ai Iakopo i Aikupito, ma “ua tāu lata mai foi aso e maliu ai [o ia].” (Fuaiupu 27-29) O lona popolega, ona o lea o le a oti ae e lē o i totonu o le nuu na folafola atu e le Atua iā Aperaamo. (Kenese 15:18; 35:10, 12; 49:29-32) Peitaʻi, sa leʻi manaʻo Iakopo e tanu o ia i Aikupito, o lea na ia faia ai fuafuaga ina ia ave lona tino maliu i le nuu o Kanana. O ai sa iai i se tulaga e sili ona lelei ina ia faamautinoa ua faataunuuina lona manaʻoga na i lo o lona atalii o lē sa iai le pule, o Iosefa?

¹⁰ Ua faapea mai le tala: “Ona aami lea e ia [Iakopo] o lona atalii o Iosefa, ua faapea atu ia te ia, Afai ua alofagia aʻu e oe, . . . ia e alofa [“alofa agalelei,” NW] mai, ma faamaoni mai ia te au, aua lava e te tanu ia te au i Aikupito; a ou te taoto faatasi ma oʻu tamā, ia e avae aʻu ai Aikupito, ma e tanu ia te au i lo latou tuugamau.” (Kenese 47:29, 30) Na folafola atu e Iosefa o le a ia faataunuuina lenei talosaga, ma e leʻi umi mulimuli ane ae maliu loa Iakopo. Ua ave foʻi e Iosefa ma isi atalii o Iakopo lona tino maliu “i le nuu o Kanana, ma latou tanumia o ia i le ana i le fanua o Makapelu, na faatauina mai e Aperaamo.” (Kenese 50:5-8, 12-14) O lea sa faaalia ai e Iosefa le alofa agalelei i lona tamā.

Le Alofa Agalelei Mai se Avā a le Tama Tane

11, 12. (a) Sa faapefea ona faaalia e Ruta le alofa agalelei iā Naomi? (e) I le ā le auala na sili ai le alofa agalelei “mulimuli” o Ruta nai lo o le “muamua”?

¹¹ O loo faamatala e le tusi o Ruta le auala na maua ai e le fafine ua oti lana tane o Naomi, le alofa agalelei mai iā Ruta le avā Moapi a lana tama tane. O Ruta o ia foʻi o se fafine ua oti lana tane. Ina ua filifili Naomi e toe foʻi atu i Peteleema i Iuta, sa faaalia e Ruta le alofa agalelei ma le maumauaʻi, i le faapea atu: “O le mea e te alu i ai, ou te alu ai foi; o le mea e te nofo ai, ou te nofo ai, e fai lou nuu moʻu nuu; e fai lou Atua moʻu Atua.” (Ruta 1:16) Mulimuli ane sa faaalia e Ruta lona alofa agalelei ina ua ia faailoa atu lona lotomalie e faaipoipo i se tauaiga ua matua o Naomi, o Poasa. * (Teuteronome 25:5, 6; Ruta 3:6-9) Na taʻu atu e Poasa iā Ruta: “Ua faasilisili lou alofa [“alofa agalelei,” NW] mulimuli nei i le na muamua, ina ua e le alu e mulimuli atu i taulelea, po o sē mativa po o sē mauoa.”—Ruta 3:10.

¹² O le taimi “muamua” na faaalia ai e Ruta le alofa agalelei, sa faasino lea i le taimi na ia tuua ai ona tagata ae mulimuli atu iā Naomi. (Ruta1:14; 2:11) E oo lava i lenā gaoioiga, sa sili atu ai le alofa agalelei “mulimuli”—o le lotomalie lea o Ruta ina ia faaipoipo atu iā Poasa. O lea o le a  mafai ai e Ruta ona fanauina mai se suli mo Naomi, o lē ua loomatua e lē toe fanau. Na faia le faaipoipoga, ma e mulimuli ane ina ua fanau Ruta, sa alalaga fafine o Peteleema: “Ua fanau mai se tama ia Naomi.” (Ruta 4:14, 17) Sa avea Ruta o se ʻfafine amio lelei tele,’ o lē na tauia e Ieova i se faaeaga matagofie o le avea lea ma tupuaga o Iesu Keriso.—Ruta 2:12; 3:11; 4:18-22; Mataio 1:1, 5, 6.

Faaalia i Gaoioiga

13. Sa faaalia faapefea e Petueli, Iosefa, ma Ruta lo latou alofa agalelei?

¹³ Pe na e mātauina le auala na faaalia ai e Petueli, Iosefa, ma Ruta lo latou alofa agalelei? Na latou faia faapena e lē gata i upu agalelei, ae i gaoioiga patino. Sa leʻi tau ina faapea atu Petueli, “faauta, o Repeka” lea, ae na ia “tuuina atu [moni] lea o Repeka.” (Kenese 24:51, 59) Sa leʻi tau ina faapea atu Iosefa, “Ou te faia lava e pei ona e fai mai ai,” ae sa ia faia ma ona uso iā Iakopo “e faapei ona ia fetalai atu ia i latou.” (Kenese 47:30; 50:12, 13) Sa leʻi tau ina faapea atu Ruta, “o le mea e te alu i ai, ou te alu ai foi,” ae na ia tuua ona tagata ae ō faatasi ma Naomi, ma “ua o ane i laua, ua oo mai i Peteleema.” (Ruta 1:16, 19) A o iai i Iuta, sa toe gaoioi ai foʻi Ruta “e tusa ma mea uma na fai mai ai le tinā o lana tane ia te ia.” (Ruta 3:6) Ioe, i le pei o isi, o le alofa agalelei o Ruta, sa faaalia i gaoioiga.

14. (a) Ua faapefea i auauna i aso nei a le Atua ona faaalia le alofa agalelei e ala i gaoioiga? (e) O ā gaoioiga o le alofa agalelei o e iloa o loo faia e Kerisiano i lou vaipanoa?

¹⁴ O se mea e faafiafialoto le vaaia o le auala o loo faaauau ai e auauna a le Atua i aso nei ona faaalia le alofa agalelei e ala i gaoioiga. Mo se faaaʻoaʻoga, seʻi manatu iā i latou o ē o loo ofoina atu le lagolagosua ma le onosai i itu tau faalogona o aumea talitonu o ē e lē atoatoa le malosi, o ē lotomafatia, pe lotofaavauvau. (Faataoto 12:25) Po o le manatunatu foʻi i le toʻatele o Molimau a Ieova o ē o loo momoliina atu ma le faamaoni tagata matutua i le Maota o le Malo ina ia auai i sauniga a le faapotopotoga i vaiaso taʻitasi. O Ana, ua 82 tausaga o lona soifua ma na maua o ia i le gugu. Ua ia faaleoina mai faalogona o isi ina ua ia faapea mai: “O le momoliina atu i sauniga uma o se faamanuiaga mai iā Ieova. Ou te faafetai atu iā te ia mai le taʻele o loʻu loto ona o loʻu mauaina o ni uso ma ni tuafāfine alolofa.” Po o e auai ea i na gaoioiga i lau faapotopotoga? (1 Ioane 3:17, 18) Afai o e auai, ia mautinoa o loo matuā talisapaia lou alofa agalelei.

Ia Faaalia ma le Lotomalie

15. O ā vala o le alofa agalelei ua faamatilatila atili i tala faale-Tusi Paia e tolu na tatou iloiloina?

¹⁵ Ua faaalia foʻi i faamatalaga a le Tusi Paia ia sa tatou iloiloina e faapea sa faasafua atu le alofa agalelei e tusa ai i le faitalia ma le lotomalie, ae e leʻi faatauanauina. Sa felagolagomaʻi ma le lotomalie Petueli ma le auauna a Aperaamo, ma sa faapena foʻi Repeka. (Kenese 24:51, 58) Na faaalia e Iosefa lona alofa agalelei e aunoa ma le uunaʻia e isi. (Kenese 50:4, 5) O Ruta, sa “faamalosi o ia e o ma [Naomi].” (Ruta 1:18) Ina ua fautuaina Ruta e Naomi ina ia faalatalata atu iā Poasa, o le alofa agalelei na  uunaʻia ai le fafine Moapi e taʻutino atu: “O mea uma ua e fai mai ai ia te au ou te faia lava.”—Ruta 3:1-5.

16, 17. O le ā na matuā uiga i ai le alofa agalelei o Petueli, Iosefa, ma Ruta, ma o le ā sa uunaʻia ai i latou e faaalia lenei uiga?

¹⁶ O le alofa agalelei lea sa faaalia e Petueli, Iosefa, ma Ruta e matuā uigaese lava, auā sa leʻi faaaogāina e Aperaamo, Iakopo, ma Naomi ni omiga malolosi ina ia uunaʻia ai i latou. I le isi itu, sa leʻi saisaitia Petueli i se aiāiga faaletulafono ina ia valavala ma lona afafine. Sa ono faigofie lava iā te ia ona taʻu atu i le auauna a Aperaamo e faapea: ‘⁠Leai, ou te lē manaʻo e auina ese atu loʻu afafine tōʻaga.’ (Kenese 24:18-20) I se tulaga faapena, sa iai foʻi iā Iosefa le faitalia e filifili ai pe faataunuu le talosaga a lona tamā pe leai, auā o lea o le a maliu Iakopo ma e lē toe mafai ona ia uunaʻia Iosefa e tausisi i ana upu. Na faaalia e Naomi lava ia faapea sa faitalia Ruta pe nofo i Moapi. (Ruta 1:8) Sa faitalia foʻi Ruta pe faaipoipo atu i se tasi o “taulelea” na i lo o Poasa ua matua.

¹⁷ Na faaalia ma le lotomalie e Petueli, Iosefa, ma Ruta le alofa agalelei; sa uunaʻia i latou e o latou loto. Sa latou manatu o se avega tauave tauamio le faaalia o lenei uiga, iā i latou o ē na iai sa latou faiā, e pei lava ona mulimuli ane manatu i ai le Tupu o Tavita ina ia faaalia iā Mefiposeta.

18. (a) I le ā le uiga e ao ai i toeaina Kerisiano ona “leoleo i le lafu”? (e) Sa faapefea i se tasi toeaina ona faaalia ona faalogona e uiga i le fesoasoani atu i uso talitonu?

¹⁸ O loo avea pea le alofa agalelei ma faailoga o tagata o le Atua, e aofia ai tane o ē o loo leoleoina le lafu a le Atua. (Salamo 110:3; 1 Tesalonia 5:12) E manatu na toeaina, po o ovasia, o se avega tauave le ola ina ia ōgatusa ma le faatuatuaga ua tuuina atu iā te i latou ona o lo latou tofiga. (Galuega 20:28) E ui i lea, latou te faia la latou galuega faaleoleo mamoe, atoa ma isi gaoioiga o le alofa agalelei mo le faapotopotoga, ona o le “tausi i ai ma le loto, a e le o le faatauanauina.” (1 Peteru 5:2) Ua leoleoina e toeaina le lafu, ona ua iite i latou se avega tauave, ma se faanaunauga ina ia faia faapena. Latou te faaalia le alofa agalelei i mamoe a Keriso ona o se mea e tatau ona latou faia, ma ona e latou te mananaʻo e faia faapena. (Ioane 21:15-17) Ua faapea mai se tasi o toeaina Kerisiano: “Ou te fiafia tele e asiasi i aiga o uso po o le tau ina telefoni i ai e faailoa atu ai o loo oʻu mafaufau iā te i latou. O le fesoasoani i uso o se puna sili lea o le olioli ma le faamalieina mo aʻu!” E ioe uma i ai isi toeaina alolofa.

Faaalia le Alofa Agalelei iā i Latou o Loo Manaʻomia

19. O le ā le mea moni e uiga i le alofa agalelei ua faamamafa i tala faale-Tusi Paia ua talanoaina i lenei mataupu?

¹⁹ O loo faamamafa foʻi i tala faale-Tusi Paia sa tatou iloiloina le mea moni e faapea, o le alofa agalelei e ao ona faaalia iā i latou o ē o loo iai se manaʻoga e lē mafai ona faaleleia e i latou lava. Ina ia faaauau pea le gafa o lona aiga, sa manaʻomia ai e Aperaamo le lagolagosua a Petueli. Ina ia ave lona tino maliu i Kanana, sa manaʻomia e Iakopo le fesoasoani a Iosefa. Ma ina ia maua se suli, sa manaʻomia e Naomi le fesoasoani a Ruta. Sa lē mafai e Aperaamo, Iakopo, po o Naomi ona foʻia na manaʻoga e aunoa ma se fesoasoani. E faapena foʻi i aso nei, e ao ona faaalia le alofa agalelei, aemaise lava iā i latou o loo manaʻomia. (Faataoto 19:17) E ao ona tatou faataʻitaʻi i le augātamā faatuatua o Iopu, o lē sa fesoasoani atu “i le ua puapuagaina, ina ua valaau mai o ia, ma le ua aumatuā, atoa ma le ua leai sona fesoasoani,” faapea ma “le na fai a fano.” O Iopu foʻi na “fiafia ai le loto o le fafine ua oti lana tane” ma sa avea ma  “mata o le tauaso, o vae o le pipili.”—Iopu 29:12-15.

20, 21. O ai o loo manaʻomia a tatou faailoaga o le alofa agalelei, ma o le ā e ao iā i tatou taʻitoʻatasi ona faamautinoa ua fai?

²⁰ O le mea moni, o loo iai ‘⁠ē ua puapuagatia o loo valaau mai mo se fesoasoani’ i faapotopotoga Kerisiano taʻitasi. Atonu ua māfua lea tulaga ona o mea e pei o le tuua toʻatasi, le lotovaivai, le lagona ua lē o toe aogā, o faanoanoaga i isi, o maʻi tugā, po o le maliu o sē pele. Po o le ā lava le māfuaaga, o na uso pele uma, o loo iai ni manaʻoga e mafai ma e ao ona faaleleia e ala i a tatou gaoioiga e fai i le lotomalie ma le onosai o le alofa agalelei.—1 Tesalonia 5:14.

²¹ O lea la, seʻi faaauau ona tatou faataʻitaʻi iā Ieova le Atua, o lē e “tele le alofa [“alofa agalelei,” NW].” (Esoto 34:6; Efeso 5:1) E mafai ona tatou faia lenā mea e ala i le faia ma le lotomalie o ni gaoioiga patino, aemaise lava mo i latou o loo manaʻomia. Ma le mautinoa lava, o le a tatou faapaiaina ai Ieova ma maua ai le olioli tele a o faaauau ona tatou “alofa agalelei o le tasi i le tasi.”—Sakaria 7:9, NW.

[Faamatalaga pito i lalo]

[Fesili mo le Suʻesuʻega]

O le ā Sau Tali?

• E faapefea ona ese le alofa agalelei mai le agalelei faaletagata?

• I ā auala na faaalia ai e Petueli, Iosefa, ma Ruta le alofa agalelei?

• Faatasi ma ā uiga e ao ona tatou faaali ai le alofa agalelei?

• O ai o loo manaʻomia a tatou faailoaga o le alofa agalelei?

[Ata i le itulau 18]

Na faapefea ona faaalia e Petueli le alofa agalelei?

[Ata i le itulau 21]

O le alofa faamaoni o Ruta sa avea o se faamanuiaga iā Naomi

[Ata i le itulau 23]

O le alofa agalelei faaletagata e faasafua atu ma le lotomalie, e faaalia e ala i gaoioiga patino, ma e faaalia iā i latou o loo manaʻomia