Fesili Mai le ʻAufaitau

Pe atamai i se Kerisiano moni ona auai atu i se falelauasiga po o se faaipoipoga i totonu o se falesā?

O lo tatou auai i so o se vala o lotu sesē, o se mea e lē fiafia i ai Ieova ma e tatau ona ʻalofia. (2 Korinito 6:14-17; Faaaliga 18:4) O se falelauasiga e faia i se falesā, o se sauniga faalelotu lea atonu e tauaao ai se lauga e faaalialia ai ni manatu e lē faale-Tusi Paia e pei o le ola pea o le agaga, atoa ma se taui faalelagi mo tagata lelei uma. Atonu foʻi o le a aofia ai ni tū e pei o le faailogaina o le koluse ma le auai i se tatalo e faia e le patele po o le faifeʻau. E ono avea foʻi tatalo ma isi tū faalelotu e feteenaʻi ma aʻoaʻoga a le Tusi Paia, ma vaega o le faapaiaina o se faaipoipoga faalelotu e faia i se falesā po o se isi nofoaga. O le iai faatasi ma isi tagata uma o loo auai i se gaoioiga sesē faalelotu, atonu o le a faafaigatā ai i se Kerisiano ona teena le omiga ina ia auai i na gaoioiga. Maʻeu le lē atamai o le faatagaina o se tasi ina ia oo i ai na omiga!

Ae ā pe afai e lagona e se Kerisiano o loo iai se pogai e tatau ai ona auai atu i se falelauasiga po o se faaipoipoga i totonu o se falesā? Mo se faaaʻoaʻoga, atonu e tauanau e se tane lē talitonu lana avā Kerisiano ina ia auai faatasi ma ia i lenā faatasiga. Pe e mafai ona auai faatasi o ia ma lana tane e tau ina ia matamata? Ona o lona amanaʻia o le talosaga a lana tane, atonu o le a filifili ai se avā e la te ō ma ia, i le maumauaʻi o le a ia lē auai i so o se faiga faalelotu. I le isi itu, atonu o le a ia filifili e lē auai, ona e manatu faapea e ono matuā lofia ai o ia i omiga tau faalogona i na siʻomaga, ma atonu o le a faapogaia ai o ia e faagutugutulua i mataupu silisili faale-Atua. O ia e ana le faaiʻuga. E mautinoa o le a ia manaʻo e faatoʻafilemu lona loto, i le mauaina o se lotofuatiaifo mamā.—1 Timoteo 1:19.

I na tulaga, o le a aogā ai i le avā ona faamatala atu i lana tane, e lē mafai ona ia auai atoatoa i so o se faiga faalelotu po o le auai foʻi i pese o viiga po o lona ifo pe a faia le tatalo. O faamatalaga na a le avā atonu o le a faia ai e le tane se faaiʻuga faapea, e ono tulaʻi mai se tulaga e faalumaina ai o ia pe a auai lana avā. Atonu o le a filifili le tane e alu na o ia ona o lona alofa i lana avā, le faaaloalo i ona talitonuga, po o le manaʻo foʻi ina ia ʻalofia le faalumaina ai. Ae afai o loo manaʻo pea le tane e ō ma lana avā, atonu o le a alu le avā e tau ina matamata.

E ao foʻi i se tasi ona manatunatu i aafiaga atonu e oo ai i uso talitonu, ona o lo tatou auai i se sauniga e faia i totonu o se falesā a lotu. Pe lē ono faamanuʻaina ai le lotofuatiaifo o se tasi? Faamata e lē faavaivaia ai lo latou taumafai e ʻalofia le auai i ifoga i tupua? Ua fautua mai le aposetolo o Paulo: “Ia outou faamautinoa mea e sili ona tāua, ina ia outou lē pona ma ia lē faatausuaiina ai isi seʻia oo i le aso o Keriso.”—Filipi 1:10, NW.

Afai o lea faatasiga o loo aafia ai se tauaiga e sili ona vavalalata, atonu o le a iai foʻi ni omiga faaopoopo mai le aiga. I na tulaga, e tatau ai i se Kerisiano ona fuafua ma le faaeteete mea uma o loo aafia ai. I nisi tulaga patino atonu e filifili ai se tasi faapea e leai ni faafitauli o le a aliaʻe pe a auai e tau ina matamata i se falelauasiga po o se faaipoipoga i totonu o se falesā. Peitaʻi, o siʻomaga atonu o le a auai atu i ai o le a sili atu le faaleagaina ai o le lotofuatiaifo o se tasi po o lotofuatiaifo foʻi o isi, na i lo o aogā e maua mai ai. Po o le ā lava le tulaga, e ao i se Kerisiano ona faamautinoa o le a lē taofia o ia e lana faaiʻuga mai le tausisia o se lotofuatiaifo lelei i luma o le Atua ma tagata.