Mauaina Aogā Mai le Alofa Agalelei o Ieova
Mauaina Aogā Mai le Alofa Agalelei o Ieova
“O ai ea ua atamai? O le a ia . . . faaalia le uaʻi totoʻa i gaoioiga o le alofa agalelei o Ieova.”—SALAMO 107:43, NW.
1. O anafea na uluaʻi faaaogā ai i le Tusi Paia le faaupuga “alofa agalelei,” ma o ā fesili e faatatau i lenei uiga o le a tatou iloiloina?
PE TUSA o le 4,000 tausaga ua mavae, na faapea atu ai Lota le atalii o le uso o Aperaamo e uiga iā Ieova: “Ua e faateleina mai foi lou alofa [“alofa agalelei,” NW].” (Kenese 19:19) O le uluaʻi taimi lea ua faaaogā ai le faaupuga alofa agalelei i le Tusi Paia. Na taʻua foʻi e Iakopo, Naomi, Tavita, ma isi auauna a le Atua lenei uiga o Ieova. (Kenese 32:10; Ruta 1:8; 2 Samuelu 2:6) O le mea moni o le faaupuga “alofa agalelei,” e tusa ma le 250 taimi ua faaaogā ai i le New World Translation of the Holy Scriptures. Ae o le ā le alofa agalelei o Ieova? O ai sa faaalia i ai i le taimi ua mavae? Ma e faapefea ona tatou mauaina ai aogā i aso nei?
2. Aiseā ua matuā faigatā ai ona faamatala le upu Eperu “alofa agalelei” o loo talanoaina, ma ua faapefea ona faaliliuina?
2 I le Tusi Paia, o le “alofa agalelei” o se faaliliuga lea o le upu Eperu e anoanoaʻi ona uiga, lea e leai se upu e tasi i le tele o gagana e mafai ona faamatala saʻo ai lona uiga atoa. Peitaʻi, ua faaliliuina ma le talafeagai e le New World Translation of the Holy Scriptures—With References, le upu Eperu i le “alofa agalelei po o le alofa faamaoni,” ona e sili atu ona taaofaʻia ai ma e toetoe lava maua ai le uiga atoa o le upu.—Esoto 15:13; Salamo 5:7.
E Ese Mai le Alofa ma le Faamaoni?
3. E faapefea ona ese le alofa agalelei mai le alofa?
3 O le alofa agalelei, po o le alofa faamaoni, e fesootaʻi vavalalata i uiga o le alofa ma le faamaoni. E ui i lea, e eseese mai na upu ona o ni auala tāua. Seʻi manatu i le auala ua ese ai le alofa agalelei mai le alofa. I nisi gagana, e mafai ona faasafua atu ai le alofa i ni mea po o ni manatu. O loo tautala le Tusi Paia e uiga i le “manao [“alofa,” NW] i le uaina, ma le suāuu,” ma le “manao [“alofa,”NW] i le poto.” (Faataoto 21:17; 29:3) O le alofa agalelei ua faatatau atu i tagata, ae lē i ni manatu po o ni mea e leai ni ola. Mo se faataʻitaʻiga, i le Esoto 20:6 o loo aofia ai tagata ina ua faapea mai, o Ieova o loo “alofa [“alofa agalelei,” NW] i afe o tupulaga.”
4. E faapefea ona ese le alofa agalelei mai le faamaoni?
4 O le upu Eperu ua faaliliuina i le “alofa agalelei,” e lautele atu foʻi lona uiga na i lo o le upu “faamaoni.” I nisi gagana, ua masani ona faaaogā le “faamaoni” e faatatau atu i uiga e ao ona faaalia e se auauna i lona matai. Ae e pei ona mātauina e se tasi o tamaʻitaʻi suʻesuʻe, e tusa ai ma le vaaiga faale-Tusi Paia, o le alofa agalelei “e tele taimi ua faasinotonu atu ai i le tulaga tuufaafeagai o se faiā: e faamaoni le matai i lē ua vaivai, po o lē ua tuulafoaʻia, po o le auauna.” O le mea lea, na ole atu ai le tupu o Tavita iā Ieova: “Ia malamalama mai ou fofoga i lau auauna; ia e faaola mai ia te au ona o lou alofa [“alofa agalelei,” NW].” (Salamo 31:16) Na talosagaina Ieova le matai, ina ia faaalia le alofa-agalelei, po o le alofa faamaoni, i lē ua tuulafoaʻia, o Tavita. Talu ai e lē pule lē ua tuulafoaʻia i le matai, o le alofa-agalelei la lea e faaalia i lenei tulaga, o loo faaalia lea i le lotomalie, ae lē ona ua faatauanauina.
5. (a) O ā vala o le alofa agalelei o le Atua o loo faamatilatila i lana Afioga? (e) O ā faailoaga o le alofa agalelei o Ieova o le a tatou iloiloina?
5 “O ai ea ua atamai?” o le fesili lea a le faisalamo. “O le a ia . . . faaalia le uaʻi totoʻa i gaoioiga o le alofa agalelei o Ieova.” (Salamo107:43) O le alofa agalelei o Ieova, e mafai ona maua ai le laveaʻiina po o le faasaoina. (Salamo 6:4; 119:88, 159) O se puipuiga lea, ma o se mea e manaʻomia ina ia maua ai le mapusaga mai faafitauli. (Salamo 31:16, 21; 40:11; 143:12) Ona o lenei uiga, ua mafai ai ona faamagaloina agasala. (Salamo 25:7) E ala i le toe autaluina o nisi o tala faale-Tusi Paia, ma le mātauina o isi mau o le Tusi Paia, o le a tatou iloa ai o le alofa agalelei o Ieova sa (1) faaalia i ni gaoioiga patino ma le (2) sa oo i ana auauna faamaoni.
Laveaʻiina—O se Faailoaga o le Alofa Agalelei
6, 7. (a) Na faapefea ona faateleina e Ieova lona alofa agalelei iā Lota? (e) O anafea na taʻua ai e Lota le alofa agalelei o Ieova?
6 Atonu o se auala e sili ona lelei e faamautinoa ai le tele o le alofa agalelei o Ieova, o le iloiloina lea o ni tala faale-Tusi Paia o loo faaaogā ai lenei uiga. I le Kenese 14:1-16, ua tatou iloa ai sa ave faamalosia e ʻau a le fili, ia Lota le atalii o le uso o Aperaamo. Ae na laveaʻiina Lota e Aperaamo. Sa toe lamatia foʻi le ola o Lota ina ua filifili Ieova e faaumatia le aai amioleaga o Sotoma, lea sa nonofo ai Lota ma lona aiga.—Kenese 18:20-22; 19:12, 13.
7 A o toeitiiti lava faaumatia Sotoma, na taʻitaʻia ese ai e agelu a Ieova ia Lota ma lona aiga mai le aai. O le taimi lenā, na faapea atu ai Lota: “Ua alofagia lau auauna e oe, ua e faateleina mai foi lou alofa [“alofa agalelei,” NW] ua e alofa mai ai ia te au, i lou faaola mai ia te au.” (Kenese 19:16, 19) O upu na sa faailoa atu ai e Lota e faapea, na faaalia e Ieova le matuā tele o le alofa agalelei e ala i le laveaʻiina o ia. I lenei tulaga, sa faaalia ai le alofa agalelei o le Atua e ala i le laveaʻiina ma le faasaoina.—2 Peteru 2:7.
Le Alofa Agalelei o Ieova ma Lana Taʻitaʻiga
8, 9. (a) O le ā le tofiga na avatu i le auauna a Aperaamo? (e) Aiseā na tatalo ai le auauna mo le alofa agalelei o le Atua, ma o le ā na tupu a o ia tatalo?
8 I le Kenese mataupu e 24, tatou te faitau ai i le isi faailoaga o le alofa agalelei, po o le alofa faamaoni o le Atua. Ua faapea mai le tala, sa faatonu e Aperaamo lana auauna ina ia malaga atu i le atunuu o tauaiga o Aperaamo ina ia suʻe mai ai se avā mo lona atalii o Isaako. (Fuaiupu 2-4) Sa faigatā le tofiga, ae na faamautinoa atu i le auauna e faapea o le a taʻitaʻia o ia e le agelu a Ieova. (Fuaiupu 7) Mulimuli ane, sa taunuu atu le auauna i se vaieli i tua o “le aai o Nakori,” (a lē o Karana o se isi nuu e latalata ane) i le taimi tonu e ō ane ai fafine e utu vai. (Fuaiupu 10, 11) Ina ua ia vaai atu ua latalata mai fafine, sa ia iloa o le taimi tāua lea e faalagolago i ai le taulau o lana feʻau. Ae sa mafai faapefea ona ia filifilia le fafine saʻo?
9 I lona iloa sa ia manaʻomia le fesoasoani a le Atua, na tatalo ai le auauna a Aperaamo e faapea: “Ieova e, le Atua o loʻu matai o Aperaamo, ia e faamanuia lava ia te au i le asō, ma e alofa [“alofa agalelei,” NW] mai foi i loʻu matai o Aperaamo.” (Fuaiupu 12) O le a faapefea ona faaalia e Ieova lona alofa agalelei? Na talosaga atu le auauna mo se faailoga patino na te iloa ai le fafine muli ua filifilia e le Atua. (Fuaiupu 13, 14) Na faia e se tasi o fafine le mea tonu lava lea na talosaga atu ai le auauna iā Ieova. Ioe, e pei lava o lea sa faalogo atu le fafine i le tatalo a le auauna! (Fuaiupu 15-20) Sa matuā faateʻia le auauna, “ua ofo o ia ia te ia.” Ae na iai pea ni mea tāua sa manaʻomia ona faamautinoa. Po o lenei ea fafine lalelei o se tasi o tauaiga o Aperaamo? Ma po o tumau pea ona lē faaipoipo o ia? O lea sa nofonofo ai pea le auauna ma “faalologo i le fia iloa po ua faamanuia e Ieova lana malaga pe leai.”—Fuaiupu 16, 21.
10. Aiseā sa manatu ai le auauna a Aperaamo ua faaalia e Ieova le alofa agalelei i lona matai?
10 E leʻi umi se taimi mulimuli ane, ae faailoa ane loa e le fafine muli o ia o “le afafine o Petueli o le tama ia a Meleka, na fanau e ia ia Nakori [le uso o Aperaamo].” (Kenese 11:26; 24:24) O le taimi lenā na iloa ai loa e le auauna le tali mai o Ieova i lana tatalo. Ona o lona maofa, na ia tootuli ifo ai ma faapea atu: “Ia faafetaia Ieova, o le Atua o loʻu matai o Aperaamo, o le ua le tuua lona alofa [“alofa agalelei,” NW] ma lona faamaoni i loʻu matai; na ou i le ala, ona taʻitaʻiina ai lea o aʻu e Ieova i le fale o uso o loʻu matai.” (Fuaiupu 27) E ala i le saunia o le taʻitaʻiga, na faaalia ai le alofa agalelei o le Atua iā Aperaamo, le matai o le auauna.
O le Alofa Agalelei o le Atua e Maua ai le Mapusaga ma le Puipuiga
11, 12. (a) I le gasologa o ā tofotofoga na oo ai iā Iosefa le alofa agalelei o Ieova? (e) Sa faapefea ona faaalia le alofa agalelei o le Atua i le tulaga o Iosefa?
11 O le isi e sosoo ai, seʻi o tatou iloiloina le Kenese mataupu e 39. O loo faaautū lea i le atalii o le atalii o le atalii o Aperaamo o Iosefa, o lē sa faatau atu e fai ma pologa i Aikupito. E ui i lea, “sa i ai Ieova ia Iosefa.” (Fuaiupu 1, 2) O le mea moni, e oo foʻi iā Potifara le matai Aikupito o Iosefa, na ia faapea mai sa iai Ieova iā Iosefa. (Fuaiupu 3) Peitaʻi, sa fesagaʻi Iosefa ma se tofotofoga e sili ona matuiā. Na tuuaʻia sesē o ia i le faia o se feusuaʻiga ma le avā a Potifara ma sa faapea ona faafalepuipuiina ai. (Fuaiupu 7-20) O le “lua [o le falepuipui]” lea, na “latou faatiga [ai] i ona vae i le noanoaga; ua oo lava o ia i le uamea.”—Kenese 40:15; Salamo 105:18.
12 O le ā na tupu i le taimi o lenā tofotofoga patino faigatā? “Sa ia Iosefa Ieova, ua ia alofa [“alofa agalelei,” NW] ia te ia.” (Fuaiupu 21a) O lenā gaoioiga patino o le alofa agalelei, na amata ai se faasologa o mea tutupu, lea sa mulimuli ane faapea ona taʻitaʻia atu ai i se mapusaga mai faafitauli sa oo iā Iosefa. Na faamautinoa e Ieova “ua alofa . . . le alii o le fale puipui ia [Iosefa].” (Fuaiupu 21e) O lea na tofia ai e le alii o le fale puipui Iosefa i se tulaga maualuga. (Fuaiupu 22) O le mea na sosoo ai, sa feiloaʻi atu Iosefa i se tamāloa o lē na mulimuli ane ona faailoa atu Iosefa iā Farao, le pule o Aikupito. (Kenese 40:1-4, 9-15; 41:9-14) O le iʻuga, na faaeaina e le tupu Iosefa, e avea ma pule lona lua i Aikupito, lea sa iʻu ai i lona faia o se galuega faasaoola ina ua oo le oge i le nuu o Aikupito. (Kenese 41:37-55) Na amata mafatiaga o Iosefa ina ua 17 ona tausaga ma sa faaauau pea mo le sili atu i le sefulu ma le lua tausaga! (Kenese 37:2, 4; 41:46) Ae i le gasologa o na tausaga uma o tigā ma puapuaga, sa faaalia ai e Ieova le Atua lona alofa agalelei iā Iosefa e ala i le puipuia o ia mai mala ogaoga ma i le faasaoina o ia mo se matafaioi tutasi i le faataunuuina o le fuafuaga tauatua.
E Lē Uma le Alofa Agalelei o le Atua
13. (a) O ā faailoaga o le alofa agalelei o Ieova o loo maua i le Salamo 136? (e) O le ā moni lava le mea e taʻu o le alofa agalelei?
13 E tele taimi sa faaalia ai e Ieova lona alofa agalelei i tagata Isaraelu. Ua taʻu mai e le Salamo 136 e faapea, o lona alofa agalelei, na ia saunia ai le laveaʻiina o i latou (Fuaiupu 10-15), le taʻitaʻiga (Fuaiupu 16), ma le puipuiga. (Fuaiupu 17-20) O se tagata na te faaalia le alofa agalelei i isi uso a tagata, na te faia faapena i ni galuega tauofo sa fuafuaina ina ia faamalieina ai se manaʻoga tāua. E faatatau i le alofa agalelei, ua taʻua i se tasi o faamaumauga faale-Tusi Paia: “O se galuega lea e faasaoina ai pe faafualoaina ai le ola. O le faauilavea lea e fai ma sui o se tasi ua lutia i faigatā ma puapuaga.” Ua faamatalaina e se tasi o tagata aʻoga e faapea, o le “alofa ua faaliliuina i gaoioiga.”
14, 15. Aiseā e mafai ai ona tatou mautinoa sa avea Lota o se auauna faamaonia a le Atua?
14 O tala a le Kenese ia sa tatou iloiloina, ua faaalia ai iā i tatou faapea e lē uma le faaalia mai e Ieova o le alofa agalelei iā i latou o ē alolofa atu iā te ia. Sa ola Lota, o Aperaamo, ma Iosefa i lalo o tulaga eseese ma sa fesagaʻi ma ni tofotofoga iloga. O i latou o ni tagata sa lē lelei atoatoa, ae na avea i latou o ni auauna faamaonia a Ieova, ma sa latou manaʻomia le fesoasoani tauatua. E mafai ona faamāfanafanaina i tatou i le iloa faapea, o loo faaalia e lo tatou Tamā faalelagi le alofa agalelei i tagata faapena.
15 Sa faia e Lota ni faaiʻuga lē atamai sa faapea ona oo ai i ni tulaga faigatā. (Kenese 13:12, 13; 14:11, 12) E ui i lea, na ia faaalia foʻi ni uiga ua tatau i ai le faamālō. Ina ua taunuu atu i Sotoma agelu e toʻalua a le Atua, na faaalia e Lota le talimālō iā te i laʻua. (Kenese 19:1-3) Ona o lona faatuatua, na ia lapataʻia ai tane a ona afafine e uiga i le faaumatiaga sa faaloloʻi ane o Sotoma. (Kenese 19:14) O le silafaga a le Atua iā Lota o loo maua lea i le 2 Peteru 2:7-9, tatou te faitau ai: “Na ia [Ieova] laveai foi ia Lota o le amiotonu, sa tiga i le amio faamatāitu a e faaletaupulea;—auā o lea tagata amiotonu, sa tiga lona loto faamaoni a o nofo faatasi ma i latou, i lona vaai atu ma faalogo atu i lea aso ma lea aso, i a latou amio faaletaupulea;— ua silafia e le Alii [Ieova] se mea e laveai mai ai i e amio Atua ai le tofotofoga.” Ioe, sa avea Lota o se tagata amiotonu, ma o nei upu ua faaalia ai o ia o se tagata sa tuutoina i le Atua. I le pei o ia, ua tatou maua foʻi le alofa agalelei o le Atua a o tatou auai i “gaoioiga paia tau amio ma galuega o le tuutoina i le Atua.”—2 Peteru 3:11, NW.
16. I ā upu faamālō o loo tautala ai le Tusi Paia e uiga iā Aperaamo ma Iosefa?
16 O le tala i le Kenese mataupu e 24, o loo faaalia manino ai le faiā vavalalata a Aperaamo ma Ieova. Ua faapea mai le uluaʻi fuaiupu, “ua faamanuia foi Ieova ia Aperaamo i mea uma.” Na taʻua e le auauna a Aperaamo ia Ieova o “le Atua o loʻu matai o Aperaamo.” (Fuaiupu 12, 27) Ma o le tala a le soo o Iakopo e faapea, na “taʻuamiotonuina” Aperaamo ma “sa taʻua foi o ia o le uo a le Atua.” (Iakopo 2:21-23) Ua moni foʻi lenā i le tulaga o Iosefa. O le faiā vavalalata i le va o Ieova ma Iosefa ua faamatilatila mai lea i le vaega atoa o le Kenese mataupu e 39. (Fuaiupu 2, 3, 21, 23) E lē gata i lenā, e faatatau iā Iosefa, na faapea mai le soo o Setefano: “Ua ia te ia le Atua.”—Galuega 7:9.
17. O le ā e mafai ona tatou aʻoaʻoina mai i faaaʻoaʻoga a Lota, Aperaamo, ma Iosefa?
17 O ē na faaoo i ai le alofa agalelei tauatua ia faatoʻā uma ona tatou iloiloina, o ni tagata o ē sa iai se faiā lelei ma Ieova le Atua ma sa auauna mo le fuafuaga a le Atua i ni auala eseese. Sa latou fesagaʻi ma toʻatugā sa lē mafai ona latou faatoʻilaloina e i latou lava. O mea sa lamatia ai, e aofia ai le faasaoina o le ola o Lota, le faaauauina o le gafa o le aiga o Aperaamo, ma le puipuia o le matafaioi a Iosefa. E na o Ieova lava sa faamalieina manaʻoga o na tane faale-Atua, ma na ia faia lenā mea e ala i lona faauilavea ane faatasi ma gaoioiga o le alofa agalelei. Afai tatou te fia maua le alofa agalelei o Ieova le Atua e oo i le faavavau, e tatau foʻi la iā i tatou ona iai se faiā totino vavalalata ma ia, ma e tatau ona faaauau pea ona tatou faia lona finagalo.—Esera 7:28; Salamo 18:50.
Ua Faamanuiaina Auauna a le Atua
18. O ā mau eseese o le Tusi Paia o loo faaalia ai le alofa agalelei o Ieova?
18 “Ua tumu le lalolagi” i le alofa agalelei o Ieova, ma e maʻeu lo tatou talisapaia o lenei uiga o le Atua! (Salamo 119:64) Tatou te tali atu ma le loto atoa i le augani mai a le faisalamo: “Ia vivii atu i latou ia Ieova ona o lona alofa [“alofa agalelei,” NW], ma ona vavega na fai i le fanau a tagata.” (Salamo 107:8, 15, 21, 31) Tatou te olioli ona ua faasafua mai e Ieova lona alofa agalelei i ana auauna faamaonia—o tagata taʻitoʻatasi po o se vaega. I se tatalo, na faalagi atu ai e le perofeta o Tanielu ia Ieova o ia o ʻle Atua moni, o le Atua e sili ma le mataʻutia, o lē tausi i le feagaiga, ma le alofa agalelei i ē alolofa atu iā te ia, atoa ma e o tausisi i ana poloaʻiga.’’ (Tanielu 9:4, NW) Na tatalo le tupu o Tavita: “Ia e faafualoa lou alofa [“alofa agalelei,” NW] i e ua iloa oe.” (Salamo 36:10) Maʻeu lo tatou lotofaafetai ona ua faaalia mai e Ieova le alofa agalelei i ana auauna!—1 Tupu 8:23; 1 Nofoaiga a Tupu 17:13.
19. I le mataupu o loo sosoo mai, o ā fesili o le a tatou iloiloina?
19 E moni lava, o i tatou o ni tagata ua faamanuiaina e Ieova! E lē gata i lo tatou maua o aogā mai le alofa o le Atua lea ua faaalia mai i tagata lautele, a ua tatou maua ai foʻi ni faamanuiaga faapitoa ona o le alofa agalelei, po o le alofa faamaoni o lo tatou Tamā faalelagi. (Ioane 3:16) Aemaise lava i taimi e manaʻomia ai, ua tatou maua ai aogā mai lenei uiga tautele o Ieova. (Salamo 36:7) Ae e mafai faapefea ona tatou faataʻitaʻi i le alofa agalelei o Ieova le Atua? Po o tatou faaalia taʻitoʻatasi ea lenei uiga matagofie? O nei fesili ma isi e fesootaʻi atu i ai o le a iloiloina i le mataupu o loo sosoo mai.
Po o E Manatua?
• O le ā ua tatou aʻoaʻoina e uiga i le upu Eperu ua faaliliuina i le alofa agalelei po o le alofa faamaoni?
• Ua faapefea ona ese le alofa agalelei mai le alofa ma le faamaoni?
• I ā auala sa faaalia ai e Ieova le alofa agalelei iā Lota, Aperaamo, ma Iosefa?
• O le ā le faamautinoaga e mafai ona tatou maua mai faailoaga o le alofa agalelei o Ieova i taimi ua mavae?
[Fesili mo le Suʻesuʻega]
[Ata i le itulau 13]
Pe e te silafia le auala na faaalia ai le alofa agalelei o le Atua iā Lota?
[Ata i le itulau 15]
I lona alofa agalelei, na taʻitaʻia ai e Ieova le auauna a Aperaamo
[Ata i le itulau 16]
Na faaalia e Ieova le alofa agalelei e ala i le puipuia o Iosefa