“Ia Outou O Mai ia te Au, . . . o Aʻu Foi e Malolo ai Outou”

Ua Manaʻomia Vave Nisi Fale Ona o se Faatelega Mataʻina

NA FETALAI Iesu Keriso e faapea: “O mai ia te au, . . . o aʻu foi e malolo ai outou.” (Mataio 11:28) Maʻeu se valaaulia faamāfanafanaloto mai le Ulu o le faapotopotoga Kerisiano! (Efeso 5:23) Pe a tatou manatunatu i na upu, e mafai la ona tatou talisapaia le puna tāua o faamāfanafanaga—le aufaatasiga ma o tatou uso ma tuafāfine faaleagaga i sauniga faa-Kerisiano. E tatou te matuā ioe faatasi ma le faisalamo o lē na pese e faapea: “Faauta, o le mea e matuā lelei ma le matagofie lava, pe a nonofo faatasi lava o uso.”—Salamo 133:1.

O le mea moni, e sili atu ona lelei a tatou aumea i na faatasiga mo le tapuaʻiga, ma e saogalemu ma matagofie le siʻomaga faaleagaga. O se māfuaaga lelei lea na faapea mai ai se tasi Kerisiano talavou: “I le aso atoa lea ou te alu ai i le aʻoga, ou te lagona ai lava le matuā vaivai. Ae o sauniga, ua pei o se vai mālū i le toafa, o inā e faafouina ai aʻu e mafai ai ona ou aulia atu le isi aso o le aʻoga.” Na faapea mai se talavou mai Nigeria: “Ua ou iloa o le auaufaatasi vavalalata ma isi o ē alolofa iā Ieova, ua fesoasoani lea iā te aʻu e faalatalata atu ai pea iā te ia.”

Ua faamalieina i le Maota o le Malo o Molimau a Ieova se manaʻoga tele, ua avea ma ogatotonu o le tapuaʻiga moni i le nuu ma e nonofo ai. I le tele o nofoaga, e faia ai sauniga i le Maota o le Malo a itiiti mai o le faalua i le vaiaso, ma ua faalaeiauina ai ia tagata suʻesuʻe o le Tusi Paia ina ia vave ona auai ina ia maua aogā mai aufaatasiga e faafouina ai.—Eperu 10:24, 25.

 Se Manaʻoga Faanatinati

Ae peitaʻi, e lelei ona mātauina e faapea, e lē o Molimau a Ieova uma e faaaogāina ni Maota o le Malo talafeagai. O le matuā faateleina o le aofaʻi o ē folafola atu le Malo i le lalolagi aoao, ua māfua ai se manaʻoga faanatinati. O loo manaʻomia pea le faitau afe o ni Maota o le Malo, aemaise lava i atunuu tau ati aʻe.—Isaia 54:2; 60:22.

Mo se faataʻitaʻiga: Sa na o le sefulu Maota o le Malo na iai mo le 290 faapotopotoga i le laumua o le Malo Faatemokalasi o le Congo. Sa manaʻomia vave ai lava e lenā atunuu ni Maota o le Malo se tele. I Angola, o le tele o faapotopotoga e faia a latou sauniga i fafo, talu ai e lē lava ni Maota o le Malo. O le manaʻoga foʻi lenā o loo iai i le tele o isi atunuu.

O le mea lea, i le 1999, na faia faatasi ai se taumafaiga ina ia fesoasoani atu i le fausiaina o ni Maota o le Malo i atunuu e lē lava a latou alāmanuia. Ina ia fesoasoani i le galuega o faugāfale i na atunuu, ua ofo atu ai e Molimau e iai le poto masani la latou auaunaga. Pe a ō faatasi na taumafaiga ma le agaga naunau, faatasi ma le iai o ni ē tauofo i na atunuu, o le a maua ai ni iʻuga faalaeiau. I le isi itu, ua maua ai foʻi e Molimau o lea lava atunuu aogā mai toleniga e latou te mauaina. Ua fesoasoani nei mea uma lava i le faatinoina o manaʻoga mo le fausiaina o Maota o le Malo i o latou lava atunuu.

I lea, ua avatu ai se fesoasoani aogā i laasaga fetuutuunaʻi ua faia mo le fausiaina o Maota o le Malo e faaaogā ai metotia ma meafaufale o loo maua i le atunuu. O le sini, e lē na o le faamalieina o lenei manaʻoga matuā tele mo ni Maota o le Malo, ae ia faavaeina foʻi se polokalame mo le tausiaina lelei e talafeagai ma tulaga masani o le atunuu.—2 Korinito 8:14, 15.

Atinaʻe e Faalaeiau Ai

O ā iʻuga o nei taumafaiga ina ia fausia ai ni nofoaga mo le tapuaʻiga? I le amataga lava o le 2001, na taʻua ai i se lipoti mai Malawi e faapea: “E matuā faagaeetia lava ona o se mea ua faataunuuina i lenei atunuu. I le isi lua masina e sosoo ai, o le a matou faamāeʻaina ai nisi foʻi Maota o le Malo.” (Ata 1 ma le 2) I Togo, na fausia ai e le ʻaufaigaluega tauofo ni Maota o le Malo faigofie i nai masina na seʻi mavae atu nei. (Ata 3) O le galuega lelei na faia e le ʻaufaigaluega tauofo lotonaunau, ua fesoasoani foʻi i le fausiaina o Maota o le Malo talafeagai i Mekisikō, Pasili, ma isi atunuu.

Ua mātauina e faapotopotoga e faapea, pe a fausia se Maota o le Malo, ona iloa lea e tagata o le nuu e faapea, ua ō mai Molimau a Ieova e nonofo mau. E toʻatele na foliga mai sa faatalatū e auaufaatasi ma Molimau seʻi vaganā ua iai se nofoaga talafeagai mo le tapuaʻiga. Ua lipotia mai e le  faapotopotoga o Nafisi i Malawi e faapea: “O lea ua iai nei lo matou Maota o le Malo manaia, ma ua avatu ai se molimau lelei. O le mea lea,ua faigofie ai ona amata ni suʻesuʻega faale-Tusi Paia.”

Sa onosaia foʻi e tagata o le faapotopotoga i Krake i Benin le tele o tauemuga i aso ua mavae ona o le Maota o le Malo sa iai i lenā taimi, sa matuā faatauvaa lava pe a faatusatusa atu i nisi o falesā. (Ata 4)I le taimi nei ua iai se maota fou o le Malo a le faapotopotoga lea ua faaatagia atu ai le tapuaʻiga moni. (Ata 5) E 34 le ʻautalaʻi a le faapotopotoga lenei ma se faatatauga e 73 e auai i sauniga i Aso Sa, ae e 651 na auai i le faapaiaina o le Maota o le Malo. O le toʻatele o i latou o tagata lava mai le aai o ē na matuā faafiafiaina ina ua  vāai ua mafai e Molimau ona fausiaina se maota i na o sina taimi puupuu lava. Pe a toe mafaufau i taualumaga i aso ua mavae e tusa ai ma lenei tulaga, na tusi mai ai le lālā i Zimbabwe e faapea: “E na o le tasi le masina na fausia ai le maota fou o le Malo, ae ua masani ona faaluaina le aofaʻi o i latou e auai.”—Ata 6 ma le 7.

E mautinoa lava, o le tele o maota fou o le Malo, ua fesoasoani i le saunia o nofoaga e faafouina ai faaleagaga Kerisiano tuuina atu ma tagata lotofiafia. Ina ua amata faaaogāina e le faapotopotoga i Ukraine lo latou maota fou o le Malo, na faapea mai se Molimau i inā: “Ua matuā faafiafiaina lava i matou. Ua matou molimauina e i matou lava le auala o loo fesoasoani mai ai Ieova i ona tagata.

[Pusa/Ata i le itulau 10, 11]

E Matuā Tāua le Lagolagosua Agaalofa

E matuā olioli Molimau a Ieova e vaai atu i le agaʻigaʻi i luma ua iai e faafetaiaʻia ai le manaʻoga faanatinati mo ni maota fou o le Malo i le lalolagi aoao. O le faateleina pea o le faitau aofaʻi o tagata tapuaʻi o Ieova i atunuu eseese, ua manaʻomia ai le fausiaina o le tele o ni maota fou o le Malo i le lumanaʻi. Ioe, o se faatatauga i le tausaga faaleauaunaga e 2001, e 32 faapotopotoga fou e faavaeina i vaiaso uma! E manaʻomia e na faapotopotoga ni nofoaga e faapotopoto ma tapuaʻi ai.

Atonu e lāgā ai se fesili, ʻE faapefea ona tatou faatupeina na galuega, o le fausiaina o maota fou o le Malo, aemaise i atunuu e lē lava le tamaoaiga o uso?’ O le tali, e aofia ai le lagolagosua a le Atua ma le limafoaʻi o tagata.

E faamaoni i lana folafolaga, e liligi mai e Ieova lona agaga paia i ana auauna, e mafai ai ona latou “agalelei atu, ia tamaoaiga i galuega lelei, ia mataalofa, ia latou avatu fua a latou mea.” (1 Timoteo 6:18) Ua uunaʻia e le agaga o le Atua Molimau a Ieova ina ia lagolagoina le galuega talaʻi o le Malo i auala uma lava—i le tuutoina atu o lo latou taimi, malosi, a latou lava galuega, ma isi lava alāmanuia i galuega faa-Kerisiano.

O le agaga limafoaʻi, ua uunaʻia ai Molimau ma isi ina ia avatu le fesoasoani tautupe i le galuega o le faateleina ma le fausiaina o nisi maota. E lē gata e fesoasoani i le totogiina o tupe faaalu masani a la latou faapotopotoga, ae latou te faia foʻi foaʻi tauofo i le galuega o faugāfale i isi itu o le lalolagi.

I faapotopotoga taʻitasi, e iai pusa ua tusia manino ai upu, “Meaalofa mo le Galuega i le Lalolagi Aoao—Mataio 24:14.” O inā, e mafai e tagata taʻitoʻatasi ona lafo i ai meaalofa tauofo pe afai e latou te manatu i ai e faia faapea. (2 Tupu 12:9) Pe tele pe itiiti, e talisapaia lava meaalofa uma. (Mareko 12:42-44) O nei tupe e faaaogā i auala eseese e tusa ma le manaʻoga o iai, e aofia ai le fausiaina o Maota o le Malo. E lē faaaogāina na meaalofa e totogi ai ni pule, auā e leai ni tagata faapena i Molimau a Ieova.

Po o faataunuuina ea e meaalofa mo le galuega i le lalolagi aoao le fuafuaga na faia ai? Ioe, o lea lava. Ua lipotia mai e le lālā i Liberia,o se atunuu o loo vevela ai faigātaua a o latou lava tagata e faapea, o le toʻatele o Molimau i le atunuu, ua leai ni galuega ma ua fesagaʻi ma faafitauli matuiā tautupe. Ua mafai faapefea e tagata o Ieova i lenei atunuu ona maua ni nofoaga talafeagai mo le tapuaʻiga? Ua taʻua e le ofisa o le lālā e faapea: “O foaʻi ma le agaalofa a uso i isi atunuu, o le a faaaogā e faatupeina ai le galuega. Maʻeu se fuafuaga atamai ma le alofa!”

E ui i le lē lava o a latou alāmanuia, ae e fai foʻi meaalofa a uso i le atunuu lava ia. Ua lipotia mai i se atunuu o Aferika o Sierra Leone e faapea: “O uso lava i le atunuu o loo lagolagoina lea taumafaiga ma e fiafia e faigaluega ma foaʻi po o ā lava ni tupe latou te mafaia e lagolagosua ai i le fausiaina o Maota o le Malo.”

O le iʻuga, o lenei galuega faufale ua viia ai Ieova. Ua faapea mai ma le matuā fiafia uso i Liberia: “O le fausiaina o nofoaga talafeagai mo le tapuaʻiga i le atunuu atoa, o le a faailoa atu ai i tagata e faapea, o lea ua i inei le tapuaʻiga moni e lē toe aveesea, ma o le a faamamaluina ma viia ai le suafa silisili o lo tatou Atua.”