Fesili Mai le ʻAufaitau

Pe e manaʻomia ona faatofuina atoa i le vai pe afai ua manaʻo se tagata e papatisoina ae o loo aafia i se maʻi ua matuā lē mafai ai lava ona gaoioi, po o aafia foʻi i se tulaga e sili ona leaga o lona soifua mālōlōina, lea e faafaigatā ai ona faatofuina?

O le upu papatisoina, e sau mai le veape Eleni baʹpto, o lona uiga “fufui i totonu.” (Ioane 13:26) I le Tusi Paia, “o le papatiso” e tutusa lava ma le “faatofu.” E tusa ai ma le papatisoina o le eunuka Aitiope lea na faia e Filipo, ua faapea mai le Emphasised Bible a Rotherham: “Ona o ifo lea o i laua uma i le vai, o Filipo ma le eunuka—ua na faatofu foi ia te ia.” (Galuega 8:38) I lea, ua fufui atoa ai i le vai le tagata lea ua papatisoina.—Mataio 3:16; Mareko 1:10.

Sa faatonuina e Iesu ona soo e faapea: “O lenei, ia outou o atu e fai nuu uma lava ma soo, ma papatiso atu ia te i latou.” (Mataio 28:19, 20) E tusa ai ma lenei tulaga, ua fuafua ai e Molimau a Ieova e faia papatisoga i vai taʻele, vaituloto, vaitafe, po o isi lava nofoaga e tele ai vai mo le faatofuina atoa o se sui papatiso. Talu ai o le papatisoga o se mea e manaʻomia faale-Tusi Paia ona faatofuina atoa se tagata, e leai la se pule a se tagata e taofia ai se tasi mai le papatisoina. I lea, e ao ai ona papatisoina se tagata e tusa lava pe faia ai nisi o laasaga e lē masani ai ona o lona tulaga. Mo se faaaʻoaʻoga, o papatisoga e faia i tapu taʻele tetele, ua aogā mo tagata ua matutua aemaise i latou e faalēlelei le soifua mālōlōina. E mafai ona faamāfanafana le vai o loo i le tapu, ona tuutuu mālie ifo lea o le sui papatiso i totonu, ma a oo loa ina masani atu lona tino ma le māfanafana o le vai, ona faia loa lea o le papatisoga.

E oo lava i tagata e iai faigata faapitoa ona o le lē atoatoa o le malosi o le tino, ua papatisoina. Mo se faataʻitaʻiga, o tagata o ē sa fai taotoga i o latou faaʻī (tracheotomy), ma iʻu ai ina iai se pu tumau i le faaʻī, po o i latou o ē e manaʻomia ia masini e faamānava ai (respirator), sa faatofuina lava. O le mea moni, mo na papatisoga uma, e manaʻomia ai ona faia ni sauniuniga māeʻaeʻa. O se faiga atamai le iai o se tausimaʻi pasi, po o se fomaʻi foʻi. Ae peitaʻi, pe a faia ma le faaeteete ni taumafaiga faapitoa, e toetoe lava o na tulaga uma, e mafai lava ona faia le papatisoga. O lea la, e ao lava ona faia ma le faautauta taumafaiga uma e papatisoina ai se tagata i le vai pe afai o lona faanaunauga moni lea, ma pe afai ua ia sauniuni e taliaina ia lamatiaga o loo aafia ai.