Ia Faaalia le Naunau i le Amiotonu a Ieova

“O le ua tausisi i le amiotonu ma le alofa, e maua e ia le ola.”—FAATAOTO 21:21.

1. O ā ala o tagata i aso nei ua faapogaia ai ni iʻuga malaia?

“O I AI le ala ua tonu i le manatu o le tagata; a o lona taunuuga, o ala ia e oti ai.” (Faataoto 16:25) Maʻeu le saʻo o le auala ua faamatala ai e lenei faataoto o le Tusi Paia, ala o le toʻatele o tagata i aso nei! I le tulaga lautele, ua pupū atu tagata i le faia o mea e tusa ma o latou lava manatu, ae ua lē amanaʻia ai manaʻoga e sili ona faigofie o isi tagata. (Faataoto 21:2) Ua latou faapea mai e faaaloalo i tulafono ma tapulaa a o latou atunuu, ae ua taumafai e saʻilia auala faaalatua e ʻalofia ai le tulafono na i lo le solia. O le iʻuga ua maua ai se sosaiete fevaevaeaʻi, fenuminumiaʻi, ma le tumu i faigatā.—2 Timoteo 3:1-5.

2. O le ā o loo manaʻomia vave mo le lelei o tagata lava latou?

² Mo lo tatou lava lelei—ma mo le filemu ma le saogalemu o tagata uma—ua tatou manaʻomia vave ai lava se tulafono po o se faatulagaga e amiotonu ma saʻo, lea o le a lotomalilie tagata uma ina ia taliaina ma usiusitai i ai. E manino lava, e leai se tulafono po o se faatulagaga ua faatūina e so o se tagata, e tusa lava po o le ā lona atamai po o lona faamaoni, e mafai ona faamalieina lenā manaʻoga. (Ieremia 10:23; Roma 3:10, 23) Afai o loo iai se faatulagaga faapena, o fea e mafai ona maua ai ma o le a faapeʻī le tulaga o le a i ai? Ae atonu o le fesili e sili ona tāua, Afai o iai se faatulagaga faapena, po o le a e taliaina ea ma gauaʻi i ai?

Saʻilia o se Faatulagaga Amiotonu

3. O ai ua sili ona agavaa na te saunia se faatulagaga e taliaina ma aogā mo tagata uma, ma aiseā?

³ Ina ia saʻilia se faatulagaga e taliaina ma aogā i tagata uma, e ao ona tatou vaavaai atu i se tasi e lava lona silafia e faatatau i ituaiga, i atunuu, ma faasāsāga faapolotiki, ma o sē e lē o faalavelavea ona o le valea ma vaivaiga faaletagata. E aunoa ma se masalosalo, na pau lē e talafeagai i ai, o Lē e ona le malosi uma lava na Foafoaina Mea, o Ieova le Atua o lē ua folafola mai: “E pei ona sili ona maualuga o le lagi i le lalolagi, ua  faapea ona sili ona maualuga o oʻu ala i o outou ala, ma oʻu manatu e sili i o outou manatu.” (Isaia 55:9) E lē gata i lenā, ua faamatalaina i le Tusi Paia Ieova o “le Atua faamaoni, e le o ia te ia se amioletonu, o le amiotonu ma le amio saʻo lava ia.” (Teuteronome 32:4) I le Tusi Paia atoa, ua tatou maua ai le faaupuga e “amiotonu Ieova.” (Esoto 9:27; 2 Nofoaiga a Tupu 12:6; Salamo 11:7; 129:4; Auega 1:18) Ioe, e mafai ona tatou vaavaai atu iā Ieova mo se faatulagaga e aupito sili ona lelei auā o ia o lē e faamaoni, e faamasinotonu, ma amiotonu.

4. O le ā le uiga o le upu “amiotonu”?

⁴ O le mea moni ua tau lē faaaogāina le upu “amiotonu” i aso nei. E toʻatele tagata ua iai se vaaiga lē fiafia, pe ʻinoʻino i tagata o ē e manatu ua sili atu lo latou amiotonu pe paia na i lo isi tagata, po o le fia mapolotu. Peitaʻi, e tusa ai i faamatalaga faale-Tusi Paia e uiga i le amiotonu, o loo faasino atu lea i le “tonu, saʻo, sao; e lē ponā, e lē agasala; e gauaʻi i mataupu silisili o le tulafono tauatua po o faatulagaga tau amio ua taliaina; e gaoioi ma le saʻo po o le tonu.” Pe e te lē naunau atu ea i se tulafono po o se faatulagaga e faatāuaina na uiga matagofie?

5. Faamatala le uiga o le amiotonu e pei ona faamatalaina ai i le Tusi Paia.

⁵ E tusa ai i le uiga o le amiotonu, ua mātauina e le Encyclopaedia Judaica e faapea: “O le amiotonu, ua lē na o se manatu faale-Atua, ae o le mea moni o loo faavae aʻe i le faia o le mea ua tonu ma saʻo i faiā uma.” Mo se faaaʻoaʻoga, o le amiotonu a le Atua, ua lē na o se uiga i le loto po o se uiga o loo iā te ia, e pei o le paia ma le mamā. Na i lo lenā, o se faailoaga lea o lona natura i ala e saʻo ma tonu. E ono mafai ona faapea atu ona o Ieova e paia ma mamā, o mea uma lava la ua ia faia ma mea uma e pogai mai iā te ia, e amiotonu. E pei ona faapea mai le Tusi Paia, “e amiotonu Ieova i ona ala uma; o loo alofa ia i ana mea uma lava na faia.”—Sala. 145:17.

6. O le ā na taʻua e Paulo e uiga i nisi o Iutaia lē talitonu i ona aso, ma aiseā?

⁶ Sa faamamafa e le aposetolo o Paulo lenei manatu i lana tusi i Kerisiano i Roma. Na ia tusia ai e faatatau i nisi o Iutaia lē talitonu e faapea: “Auā ua le iloa e i latou le amiotonu mai le Atua, ma ua saili e faatu la latou lava amiotonu, ua latou le usiusitai ai i le amiotonu mai le Atua.” (Roma 10:3) Aiseā na taʻua ai e Paulo i latou na o ni ē “ua le iloa e i latou le amiotonu mai le Atua”? Pe sa lē aʻoaʻoina ea i latou i le Tulafono, i faatulagaga amiotonu a le Atua? O le mea moni, o le mea lenā sa fai iā i latou. Peitaʻi o le toʻatele o i latou sa manatu i le amiotonu ua na o se uiga lelei faaletagata, e mafai ona maua i le tausi aʻiaʻi ma le matuā faaeteete o tulafono faalelotu, na i lo le manatu i le amiotonu o se faatulagaga e taʻitaʻia ai i latou i a latou feutagaʻiga ma uso a tagata. I le pei o taʻitaʻi lotu i ona pō o Iesu, sa latou lē malamalama i le uiga moni o le faamasinotonu ma le amiotonu.—Mataio 23:23-28.

7. Ua faapefea ona faaalia le amiotonu a Ieova?

⁷ I se eseesega iloga, ua faaalia ma ua matuā iloa lelei le amiotonu a Ieova i ana feutagaʻiga uma. E ui ina manaʻomia e lana amiotonu lona lē faagaloina o agasala e faia ma le loto i ai a tagata agasala, ae ua lē avea ai o ia ma Atua e sauā ma tagisā, lea e ao ona matataʻu ma faamamao ese mai ai. I le tuufaafeagai, o ana gaoioiga amiotonu ua avea lea ma faavae e mafai ai e tagata ona faalatalata atu iā te ia ma faapea ona faasaoina ai mai iʻuga malaia o le agasala. O le mea lea, ua matuā talafeagai ai ona faamatalaina Ieova “o le Atua amiotonu, i le ma le Faaola.”—Isaia 45:21.

Le Amiotonu ma le Faaolataga

8, 9. I ā auala na faaalia ai e le Tulafono le amiotonu a le Atua?

⁸ Ina ia malamalama i le fesootaʻiga i le va o le amiotonu a le Atua ma lana gaoioiga alofa o le faaolataga, seʻi manatunatu i le Tulafono na ia tuuina atu i le nuu o Isaraelu e ala iā Mose. E mautinoa sa tonu le Tulafono. I ana upu faamavae, na toe faamanatu atu ai Mose i tagata Isaraelu e faapea: “O ifea foi se nuu mamalu e i ai tulafono ma faamasinoga tonu, e pei o lenei tulafono uma ua ou tuuina atu ia te outou i le aso nei?” (Teuteronome 4:8) I senituri mulimuli ane, na faalauiloa atu ai e le Tupu o Tavita o Isaraelu e faapea: “O faamasinoga foi a Ieova e moni ia ma tonu uma lava.”—Salamo 19:9.

 ⁹ E ala i le Tulafono, na faamanino atu ai e Ieova ana faatulagaga lelei atoatoa mo le mea saʻo ma le mea e sesē. Na faatulaga auʻiliʻili atu e le Tulafono, le auala sa tatau i tagata Isaraelu ona latou amioaʻi e lē gata i mataupu faalelotu, ae faapena foʻi i feutagaʻiga faapisinisi, i faiā tau faaipoipoga, i mea taumafa ma le tausia o le tumamā, atoa ai ma faaiʻuga tau faamasinoga. Sa iai foʻi i le Tulafono faasalaga mamafa faasaga i ē e solia le tulafono, e aofia ai se faasalaga oti i nisi o tulaga. * Ae pe ua avea ea mea manaʻomia amiotonu a le Atua, e pei ona faaalia i le Tulafono, o se avega mamafa ma faatigā i tagata, e aveesea ai lo latou saʻolotoga ma le olioli, e pei ona faitio ai tagata i aso nei?

10. Sa faapeʻī lagona o i latou sa alolofa iā Ieova e uiga i ana tulafono?

¹⁰ O i latou na alolofa iā Ieova sa latou matuā naunau i ana tulafono ma poloaʻiga amiotonu. Mo se faaaʻoaʻoga, o le tupu o Tavita, e lē gata sa ia amanaʻia le moni ma le amiotonu o faaiʻuga tau faamasinoga a Ieova e pei ona tatou mātauina, ae sa ia lotofaafetai foʻi ma talisapaia na mea. Na ia tusia e faatatau i tulafono ma faaiʻuga tau faamasinoga a Ieova e faapea: “E silisili ona lelei i le auro, o le auro e sili ona lelei e tele; e sili foi ona suamalie i lo le meli, o le meli ua sisina ifo. Ua apoapoaiina mai ai foi lau auauna; e tele foi le taui pe a tausi i ai.”—Salamo 19:7, 10, 11.

11. Sa faamaonia faapefea le avea o le Tulafono o se ‘taʻitaʻitama e taʻitaʻiina ai ia Keriso’?

¹¹ I ni senituri mulimuli ane, na faasino atu ai foʻi e Paulo se aogā aupito sili o le Tulafono. Na ia tusia i lana tusi na auina atu i Kalatia e faapea: “Ua fai mo tatou taʻitaʻitama le tulafono, na te taʻitaʻiina i tatou ia Keriso, ina ia taʻuamiotonuina i tatou i le faatuatua.” (Kalatia 3:24) I le vaitaimi o Paulo, na avea ai se taʻitaʻitama e fai ma auauna po o se pologa a se ʻauaiga e toʻatele. O lona tiute o le puipuia lea o le fanau po o le momoli foʻi o i latou i le aʻoga. I se tulaga faapena, na puipuia ai e le Tulafono tagata Isaraelu mai amioga ma faiga paʻū maulalo faalelotu a o latou nuu tuaoi. (Teuteronome 18:9-13; Kalatia 3:23) E lē gata i lenā, sa faamanatu atu e le Tulafono i tagata Isaraelu lo latou tulaga agasala, ma lo latou manaʻomia o le faamagaloga ma le faaolataga. (Kalatia 3:19) Na faaalia i le faatulagaga o taulaga le manaʻomia o se taulaga togiola, ma na saunia ai se faiga faavaloaga o le a mafai ona mātaulia ai le Mesia moni. (Eperu 10:1, 11, 12) O lea, a o faailoa mai e Ieova lana amiotonu e ala i le Tulafono, sa ia faia faatasi ma lona finagalo mo le lelei ma le faaolataga e faavavau o tagata.

I Latou ua Taʻuamiotonuina e le Atua

12. O le ā na semanū e maua e tagata Isaraelu pe ana latou tausia ma le faaeteete le Tulafono?

¹² Talu ai o le Tulafono na tuuina mai e Ieova sa tonu i ona vala uma, na semanū e maua ai e tagata Isaraelu se tulaga amiotonu i luma o le Atua pe ana latou usiusitai i ai. Na toe faamanatu atu e Mose i tagata Isaraelu a o toe o se aga ona latou ulu atu lea i le Nuu Folafolaina e faapea: “E avea foi ma amiotonu ia te i tatou, pe afai tatou te anaana ia faia ia poloaiga uma i luma o  Ieova lo tatou Atua, faapei ona ia poloai mai ai ia i tatou.” (Teuteronome 6:25) E lē gata i lenā, sa folafola atu e Ieova e faapea: “Ia outou tausiusi i aʻu tulafono ma aʻu faamasinoga; o mea ia, a faia e le tagata, e ola ai lava ia; o aʻu o Ieova.”—Levitiko 18:5; Roma 10:5.

13. Pe sa lē faamasinotonu ea Ieova i le poloaʻiina o ona tagata e tausia le Tulafono amiotonu? Faamatala.

¹³ E faanoanoa, ona sa lē taulau i le nuu o Isaraelu ona “faia ia poloaiga uma i luma o Ieova” ma na latou lē maua ai faamanuiaga na folafola atu i ai. Sa lē taulau ona latou tausia poloaʻiga uma a le Atua ona sa lelei atoatoa le Tulafono a le Atua, ae e leʻi faapena i latou. Po o le uiga ea o lea mea sa lē faamasinotonu pe amiolētonu le Atua? E matuā leai lava. Na tusia e Paulo e faapea: “O lenei, se a ea sa tatou upu? O i le Atua ea le amioletonu? Aua neʻi faapea.” (Roma 9:14) O le mea moni o tagata o ē na soifua i luma atu ma ina ua māeʻa ona tuuina mai le Tulafono, sa taʻuamiotonuina i latou e le Atua e ui lava i so latou tulaga lē lelei atoatoa ma agasala na iai. Ua aofia ai i le lisi o na tagata e matataʻu i le Atua ia Noa, Aperaamo, Iopu, Raava, ma Tanielu. (Kenese 7:1; 15:6; Iopu 1:1; Esekielu 14:14; Iakopo 2:25) O le fesili la ua tulaʻi mai: O le ā le faavae na taʻuamiotonuina ai na tagata e le Atua?

14. O le ā e faauiga i ai e le Tusi Paia pe a tautala i se tagata e faapea e “amiotonu”?

¹⁴ Pe a tautala le Tusi Paia e faatatau i se tagata e “amiotonu,” e lē o lona uiga e faapea e lē agasala pe lelei atoatoa o ia. Na i lo lenā, o loo faauiga atu i le faataunuuina e se tasi o ana matafaioi i luma o le Atua ma tagata. Mo se faaaʻoaʻoga, sa taʻua Noa “o le tagata amiotonu” ma le “sao i e tupulaga ma ia” ona sa ia “faia . . . e pei ona poloai atu ai le Atua ia te ia i mea uma, sa faapea lava ona fai e ia.” (Kenese 6:9, 22; Malaki 3:18) O mātua o Ioane le papatiso, o Sakaria ma Elisapeta, “sa amiotonu i laua i luma o le Atua, o savavali i poloaiga ma tulafono uma a le Alii [Ieova] e le mataʻuleagaina.” (Luka 1:6) Ma na faamatalaina se tagata e lē o se Isaraelu, ae o se taʻitaʻiʻau mai Italia e suafa iā Konelio e faapea “o le tagata amiotonu, ma le mataʻu i le Atua.”—Galuega 10:22.

15. O le ā e fesootaʻi vavalalata atu i ai le amiotonu?

¹⁵ E faaopoopo atili atu i ai, o le amiotonu a tagata, e fesootaʻi vavalalata atu i mea o loo i le loto o se tasi—o lona faatuatua ma le lotofaafetai ma le alofa mo Ieova ma ana folafolaga—ae lē o le tau ina faia e se tasi o mea o loo manaʻomia e le Atua. O loo taʻua i le Tusi Paia Aperaamo e faapea “ua faatuatua foi o ia ia Ieova, ona ia taʻuamiotonuina mai ai lea ia te ia.” (Kenese 15:6) Sa faatuatua Aperaamo e lē gata o loo soifua le Atua, ae faapena foʻi i ana folafolaga e faatatau i le “fanau.” (Kenese 3:15; 12:2; 15:5; 22:18) E faavae i lenā faatuatua ma galuega e ōgatasi ma le  faatuatua, sa mafai ai e Ieova ona maua se faiā ma Aperaamo, atoa ai ma isi tagata faatuatua e ui i so latou tulaga lē lelei atoatoa.—Salamo 36:10; Roma 4:20-22.

16. O le ā e iʻu i ai le faatuatua i le togiola?

¹⁶ O le manatu faaiʻu, o le amiotonu a tagata e faalagolago lea i le faatuatua i le taulaga togiola a Iesu Keriso. Na tusi Paulo e faatatau i Kerisiano i le uluaʻi senituri, e faapea: “Ua taʻuamiotonuina fua i lona alofa tunoa [o le Atua] i le togiola e a Keriso Iesu.” (Roma 3:24) O i inā sa talanoa atu ai Paulo e uiga iā i latou o ē ua filifilia e avea ma suli faatasi ma Keriso i le Malo faalelagi. Ae o le taulaga togiola a Iesu, na maua ai foʻi e le isi faitau miliona le avanoa e taʻuamiotonuina ai i luma o le Atua. Na vaaia e le aposetolo o Ioane i se faaaliga “le motu o tagata e toatele . . . e le ma faitaulia e se tasi, o loo tutū i latou i luma o le nofoālii ma luma o le Tamai Mamoe, ua oofu i latou i ofu sisina.” O ofu sisina ua faatusaina ai lo latou tulaga mamā ma le amiotonu i luma o le Atua ona “ua ta foi o latou ofu, ma ua faasinasinaina o latou ofu i le toto o le Tamai mamoe.”—Faaaliga 7:9, 14.

Ia Naunau i le Amiotonu a Ieova

17. O ā laasaga e tatau ona uia i le saʻilia o le amiotonu?

¹⁷ A o foaʻiina mai ma le alofa e Ieova lona Alo, o Iesu Keriso, e avea o se auala e maua ai e tagata se tulaga amiotonu i ona luma, e lē faafuaseʻi iʻuga e maua mai ai. E tatau i se tasi ona faaalia le faatuatua i le togiola, ia faaōgatasi lona olaga ma le finagalo o le Atua, ia faia se tuuina atu iā Ieova, ma ia faailogaina e ala i le papatisoga i le vai. Ona tatau lea i se tasi ona faaauau pea ona saʻili i le amiotonu, atoa ai ma isi uiga faaleagaga. Na apoapoaʻi atu Paulo iā Timoteo, o se Kerisiano papatiso o lē ua aofia i le valaaulia faalelagi e faapea: “Ia e tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu.” (1 Timoteo 6:11; 2 Timoteo 2:22) Sa faamamafa foʻi e Iesu le manaʻomia o se taumafaiga e faaauau pea ina ua ia fetalai e faapea: “Ia outou muai saili [“pea,” NW] lona malo ma lana amiotonu.” Atonu o loo tatou matuā galulue mamafa e saʻili faamanuiaga o le Malo o le Atua, ae po o tutusa foʻi ma lo tatou galulue mamafa i le saʻilia o ala amiotonu a Ieova?—Mataio 6:33, LF.

18. (a) Aiseā e lē faigofie ai ona saʻilia le amiotonu? (e) O le ā e mafai ona tatou aʻoaʻoina mai le faaaʻoaʻoga a Lota?

¹⁸ O le mea moni, e lē faigofie le saʻilia o le amiotonu. O le māfuaaga ona o i tatou uma lava tatou te lē lelei atoatoa ma o lo tatou faanaunauga masani e mafuli atu i le faia o amiolētonu. (Isaia 64:6) E sili atu i lenā, o loo siʻomia i tatou e tagata o ē e itiiti so latou faaaloalo mo ala amiotonu a Ieova. Ua talitutusa lo tatou siʻomaga ma le tulaga o Lota, o lē na soifua aʻe i se aai sa lauiloa i le amioleaga o Sotoma. Na faamatala e le aposetolo o Peteru le pogai na talafeagai ai iā Ieova ona laveaʻiina Lota mai le faaumatiaga sa faaloloʻi ane. Na faapea mai Peteru: “O lea tagata amiotonu, sa tiga lona loto faamaoni a o nofo faatasi ma i latou, i lona vaai atu ma faalogo atu i lea aso ma lea aso, i a latou amio faaletaupulea.” (2 Peteru 2:7, 8) O le mea lea e ao ai iā i tatou taʻitoʻatasi ona fesili ifo, ‘Po o taliaina ea e loʻu loto faiga amioleaga o loo siʻomia ai i tatou? Po o oʻu iloa ea le matagā o faafiafiaga po o taaloga taʻutaʻua o loo aafia ai faiga sauā? Pe o tigā ea loʻu loto e pei o Lota ona o na amiolētonu?

19. O ā faamanuiaga e mafai ona tatou maua pe afai tatou te naunau i le amiotonu a le Atua?

¹⁹ I nei aso fesouaʻina ma le lē mautonu, ua avea ai le naunau i le amiotonu a Ieova o se puna o le saogalemu ma le puipuiga malu. E  faatatau atu i le fesili: “Ieova e, o ai ea e nofo i lou fale fetafai? O ai ea e mau i lou mauga paia?” Na tali le Tupu o Tavita: “O le savali ma le amio sao, ma ua fai le amiotonu, ma tautala ma le faamaoni i lona loto.” (Salamo 15:1, 2) E ala i le saʻilia o le amiotonu a le Atua ma faaalia le naunau i ai, e mafai ona tatou faatumauina ai se faiā lelei ma ia ma faaauau ai ona tatou maua lona finagalo malie ma faamanuiaga. O lea, e tatou te mauaina ai se olaga e faamalieina, e faaaloalogia, ma maua ai le filemu o le mafaufau. Ua faapea mai le Afioga a le Atua, “o le ua tausisi i le amiotonu ma le alofa, e maua e ia le ola, ma le amiotonu, ma le viiga.” (Faataoto 21:21) I le ma le isi, o le faia o le mea aupito sili tatou te mafaia mo le mea ua tonu ma saʻo i a tatou taumafaiga uma lava, o le a faapea ona maua ai ni faiā totino fiafia ma faaleleia ai le uigā o se olaga—tau amio ma le faaleagaga. Na faalauiloa mai e le faisalamo e faapea: “Amuia i latou o e tausi i le faamasinoga, o e fai le amiotonu e le aunoa.”—Salamo 106:3.

[Faamatalaga pito i lalo]

Pe Mafai Ona E Faamatalaina?

• O le ā le mea e taʻu o le amiotonu?

• E faapefea ona fesootaʻi le faaolataga ma le amiotonu a le Atua?

• O le ā le faavae ua taʻuamiotonuina ai tagata e le Atua?

• E mafai faapefea ona tatou faaalia le naunau i le amiotonu a le Atua?

[Fesili mo le Suʻesuʻega]

[Ata i le itulau 15]

Na faaalia e le tupu o Tavita le naunau loloto mo tulafono a le Atua

[Ata i le itulau 16]

Na taʻuamiotonuina Noa, Aperaamo, Sakaria ma Elisapeta ma Konelio e le Atua. Pe e te silafia le pogai?