Lipoti a Ē Faalauiloa le Malo

Mauaina o le Upu Moni i se Nofoaga e Leʻi Mafaufauina

O LE finagalo o le Atua, “ina ia faaolaina o tagata uma lava, ma ia oo ina iloa lelei [“mauaina le poto saʻo,” NW] le upu moni.” (1 Timoteo 2:3, 4) O le māfuaaga lenei ua lomia ai ma faasalalauina e Molimau a Ieova le faitau miliona o kopi o le Tusi Paia ma lomiga e fesoasoani ai i le suʻesuʻeina o le Tusi Paia. I nisi taimi, ua fesoasoani ai nei lomiga i tagata loto faamaoni e aʻoaʻoina le upu moni i ni auala e matuā leʻi faatalitalia lava. E tusa ai ma lea itu, ua lipotia mai ai e ē faalauiloaina le Malo i Freetown, Sierra Leone, le mea lenei na tupu.

O Osman, o le atalii lona lua lea i se aiga e toʻa iva le fanau. I le tuputupu aʻe i se aiga e fiafia i le lotu, sa ō ai e lē aunoa o ia ma lona tamā e tapuaʻi. Ae peitaʻi, na matuā mafatia lava Osman i mea na aʻoaʻoina e lana lotu e uiga i seoli. Sa lē malamalama o ia pe e faapefea i se Atua e alofa mutimutivale ona faapuapuagatia tagata amioleaga i le susunuina o i latou i se afi. Sa lē mafai ona faatoʻafilemuina le mafaufau o Osman i faamatalaga uma na ofoina atu, ina ia fesoasoani iā te ia e malamalama ai i le aʻoaʻoga e uiga i le afi i seoli.

I le tasi aso, ina ua 20 tausaga o Osman, sa ia mātauina ai se tusi lanumoana na toetoe lava a tanumia atoa i lapisi i totonu o se kalone lapisi. Ona o lona fiafia tele i tusi, na ia tago ai ma avaʻe i luga tafitafi mamā, ma ia iloa ai le igoa o le tusi e faapea—O Le Upu Moni E Taʻitaʻia Ai I Le Ola Faavavau. *

Sa taumanatu ia Osman e faapea: ‘Po o le ā lenei upu moni?’ Talu ai lona fia iloa tele, na ia aveina ai i lona aiga ma faitau loa le tusi atoa. Maʻeu lona fiafia ina ua ia aʻoaʻoina e iai le suafa totino o le Atua—o Ieova! (Salamo 83:18) Sa iloa ai foʻi e Osman e faapea, o le uiga autū o le Atua, o le alofa, ma e oo foʻi i le manatu e faapea e faapuapuagatia e le Atua tagata i se afi, o se mea e inosia e Ia. (Ieremia 32:35; 1 Ioane 4:8) Mulimuli lava, na faitau ai e Osman e faapea, ua lē pine ona aumaia lea e Ieova se parataiso faalelalolagi lea o le a mafai ona ola ai e faavavau tagata. (Salamo 37:29; Faaaliga 21:3, 4) Maʻeu se upu moni ofoofogia mai se Atua pele, e alofa mutimutivale! Sa faaalia e Osman le matuā lotofaafetai iā Ieova ina ua mafai ona ia mauaina le upu moni i se nofoaga e matuā leʻi faatalitalia lava.

I ni nai aso mulimuli ane, na mafai ai e Osman i le fesoasoani a ana uō ona maua le nofoaga e tū ai le Maota o le Malo a Molimau a Ieova ma auai loa mo le uluaʻi taimi i se sauniga. A o iai i inā, sa ia talosaga atu i se Molimau ina ia la suʻesuʻeina le Tusi Paia. E ui lava i teteega malolosi mai lona aiga, ae sa faaauau pea ona agaʻigaʻi i luma faaleagaga ia Osman ma na papatisoina ai o ia. (Mataio 10:36) I aso nei, o loo auauna o ia o se toeaina i le faapotopotoga. Maʻeu le ofoofogia ona na māfua nei mea uma lava mai le mauaina o se lomiga faale-Tusi Paia i se kalone lapisi!

[Faamatalaga pito i lalo]