O Ai e Tuuaʻia—O Oe Po o le Auala na Faia ai Oe?

O LOO galulue ma le fitā saienitisi e taumafai e suʻesuʻe pe iai ni aafiaga o le auala na faia ai le tagata e ono faapogaia ai le pulea e le ʻava malosi, le faatauatane, amioga tuufau faaleituaiga, faiga sauā, ma isi amioga e lē masani aʻi, e oo lava foʻi i le oti. Pe e lē o se toomaga ea la le iloaina e lē o i tatou e tuuaʻia mo a tatou gaoioiga, ae o aafiaga o le auala na faia ai i tatou? O se uiga masani faaletagata le tuuaʻia o se isi tagata po o se isi mea i ni o tatou sesē.

Pe afai o le faafitauli o le auala lea na faia ai le tagata, ua faapea mai saienitisi atonu e mafai ona suia le vaega o sela lea e faatonutonuina ai le tuputupu aʻe faaletino o le tagata, ma aveesea ai uiga e lē manaʻomia e ala i le faafesuiaʻi. O se malamalamaga na maua talu ai nei e faatatau i se vaega faapitoa o sela o le tino o le tagata, ua tuuina atu ai iā i latou se faamoemoe e mafai ai ona faia lea gaoioiga.

Peitaʻi, o lenei faamoemoe e faavae mai i le manatu e faapea e tuuaʻia moni lava le auala na faia ai i tatou e tusa ai o a tatou agasala ma mea sesē uma. Pe ua lava ea ni faamaoniga ua maua e saienitisi e faia ai se tuuaʻiga faasaga i le auala na faia ai i tatou? E manino mai, o le tali i lea fesili o le a aafia loloto ai le auala o loo tatou vaai ai iā i tatou lava ma lo tatou lumanaʻi. E ui i lea, a o leʻi iloiloina ia faamaoniga, seʻi mafaufau muamua i le amataga mai o le tagata ina ia atili malamalama ai le mataupu.

Le Amataga Mai o le Agasala

O le toʻatele o tagata ua masani po ua faalogo foʻi i le tala e uiga i le agasala na faia e Atamu ma Eva, le uluaʻi ulugalii i le faatoʻaga o Etena. Pe na faia ea i laʻua faatasi ai ma se tulaga faalētonu na iai i vaega o o la sela ia e faatonutonuina ai lo la tuputupu aʻe faaletino, lea na māfua ai ona faigofie ona lolo atu ai i laʻua i le agasala ma le lē usiusitai?

Na folafola mai e Ieova le Atua o Lē na Foafoaina i laʻua, o lē e ana foafoaga lelei atoatoa uma e faapea, o lana galuega silisili i le lalolagi sa “matuā lelei lava.” (Kenese 1:31; Teuteronome 32:4) O faamaoniga faaopoopo o lona finagalo malie i lana foafoaga, o lona faamanuiaina lea o le uluaʻi ulugalii ma faatonuina i laʻua ina ia fanafanau, ia faatumu le lalolagi i tagata ola, ma pule i ana foafoaga i le lalolagi—e mautinoa le lē taitai ona masalosalo le Atua i mea na foafoaina e ia.—Kenese 1:28.

E tusa ai o le foafoaina o le uluaʻi ulugalii, ua taʻu mai e le Tusi Paia iā i tatou e faapea: “Ona faia lea e le Atua o le tagata i lona faatusa, o le faatusa o  le Atua na ia faia ai o ia; na faia e ia o i laua o le tane ma le fafine.” (Kenese 1:27) E lē o le uiga o lenei mea faapea na foafoaina tagata e foliga i le Atua i le itu faaletino, ona o le “Atua o le agaga lava ia.” (Ioane 4:24) Na i lo lenā, e faauiga atu i le foaʻiina atu i tagata o uiga o le Atua ma amioga talafeagai, le lotofuatiaifo. (Roma 2:14, 15) O i laʻua foʻi o ni ē na iai ni filifiliga saʻoloto, e mafai ona fefuafuataʻi ai se mataupu ma filifili mo se gaoioiga e faia.

E ui i lenā, sa leʻi tuusaunoaina ai o tatou uluaʻi matua e aunoa ma ni taʻiala. Na i lo lea, na lapataʻia i laʻua i āuga o le faia o le mea sesē. (Kenese 2:17) Ua faailoa mai e le faamaoniga faapea ina ua fesagaʻia Atamu ma le faafitauli o le faia o se filifiliga, na ia filifili ai e faia le mea sa foliga ane iā te ia e aogā ma lelei i lenā taimi. Na ia mulimuli atu i lana avā e faia le mea sesē na i lo le mafaufauina o la laʻua faiā ma Lē na Foafoaina o ia, po o āuga faaumiumi o lana gaoioiga. Mulimuli ane na ia taumafai foʻi e tuuaʻia Ieova, i lona faapea atu o le avā na Ia aumaia ua na faasesēina o ia.—Kenese 3:6, 12; 1 Timoteo 2:14.

E manino lava le tali atu a le Atua e tusa ai o le agasala a Atamu ma Eva. Sa leʻi taumafai o ia e faasaʻoina ni ‘faalētonu’ i le auala na faia ai i laʻua. Na i lo lea, na ia faaooina atu pea mea na ia taʻu atu iā i laʻua o le a avea ma āuga o a la gaoioiga, lea na iʻu ai i lo laʻua feoti. (Kenese 3:17-19) O lenei talafaasolopito i le amataga ua faamanino atili mai ai amioga masani a le tagata. *

Le Faamaoniga Faasaga i le Tuuaʻia o le Auala na Faia ai i Tatou

Ua loa ona faia e saienitisi se galuega tele o le saʻilia o le auala na faia ai i tatou mo māfuaaga ma auala e togafitia ai faamaʻi ma suia ai amioga faaletagata. Ina ua mavae le sefulu tausaga o saʻiliʻiliga a ni vaega se ono o tagata suʻesuʻe, na taʻua ai le fesootaʻi atu o le vaega o le sela e faatonutonu ai le olaga ma se faamaʻi e aafia ai neula o le tino, ae peitaʻi latou te lē iloa le auala e tupu ai. Peitaʻi, i le lipoti e uiga i lenei suʻesuʻega, na sii mai ai e le Scientific American le faamatalaga a le tagata suʻesuʻe i meaola o Evan Balaban, o lē na faapea mai e “matuā faigatā lava ona iloa e faapogaia e ni vaega faapitoa o sela ia e faatonutonuina ai le olaga amioga lē taupulea.”

O le mea moni, sa lē taulau suʻesuʻega ia na taumafai e faafesootaʻi atu ai le auala na faia ai le tagata ma amioga faaletagata. Mo se faaaʻoaʻoga, i le Psychology Today i se lipoti e faatatau i taumafaiga e saʻilia ni aafiaga mai le auala na faia ai le tagata mo le lotomafatia ua faapea mai: “O faamatalaga e faatatau i le puipuiga o tagata mai faamaʻi e tusa ai o le maʻi o le mafaufau, ua manino mai ai le lē avea o le auala na faia ai i tatou ma pogai o lea faamaʻi.” Ua aumaia e le lipoti se faaaʻoaʻoga: “O le tuufaatatauga o tagata na fananau i Amerika sa aafia i le lotomafatia a o leʻi oo i le 1905, e tasi le pasene o i latou e taʻi 75 tausaga. Iā i latou na fananau  i Amerika i le ʻafa senituri mulimuli ane ai, e 6 pasene i latou na oo ina maua i le lotomafatia i le taʻi 24 tausaga!” O lea ua manino mai e na o aafiaga e ese mai le tagata lava ia po o tulaga foʻi o le olaga sa mafai ona aumaia ia suiga tetele i na o ni nai tausaga.

O le ā ua taʻu mai iā i tatou e nei suʻesuʻega ma le tele o isi suʻesuʻega? A o ono fafauina aʻe e le vaega o le sela e faatonutonuina le olaga o tatou uiga totino, e mautinoa le iai o isi foʻi aafiaga. O le vala autū lava o lo tatou olaga masani, lea ua matuā oo i ai suiga tetele i aso nei. E tusa ai o mea o loo aafia ai talavou i faafiafiaga, ua faapea mai le tusi Boys Will Be Boys, e faigatā ona atiina aʻe e tamaiti ni amioga tatau pe afai e latou te “ola aʻe ma matamata mo le faitau sefuluafe itula i faasalalauga ma ata tifaga i TV i le fasi faamoʻamoʻaina o tagata, le tafanaina, tatuiina, aveesea o latou taufale, tatipi, faamanuʻalia, po o le tatipi ese o lima ma vae, po o le tutupu aʻe foʻi o tamaiti ma faalogologo i musika e viviia ai le toso teine, pule i le ola, fualaau faasāina, ʻava malosi, ma le faauamaaʻa.”

E manino mai, ua fafau aʻe e Satani, “le alii o lenei lalolagi” se lalolagi o loo ola ai le tagata e faamalieina ai ona tuʻinanauga sili ona leaga. O ai la na te mafaia ona faafitia le malosi o taaʻiga e aumaia e se lalolagi faapena iā i tatou?—Ioane 12:31; Efeso 6:12; Faaaliga 12:9, 12.

O le Pogai o Faafitauli o le Tagata

E pei ona tatou mātauina muamua, na amataina mai faafitauli o le tagata ina ua agasala le uluaʻi ulugalii. O le ā le iʻuga? E ui e lē tuuaʻia ē e tupuga mai iā Atamu i le agasala a Atamu, ae ua fananau mai i latou ma le agasala, le lē lelei atoatoa, ma le oti o so latou tofi tuufaasolo mai lea o le olaga. Ua faamatala mai e le Tusi Paia: “Faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.”—Roma 5:12.

Ona o le lē lelei atoatoa o le tagata ua oo ai o ia i se tulaga e mautinoa le faigatā. Ae ua lē tuusaunoaina mai ai i avega tauave tau amio. Ua faaalia mai e le Tusi Paia e faapea o i latou o ē faatuatua i le sauniga a Ieova mo le ola ma faaōgatusa o latou olaga i tapulaa a le Atua, o le a maua ai lona finagalo malie. E ala i lona agalelei, na saunia ai e Ieova se sauniuniga agaalofa e togiolaina ai tagata, i se uiga faafaatusa, e toe faatauina mai ai le mea na leiloa iā Atamu. O lenā sauniuniga o le taulaga togiola lea a lona Alo lelei atoatoa, o Iesu Keriso o lē na faapea mai: “Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.”—Ioane 3:16, LF; 1 Korinito 15:21, 22.

Na faaalia mai e le aposetolo o Paulo lona talisapaia loloto mo lenei sauniuniga. Na ia faapea mai: “Aue o aʻu le tagata malaia! O ai sē laveai ia te au ai le tino o lenei oti? Ou te faafetai lava i le Atua, auā o Iesu Keriso lo tatou Alii.” (Roma 7:24, 25) Na iloa e Paulo faapea pe afai e lolo atu o ia i le agasala ona o se vaivaiga, e mafai ona ia ole atu mo le faamagaloga a le Atua e faavae i le taulaga togiola a Iesu Keriso. *

E pei o le uluaʻi senituri, ua toʻatele tagata i aso nei na muaʻi ola i ni olaga leaga pe na foliga mai ua leai se faamoemoe, ae ua oo ina latou mauaina le poto saʻo o le upu moni o le Tusi Paia, faia suiga manaʻomia, ma ua oo i se tulaga e mauaina ai faamanuiaga a le Atua. O suiga na latou faia sa lē faigofie, ma e toʻatele o loo tauivi pea ma tuʻinanauga leaga. Ae ona o le fesoasoani a le Atua, ua mafai ai ona latou tumau i le faamaoni ma mauaina le olioli i le auauna ai iā te ia. (Filipi 4:13) Seʻi iloiloina se faaaʻoaʻoga o se tasi o lē na ia faia ni suiga tetele ina ia faafiafiaina ai le Atua.

Se Mea na Tupu e Faalaeiauina Ai

“A o avea aʻu ma tama talavou sa auai i se aʻoga nofo tumau, na ou aafia ai i amioga faatauatane, e ui lava sa lē taitai ona ou mafaufau o aʻu o se tauatane. Na tatala le faaipoipoga a oʻu matua, ma sa  ou moomoo ai mo se alofa faamatua lea sa ou leʻi mauaina. Ina ua uma aʻu aʻoga, sa ou auai i le vaegāʻau faafitafita e tusa ma tulafono o le malo. Sa iai ni alii tauatane sa nonofo i le fale na sosoo atu ma le fale sa ou iai. Na oo ina ou faananau i le auala sa ola ai i latou, o lea na amata ai loa ona ou aumea ma i latou. Ina ua mavae le tausaga talu ona matou faifaimea faatasi, na amata ai loa ona ou manatu o aʻu o se tauatane. Na ou faapea ifo: ‘O le tulaga lea ua ou iai, ma e leai se mea ou te mafai ona toe fai i ai.’

“Na amata ona ou aʻoaʻoina le gagana a ē tauatane, ma auai atu i fale kalapu a i latou, lea e faigofie ona maua ai fualaau faasāina ma le ʻava malosi. E ui lava e foliga mai o se olaga sa maua ai le fiafia ma e manaia tele, ae o le mea moni lava sa matuā matagā. Na ou faalogoina i totonu o loʻu loto le lē talafeagai o lenei ituaiga o faiā ma e leai se lumanaʻi e maua mai ai.

“Na ou vaaia i se tamaʻi aai se Maota o le Malo o Molimau a Ieova a o faia ai le sauniga. Sa ou alu i totonu ma faalogologo ai i le lauga, lea na talanoaina ai tulaga o le Parataiso i le lumanaʻi. Ina ua māeʻa ona ou feiloaʻi atu ai lea i nisi o Molimau ma valaaulia ai aʻu i se fonotaga. Na ou alu i ai, ma o se faaaliga lenā mo aʻu—le vaaia o aiga fiafia o loo tapuaʻi faatasi. O lea na amata ai loa ona ou suʻesuʻeina le Tusi Paia ma Molimau.

“E ui lava o se tauiviga mo aʻu, ae na amata ona ou faatatauina mea na ou aʻoaʻoina mai le Tusi Paia. Na mafai ona faasaʻoloto mai aʻu i faiga lē mamā sa ou aafia ai. Ina ua māeʻa ona ou suʻesuʻe mo le 14 masina, na tuuina atu loʻu ola mo Ieova ma papatisoina. O le uluaʻi taimi lea i loʻu olaga, na maua ai ni aʻu uō moni. Na mafai ona ou fesoasoani atu i isi ina ia aʻoaʻoina le upu moni mai le Tusi Paia, ma i le taimi nei o loo oʻu auauna ai o se auauna o le faiva i le faapotopotoga Kerisiano. Ua matuā faamanuiaina moni lava aʻu e Ieova.”

O Tatou e Tuuaʻia

E lē avea ma vaifofō le taumafai e tuuaʻia atoatoa le auala na faia ai i tatou ona o a tatou amioga lē taupulea. Na i lo le fesoasoani iā i tatou e faaleleia pe foʻia ai o tatou faafitauli, ua faapea mai le Psychology Today, o le faia faapea “atonu na ona māfua ai le manatu e leai se mea e mafai ona tatou faia ma o lea manatu ua avea ma pogai o le tele o o tatou faafitauli. Na i lo le faaitiitia ai o le faatuputupulaʻia o nei faafitauli, e foliga mai ua na ona faateteleina ai.”

E moni e tatau ona tatou tauivi ma taaʻiga leaga, e aofia ai o tatou lava tuʻinanauga agasala ma taumafaiga a Satani e faatosina ese ai i tatou mai le usitaʻi atu i le Atua. (1 Peteru 5:8) E moni foʻi atonu e ono aafia i tatou i se vaega o o tatou sela ia e faatonutonuina ai lo tatou tuputupu aʻe faaletino i se isi itu. Ae e mautinoa e lē tuua na o i tatou e aunoa ma se fesoasoani. Ua iai fesoasoani maufaatuatuaina mo Kerisiano—o Ieova, Iesu Keriso, le agaga paia o le Atua, lana Afioga le Tusi Paia, ma le faapotopotoga Kerisiano.—1 Timoteo 6:11, 12; 1 Ioane 2:1.

A o leʻi ulu atu le nuu o Isaraelu i le Nuu Folafolaina, na faamanatu atu ai e Mose i tagata la latou avega tauave i luma o le Atua, i le faapea atu: “Ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau; ina ia e alofa atu ia Ieova lou Atua, ma e faalogo i lona siufofoga, ma ia e pipii atu ia te ia.” (Teuteronome 30:19, 20) Ua faapena foʻi aso nei, ua iai i tagata taʻitoʻatasi lana avega tauave e filifili e ia lava e uiga i le auauna i le Atua ma le ausia o mea e manaʻomia e ia. O oe la e faia le filifiliga.—Kalatia 6:7, 8.

[Faamatalaga pito i lalo]

[Ata i le itulau 9]

Pe na lolo atu ea Atamu ma Eva i le agasala ona o ni faalētonu i le auala na faia ai i laʻua?

[Ata i le itulau 10]

Pe e tatau i tagata taʻitoʻatasi ona taliaina āuga o ana filifiliga?

[Faamatalaga i Ata]

O lē o loo faaaogāina fualaau faasāina: Godo-Foto

[Ata i le itulau 11]

Ua lē taulau taumafaiga e saʻilia ai aafiaga o le auala na faia ai le tagata i amioga faaletagata

[Ata i le itulau 12]

O le faatatauina o mea o loo i le Tusi Paia e mafai ona fesoasoani ai i ē e lotofaamaoni ina ia suia