O le Tetakalamatone i le Septuagint

O LOO suitulaga le Tetakalamatone, o mataʻitusi Eperu e fā יהוה (YHWH) i le suafa tauatua o Ieova. Ua loa ona talitonuina e faapea sa leʻi aliali mai le Tetakalamatone i kopi o le Septuagint. O lea, ua finauina ai e faapea pe a sii mai e tusitala o Tusitusiga Paia Eleni Tusitusiga Paia Eperu, e latou te lē faaaogāina le suafa tauatua i a latou tusitusiga.

O le faasologa o saʻiliʻiliga na faia pe ā ma le silia i le selau tausaga na mavae atu nei, na faaalia ai e faapea o loo iai le suafa o le Atua i le Septuagint. Ua taʻua faapea e se tasi tusi: “Sa iai se faanaunauga tele ina ia faasaoina mai ma le saʻo le suafa paia o le Atua, lea e kopiina saʻo mai ai mataʻitusi lava ia o le Tetakalamatone o loo i le ogatotonu o le tusitusiga Eleni pe a faaliliuina e tagata Iutaia Eleni le Tusi Paia Eperu i le faa-Eleni.”

O le manusikulipi na tusia i paʻu laau o loo faaalia i le itu agavale, ua na o se faataʻitaʻiga lenā o se tasi o tusi na faasaoina mai. Na mauaina i Oxyrhynchus, i Aikupito, ma faanumeraina i le 3522, o lenei tusi na tusiaina i tuā i le senituri muamua T.A. * Na fuaina pe ā ma le 2.5 i le 4 inisi (7 i le 10.5 senitimita) ma sa maua ai se fuaitau mai le tusi o Iopu 42:11, 12. O le Tetakalamatone, lenā o loo liʻoina, o loo tusiaina i mataʻitusi Eperu anamua. *

O lea la, pe na aliali mai i uluaʻi kopi o Tusitusiga Paia Eleni le suafa tauatua? Ua faapea mai le tagata atamai faapitoa o George Howard: “Talu ai ona o le Tetakalamatone o loo tusia lava i kopi o le Tusi Paia Eleni [le Septuagint] lea o loo faia aʻe ai le Tusi Paia a le uluaʻi lotu, ua talafeagai ai la ona talitonu e faapea na faasaoina mai e tusitala o le F[eagaiga] F[ou] le Tetakalamatone i tusitusiga paia ina ua latou siiina mai.” E aliali mai e leʻi leva lava ae suia e le ʻausii tusi le suafa tauatua i isi taʻu, e pei o le Kyʹri·os (Alii) ma le The·osʹ (Atua).

[Faamatalaga pito i lalo]

[Faamatalaga i Ata i le itulau 30]

Faaaloaloga a le Egypt Exploration Society