“Ua Latou O Ifo i le Mea Loloto”

“O le moana ua ufitia ai i latou, ua latou o ifo i le mea loloto pei o se maa.”

O UPU na sa faamanatuina ai i pese e Mose ma le nuu o Isaraelu le faasaoina o i latou mai le Sami Ulaula, ma le faaumatiaina o o latou fili Aikupito na tuliloaina i latou, o Farao ma lana ʻautau.—Esoto 15:4, 5.

Mo so o se tasi e vaavaai i lenā mea mataʻina na tupu, sa ia iloa lelei lava le uiga. E leai se tasi e mafai ona ia luʻia pe tetee i le pule a Ieova ma ola pea. Ae peitaʻi, i na o ni nai masina lava mulimuli ane, na luʻia ai i luma o le lautele e ni tagata iloga o Isaraelu, o Koru, Tatano, Apiramo, ma le toʻa 250 o ē na mulimuli atu iā i latou, le pule na tuuina atu e le Atua iā Mose ma Arona.—Numera 16:1-3.

I le faatonuga a Ieova, na lapataʻia ai e Mose le nuu o Isaraelu ina ia ō ese mai faleʻie o tagata fouvale. I le lagolagoina e tagata o o la aiga, na matuā lē maluelue ai lava ia taofi o Tatano ma Apiramo. Ona faalauiloa atu loa lea e Mose e faapea, o le a faailoa manino mai e Ieova i Lana lava auala i tagata e faapea, “ua ʻinoʻino ia tagata ia Ieova.” I lenā mea, na vaeluaina ai e Ieova le eleele i lalo ifo o o latou vae. “Ua o ifo i seoli i latou ma i latou uma e na ia i latou o ola lava, ona toe soo ane lea o le eleele i luga ia te i latou.” Ae faapefea Koru ma isi na fouvale? “Ua oo atu foi le afi mai ia Ieova, ua faaumatia ai ia tagata e toalua selau ma le toalima sefulu o e na avatu mea manogi e mu.”—Numera 16:23-35; 26:10.

Na faaumatia Farao ma ana ʻautau faapea ma i latou uma na fouvale i le vao, talu ai sa lē taulau ona latou amanaʻia le pule silisili a Ieova, ma lona silasila alofa mai i mea o loo faia i ona tagata. O lea la, o i latou uma ua vāai i le puipuiga a Ieova i nei aso faigatā, ua iai i se tulaga faanatinati e aʻoaʻoina, ma usiusitai iā Ieova o “lē Silisili ese” ma “Le e ona le malosi uma lava.” O le faia faapea, e mafai ai ona latou teulotoina fetalaiga mautinoa a Ieova e faapea: “E pauu se toaafe i ou tafatafa, ma le mano i lou itu taumatau; a e le tāitāi ane ia te oe. Na ona vaai i ai ou mata, e te iloa atu foi le taui o e amio leaga. Auā o oe, Ieova e, o loʻu malu oe, na e faia lē Silisili ese ma mea e te nofo ai.”—Salamo 91:1, 7-9.