Faafitauli o Tagata ua Toeitiiti Ona Faaiʻuina Lea!

“E FAATAUVAA lava le aogā o le fesoasoani a tagata ua fuafuaina mo le foʻiaina o pogai autū o feteenaʻiga pe afai e lē avea o se vaega o se fuafuaga patino, ma pe a lē sapasapaia e le malo. Ua faaalia i mea tutupu i lea aso ma lea aso e faapea, e lē mafai i na o taumafaiga a tagata ona foʻia faafitauli ia e masani ona faapogaia e faigāmalo.”—The State of the World’s Refugees 2000.

E ui lava i le tele o taumafaiga ua faia e tagata, ae ua lē mafai ai ona faaitiitia faafitauli o le fanau a tagata. O le ā se vaifofō tumau ua faia e malo? O le mea moni, e matuā laʻitiiti lava. Ae o fea se isi mea e mafai ona tatou saʻili atu i ai? I se fuaiupu mataʻiina i le amataga o le tusi a le aposetolo o Paulo i Kerisiano i Efeso, na ia faamatala ai le auala o le a faaiʻuina ai e le Atua faafitauli uma lava o le fanau a tagata. Ua ia faailoa mai foʻi le faatulagaga o le a faaaogā e le Atua e faia ai lenei mea—o se faatulagaga o le a uaʻi tuusaʻo atu i le pogai autū o faafitauli uma o loo malaia ai i tatou i aso nei. Aiseā e lē iloiloina ai le mea o loo fai mai ai Paulo? O le faamatalaga lenā o loo maua i le Efeso 1:3-10.

‘Ina ia Toe Faapotopotoina ia Keriso o Mea Uma Lava’

Ua faapea mai le aposetolo, o le fuafuaga a le Atua, ina ia faia ‘se sauniuniga [po o se pulega o mataupufai] i le faaatoaga o tausaga [atofaina].’ O le ā le uiga o lenei mea? O lona uiga, ua uma ona faataatia e le Atua se taimi patino o le a ia gaoioi ai i se auala ‘ina ia toe faapotopotoina ia Keriso . . . o mea uma lava i le lagi ma mea i le lalolagi.’ (Efeso 1:10, LF) Ioe, ua amata nei ona faagaoioia e le Atua se faatulagaga ina ia toe faapotopotoina faatasi mea uma lava i le lagi ma mea i le lalolagi ina ia autasi ai i lalo o lana lava pule. E mālie lava e tusa ai ma le faaupuga i inei e faapea ʻina ia toe faapotopotoina faatasi,’ ua mātauina e se tagata aʻoga o le Tusi Paia o J. H. Thayer e faapea: “O le a toe aumaia faatasi iā te ia . . . o mea uma ma tagata uma (na faataapeapeina ona o le agasala) i se tulaga soofaatasi e tasi o se ʻauuso iā Keriso.”

Ua faailoa mai e lenā manatu le manaʻoga mo le Atua ina ia faia lenei mea ona o le pogai na  māfua ai le lē autasi i le amataga. I le amataga lava o le tala faasolopito o le tagata, na mulimuli ai o tatou uluaʻi mātua o Atamu ma Eva i le fouvalega a Satani le Tiapolo faasaga i le Atua. Na mananaʻo i latou e fia tutoʻatasi ina ia mafai ai ona faia a latou lava filifiliga i le faia o le mea saʻo ma le mea sesē. (Kenese 3:1-5) I le ōgatusa ai ma le faamasinoga tonu a le Atua, na tulia ese i latou mai le aiga o le Atua ma motusia ai la latou faiā faaleuō ma ia. Ua latou faaoo uma atu le fanau a tagata i le lē lelei atoatoa faatasi ai ma iʻuga mataʻutia uma ua oo iā i tatou i aso nei.—Roma 5:12.

Faatagaina o le Amioleaga mo se Taimi Lē Tumau

Atonu o le a fesili mai nisi: ‘Aiseā na faataga ai i latou e le Atua e faia lenā mea? Aiseā na ia lē faaaogāina ai lona mana silisili ma uunaʻia faamalosi le faia o lona finagalo, ina ia taofia ai tigā ma mafatiaga uma, ia ua oo mai iā i tatou i le taimi nei?’ Atonu o lagona masani lava na. Ae o le ā o le a faamaonia ai pe a faaaogāina lenā mana uiga ese? Pe e te fiafia i se tasi o lē e na te iloaina loa lava se faailoga o ē e tetee iā te ia, ona ia faatoʻilaloina loa lea o teteega ona e iai lona mana e faia ai faapea? E mautinoa lava e leai.

E leʻi luʻia e na ʻaufouvale le mana o le Atua e ona le malosi uma lava. Sa sili atu ona latou luʻia aemaise lava le saʻo aʻiaʻi ma le tonu o lana pulega. Ina ia foʻia e lē toe lāgā lava le finauga na lāgā i le amataga, na faataga ai e Ieova ana foafoaga ola e faia a latou lava pulega mo se taimi lē tumau e aunoa ma lona pule tuusaʻo mai i ai. (Failauga 3:1; Luka 21:24) Pe a māeʻa lenā taimi, ona ia faalaa mai loa lea e toe faatinoina atoatoa lana pulega i le lalolagi. E oo atu i lenā taimi, o le a matuā manino mai lava e faapea, o lana pulega e na o le pau lea o le auala e maua ai le filemu tumau, le fiafia, ma le manuia e i latou e aināina le lalolagi. Ona aveesea loa lea e faavavau o tagata sauā uma i le lalolagi.—Salamo 72:12-14; Tanielu 2:44.

“A o Lei Faavaeina le Lalolagi”

Ua leva lava ona fuafuaina e Ieova e faia nei mea uma. Ua taʻua e Paulo e faapea, “a o lei faavaeina le lalolagi.” (Efeso 1:4) E lē o le uiga o lenā mea e faapea, i le taimi a o leʻi foafoaina le lalolagi po o Atamu ma Eva. O le lalolagi lenā sa “matuā lelei lava,” ma o le taimi lenā e leʻi faia se fouvalega. (Kenese 1:31) Ae o le ā la le “lalolagi” lea na faauiga i ai le tala a le aposetolo o Paulo? Le lalolagi o fanau a Atamu ma Eva—se lalolagi o tagata agasala e lē lelei atoatoa, e iai se faamoemoe mo le togiolaina. A o leʻi fanauina mai ni fanau, ua uma ona silafia e Ieova le auala o le a ia tauaaoina ai mataupu, ina ia saunia ai se mapusaga mo ē na tupuga mai iā Atamu ua mafai ona togiolaina.—Roma 8:20.

O le mea moni, e lē o faaalia ai i inei e faapea, ua tauaaoina e le Pule Silisili ese o le vateatea mataupu e pei ona faia e tagata. I le iloaina atonu o le a tulaʻi mai se faalavelave faafuaseʻi, ona faia lea e tagata ni fuafuaga eseese ina ia mafai ai ona taulimaina lea tulaga pe a tupu. E lē faapena le Atua, e na ona finagalo lava o Lē e Ona le malosi uma lava i le mea e fai ma faataunuuina loa. Ae e ui i lea, o loo faamatalaina mai e Paulo le auala ua filifilia e Ieova e faaleleia ai mea, ina ia aumaia ai se mapusaga tumau i tagata. O ā na auala?

O Ai o le a Aumaia le Mapusaga?

Ua faamatalaina e Paulo e faapea, ua faia e soo o Keriso ua faauuina e le agaga se vaega faapitoa i le aveesea o mafatiaga na faapogaia e le agasala a Atamu. Ua faapea mai Paulo, o Ieova ua ‘ia filifilia i tatou ona o ia [Keriso],’ ina ia pule faatasi ma Iesu i lona Malo faalelagi. I le faamatalaina atili o lenei manatu, ua faapea mai Paulo, o Ieova “ua na tofia i tatou anamua, ina ia avea ma tamafai māna, ona o Iesu Keriso.” (Efeso 1:4, 5) O le mea moni, e leʻi filifilia pe na muaʻi tofia taʻitoʻatasi i latou e Ieova. Ae peitaʻi, sa ia muaʻi tofia se vaega o tagata faatuatua ua tuutoina, o ē o le a tofu sao faatasi ma Keriso i le aveesea o mafatiaga ia na aumaia e Satani le Tiapolo, faatasi ma Atamu ma Eva i le aiga faaletagata.—Luka 12:32; Eperu 2:14-18.

Pagā se mea e ofo ai! I lana uluaʻi luʻi faasaga i le pule silisili ese a le Atua, na faaalia ai e Satani i se auala faatogafiti e faapea, e iai se mea na faalētonu i le foafoaga faaletino a le Atua—ma i lea,  pe a tele omiga po o sauāga, po o faatosinaga e oo i tagata, o le a latou fouvale uma lava faasaga i le pule a le Atua. (Iopu 1:7-12; 2:2-5) I se faatinoga mataʻiina o “lona alofa tunoa ua silisili,” na faaalia ai e Ieova le Atua a o faagasolo le taimi lona faatuatuaina o ana foafoaga faalelalolagi e ala i le vavaeina mai o nisi mai le aiga agasala o Atamu e avea ma ana fanau faaleagaga. O i latou o i lenei vaega toʻa laʻitiiti o le a aveina aʻe e auauna i le lagi. Mo le ā le fuafuaga?—Efeso 1:3-6; Ioane 14:2, 3; 1 Tesalonia 4:15-17; 1 Peteru 1:3, 4.

Ua faapea mai le aposetolo o Paulo, o nei atalii fai o le Atua, ua avea ma “suli faatasi ma Keriso” i lona Malo faalelagi. (Roma 8:14-17) I le avea o ni tupu ma ositaulaga, o le a latou faia ai se sao i le faasaʻolotoina o le aiga faaletagata mai tigā ma mafatiaga ia ua oo iā i tatou i le taimi nei. (Faaaliga 5:10) E moni, “ua oi faatasi, ma oono faatasi mea uma lava na faia, ua oo mai lava i ona po nei.” Ae peitaʻi, ua lē o toe umi lava se taimi, ona mulimuli atu loa lea o nei atalii o le Atua ua filifilia faapitoa iā Iesu Keriso e faia lea gaoioiga, ona “tuusaunoa [ai lea o] ia lava mea na faia [tagata usiusitai] ia le faapologaina e le iu vale, a e oo i le saolotoga o le fanau a le Atua e manuia ai.”—Roma 8:18-22.

‘Ua Maua ai le Togiola’

Ua mafaia nei mea uma e ala i se gaoioiga atonu e aupito sili ona mataʻiina ma maualuga, e faaalia ai le alofa tunoa o le Atua i lenei lalolagi o tagata e mafai ona togiolaina —o le taulaga togiola lea a Iesu Keriso. Ua tusia e Paulo e faapea: “O ia foi [Iesu Keriso] ua tatou maua ai le togiola i lona toto, o le faamagaloina o agasala, e tusa ma le oloa faulai o lona alofa tunoa.”—Efeso 1:7.

O Iesu Keriso, o le autū i le faataunuuina o le fuafuaga a le Atua. (Eperu 2:10) O lana taulaga togiola ua saunia ai le faavae faaletulafono mo Ieova e filifilia ai nisi o fanau a Atamu e avea ma atalii fai i lona aiga faalelagi ma avatu ai le mapusaga i tagata mai i iʻuga o le agasala a Atamu, e aunoa ma le faavaivaia ai o le maufaatuatuaina o Ana tulafono ma mataupu silisili. (Mataio 20:28; 1 Timoteo 2:6) Ua faia e Ieova mea i se auala e tusa ai ma lana amiotonu ma faataunuuina ai mea o loo manaʻomia ai se faamasinoga tonu e lelei atoatoa.—Roma 3:22-26.

Le “Mea Lilo” Paia a le Atua

Mo le faitau afe o tausaga, sa leʻi faaalia mai e le Atua le auala tonu o le a ia faataunuuina ai lana fuafuaga mo le lalolagi. I le uluaʻi senituri T.A., “ua [ia] faailoa mai ia te i tatou [o Kerisiano] le mea lilo sa i lona finagalo.” (Efeso 1:9) Sa malamalama lelei Paulo ma ona uso Kerisiano faauuina, i le vaega tutasi na tofia atu iā Iesu Keriso i le faatinoina o le fuafuaga a le Atua. Sa amata ai foʻi ona latou malamalama i la latou vaega faapitoa i le avea ai o ni suli faatasi ma Keriso i lona Malo faalelagi. (Efeso 3:5, 6, 8-11) Ioe, o le Malo faalelagi i aao o Iesu Keriso ma i latou e pule faatasi ma ia, o le faatulagaga lea o le a faaaogā e le Atua e aumaia ai le filemu e faavavau e lē na o le lagi, ae i le lalolagi foʻi. (Mataio 6:9, 10) E ala i lea faatulagaga, o le a toe faafoʻisia ai e Ieova lenei lalolagi i le tulaga na ia uluaʻi fuafuaina ai.—Isaia 45:18; 65:21-23; Galuega 3:21.

Ua matuā lalata mai lava lana taimi atofaina mo le faia o gaoioiga tuusaʻo e tafiesea ai mai le lalolagi mafatiaga uma ma faiga uma e lē tonu. Ae na amataina e Ieova le toe faafoʻisia i le Penetekoso o le 33 T.A. E faapefea? E ala i le amataina i lenā taimi ona aoaoina o “mea uma lava o i le lagi,” i latou o le a pule faatasi ma Keriso i le lagi. E aofia ai iā i latou nei ia Kerisiano i Efeso.  (Efeso 2:4-7) E talu ai nei lava, i o tatou aso, ua aoaoina ai e Ieova “mea o i le lalolagi.” (Efeso 1:10, LF) E ala i se tauiviga o le talaʻiga i le lalolagi aoao, ua ia faailoa atu ai i nuu uma lava le tala lelei e uiga i le pulega a lona Malo e ala i aao o Iesu Keriso. O i latou ua tali mai i lenei talaʻiga ua aoaoina i le taimi nei i se nofoaga o le puipuiga ma le faamālōlōina faaleagaga. (Ioane 10:16) Ua lē pine, ona latou olioli lea i le saʻolotoga atoatoa mai faiga lē tonu uma ma mafatiaga uma i luga lava o lenei lalolagi ua faamamāina ma faaparataisoina.—2 Peteru 3:13; Faaaliga 11:18.

“E tele laasaga agaʻi i luma e maofa ai” ua faia e taumafaiga a tagata ina ia fesoasoani ai i tagata mafatia. (The State of the World’s Children 2000) Ae peitaʻi, o le laasaga o le a matuā faateʻia ai, o le faalaa mai lea o Iesu ma i latou e pule faatasi ma ia i le pulega a le Malo faalelagi lea ua matuā lalata tele lava. O le a latou tafiesea atoatoa pogai autū uma o feteenaʻiga ma isi mea leaga uma o loo faalavelavea ai i tatou. O le a latou faaiʻuina faafitauli uma o le fanau a tagata.—Faaaliga 21:1-4.

[Ata i le itulau 4]

E lē mafai e gaoioiga a tagata ona foʻia faafitauli uma o le fanau a tagata

[Ata i le itulau 6]

Ua saunia e le taulaga togiola a Keriso mo tagata se mapusaga mai le agasala a Atamu

[Ata i le itulau 7]

E mafai ona mauaina ia puipuiga ma le faamālōlōga faaleagaga i aso nei

[Ata i le itulau 7]

Ua lē pine ona oo mai lea o le mapusaga atoatoa mai faafitauli, e ala mai i le Malo faa-Mesia