Ia Aʻoaʻoina Oe ma Aʻoaʻo Atu Amioga Tatau Faa-Kerisiano

“Lenei foi, o oe lē aʻoaʻo atu i le tasi tagata, e te le aʻoaʻo ea oe ia te oe?”—ROMA 2:21.

1, 2. O ā ni māfuaaga e te manaʻo ai e suʻesuʻeina le Tusi Paia?

UA IĀ te oe māfuaaga e tele e suʻesuʻeina ai le Afioga a le Atua. E te ono manaʻo ia e iloa mea moni o loo iai—e faatatau i tagata, mea tutupu, o nofoaga, ma isi mea. E te manaʻo ina ia iloa mea moni tau i talitonuga, lea e feteenaʻi ma aʻoaʻoga sesē faalotu, e pei o le Tolutasi ma le afi i seoli. (Ioane 8:32) E ao foʻi ona e manaʻo e faaleleia atili lou iloa o Ieova ina ia mafai ai ona e pei o ia ma savali i ona luma ma le amio saʻo.—1 Tupu 15:4, 5.

² O se māfuaaga e fesootaʻi atu i ai ma e tāua tele mo le suʻesuʻeina o le Afioga a le Atua, o le faaauupegaina ai lea o oe e aʻoaʻo atu i isi—o ē e te alofa i ai, o ē tou te masani, ma e oo lava foʻi iā i latou e te lē masani i ai. E leai se faitalia a Kerisiano moni i le faia o lenei mea. Na taʻu atu e Iesu i ona soo: “O lenei, ia outou o atu e fai nuu uma lava ma soo, . . . ia outou aʻoaʻo atu ia te i latou ia tausi i mea uma ua ou fai atu ai ia te outou.”—Mataio 28:19, 20.

3, 4. Aiseā e avea ai o se tulaga faamamaluina mo oe le aʻoaʻo atu e pei ona faatonu mai e Iesu?

³ O le suʻesuʻeina o le Tusi Paia ma se faanaunauga ina ia aʻoaʻo atu i isi, o se tulaga  faamamaluina ma e mafai ona avea ma puna o le faamalieina tumau. Ua loa ona avea le aʻoaʻo atu o se galuega faamamaluina. Na taʻua e le Encarta Encyclopedia e faapea: “I Iutaia anamua, e toʻatele tagata matutua sa manatu i faiaʻoga o taʻiala ia i le faaolataga ma sa uunaʻia fanau ina ia sili atu ona ava i o latou faiaʻoga na i o latou mātua.” E faapitoa lava ona faamamaluina mo Kerisiano le aʻoaʻoina o i latou e ala i le suʻesuʻeina o le Tusi Paia ona aʻoaʻo atu ai lea i isi.

⁴ “E toʻatele atu tagata o loo auai i le aʻoaʻo atu na i lo se isi lava galuega. Pe tusa o le 48 miliona tane ma fafine o ni faiaʻoga i le lalolagi.” (The World Book Encyclopedia) O se faiaʻoga i aʻoga ua tuu atu iā te ia le aʻoaʻoina o tamaiti ma e mafai ona aafia ai i latou mo tausaga o i le lumanaʻi. E sili atu aafiaga o le a iai pe a e usitaʻi i le poloaʻiga a Iesu e aʻoaʻo atu i isi; e mafai ona e avatu ai iā i latou ni aafiaga mo se lumanaʻi e faavavau. Sa faamamafa e le aposetolo o Paulo lenei mea ina ua ia uunaʻia Timoteo. “Ia oe lava ia te oe, atoa ma lau e aʻoaʻo atu, ia e tumau pea i ai; auā a ē fai lena mea, e faaolaina ai oe e oe atoa ma e ua faalogologo ia te oe.” (1 Timoteo 4:16) Ioe, e fesootaʻi lau aʻoaʻo atu i le mauaina o le faaolataga.

5. Aiseā e maualuga ai le tulaga o le aʻoaʻo atu faa-Kerisiano?

⁵ O le aʻoaʻoina o oe lava ona aʻoaʻo atu ai lea o isi o loo faamaonia ma faatonutonuina e le Puna aupito i maualuga, le Pule Silisili Ese i le aoao o mea. I lenā lava māfuaaga e tasi ua sili ai ona maualuga le tulaga o lenei galuega o le aʻoaʻo atu na i lo so o se isi lava galuega faapea o iai i le lalolagi, e tusa lava po o le aʻoaʻoina atu o mataupu faavae, o tomai tau i galuega, e oo lava foʻi i tomai faapitoa faafomaʻi. O le aʻoaʻo atu lea e fai e se Kerisiano e aofia ai le faamasani o le tagata aʻoga lava ia e faaaʻoaʻo i le Alo o le Atua, o Iesu Keriso, ma ia aʻoaʻo atu i isi e fai le mea lava lenā e tasi.—Ioane 15:10.

Aiseā e Aʻoaʻoina ai Oe?

6, 7. (a) Aiseā e ao ai ona tatou aʻoaʻoina muamua i tatou? (e) I le ā le auala na lē taulau ai Iutaia o le uluaʻi senituri i le avea ai o ni faiaʻoga?

⁶ Aiseā ua faapea mai ai e ao ona tatou aʻoaʻoina muamua i tatou? O le mea moni lava ia, e lē mafai ona tatou aʻoaʻo atu i isi pe afai tatou te leʻi aʻoaʻoina muamua i tatou. Sa faamamafa e Paulo lenei mea moni i se auala faatupu manatu, lea sa tāua mo Iutaia sa iai i inā ma o loo iai foʻi se feʻau tāua mo Kerisiano i aso nei. Na fesili Paulo e faapea: “Lenei foi, o oe lē aʻoaʻo atu i le tasi tagata, e te le aʻoaʻo ea oe ia te oe? o oe lē lauga atu, Aua le gaoi, e te gaoi ea oe? o oe lē fai ane, Aua le mulilua, e te mulilua ea oe? o oe lē matuā ʻinoʻino i tupua, e te faoa ea mea sa [“gaoia ea malumalu,” NW]? o oe lē mitamita i le tulafono, e te faalemigao  ea i le Atua i lou soli i le tulafono?”—Roma 2:21-23.

⁷ I le faaaogāina o fesili faatupu manatu, na taʻua ai e Paulo ni mea sesē se lua sa talanoaina tuusaʻo i le Tulafono e Sefulu: Aua e te gaoi, ma le aua e te mulilua. (Esoto 20:14, 15) Sa mitamita nisi Iutaia i aso o Paulo i le iā i latou o Tulafono a le Atua. Sa ‘aʻoaʻoina i latou i le Tulafono ma sa taofi foi o i latou o taʻitaʻi mo ē tauaso ma o le malamalama i e o i le pouliuli, o aʻoaʻo i tamaiti.’ (Roma 2:17-20) Peitaʻi, o nisi sa faagutugutulua ona sa latou faia faalilolilo le gaoi ma le mulilua. O le faia o lenā mea e taʻuvalea ai le Tulafono ma lē na Sauniaina o loo afio i le lagi. E mafai ona e mātauina lo latou matuā le agavaa lava e aʻoaʻo atu i isi; o le mea moni latou te leʻi aʻoaʻoina foʻi i latou.

8. Sa faapefea i nisi Iutaia i aso o Paulo ona ‘gaoia malumalu’?

⁸ Sa taʻua e Paulo le gaoia o malumalu. Pe sa faia moʻi ea e nisi Iutaia lenā mea? O le ā sa manatu i ai Paulo? O le mea moni lava ia, ona o le lē lava o faamatalaga e uiga i lenei mau, e lē faigofie ona tatou iloa pe na faapefea ona ‘gaoia malumalu’ e nisi o Iutaia. Sa faalauiloa i se taimi muamua atu e le tusiupu o Efeso e faapea, o Paulo ma ana aumea e lē o nisi e ‘fao i mea sa’ [pe gaoia malumalu] lea e aliali mai ai e foliga atonu sa iai nisi tagata na manatu e faapea sa aafia nisi o Iutaia i lenā tuuaʻiga. (Galuega 19:29-37) Pe sa latou faaaogāina totino pe i ni faiga faapisinisi ia mea tāua sa aumai mai i malumalu faapaupau, ia sa vetea e ē na manumalo i taua po o tagata mapolotu? E tusa ai o le Tulafono a le Atua, sa tatau ona faaumatia le auro ma siliva o tupua, sa lē talafeagai ona avea e se tasi mā ia. (Teuteronome 7:25) * Atonu la sa faasino atu Paulo i tagata Iutaia o ē sa lē manatu mamafa i le faatonuga a le Atua ma sa faaaogāina pe sa maua foʻi ni aogā mai i mea na maua mai i malumalu faapaupau.

9. O ā faiga sesē e fesootaʻi atu i le malumalu i Ierusalema atonu sa tutusa lava ma le gaoia o le malumalu?

⁹ I le isi itu, sa taʻua e Josephus se faiga piʻopiʻo i Roma sa faapogaia e ni Iutaia se toʻafā, o le taʻitaʻi sa avea o se faiaʻoga o le Tulafono. Sa faatalitonuina e lenei toʻafā se fafine Roma, o se tasi na liliu mai i le faa-Iutaia, ina ia avatu iā i latou auro ma isi mea tāua e fai ma meaalofa i le malumalu i Ierusalema. Ae ina ua latou mauaina nei mea mai iā te ia, sa latou faaaogāina mo i latou nei ʻoa—e tusa lava lenā ma lo latou gaoia o le malumalu. * O isi sa i se tulaga e tusa lava ua latou gaoia le malumalu o le Atua e ala i lo latou ofoina atu o taulaga lē lelei ma faia ni fefaatauaʻiga matapeapea i le lotoā o le malumalu, ua fai ai le malumalu ma “ana o e fao mea.”—Mataio 21:12, 13; Malaki 1:12-14; 3:8, 9.

Ia Aʻoaʻo Atu Amioga Tatau Faa-Kerisiano

10. O le ā le manatu autū o upu a Paulo o loo faamauina i le Roma 2:21-23 e lē tatau ona tatou misia?

¹⁰ Po o ā lava faiga sa iai i le uluaʻi senituri na fesootai atu i le gaoi, mulilua, ma le gaoia o malumalu e pei ona faasino atu i ai Paulo, ia aua lava neʻi misi iā i tatou le manatu autū o lana faamatalaga. Na ia fesili mai: “Lenei foi, o oe lē aʻoaʻo atu i le tasi tagata, e te le aʻoaʻo ea oe ia te oe?” E lelei ona mātauina e faapea o faaaʻoaʻoga ia sa lāgā e Paulo, e faatatau atu i amioga tatau. I inei e lē o faasino atu le aposetolo i talitonuga faale-Tusi Paia po o le talafaasolopito. O le aʻoaʻoina o le tagata lava ia ma le aʻoaʻoina o isi lea sa faasino atu i ai Paulo, e faatatau atu lea i amioga tatau faa-Kerisiano.

11. Aiseā e ao ai ona e uaʻi atu i amioga tatau faa-Kerisiano a o e suʻesuʻeina le Afioga a le Atua?

¹¹ Ina ia tatou faatatauina le lesona i le Roma 2:21-23 e ao ona tatou aʻoaʻoina amioga tatau faa-Kerisiano mai le Afioga a le Atua, ia gaoioi e tusa ma mea ua tatou aʻoaʻoina, ona faatonu atu lea i isi e fai le mea lava lenā. O lea la, a o e suʻesuʻeina le Tusi Paia, ia mataalia i le faailoaga mai o tapulaa a Ieova, lea e faatulaga mai ai amioga tatau faa-Kerisiano. Ia manatunatu loloto i fautuaga ma lesona e te maua i le Tusi Paia. Ona  faatatauina lea ma le lototele mea ua e aʻoaʻoina. E mautinoa lava e manaʻomia ai le faamalosi ma le maumauaʻi i le faia o lenei mea. E faigofie tele i tagata lē lelei atoatoa ona fai faamolemolega, e faamāmā ai māfuaaga ua māfua ai po o le pogai foʻi na lē manatu mamafa ai i amioga tatau i se mea patino na tupu. Atonu o tagata Iutaia ia sa taʻua e Paulo sa iai so latou poto masani i le faia o faamatalaga faatogafiti faapena, e taumafai e faamatala ai pe faasesēina ai isi. Ae ui i lea, ua faaalia i upu a Paulo e faapea o amioga tatau faa-Kerisiano e lē tatau ona faaitiitia le tāua po o le manatu māmā i ai faapea e pule lava le tagata i lana mea e fai.

12. E faapefea ona aafia Ieova i amioga lelei po o amioga leaga, ma aiseā e tāua ai le teu i manatu o lenei mea moni?

¹² Sa faamatilatila e le aposetolo o Paulo se māfuaaga autū mo le aʻoaʻoina ma faatatauina o amioga tatau o loo e mauaina i le Tusi Paia. Sa iai aafiaga o amioga leaga a tagata Iutaia iā Ieova: “O oe lē mitamita i le tulafono, e te faalemigao ea i le Atua i lou soli i le tulafono? auā ua upuleagaina le suafa o le Atua talu outou i nuu ese.” (Roma 2:23, 24) E tutusa lelei lava le moni i lenei mea i aso nei, afai tatou te lē amanaʻia amioga tatau faa-Kerisiano, ua tatou lē faamamaluina foʻi Lē na faatulagaina. I le isi itu, afai tatou te taofi mau i tapulaa a le Atua, o le a iai ni aafiaga lelei iā te ia, e faamamaluina ai o ia. (Isaia 52:5; Esekielu 36:20) O lou iloa o lenei mea e mafai ona faamalosia ai lou maumauaʻi pe a e feagai ma tofotofoga po o ni tulaga e foliga mai o le lē amanaʻiaina o amioga tatau faa-Kerisiano, o le auala faigofie lea ma talafeagai e gaoioi ai. E lē gata i lenā, ua aʻoaʻo mai foʻi i upu a Paulo iā i tatou i se isi mea. E ese mai i le iloa taʻitoʻatasi e faapea e aafia le Atua i a tatou amio, a o e aʻoaʻoina isi, ia fesoasoani iā i latou ina ia iloa o le auala latou te faatatauina ai amioga tatau ua latou aʻoaʻoina, e aafia ai Ieova. E lē faapea e na o le mauaina o le lotomalie ma le puipuia o le soifua mālōlōina e maua mai i amioga tatau faa-Kerisiano. E atagia atu ai foʻi Lē na saunia ma faalaeiauina na amioga tatau.—Salamo 74:10; Iakopo 3:17.

13. (a) E faapefea ona fesoasoani mai le Tusi Paia iā i tatou e faatatau i amioga tatau? (e) Taʻu mai le manatu autū o le fautuaga o loo i le 1 Tesalonia 4:3-7.

¹³ E aafia foʻi isi tagata i amioga tatau. E mafai ona e iloa lenā mai i faaaʻoaʻoga i le Afioga a le Atua o loo faataʻitaʻia ai le aogā o le faatatauina o tapulaa tau amio, faapea foʻi ma iʻuga o le lē manatu mamafa i ai. (Kenese 39:1-9, 21; Iosua 7:1-25) E mafai foʻi ona e maua fautuaga manino e faatatau i amioga mamā e faapea: “O le finagalo foi lenei o le Atua, ia faapaiaina outou, ina ia faamamao outou ma le faitaaga; ia taitasi outou ma iloa ona fai o lona lava tino ma le faapaiaina ma le taʻuleleia, aua ma le tuʻinanau o le manao, faapei o nuu ese ua le iloa le Atua. Aua neʻi sopo tapulaa se tasi, ma agaleaga i lona uso i lenei mea, . . . auā e lei valaauina i tatou e le Atua ia amio leaga, a ia faapaiaina lava.”—1 Tesalonia 4:3-7.

14. O le ā e te ono fesili ai iā te oe lava e faatatau i le fautuaga i le 1 Tesalonia 4:3-7?

¹⁴ E toetoe lava o so o se tasi e mafai ona mātauina mai i lenei mau e faapea o feusuaʻiga lē mamā faaleituaiga e solia ai le tulafono o amioga tatau faa-Kerisiano. Peitaʻi e sili atu isi mea o loo aofia ai i le mau lenei. O nisi mau o loo tuu mai ai avanoa e matuā suʻesuʻeina ai ma manatunatu loloto i ai, lea o le a maua ai le malamalamaga. O se faaaʻoaʻoga, e te ono manatu i le mea o loo uiga iai Paulo ina ua ia fai mai, o le faia e se tasi o le faitaaga e mafai ai ona “sopo tapulaa se tasi [“i aiā tatau,” NW], ma agaleaga i lona uso i lenei mea.” O ā aiā tatau o loo aofia ai, ma e faapefea i le iai o se malamalamaga lelei i lenei mea ona avatu ai iā te oe le maumauaʻi e tausia ai amioga tatau faa-Kerisiano? E faapefea i iʻuga o se suʻesuʻega loloto ona faaauupegaina atili ai oe e aʻoaʻo atu i isi ma fesoasoani iā i latou e ava i le Atua?

Suʻesuʻe Ina ia Mafai ai Ona Aʻoaʻo Atu

15. O ā mea faigaluega e te ono faaaogā e aʻoaʻo ai oe e ala i au lava suʻesuʻega?

¹⁵ O loo iai meafaigaluega a Molimau a Ieova latou te faaaogā e fai ai saʻiliʻiliga loloto i fesili ma mataupu e tulaʻi mai, a o latou suʻesuʻe ina ia aʻoaʻoina i latou lava po o isi. O se tasi o meafaigaluega o loo maua i le tele o gagana o le Watch Tower Publications Index. Afai o loo mafai ona e maua, e  mafai la ona e faaaogāina ina ia maua ai faamatalaga i lomiga faale-Tusi Paia a Molimau a Ieova. E mafai ona e suʻeina e ala i le faaaogāina o se mataupu po o se fuaiupu o le Tusi Paia. O le isi meafaigaluega o loo maua e Molimau a Ieova i le tele o gagana autū o le Watchtower Library. O lenei polokalame faakomepiuta e faaaogā ai CD-ROM o loo aofia ai se aofaʻiga tele o lomiga i se faiga faaelekitoronika. O lona polokalameina e mafai ai e se tasi ona saʻiliʻili loloto i mataupu ma faamatalaga o mau. Afai o loo e mauaina se tasi po o meafaigaluega uma nei, ia faaaogā e lē aunoa nei mea a o e suʻesuʻeina le Afioga a le Atua ina ia aʻoaʻo atu ai i isi.

16, 17. (a) O fea e mafai ona e maua ai faamatalaga aogā e faatatau i aiā o loo taʻua i le 1 Tesalonia 4:6? (e) I ā auala e mafai ai e le faitaaga ona sopo tapulaa i aiā a isi?

¹⁶ Seʻi tatou talanoa la i le faaaʻoaʻoga o loo taʻua i inei, 1 Tesalonia 4:3-7. O le fesili ua tulaʻi mai e faatatau i aiā. O aiā a ai? Ma e faapefea ona sopo tapulaa i na aiā? E ala i le faaaogāina o meafaigaluega e pei ona taʻua, e te ono mafai ona maua ni faamatalaga aogā e faatatau i nei fuaiupu, e oo lava i aiā o loo taʻua e Paulo. E mafai ona e faitau i faamatalaga faapena i le Insight on the Scriptures, Tusi 1, itulau 863-864; True Peace and Security—How Can You Find It?, itulau 145; Le Olomatamata, Fepuari 15, 1990, itulau 24.

¹⁷ A o faagasolo lau suʻesuʻega, o le a e iloa ai o loo faaalia e na lomiga le moni o upu a Paulo. O le tagata e faitaaga e agasala faasaga i le Atua ma aafiagofie ai o ia i faamaʻi. (1 Korinito 6:18, 19; Eperu 13:4) O le tamāloa e faia le faitaaga ua sopo tapulaa i aiā a le fafine lea la te agasala. Ua ia aveesea mai i le fafine se tulaga mamā tau amio ma se lotofuatiaifo lelei. Afai e nofofua le fafine, ua sopo tapulaa la le tamāloa i le aiā a le fafine e ulu atu ai i se faaipoipoga ma lona tulaga taupou, atoa ma le aiā a le tane o le a ia faaipoipo atu i ai o loo faatalitalia o ia i se tulaga faapena. O le a ia faatigā i mātua o le fafine ma lana tane pe afai ua faaipoipo. Ua faaleagaina foʻi e le tane lea ua amio lē mamā ia le aiā a lona aiga i se talaaga mamā tau amio. Afai o ia o se tasi o se faapotopotoga Kerisiano, ua ia faalumaina le faapotopotoga, ma faaleagaina lona talaaga.—1 Korinito 5:1.

18. E faapefea ona e maua aogā mai i le suʻesuʻeina o le Tusi Paia e faatatau i amioga tatau faa-Kerisiano?

¹⁸ Po ua lē fesoasoani ea iā te oe faamatalaga faapena faatatau i aiā ina ia e mātauina ai le uiga loloto o lenā fuaiupu? E matuā aogā lava ituaiga o suʻesuʻega faapena. A o e faaauau ona faia, o loo e aʻoaʻoina ai oe lava. O le a tupu aʻe lou malamalamaga mo le upu moni ma aafiaga malosi o le feʻau a le Atua. O le a e faamalosia lou maumauaʻi e tausisi i le mamā faa-Kerisiano e tusa lava po o a tofotofoga e tulaʻi mai. Ma ia mafaufau i le matuā sili atu ona uigā o le a e iai i le avea ai o se faiaʻoga! Mo se faaaʻoaʻoga, a o e aʻoaʻo atu i isi mea moni o le Tusi Paia, e mafai ona e avatu se malamalamaga o le 1 Tesalonia 4:3-7, e faateleina ai lo latou malamalamaga ma le talisapaia o amioga mamā faa-Kerisiano. O le faia faapea, o le a mafai ai ona fesoasoani lau suʻesuʻega iā te oe ma le toʻatele o isi ina ia ava i le Atua. Ae ua matou taʻua i inei na o se faaaʻoaʻoga se tasi mai i le tusi a Paulo i tagata Tesalonia. E anoanoaʻi isi vala o amioga tatau faa-Kerisiano, ma e tele isi faaaʻoaʻoga faapena i le Tusi Paia ma fautuaga, e mafai ona e suʻesuʻeina, faatatauina, ma aʻoaʻo atu.

19. Aiseā e tāua ai ona e tausisi i amioga tatau faa-Kerisiano?

¹⁹ E aunoa lava ma se faalētonu e uiga i le atamai o le tausia o amioga tatau faa-Kerisiano. Ua faapea mai le Iakopo 3:17 o “le poto mai lugā,” e mai iā Ieova lava ia, e “muamua ona mamā.” E manino le faatatau atu o lenei mea i le mulimuli i tapulaa tau amio a le Atua. O le mea moni, e finagalo Ieova iā i latou e fai ma ona sui i le  aʻoaʻoina o le Tusi Paia, e avea o ni ē e faia faaaʻoaʻoga lelei i le “amio mamā.” (1 Timoteo 4:12, LF ) O le ituaiga soifuaga sa soifua ai na uluaʻi soo e pei o Paulo ma Timoteo, ua faaalia ai sa latou taumamao mai i amioga lē mamā, sa tusi mai foʻi Paulo e faapea: “A o le faitaaga, ma amio leaga uma, po o le manumanu foi, aua neʻi taʻua lava ia te outou, e pei ona tatau i e ua paia. O le anovale foi, ma le tautala i upu faatauvaa, ma le faaulaula.”—Efeso 5:3, 4, LF.

20, 21. Aiseā e te ioe ai i le mea na tusia e le aposetolo o Ioane, e pei ona faamauina i le 1 Ioane 5:3?

²⁰ A o manino ma patino tapulaa tau amio o loo taʻua i le Afioga a le Atua, ua lē o avea ai o ni avega mamafa. Sa manino lenei mea iā Ioane le aposetolo lē na mulimuli maliu. E faavae i mea sa ia mātauina i le faitau sefulu o tausaga o le olaga, sa ia iloa ai o amioga tatau faa-Kerisiano, e lē faaleagaina ai. Na i lo lenā, ua faamaonia le lelei, e aogā, ma e tauia. Sa faamamafa e Ioane le mea lenei, i lona tusia e faapea: “O lenei lava le alofa i le Atua, ia tatou tausi i ana poloaiga. Ma tatou te lē mafatia ai i ana poloaiga.”—1 Ioane 5:3, New English Translation.

²¹ Peitaʻi, e ao ona mātauina, e leʻi talanoaina e Ioane le usitai i le Atua e ala i amioga tatau faa-Kerisiano e faapea o le auala sili lea ona lelei talu ai e laveaʻiina ai i tatou mai i iʻuga leaga o le lē usitai. Sa ia faatulagaina mea i le tulaga e tatau ona iai i le faailoa mai e faapea, o le usitai i le Atua e ala i le tausia o amioga tatau faa-Kerisiano o se faailoaga lea o lo tatou alofa mo Ieova le Atua, o se avanoa matagofie e faaalia ai lo tatou alofa mo ia. O le mea moni lava ia, o le aʻoaʻoina o le tagata lava ia po o isi ina ia alofa i le Atua e manaʻomia ai ona tatou talia ma faatatauina tapulaa maualuluga. Ioe, e uiga atu i le aʻoaʻoina o i tatou lava atoa ma isi i amioga tatau faa-Kerisiano.

[Faamatalaga pito i lalo]

Pe E te Manatua?

• Aiseā e ao ai ona tatou suʻesuʻe ina ia aʻoaʻoina i tatou a o tatou leʻi aʻoaʻo atu i isi?

• E faapefea ona aafia Ieova i a tatou amioga?

• E ono sopo tapulaa sē e faitaaga i aiā tatau a ai?

• O le ā lou naunautaʻiga e uiga i amioga tatau faa-Kerisiano?

[Fesili mo le Suʻesuʻega]

[Ata i le itulau 22]

“Tatou te lē mafatia ai i ana poloaiga”