Le Taimi e Faaali ai se Mataupu Faalilolilo

O le taofia o nisi mataupu faalilolilo mai le faailoaina atu, e māfua ai le mauaina o le filemu ae lē o le fefinauaʻi. Ae pe e iai ea se taimi e faailoa atu ai se mataupu faalilolilo? Mātau le mea na fai mai ai le perofeta o Amosa e uiga i lona Atua: “E le faia lava se mea e le Alii o Ieova, a e faaalia lona finagalo i ana auauna o perofeta.” (Amosa 3:7) E mai nei upu, e mafai ona tatou aʻoaʻoina ai se mea e faatatau i mataupu faalilolilo. Atonu e taofia e Ieova nisi o mataupu faalilolilo mo se vaitaimi ma faaalia mulimuli ane i ni tagata. E mafai faapefea ona tatou faataʻitaʻi iā Ieova e tusa ai ma lenei tulaga?

I nisi taimi, e iloa ai e leoleo mamoe tofia i le faapotopotoga Kerisiano le aogā o le taofia o se mataupu e lē faailoaina atu. (Galuega 20:28) Mo se faataʻitaʻiga, i le manatu mo le lelei o le faapotopotoga, atonu e latou te filifili ai e aua le faailoaina atu nisi o faamatalaga e faatatau i ni fuafuaga po o ni suiga e tusa ai ma tiute tauave i le faapotopotoga seʻia oo i se taimi patino.

Ae peitaʻi, i tulaga faapena, e tāua le faamanino atu iā i latou o loo aafia ai pe afai, o afea, ma i le ā le auala o le a faaalia ai le mataupu. I le iloaina o le taimi o le a faaalia ai le mataupu i le lautele, e mafai ona fesoasoani iā i latou ina ia lē faailoaina atu ai i nisi le mataupu.—Faataoto 25:9.