“O le Fafine Amio Lelei Lava Oe”

O nei upu o le taʻuleleia na fai atu i se fafine talavou mai Moapi. O ia o se fafine ua oti lana tane e igoa iā Ruta, sa nofotane i le tama a se fafine Isaraelu, o Naomi. Sa mau i Isaraelu pe a ma se 3000 tausaga ua mavae, i le taimi a o pule ia faamasino, na lauiloa ai Ruta e faapea, o se fafine amio lelei. (Ruta 3:11) Na faapefea ona ia mauaina lenei talaaga taʻuleleia? O ai e mafai ona maua ai aogā mai lana faaaʻoaʻoga?

E lē o sē e ʻai i “mea e ʻai a le paie,” sa galue ma le filigā Ruta mo ni taimi uumi i le aoina mai o mea i le fanua, ma o lona filigā na ia mauaina ai lea taʻuleleia. E tusa lava pe sa taumafai nisi ona faamāmā ai lana galuega, sa faaauau pea ona ia galue mamafa, e sili atu i mea sa tatau ona ia faia. I se tulaga matuā mataʻiina, ua fetaui lelei ai lava ia te ia le faamatalaga a le Tusi Paia e uiga i se avā e taʻuleleia, amiolelei ma tōʻaga.—Faataoto 31:10-31; Ruta 2:7, 15-17.

O uiga faaleagaga o Ruta—o lona lotomaulalo, faataulagaina totino ma lona alofa faamaoni—o vala autū na sa ia olioli ai i se talaaga taʻuleleia. I le tuua o ona mātua ma lona nuu moni, e aunoa ma se faamoemoe e toe faaipoipo ina ia saogalemu ai, sa ia pipii atu pea iā Naomi. I le taimi lava lea, na faaalia ai e Ruta le faanaunauga e fia auauna iā Ieova le Atua o le tinā o lana tane ua oti. I le faamamafaina o lona tāua, ua faapea mai le faamatalaga a le Tusi Paia, ua lelei o ia “e sili [iā Naomi] i tama tane e toafitu.”—Ruta 1:16, 17; 2:11, 12; 4:15.

E ui i le talaaga taʻuleleia o le amio lelei a Ruta e tagata na latou aumea, ae o le faaaliga e sili ona mataʻiina, o le taʻuleleia lea e le Atua o ona uiga, ma ia tauia ai o ia i se faaeaga o le avea ma tupuga o Iesu Keriso. (Mataio 1:5; 1 Peteru 3:4) Maʻeu se faaaʻoaʻoga lelei a Ruta, e lē mo na o fafine Kerisiano ae mo i latou uma o ē e faapea mai e tapuaʻi iā Ieova!