Se Lesona Mai le Talafaasolopito o Roma

“UA OU tau ma manu feai i Efeso, pei o le tu a tagata.” Ua manatu nisi faapea, o le uiga o na upu o loo faamauina i le 1 Korinito 15:32, na faasalaina Paulo e tau i le malae taalo i Roma. E tusa lava pe sa tau pe leai, ae sa taatele i na ona pō le tau e oo i le oti. O le ā ua taʻu mai e le talafaasolopito iā i tatou e faatatau i malae taalo ma mea na faia ai i inā?

I le avea o ni Kerisiano, e tatou te mananaʻo ai e faaōgatusa o tatou lotofuatiaifo ma le finagalo o Ieova, lea e mafai ona fesoasoani iā i tatou e faia ai filifiliga i faafiafiaga faaonapōnei. Mo se faaaʻoaʻoga, seʻi iloilo le finagalo o le Atua e tusa ai o faiga sauā, e pei ona faaalia i upu nei: “Aua e te mataua i le tagata faasaua; aua foi e te filifili i se tasi o ona ala.” (Faataoto 3:31) Na maua e uluaʻi Kerisiano lea fautuaga e taʻitaʻia ai i latou, a o siʻomia i le toʻatele o tagata sa faananau i faafiafiaga a Roma ia na tau ai e oo i le oti. I le iloiloina o tulaga na tutupu i na taaloga,  seʻi o tatou vaai po o le ā le lesona o loo manino mai ai mo Kerisiano i aso nei.

Ua faafesagaʻi tagata tau e toʻalua e sauni e tau i le malae taalo i Roma. I uluaʻi sasau atu o le pelu ma tau i le talita, ua tau fai feʻei faamalosiau atu ai le aofia ua lē manofo lelei i lē e latou te ʻau i ai. O se fetauiga mataʻutia. E leʻi umi lava, ae manuʻa se tasi ma lē mafai ai loa ona faaauau, ua lafoaʻi e ia ana auupega ma tootuli ifo i lalo, e faailoa atu ai lona toʻilalo ma talosaga atu mo lona ola e faasaoina. Ua faifai tetele aʻe i luga le feʻei. O nisi ua tauvalaau atu ina ia faaola, ae o isi ina ia fasioti iā te ia. Ua tau fai tepa uma atu tagata i le emeperoa. Ua faalologo atu foʻi o ia i le mea o loo mafuli i ai le toʻatele, e mafai ai ona faapea atu e faasaʻoloto lē ua malolo, po o le talo atu ina ia fasiotia o ia.

Na matuā faananau tagata Roma i faafiafiaga e tau ai tagata e oo i le oti. Atonu e ono faateʻia oe i le iloaina faapea o na fetauiga sa muaʻi faia i falelauasiga o ni tagata tāua. O le manatu taatele o nei tauvaga na amata mai i le faia o taulaga i tagata e tagata Oscan po o le ʻau Samnite o ē sa nonofo i le vaipanoa ua avea nei ma Italia tutotonu. Sa faia taulaga ina ia faafilemu ai agaga o ē maliliu. O lenā fetauiga na taʻua o se munus, po o se “mea alofa” (numera tele, munera). O taaloga i Roma na muaʻi faamaumauina, sa faia lea i le 264 T.L.M., ina ua fetaui ni paga se tolu i le maketi e faatau ai povi poʻa. I le falelauasiga o Marcus Aemilius Lepidus, e 22 ni paga na fetaui ai foʻi i inā. I le falelauasiga o Publius Licinius, na fetaui ai ni paga se toʻa 60. I le 65 T.L.M., na auina atu ai e Julius Caesar le 320 paga i le malae taalo.

“O falelauasiga o tagata maualuluga sa avea o se faiga faapolotiki,” ua faapea mai ai le tusitala o le talafaasolopito o Keith Hopkins, “ma o fetauiga sa faia i falelauasiga sa faailoa mai ai se uiga faapolotiki . . . ona o le fiafia o tagata palota i nei taaloga. O le mea moni, o le faateleina o le ofoofogia o nei fetauiga na māfua mai i taaʻiga malosi o tauvaga faapolotiki i le va o ni tagata maualuluga fia manumalo.” Ina ua oo i le nofoaiga a Aokuso (27 T.L.M. i le 14 T.A.), na avea ai munera ma ni meaalofa faalialiavale—mo le faafiafiaina ai o le vao o tagata⁠—lea na ofoina atu e tagata maualuluga mauoloa o le malo e faaauiluma atili o latou tulaga faapolotiki.

Tagata na Auai ma le Toleniina

E te ono fesili, ‘O ai na avea ma tagata tau? Ia, atonu o i latou o ni pologa, o tagata solitulafono na faasalaina i le oti, o ē na aumaia faapagota mai se taua, po o so o se tagata lava na taaʻina mai ona o le faagaeetia po o le faanaunau ina ia taʻutaʻua pe faatamaoaiga ai. Sa toleniina tagata uma i aʻoga e pei o ni falepuipui. Ua lipotia mai i le tusi o le Giochi e spettacoli (Taaloga ma Faaaliga) le toleniina o tagata tau, “sa masani ona vaavaaia e leoleo ma aʻoaʻia mamafa, o tulafono faigatā, aemaise lava ia faasalaga ogaoga . . . Na masani ona iʻu atu lenei faiga i le pule i le ola, tetee ma le fouvale.” O le aʻoga pito sili ona telē mo tagata tau i Roma e iai ona tamaʻi potu taʻitasi ia e nofoia e tagata a itiiti mai e toʻaafe. E tofu lava le tagata ma lana taaloga e aʻoaʻoina. O nisi e tau e faaaogā ai se ofutau, talita ma se pelu, a o isi o se upega ma se tao mata tolu. Peitaʻi, o isi sa toleniina lava e tau ma manu feʻai i se tasi o ituaiga o faaaliga taʻutaʻua, o le tuliga. Pe sa uiga atu ea Paulo i na taaloga?

Sa mafai ona tāpā e i latou na faamaopoopoina nei faafiafiaga le fesoasoani a tagata na iai le tomai faapitoa i nei taaloga o ē na aʻoaʻo ma toleniina i latou e taʻi 17 i le taʻi 18 tausaga le matutua e avea ma tagata tau. O nei faafiafiaga sa faia i ola o tagata na maua ai le tele o tupe. O se tasi o faaaliga matilatila lea na faia e Trajan e  faamanatuina ai le manumalo mai se taua, na auai ai le 10,000 tagata tau ma le 11,000 o manu.

Se Aso i le Malae Taalo

I taeao sa faia ai tuliga i le malae. Sa tau ai so o se ituaiga manu feʻai lava i le malae. Sa sili atu ona fiafia le aofia e maimoaina taugā a se povi poʻa ma se urosa. E masani ona saisaiina faatasi nei manu e lua ae tau seʻia oo lava ina mate le isi, ona fasimateina loa lea o le manu o loo ola e se tagata tulimanu. O isi taugā mataʻina o ni leona e tau ma ni taika, po o ni elefane ma ni urosa. Sa faaalia e tagata tulimanu o latou tomai e fasimatea ai se manu fou mai se isi atunuu o le malo aoao, tusa lava po o le ā le tau na aumai ai—o nameri, rhinoceros, puaasami, giraffe, hyena, kamela, luko, puaa poʻa, ma aila.

O vaaiga matagofie o le malae e avea ai tuliga ma mea faagalogatā. Sa faia aʻe i papa, o vaituloto, ma laau e faafoliga mai ai le vaomatua. I nisi o malae, na peiseaʻī na feosofi mai manu feʻai e ala i se faiga faamaneta, ae na aumaia e ni lifi mai lalo o le palapala ma ui mai i ni faitotoʻa e lē iloa atu. O amioga mategatā a manu sa atili ai ona mālie, ae o le mea sa sili ona naunau ai i tuliga, o gaoioiga sauā.

O le vaega na sosoo ai i le polokalame o le faaooina lea o faasalaga oti. Na taumafai lava e faia nei mea i ni auala eseese. O tala o le vavau sa faatino ai, ma na feoti moni lava ē na faatinoina.

I aoauli, na fetaui ai vaega eseese o tagata tau sa faaauupegaina i ni auala eseese ma toleniina i ni metotia eseese. O nisi o i latou sa tatosoina i fafo tino maliu, sa laʻei e pei o le atua o le nofoaga o agaga.

Aafiaga i Tagata Maimoa

Pe a lē faamalieina faanaunauga o tagata i gaoioi a tagata tau ua faavaivai, ona faateʻi lea o i latou e ala i le sasaina ma faamū i uʻamea aasa. Na feʻei atu le toʻatele o tagata: “Aiseā e palaai ai lana tali i le sasau mai a le pelu? Aiseā e sasau lemū ai? Aiseā e lē [malie] ai e oti? Ina sasa ia ina ia tau malosi o ia! Ia ta atu pe a ta mai, tuu i ai le tino e tali atu pe a ta mai!” Na tusi mai se tagata aloaʻia o le malo o Roma o Seneca faapea i le taimi o le mālōlōga, e faasilasila mai ai: “Ina ia lē motusia a tatou faafiafiaga, o loo faia se isi fetauiga i le taimi nei!”

E lē o se mea e faateʻia ai le taʻutinoga a Seneca faapea na ia foʻi atu i le fale ua “atili ona sauā ma leai se faalogona alofa faaletagata.” O le taʻutinoga faamaoni a lenei tagata matamata e ao ona tatou manatunatu loloto i ai. Pe e lē o faapena foʻi le aafiaga o iai i tagata matamata i taaloga i aso nei, o le “atili ona sauā ma leai se faalogona alofa faaletagata”?

Atonu na manatu nisi ua lelei ona ua mafai ona toe foʻi i o latou aiga ma le saogalemu. Na faia se talaula a se tasi tagata matamata e faatatau i le emeperoa o Domitian, ma i le faatonuga a le emeperoa sa toso ese ai o ia mai lona nofoa ma lafoina atu i taʻifau feʻai. O le lē lava o tagata solitulafono e faia i ai le faasalaga o le oti, na māfua ai  ona faatonuina e le emeperoa o Caligula ina ia puʻea se vaega o tagata matamata ma lafo atu i manu feʻai. Ina ua lē ola masini o le pulelaa e tusa ai ma le auala na finagalo i ai le emeperoa o Cladius, na ia poloaʻiina ai foʻi tagata inisinia e gafa ma le vaaiga o masini ina ia tau i totonu o le malae.

O le loto aasa o tagata maimoa na māfua ai foʻi ni faalavelave ma fevesiaʻiga. Na solofa i lalo se fale taalo i le itu i matu o Roma, ma faitau afe na lipotia mai na maliliu ai. Na tupu se fevesiaʻiga a o faia se fetauaʻiga i Pompeii i le 59 T.A. Ua lipotia mai e Tacitus lenā vevesi i le va o tagata maimoa o le nuu ma tagata tauvā mai le isi nuu tuaoi faapea na amata i ni taugā upu mamafa, ona sosoo ai lea ma taugā maa, ae faaiʻu i le tau i pelu. Na iai ni nai tagata na mumutu vaega o o latou tino ma manunuʻa ai, ae o le toʻatele na feoti.

Se Lesona Manino

O se faaaliga talu ai nei o le (Sangue e arena, “Toto ma le Oneone”) i le Colosseum (fale sa fai ai fetauiga anamua) i Roma na toe faamanatu mai ai mea i ona pō nei e taitutusa atu i le munera. O le mea e iloga ai, ona na faaalia ai i ni vitiō taugā a tagata ma povi poʻa, o faipelega faapolofesa, o le mataʻutia o le lavevea a ni taavale ma uila afi i ni tuuga, o fusuaga lē mapupulua a ʻautaaalo i taaloga, ma misa lē mavaovao a le ʻaumaimoa. Na faaiʻu le ata i se vaaiga na puʻeina mai luga o le Colosseum. O le ā sou manatu e tusa ai o le faaiʻuga a tagata asiasi maimoa ane? E toʻafia o le a aʻoaʻoina se lesona?

Ua tele ina faia i nisi o atunuu i aso nei taugā a taʻifau, taugā a toa, o fetauiga a tagata ma povi, ma taaloga mataʻutia. Ua lamatia ola i tuuga taavale ma uila afi e faamalieina ai le maimoa a le vao o tagata. Ae sei mafaufau i ata o loo faaali mai i le televise i aso taʻitasi. I suʻesuʻega i se tasi o atunuu i sisifo na faaalia ai faapea e oo ane i le taimi ua sefulu tausaga o se tamaitiiti ua masani ona matamata i le TV, na te ono vaaia le faitau 10,000 o fasiotiga tagata ma le 100,000 o gaoioiga sauā.

Ua faapea mai le tusitala o le senituri lona tolu o Tetuliano, o le fiafia i tauvaga e “lē talafeagai lea ma le lotu moni ma le usiusitai i le Atua moni.” Na ia manatu iā i latou na auai atu e matamata o ni ē e lagolagoina fasiotiga tagata. Ae faapefea aso nei? E ono faapea mai se tasi, ‘Pe o faafiafiaina aʻu e ala i le matamata i le faamasaaina o le toto, le feoti o tagata, po o faiga sauā i le televise po o le Initineti?’ E talafeagai ai ona manatua le Salamo 11:5: “E tofotofo e Ieova i le ua amiotonu; a ua inosia e lona finagalo lē fai amio leaga, ma lē fiafia i le faasaua.”

[Pusa i le itulau 28]

Fetauiga Ina ia “Faafilemuina ai Lē ua Maliu”

I le amataga mai o fetauiga a tagata tau, ua tusi ai le tusitala o Tetuliano o le senituri lona tolu faapea: “Na manatu tagata i aso anamua faapea o lenei ituaiga o faaaliga ua latou avatu ai le auaunaga mo ē ua oti, ina ua uma ona latou faatoʻafilemuina teisi faiga sauā ona o a latou aganuu. I taimi ua mavae, na talitonu ai e faapea o agaga o ē ua maliliu sa togiolaina i le toto o tagata, o lea la i taimi o falelauasiga na latou faia ai taulaga i tagata na aumai faapagota, po o ni pologa sa itiiti so latou aogā na latou faatauina mai. Ae mulimuli ane, na manatu ai e lelei ona avea o se faafiafiaga e ufiufi ai le leaga o lenā faiga. Ina ua māeʻa ona toleniina tagata na latou maua mai e tau e faaaogā ai auupega na iai i na taimi i le mea sili latou te mafai—le toleniga lea na aʻoaʻoina ai e tau ina ia oti!—ona fasiotia loa lea o i latou i se falelauasiga atofaina i totonu o le fanua oti. Ona faamāfanafanaina ai loa lea o i latou e tusa ai o lē ua maliu ina ua fasiotia isi. O le amataga mai lenā o le munus. Ae ina ua mavae se taimi, na oo atu ai ina tulaga tutusa le maoaʻe o faiga sauā ma le aganuu; auā e lē atoa le manaia o se aso mālōlō, seʻi vaganā ua saeina e manu feʻai tino o tagata. O mea na ofoina ina ia faafilemuina ai lē ua maliu na manatu i ai o se sauniga faalelotu mo se falelauasiga.”

[Ata i le itulau 27]

Se puloutau ma se talitulivae a se tagata tau anamua

[Ata i le itulau 29]

Na lē taliaina e Kerisiano anamua faafiafiaga sauā. Ae faapefea oe?

[Faamatalaga i Ata]

Faipelega: Dave Kingdon/Index Stock Photography; taavale lavea: AP Photo/Martin Seppala

[Faamatalaga i Ata i le itulau 26]

Phoenix Art Museum, Arizona/Bridgeman Art Library