Ua Auina Atu se Fesoasoani Laveaʻi mo le Oge!

ATONU e te fesili, ‘O le ā le ituaiga o oge?’ O se oge i meaʻai faaleagaga! Na valoia mai e le perofeta Eperu anamua lenei oge: “Faauta, e oo mai aso ou te tuuina atu ai le oge i le nuu; e le se oge i mea e ʻai, po o se galala i le fia inu vai, a o le oge i le faalogologo i afioga a Ieova.” (Amosa 8:11) Ina ia fesoasoani e aveesea lea oge faaleagaga, ua auina atu ai sui e toʻa 48 o le vasega 112 o le Aʻoga Faale-Tusi Paia o le Olomatamata o Kiliata, o loo faia i Patterson i Niu Ioka, i atunuu eseese e 19 i konetineta e 5 ma motu o le vasa.

E lē o auina atu i latou ma ni meaʻai faaletino, ae ua iā i latou le poto, le tomai, ma le toleniga. Na latou auai mo le lima masina i suʻesuʻega māeʻaeʻa o le Tusi Paia sa fuafuaina e faamalosia ai lo latou faatuatua mo le auaunaga faamisionare i atunuu ese. Iā Mati 9, 2002, e toʻa 5,554 le aofia na auai ma faalogologo ma le fiafia i le polokalame o le faauuga.

O Stephen Lett, o lē o loo auauna o se sui o le Vaega Pule o Molimau a Ieova, na tatalaina ma le aasa le polokalame. Na ia faafeiloaʻia faapitoa le toʻatele o malō asiasi mai i vaega eseese o le lalolagi. Ona faasolosolo loa lea ona ia faatatauina le fetalaiga a Iesu: “O outou, o le malamalama o le lalolagi outou” i le galuega a ē o le a avea nei ma misionare. (Mataio 5:14) Na ia faamatalaina mai e faapea: ‘I o outou tofiga, o le a outou “faamalamalamaina ai” vala eseese o galuega ofoofogia a Ieova, ma mafai ai ona iloa e ē lotofaamaoni le matagofie o Ieova ma ana fuafuaga.’ Na faalaeiauina e le uso o Lett misionare e faaaogā le malamalama o le Afioga a le Atua e faaalia ai le pogisa o aʻoaʻoga sesē ma saunia ai se taʻiala mo i latou o loo saʻilia le upu moni.

Se Uiga Talafeagai e Tāua mo le Taulau Manuia

Ina ua māeʻa upu tomua a le taʻitaʻifono, ona tauaaoina atu loa lea e Baltasar Perla, o se sui o le Komiti o le Lālā o le Iunaite Setete le lauga muamua o le faasologa o lauga, lea na saunia e fesoasoani ai i le ʻaufaauu ina ia avea o ni misionare e taulau manuia. Na ia fafauina aʻe se matua e faapea “Ia Faamalosi ma Loto Tele, ma ia Faia Lenei Mea.” (1 Nofoaiga a Tupu 28:20)Na mauaina e le tupu o Isaraelu anamua o Solomona se tofiga faigatā, o le faia lea o se galuega na te leʻi faapea ona faia muamua—o le fausiaina lea o se malumalu i Ierusalema. Na gaoioi Solomona, ma faatasi ai ma le fesoasoani a Ieova na mafai ona faamāeʻaina ai le malumalu. I le faatatauina atu o le lesona i le vasega, na faapea mai ai le uso o Perla: ‘Ua outou maua se tofiga fou, o le avea lea ma misionare, ma e manaʻomia ai ona outou lototetele ma faamalolosi.’ E mautinoa na faamāfanafanaina le ʻauaʻoʻoga i le faamautinoaga e faapea, o le a lē tuulafoaʻia pe tuua e Ieova i latou pe afai latou te tumau ona vavalalata atu iā te ia. Na faagaeetia e le uso o Perla le aofia ina ua faaiʻu i lona taʻuina mai o se mea e faatatau iā te ia lava: ‘E mafai ona outou faataulauina ni mea  lelei se tele i le avea ai o ni misionare. O misionare na aʻoaʻo mai iā te aʻu ma loʻu aiga le upu moni!’

O le matua o le lauga na tauaaoina e Samuel Herd o se tasi o sui o le Vaega Pule, “Vaai Atu iā Ieova e Taulau Ai.” Ua faaee atu i le ʻauaʻoʻoga se matafaioi i le galuega faamisionare, ma o lo latou taulau e faalagolago tele atu lea i la latou faiā ma Ieova. Na apoapoaʻia i latou e le uso o Herd: ‘Ua outou faateleina le poto i le Tusi Paia e ala iā outou suʻesuʻega i Kiliata. Ua outou mauaina ma le olioli. Ae i le taimi nei, ina ia taulau moni, e tatau ona outou amata ona faailoa atu i isi mea ua outou aʻoaʻoina.’ (Galuega 20:35) Ua iai i misionare le tele o avanoa e faia ai lenei mea a o latou ‘faataulagaina i latou lava’ mo isi.—Filipi 2:17, NW.

O ā fautuaga mulimuli na tuuina atu e faiaʻoga mo le ʻauaʻoaʻoga? Na faavaeina aʻe e Mark Noumair lana matua i le Ruta 3:18, “Nofo ia, Seia E Iloa se Mea e Tupu Ai.” I le faaaogāina o le faataʻitaʻiga iā Naomi ma Ruta, na faalaeiauina ai e le failauga le ʻaufaauu ina ia faatuatuaina atoatoa faatulagaga ua faataatia mai e le faalapotopotoga a le Atua i le lalolagi, ma ia faaaloalo i le pulega faatiokarate. I le pāʻiaina o loto o le ʻauaʻoʻoga, na faapea mai ai le uso o Noumair: ‘Atonu e iai ni taimi tou te lē malamalama ai i le māfuaaga ua faia ai se faaiʻuga e tou te aafia ai pe atonu foʻi o loo iā te outou ni lagona maumaututū  e faatino ai se mea i se auala e ese mai. O le ā e tou te ono faia? Po o le a outou gaoioi loa ma faataunuu lenā mea i la outou lava auala pe o le a outou ‘nonofo ia’ ma faalagolago atu i le taʻitaʻiga a le Atua, ona o le mautinoa e faapea e iai le taimi o le a ia faapogaia na o le lelei e iʻu i ai.’ (Roma 8:28) O le fautuaga ina ia ‘uaʻi atu i manaʻoga o le Malo, ma taulaʻi atu i mea o loo faia e le faalapotopotoga a Ieova na i lo o mea o loo faia e isi tagata,’ e lē masalomia o le a aogā i ē o le a avea nei ma misionare i o latou tofiga i isi atunuu.

O Wallace Liverance, o lē sa avea ma misionare ma ua auauna nei o se faiaʻoga o Kiliata, na tauaaoina le lauga faaiʻu o le faasologa o lauga amata. O le matua o lana lauga “Ia Taulaʻi Pea, Tumau i le Auaunaga a le Atua.” Na ia faailoa mai e faapea na silafia lelei e le perofeta o Tanielu mai le iloaina o le paʻū o Papelonia ma mea na valoiaina e Ieremia i le latalata ane o le faasaʻolotoina o tagata Isaraelu mai le faatagataotauaina. (Ieremia 25:11; Tanielu 9:2) Na iloa lelei e Tanielu taimi faatulagaina a Ieova, ma na fesoasoani lenā iā te ia e taulaʻi atu i le faaalia mai o fuafuaga a le Atua. I lona tuufaafeagai, na faapea mai tagata Isaraelu i aso o le perofeta o Hakai: “E lei oo i ona aso.” (Hakai 1:2) Sa leʻi taulaʻi atu la latou vaai i taimi na latou ola ai, ae na latou uaʻi atu i o latou lava manaʻoga ma mea na latou faia, ma tuua ai le galuega lea na faasaʻolotoina mai ai i latou mai Papelonia, o le toe fausia lea o le malumalu. Na faaiʻu atu e le uso o Liverance e faapea: “O lea seʻi taulaʻi atu e ala i le manatuaina pea o fuafuaga a Ieova i taimi uma.”

Na taʻitaʻia e se faiaʻoga o Kiliata o Lawrence Bowen se vaega o le polokalame o lona matua e faapea “E Faamanuiaina e Ieova i Latou o Ē Faaaogāina le Afioga o Loo Ola.” (Eperu 4:12) Sa feagai lenei vaega ma mea na tutupu i le vasega i le galuega i le fanua, na faamamafa ai le auala e faamanuiaina ai e Ieova i latou e faaaogāina le Tusi Paia pe a talaʻi ma aʻoaʻo atu. Na taʻua e lē na taʻitaʻia le auala na faataatia ai e Iesu Keriso se faaaʻoaʻoga lelei mo faifeʻau uma a le Atua i lona faapea mai: ‘Na mafai ona faapea atu ma le moni Iesu o mea na ia aʻoaʻo atu e lē o sana aʻoaʻoga lea, ae o Afioga a le Atua ua fetalai atu ai o ia.’ Na iloa lelei e ē lotofaamaoni le upu moni ma na tali lelei mai i ai. (Ioane 7:16, 17) O le tulaga moni foʻi lenā i aso nei.

O le Toleniina i Kiliata ua Faaauupegaina ai se Tasi mo Galuega Lelei Uma

Na sosoo ai, ma le faatalanoaina e Richard Abrahamson ma Patrick LaFranca o ni sui ua leva ona iai o le aiga Peteli, ni tagata se toʻaono na faauu mai i Kiliata lea o loo auauna nei i vala eseese o le auaunaga faataimi atoa. Na faalaeiauina le vasega lona 112 i le faalogo atu e faapea e ui i le faitau sefulu tausaga talu ona faauu lenā toʻaono, ae o loo faaauau pea ona latou faaaogāina toleniga na latou mauaina mai Kiliata e tusa ai o suʻesuʻega faale-Tusi Paia, saʻiliʻiliga loloto o mataupu, ma le feagai lelei ai ma tagata, tusa lava po o ā tofiga o loo latou iai nei.

O Theodore Jaracz o se sui o le Vaega Pule na tauaaoina le lauga autū o le polokalame. O le matua “Le Mea ua Faataunuuina Ona o le Onosaia o le ʻInoʻino Mai o Satani.” A o faagasolo le lima masina ua mavae, na nonofo ai le ʻauaʻoʻoga i se nofoaga na faaalia ai le agaalofa ma le pulega a le Atua. Ae peitaʻi, e pei ona sa faaalia ai i a latou aʻoga, o loo tatou ola i se lalolagi e feʻainaʻi. O loo osofaʻia nei tagata o Ieova i le lalolagi atoa. (Mataio 24:9) E ala i le faaaogāina o nisi o tala faale-Tusi Paia, na faapea mai ai le uso o Jaracz ‘ua avea i tatou ma taulaʻiga autū a le Tiapolo. E tatau ona faamalosia la tatou faiā ma Ieova ma ia lototetele ina ia mafai ona feagai ma tofotofoga.’ (Iopu 1:8; Tanielu 6:4; Ioane 15:20; Faaaliga 12:12, 17) Na faaiʻu mai e faapea le uso o Jaracz, e ui ina faaauau pea ona inosia tagata o le Atua, ‘e leai se auupega na faia e tau ma i tatou, e pei ona taʻua i le Isaia 54:17, o le a manuia. O le a faamautinoaina e Ieova ua laveaʻia i tatou i lana taimi ma lana auala.’

E lē masalomia le tele o mea o le a faia e le ʻaufaauu o le vasega lona 112 o Kiliata o ē ‘ua faaauupegaina atoatoa’ e aveesea ai le oge i meaʻai faaleagaga o loo iai i atunuu o le a latou auauna ai. (2 Timoteo 3:16, 17) E tatou te tulimataʻia ma le naunautaʻi lipoti o lo latou faaooina atu o le feʻau e faaolaina ai tagata i ia atunuu.

[Pusa i le itulau 23]

FAAMAUMAUGA O LE VASEGA

Aofaʻi o atunuu o loo iai o latou sui: 6

Aofaʻi o atunuu ua tofia i ai: 19

Aofaʻi o le ʻauaʻoʻoga: 48

Faatatauga o tausaga: 33.2

Faatatauga o tausaga i le upu moni: 15.7

Faatatauga o tausaga i le faiva faataimi atoa: 12.2

[Ata i le itulau 24]

Vasega Faauu Lona 112 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai luma agaʻi i tua, ma o igoa e lisi mai le itu agavale i le itu taumatau i laina taʻitasi.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.