Aua Neʻi Faasesēina Oe

O LE taufaasesē, e toeitiiti tutusa lava lona leva ma le leva ona iai o le tagata. O se tasi o mea muamua lava na tupu o loo faamauina i le talafaasolopito, o se gaoioiga taufaasesē. O le taimi lenā na faasesē ai e Satani ia Eva i le faatoʻaga o Etena.—Kenese 3:13; 1 Timoteo 2:14.

E ui e leʻi iai lava se taimi na sili ai ona salalau atu le taufaasesē i le lalolagi talu mai lenā taimi, ae ua matuā sili atu ona taatele i aso nei. I le vaavaai agaʻi atu i luma i o tatou aso, na lapataʻi mai ai le Tusi Paia e faapea: “A o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.”—2 Timoteo 3:13.

E anoanoaʻi māfuaaga eseese ua faasesēina ai tagata. O tagata faitogafiti ma fai folafolaga taufaasesē, ua latou faasesēina tagata ina ia maua mai a latou tupe. O nisi tagata faipolotiki ua latou faasesēina tagata o o latou itumalo ma le manatu ina ia tumau ai pea i o latou tulaga faalemalo, e tusa lava po o ā mea e fai ina ia maua ai lea iʻuga. Ua faasesē foʻi e tagata i latou lava. Na i lo o le taliaina o mea moni e logo leaga iā i latou, ua faatalitonuina e i latou i latou lava e faapea, e lē āfaina le faia o amioga mataʻutia e pei o le ulaula, faaaogāsesēina o fualaau faasāina po o feusuaʻiga lē mamā.

E faapea foʻi ona iai faiga taufaasesē i mataupu faalotu. Sa faasesēina e taʻitaʻi lotu i aso o Iesu ia tagata. E faatatau i na tagata taufaasesē, na fetalai ai Iesu e faapea: “O tauaso i latou e taʻitaʻi i e ua tauaso; afai foi e taʻitaʻiina le tauaso e le tauaso, ona la pauu uma ai lea i le lua.” (Mataio 15:14) E lē gata i lea, e faasesē e tagata i latou lava i mataupu faalelotu. Ua taʻua i le Faataoto 14:12 e faapea: “O i ai le ala ua tonu i le manatu o le tagata; a o lona taunuuga, o ala ia e oti ai.”

E pei lava o aso o Iesu, e lētioa ona toʻatele tagata i aso nei ua faasesēina i mataupu faalelotu! Na faapea mai le aposetolo o Paulo, o Satani “ua faatauasoina manatu o i latou o e le faatuatua e le atua o le lalolagi nei, ina neʻi pupula atu ia te i latou le malamalama o le tala lelei i le mamalu o Keriso, o ia foi o le faatusa o le Atua.”—2 Korinito 4:4, LF.

Afai e faasesēina i tatou e se tagata fai mea faapiʻopiʻo, e lē toe maua a tatou tupe. Afai e faasesēina i tatou e se faipolotiki, e ono iʻu ina leiloa ai nisi o lo tatou saʻolotoga. Ae afai e faasesēina i tatou e Satani ina ia tatou teena ai le upu moni e uiga iā Iesu Keriso, o le a lē maua e i tatou le ola e faavavau! O lea ia faaeteete ina neʻi faasesēina oe. Ia mataala lou mafaufau ma lou loto i le puna moni e tasi o upu moni faalotu, le Tusi Paia. E anoanoaʻi faamanuiaga o le a lē maua pe a lē faia faapea.—Ioane 17:3.