Ua Faamatagofieina e Ieova Ona Tagata i le Malamalama

“Tulai ia [“oe le fafine,” NW], ina malamalama ia, auā ua oo mai lou malamalama; ua alu ae foi le pupula o Ieova i ou luga.”—ISAIA 60:1.

1, 2. (a) O le ā le tulaga o iai le fanau a tagata? (e) O ai o loo faapogaia le pouliuli o le fanau a tagata?

“UA TATOU manaʻomia lava se tagata e pei o Isaia po o le sagato o Paulo!” O le tagi talatala mai lenā a Harry Truman, le Peresitene o le Iunaite Setete i tuā i se tausaga i tala mai o le 1940. Aiseā na ia taʻua ai na upu? Sa ia mātauina le manaʻoga o le iai o ni taʻitaʻi o ē e faia ni faaaʻoaʻoga sili ona lelei tau amio i lona taimi. Ua faatoʻā uma atu lava le Taua Lona Lua a le Lalolagi, lea sa avea ma vaitaimi matuā pouliuli i lona luasefulu o senituri. Ae, e ui lava ua uma le taua, e leʻi maua lava se filemu i le lalolagi. Sa iai pea le pouliuli. Ma o le mea moni, ua 57 tausaga talu ona uma lenā taua, ae o loo pouliuli pea le lalolagi. Pe ana faapea o loo soifua mai lava le peresitene o Truman i aso nei, e mautinoa o le a tumau pea lona manatu i le manaʻoga mo ni taʻitaʻi e faia ni faaaʻoaʻoga lelei tau amio, e pei o Isaia po o le aposetolo o Paulo.

² E tatou te lē iloa pe sa silafia e le peresitene o Truman pe leai, ae na tautala le aposetolo o Paulo i le pouliuli lea o loo mafatia ai le fanau a tagata, ma sa ia lapataʻi e ala mai i ana tusitusiga e faatatau i lenei pouliuli. Mo se faaaʻoaʻoga, na ia lapataʻia aumea talitonu e faapea: “Auā tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.” (Efeso 6:12) Ua faaalia i nei upu e lē gata sa iloa e Paulo le pouliuli o loo ufitia ai le lalolagi, ae sa ia iloa lelei foʻi le mea moni e puna mai ai—o ni mana malolosi faatemoni e pei ona faamatalaina o “alii . . . o lenei lalolagi.” Talu ai o agaga malolosi lea o loo faapogaia le pouliuli o le lalolagi, o le ā e mafai e le tagata ona fai e aveesea ai le pouliuli?

3. E ui lava i le tulaga pouliuli o le fanau a tagata o loo iai, o le ā na valoia mai e Isaia mo tagata faamaoni?

³ Sa faapena foʻi ona tautala Isaia e faatatau i le pouliuli o loo pagatia ai le fanau a tagata. (Isaia 8:22; 59:9) Peitaʻi, i le tagaʻi mai i le lumanaʻi i o tatou taimi, na ia valoia ina ua faagaeeina o ia e faapea e oo lava i nei taimi pouliuli, o le a faamalamalamaina e Ieova manatu o i latou e mananaʻo i le malamalama. Ioe, e ui lava tatou te lē o faatasi ai ma Paulo ma Isaia, ae o loo iā i tatou a la tusitusiga faagaeeina e taʻitaʻiina ai i tatou. Ina ia iloa le auala ua avea ai o se faamanuiaga lenā mea mo i latou e alolofa iā Ieova, seʻi tatou iloiloina upu faavaloaga a Isaia o loo maua i le mataupu e 60 o lana tusi.

Ua Faasusulu Atu le Malamalama e le Fafine Faavaloaga

4, 5. (a) O le ā ua faatonu e Ieova le fafine e fai, ma o le ā le folafolaga ua ia faia? (e) O ā faamatalaga e faafiafiaina ai o loo aofia i le mataupu e 60 o le Isaia?

⁴ O upu amata o le Isaia e 60 o loo taulaʻi atu i se fafine o loo iai i se tulaga faanoanoa—o loo taoto o ia i le eleele i le pouliuli. E faafuaseʻi lava ona ati mai i le pouliuli le susulu o le malamalama, ona alaga mai lea o Ieova e faapea: “Tulai ia, [“oe le fafine,” NW], ina malamalama ia, auā ua oo mai lou malamalama; ua alu ae foi le pupula o Ieova i ou luga.” (Isaia 60:1) Ua oo mai le taimi mo le fafine faafaatusa e tulaʻi ai ma faasusulu atu le malamalama o le Atua, Lona mamalu. Aiseā? E tatou te maua le tali i le fuaiupu o loo sosoo mai ai: “Faauta mai, e ufitia le lalolagi i le pouliuli, e ufitia foi nuu i le pogisa; a e afio ae Ieova i ou luga, ma le pupula o Ieova e aliali mai lea i ou luga.” (Isaia 60:2) Ina ua usitai le fafine i le faatonuga a Ieova, ua faamautinoa atu iā te ia se iʻuga  matagofie o le a oo i ai. Ua fetalai Ieova: “E o mai nuu ese i lou malamalama, o tupu foi e o mai i latou i le pupula o lou alu ae.”—Isaia 60:3.

⁵ O upu faagaeeloto o loo i nei fuaiupu e tolu e lē gata o se faatomuaga ae o se otootoga o faamatalaga uma o loo iai i le Isaia mataupu e 60. O loo valoia mai ai mea o le a oo i se fafine faavaloaga ma faamatalaina ai le auala e mafai ai ona tatou nonofo i le malamalama o Ieova e ui lava i le pouliuli ua i luga o le fanau a tagata. O le ā o loo faaata mai e mea o loo taʻua i nei fuaiupu amata e tolu?

6. O ai le fafine i le Isaia mataupu e 60, ma o ai o loo fai ma ona sui i le lalolagi?

⁶ O le fafine i le Isaia 60:1-3 o Siona, le faalapotopotoga faalelagi o foafoaga agaga a Ieova. I aso nei, o loo fai ma sui o Siona i le lalolagi le vaega totoe o “le Isaraelu o le Atua,” le faapotopotoga i le lalolagi atoa o Kerisiano faauuagagaina, i latou o loo iai le faamoemoe e pule faatasi ai ma Keriso i le lagi. (Kalatia 6:16) E 144,000 sui o lenei nuu faaleagaga, ma o le faataunuuga faaonapōnei o le Isaia mataupu e 60 e taulaʻi atu iā i latou o loo soifua pea i le lalolagi i “aso e gata ai.” (2 Timoteo 3:1; Faaaliga 14:1) E anoanoaʻi foʻi faamatalaga o loo i le valoaga e faatatau i aumea a nei Kerisiano faauuina, le “motu o tagata e toatele” o “isi mamoe.”—Faaaliga 7:9; Ioane 10:16.

7. O le ā le tulaga sa iai Siona i le 1918, ma sa faapefea ona valoiaina mai lenei mea?

⁷ Pe sa iai ea se vaitaimi na nofo ai “le Isaraelu o le Atua” i le pouliuli, e pei ona faaata mai i lenā fafine faavaloaga? Ioe, na tupu lenei mea i le sili atu i le 80 tausaga talu ai. I le vaitaimi o le Taua Muamua a le Lalolagi, sa tauivi malosi ai Kerisiano faauuina e faaauau le galuega o le molimau atu. Peitaʻi i le 1918, le tausaga mulimuli o le taua, na toetoe lava taofia atoatoa ai le galuega talaʻi. Sa faasalaina i le falepuipui ia Joseph F. Rutherford, o lē na vaaia le galuega talaʻi i le lalolagi atoa, ma isi Kerisiano aloaʻia i ni vaitaimi uumi ona o ni tuuaʻiga lē saʻo. Sa faamatalaina mai faavaloaga i le tusi o Faaaliga, ia Kerisiano faauuina i le lalolagi i lenā taimi e pei o ni tino oti o loo taatitia “i le ala o le aai tele, o lona igoa faaleagaga, o Sotoma ma Aikupito.” (Faaaliga 11:8, LT ) Sa avea moni lenā ma vaitaimi pouliuli mo Siona, e pei ona faaata mai e ana fanau faauuina i le lalolagi!

8. O le ā le suiga mataʻina na tupu i le 1919, ma o le ā na iʻu i ai?

⁸ Peitaʻi, o le tausaga e 1919 na vaaia ai se suiga mataʻina. Sa faasusulu mai e Ieova le malamalama i luga o Siona! O i latou o le Isaraelu a le Atua sa iai i lenā taimi sa gaoioi ina ia faasusulu  atu le malamalama o le Atua, sa toe auai ma le lē fefe i le faalauiloaina atu o le tala lelei. (Mataio 5:14-16) E faafetaia le maelega ua toe faafouina o nei Kerisiano, auā ua aumaia ai isi i le malamalama o Ieova. Muamua lava, o ē na maua mai sa faauuina e avea ma sui faaopoopo o le Isaraelu a le Atua. O loo taʻua i latou o tupu i le Isaia 60:3, ona o le a avea i latou ma suli faatasi ma Keriso i le Malo faalelagi o le Atua. (Faaaliga 20:6) Mulimuli ane, na amata ona aumaia ai se motu o tagata e toʻatele o isi mamoe i le malamalama o Ieova. O i latou nei o “nuu ese” o loo taʻua i le valoaga.

Ua Toe Foʻi Mai Fanau a le Fafine i le Aiga!

9, 10. (a) O le ā le vaaiga mataʻina na iloa e le fafine, ma o le ā na faaata mai e lenei mea? (e) O ā māfuaaga na iā Siona e olioli ai?

⁹ O lea la, ua amata ona avatu atili e Ieova nisi faamatalaga e faatatau i mea o loo faamauina i le Isaia 60:1-3. Ua ia avatu i le fafine le isi faatonuga. seʻi faafofoga i le mea ua ia fetalai atu ai: “Ia e fetepaʻi i itu uma, ma e vaai!” E usitai i ai le fafine, ma maʻeu se vaaiga faamāfanafanaloto ua ia iloaina atu! Ua ō mai lana fanau i le aiga. Ua faaauau mai le mau e faapea: “O loo faapotopoto mai i latou uma; ua latou o mai ia te oe, o au tama tane e o mai i latou i mea mamao, e afisi foi au tama fafine i lou itu.” (Isaia 60:4) O le faalauiloaina o le Malo i le lalolagi atoa lea na amata i le 1919 ua aumaia ai le faitau afe o ē fou i le auaunaga a Ieova. Ua avea foʻi i latou nei ma “tama tane” ma “tama fafine” a Siona, o sui faauuina o le Isaraelu a le Atua. I le faia faapea, ua faamatagofieina ai e Ieova Siona e ala i le aumaia o sui mulimuli o le 144,000 i le malamalama.

¹⁰ Pe mafai ona e tomanatu i le olioli o Siona i le iai faatasi ma lana fanau? Ua avatu e Ieova iā Siona māfuaaga faaopoopo e olioli ai. E tatou te faitau i ai e faapea: “Ona e vaai ai lea, ma e olioli; [“ma lē manofo,” NW ] oe, ma fiafia tele lou loto; auā e liua mai ia te oe le a o le sami; e oo mai ia te oe le oloa o nuu ese.” (Isaia 60:5) I le ōgatasi ai ma na upu faavaloaga, talu mai le 1930, e anoanoaʻi Kerisiano o ē o lo latou faamoemoe o le ola e faavavau i le lalolagi ua lolofi mai iā Siona. Ua latou ō mai mai “le sami” o le fanau a tagata lea o loo vavaeese mai le Atua, ma ua avea i latou ma oloa o nuu ese. O i latou ia o “mea ua manaomia e nuu uma.” (Hakai 2:7; Isaia 57:20) E lelei foʻi ona mātau mai, e lē o taumafai nei “mea ua manaomia” e auauna iā Ieova i le auala e manaʻo ai le tagata lava ia. E leai, e latou te faaopoopo atu i le matagofie o Siona e ala i le ō mai e tapuaʻi faatasi ma o latou uso faauuina, i le avea faatasi o i latou ma “lafu mamoe” e tasi i lalo o le taʻitaʻiga a le “leoleo mamoe e toatasi.”—Ioane 10:16.

Ua Agaʻi Mai i Siona, Tagata Faatauʻoa ma ʻAufailafumanu

11, 12. Faamatala tagata e toʻatele ua iloa atu o agaʻi mai i Siona.

¹¹ O le iʻuga o lenei aoaoina na valoia mai, o se faatelega maoaʻe i le aofaʻiga o ē tapuaʻi iā Ieova. O loo valoia mai lenei mea i upu o loo sosoo ai o le valoaga. Seʻi tau ina manatu faapea o lea e te lua tutū ma le fafine faavaloaga i le mauga o Siona. Ua e tagaʻi atu i sasaʻe, ma o le ā o loo e iloaina atu? “E ufitia oe i le vao kamela e tele, o kamela taanoa o Mitiana ma Efa; o i latou uma mai Seepa e o mai; latou te aumaia auro ma pulu lipano, latou te tala fiafia i viiga o Ieova.” (Isaia 60:6) O le vao o tagata faatauʻoa ma le solo o a latou kamela o loo malaga i auala e tau atu i Ierusalema. Ua faatusaina kamela i se lologa ua lofia ai le laueleele! Ua aumaia e faatauʻoa ia meaalofa tāua, o “auro ma pulu lipano.” O nei tagata faatauʻoa ua latou ō mai i le malamalama o le Atua ina ia viia o ia i luma o le lautele, ua latou ‘taʻu atu viiga o Ieova.’

¹² E lē na o tagata faatauʻoa o loo agaʻi mai. E oo foʻi i ʻaufailafumanu o loo agaʻi mai foʻi i latou i Siona. Ua faapea mai atili le valoaga: “E faapotopotoina ia te oe lafu mamoe uma o Kitara; e auauna ia te oe mamoe poa o Nepaiota.” (Isaia 60:7a) O tagata failafumanu o loo agaʻi mai i le aai paia e ofo atu manu sili ona lelei o a  latou lafu iā Ieova. Ua oo lava foʻi ina latou ofoina mai i latou e auauna iā Siona! O faapefea ona talia e Ieova nei tagata ese? Ua tali mai le Atua lava ia: “Latou te o ae, e talileleia i loʻu fata faitaulaga; ou te faamatagofie foi le fale o i ai loʻu matagofie.” (Isaia 60:7e) E taliaina ma le agalelei e Ieova taulaga ma le auaunaga a nei tagata ese. O lo latou auai mai ua faamatagofieina ai lona malumalu.

13, 14. O le ā ua iloa atu o agaʻi mai mai le itu i sisifo?

¹³ I le taimi nei, seʻi liliu lau vaai ma tagaʻi atu i le tafatafaʻilagi i sisifo. O le ā o e iloa atu ai? I se vaaiga e mamao lava, ua iloa atu ai se ao paʻepaʻe a o agaʻi mālie aʻe i le fogātai. Ua fesili Ieova i le fesili foʻi lava lenā o loo e manatunatu i ai: “O ai ea i latou na o loo felelei e pei se ao, e pei o lupe foi i o latou faitotoa?” (Isaia 60:8) Ua tali e Ieova lana ia lava fesili e faapea: “Auā e faatalitali nuu tu matafaga ia te au, e muamua foi vaa o Tasesa, e aumaia lau fanau i mea mamao, o a latou ario ma a latou auro e faatasi ma i latou; ona o le suafa o Ieova lou Atua, ma le Paia o Isaraelu, auā ua ia faamatagofie ia te oe.”—Isaia 60:9.

¹⁴ Pe mafai ona e faaata i lou mafaufau lenei vaaiga? O lenā ao paʻepaʻe ua faasolo ina latalata mai ma ua foliga mai e pei o ni mea ninii e tau lē iloa atu i le tafatafaʻilagi i sisifo. E foliga mai o ni manu felelei toetoe lava papaʻi i galu. Peitaʻi a o latalata mai atili, ua e iloa atu ai o vaa ma o latou la o loo tasisi mo le matagi. Ua matuā tele naʻuā vaa o loo folau agaʻi mai i Ierusalema ua foliga mai ai o ni lupe o loo felelei faatasi. Mai i vaipanoa mamao, o loo matuā saosaoa le agaʻi mai ai o fuāvaa, e momoli mai tagata talitonu i Ierusalema ina ia tapuaʻi iā Ieova.

 Ua Faateleina le Faalapotopotoga a Ieova

15. (a) O le ā le faatelega na valoia mai i upu o le Isaia 60:4-9? (e) O le ā le agaga o loo faaalia e Kerisiano moni?

¹⁵ Maʻeu se ata faavaloaga manino ua faailoa mai e le fuaiupu e 4 e oo i le 9 o le faatelega i le lalolagi atoa lea o loo tupu nei talu mai le 1919! Aiseā ua faamanuia ai Ieova iā Siona i lenei faatelega? Auā talu mai le 1919, ua faasusulu atu pea lava pea ma le usiusitai e le Isaraelu a le Atua le malamalama o Ieova. Peitaʻi, pe sa outou mātauina, e tusa ai o le fuaiupu e 7, o i latou ia ua faatoʻā taunuu mai latou te ‘⁠o aʻe i le fata faitaulaga a le Atua’? O le fatafaitaulaga o le mea e osi ai taulaga, ma ua faamanatu mai iā i tatou e lenei vaega o le valoaga e faapea o le auaunaga iā Ieova e aofia ai taulaga. Na tusi le aposetolo o Paulo e faapea: “Ou te aioi atu ia te outou . . . ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia.” (Roma 12:1) I le ōgatasi ma upu a Paulo, e lē faamalieina Kerisiano moni i le tau lava o le auai atu i ni nai sauniga faalelotu e faatasi i le vaiaso. E latou te tuutoina atu o latou taimi, malosi, atoa ai ma alagāʻoa mo le lagolagoina o le tapuaʻiga mamā. Po ua lē faamatagofieina ai ea le maota o Ieova ona o le faatasi ai o nei tagata tapuaʻi tuutoina? Na fai mai le valoaga a Isaia o le tulaga lenā o le a iai. Ma e mafai ona tatou mautinoa e faapea o nei tagata tapuaʻi maelega, e matagofie i latou i fofoga o Ieova.

16. O ai sa ofo atu e fesoasoani i le galuega o le toe atiina aʻe i aso anamua, ma o ai o loo faia faapea i aso nei?

¹⁶ E mananaʻo i latou nei e fou mai e galulue. Ua faaauau ona faapea mai le valoaga: “E atiina ae ou pa e tagata ese; e auauna mai o latou tupu ia te oe.” (Isaia 60:10) I le faataunuuga muamua o upu nei i tuā i aso na toe foʻi mai ai ē sa faaaunuua i Papelonia, sa fesoasoani moni ai lava tupu ma isi mai i nuu ese i le toe atiina aʻe o le malumalu ma le aai o Ierusalema. (Esera 3:7; Neemia 3:26) I le faataunuuga i ona pō nei, ua lagolagoina ai e le motu o tagata e toʻatele le vaega totoe faauuina i le atiina aʻe o le tapuaʻiga moni. Ua latou fesoasoani e atiina aʻe faapotopotoga Kerisiano ma ua faamalosia ai “pa” o le faalapotopotoga a Ieova lea ua pei o se aai. Ua latou auai foʻi i se galuega o le fausiaina o ni fale moni lava—le fausiaina o Maota o le Malo, o Maota Fono, ma nofoaga o Peteli. O auala uma nei, ua latou lagolagoina ai o latou uso faauuina i le tausia o manaʻoga o le faalapotopotoga ua faateleina a Ieova!

17. O le ā se tasi o auala o loo faamatagofieina ai e Ieova ona tagata?

¹⁷ Maʻeu le faalaeiauina ai i upu faaiʻu o le Isaia 60:10! Ua fetalai Ieova e faapea: “Aua o loʻu ita na aʻu taia ai oe, a o loʻu alofa ou te alofa ai lava ia te oe.” Ioe, i tuā i le 1918/1919, na aʻoaʻia ai e Ieova ona tagata. Peitaʻi ua teʻa lenā taimi. O le taimi lenei o Ieova e faaalia ai le alofa mutimuti vale i ana auauna faauuina ma a latou aumea o isi mamoe. O faamaoniga e iloa ai o le tulaga lenā ua iai, o le faatelega uiga ese lea ua ia faamanuiaina ai i latou, e tusa ua ia ‘faamatagofieina i latou.’

18, 19. (a) O le ā le folafolaga ua faia e Ieova e faatatau iā i latou e fou mai i lana faalapotopotoga? (e) O ā mea ua taʻu mai iā i tatou e fuaiupu o loo totoe o le Isaia mataupu e 60?

¹⁸ I tausaga taʻitasi, e faitau selau afe ia “tagata ese” ua auaufaatasi ma le faalapotopotoga a Ieova, ma o le a tatala pea le ala mo isi e toʻatele e mulimuli atu iā i latou. Na fetalai atu  Ieova iā Siona: “E avanoa pea lava ou faitotoa, e le punitia i le ao ma le po; ina ia aumaia ia te oe le oloa o nuu ese, ma ia taʻitaʻiina ai o latou tupu.” (Isaia 60:11) E taumafai nisi tagata tetee e tapunia na “faitotoa,” peitaʻi ua tatou iloa e lē mafai ona latou taulau manuia. O Ieova lava ia lea e fetalai mai e faapea po o le ā lava le tulaga e iai, o le a tatala pea faitotoʻa. O le a faaauau pea le faatelega.

¹⁹ O loo iai pea isi auala ua faamanuia ai e Ieova ona tagata, ua faamatagofieina ai i latou, i nei aso e gata ai. O fuaiupu o loo totoe o le Isaia 60 o loo faamatalaina mai ai faavaloaga ia na auala.

Pe Mafai Ona E Faamatala?

• O ai le “fafine” a le Atua, ma o ai o fai ma ona sui i le lalolagi?

• O anafea na taatitia ai fanau a Siona, ae o anafea ma na faapefea ona latou “tulaʻi”?

• I le faaaogāina o faaataga eseese, na faapefea ona valoia mai e Ieova le faatelega o tagata talaʻi o le Malo i aso nei?

• O ā auala ua faapogaia ai e Ieova lona malamalama e susulu atu i ona tagata?

[Fesili mo le Suʻesuʻega]

[Ata i le itulau 10]

Ua faatonuina le “fafine” a Ieova inā tulaʻi ia

[Ata i le itulau 12]

O le fuāvaa o vaa e tele ua foliga mai o ni lupe i le tafatafaʻilagi