Ua Susulu Atu le Mamalu o Ieova i Ona Tagata
Ua Susulu Atu le Mamalu o Ieova i Ona Tagata
“Auā e faia Ieova mou malamalama e faavavau.”—ISAIA 60:20.
1. Ua faapefea ona faamanuia e Ieova ona tagata faamaoni?
“O LOO fiafia Ieova i lona nuu; e faamatagofie e ia i le olataga e ua agamalu.” (Salamo 149:4) O le faamatalaga lenā a le faisalamo anamua, ma ua faamaonia mai e le talafaasolopito le moni o ana upu. Pe a faamaoni tagata o Ieova, na te tausia i latou, na te faia i latou ia fuatele mai, ma leoleo i latou. I aso anamua, sa ia avatu iā i latou le manumalo i o latou fili. I aso nei, o loo ia tausia i latou ina ia malolosi faaleagaga ma faamautinoa iā i latou le faaolataga e faavae i le taulaga a Iesu. (Roma 5:9) Na te faia lenei mea ona e matagofie i latou i ona fofoga.
2. E ui lava latou te fetaiaʻi ma teteega, o le ā le mea ua mautinoa e tagata o le Atua?
2 O le mea moni, i se lalolagi o loo ufitia i le pouliuli, o i latou e “nonofo ma le amio Atua” e fetaiaʻi ma teteega. (2 Timoteo 3:12) Ae peitaʻi, o loo mātauina lelei e Ieova tagata tetee, ma ua ia lapataʻia i latou e faapea: “Auā e fano le nuu ma le malo ua le mafai ona auauna ia te oe; e matuā faatafunaina ia nuu.” (Isaia 60:12) I aso nei, e tele auala o loo faatinoina ai teteega. I nisi atunuu, ua taumafai ai tagata tetee e faatapulaa pe faasāina le tapuaʻiga o loo avatu e Kerisiano moni iā Ieova. I isi atunuu, ua faaoolima ai tagata mapolotu i tagata tapuaʻi o Ieova ma susunu a latou meatotino. Ae ui lava i lea, ia manatua ua uma ona fuafuaina e Ieova le iʻuga o so o se tasi e tetee i le faataunuuina o lona finagalo. O le a lē taulau tagata tetee. E lē taulau i latou uma e tau faasaga iā Siona, lea o loo avea lana fanau i le lalolagi ma ona sui. Po ua lē o se faalaeiauga ea lenā mai lo tatou Atua silisili ese, o Ieova?
O Faamanuiaga e Leʻi Faatalitalia
3. O faapefea ona faataʻitaʻia mai le matagofie ma le fuatele mai o tagata tapuaʻi o Ieova?
3 O le mea moni lava ia i nei aso e gata ai o lenei faiga o mea, ua faamanuiaina ai e Ieova ona tagata e sili atu i mea na latou faatalitalia. Aemaise lava le faasolosolo ona ia faamatagofieina o lona nofoaga mo le tapuaʻiga, atoa ma i latou o loo iai o ē tauaveina lona suafa. E tusa ai o le valoaga a Isaia, ua ia fetalai atu iā Siona: “E o mai ia te oe mea e taʻua ai Lepanona, o le perosi, ma le titara, ma le tasura e faatasi, e faamatagofie aʻi le mea e i ai loʻu malumalu; ou te faalaleleia [“faamamaluina” NW] foi le mea e tu ai oʻu vae.” (Isaia 60:13) O atumauga e lilofia i vaomatua lauolaola o se vaaiga matagofie. O lea la, o laau lauolaola o ni faatusatusaga talafeagai ia o le matagofie ma le fuatele mai o tagata tapuaʻi o Ieova.—Isaia 41:19; 55:13.
4. O le ā ua faatusa i ai le “malumalu” ma le ‘mea e tu ai vae o Ieova’ ma ua faapefea ona faamatagofieina nei mea?
4 O le ā ua faatusa i ai le “malumalu” ma le ‘mea e tu ai vae o Ieova’ e pei ona taʻua i le Isaia 60:13? O taʻu nei e faatatau atu i lotoā o le malumalu sili faaleagaga o Ieova, o lona uiga o le faatulagaga mo le avatuina o le tapuaʻiga iā te ia e ala iā Iesu Keriso. (Eperu 8:1-5; 9:2-10, 23) Ua faalauiloa e Ieova lana fuafuaga e faamatagofie lenā malumalu faaleagaga e ala i le aumaia o tagata mai i atunuu uma e ō mai e tapuaʻi ai i inā. (Hakai 2:7) E muamua atu na vaai Isaia lava ia i le motu o tagata mai atunuu uma o gasolo atu i le mauga ua faamaualugaina o le tapuaʻiga a Ieova. (Isaia 2:1-4) I le faitau selau o tausaga mulimuli ane ai, na vaaia ai e le aposetolo o Ioane i le faaaliga se “motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi.” O loo latou tutū “i luma . . . o le nofoalii o le Atua, ua latou auauna foi ia te ia i lona malumalu i le ao ma le po.” (Faaaliga 7:9, 15) Talu ai ua faataunuuina nei valoaga i o tatou aso, ua tatou vaaitino ai lava i le faamatagofieina o le fale o Ieova.
5. O le ā le suiga tele mo le lelei na oo i fanau a Siona?
5 Maʻeu le suiga tele mo le lelei na oo iā Siona ona o nei mea uma! Na fetalai mai Ieova e faapea: “Na fai oe ma nuu lafoaiina ma le inosia, ua leai foi se ui ai, a o lenei e faia oe e aʻu ma nuu matagofie [“o se mea e mitamita ai,” NW ] e faavavau, ma nuu e olioli ai i lea tupulaga ma lea tupulaga.” (Isaia 60:15) I le agaʻi atu i le iʻuga o le Taua Muamua a le Lalolagi, na oo moni ai “le Isaraelu o le Atua” i se vaitaimi faanoanoa. (Kalatia 6:16) Sa ia lagona le matuā “lafoaiina,” ona sa leʻi manino atoatoa i ana fanau i le lalolagi le finagalo o le Atua mo i latou. Mulimuli ane, i le 1919, na toe faaolaola ai e Ieova ana auauna faauuina, ma talu mai lenā taimi ua ia faamatagofieina i latou i se tulaga manuia faaleagaga e matuā ofoofogia. E lē gata i lenā, pe ua lē faapogaia ai ea le fiafia ona o le folafolaga i le fuaiupu lenei? O le a manatu Ieova iā Siona o “se mea e mitamita ai.” Ioe o le a mitamita fanau a Siona, ma Ieova lava ia ona o Siona. O le a avea o ia ma “nuu e olioli ai,” o se faapogai mo le fiafia tele. Ma o le a lē na o sina taimi puupuu o le a iai lenā tulaga. O le tulaga faafiafiaina o Siona, e pei ona faaata mai e ana fanau i le lalolagi, o le a tumau “i lea tupulaga ma lea tupulaga.” E lē mafai ona faamutaina.
6. Ua faapefea ona faaaogāina e Kerisiano moni ia alagāʻoa mai i nuu ese?
6 Faafofoga atu nei, i le isi folafolaga tauatua. I le talanoa atu iā Siona, ua fetalai atu Ieova: “E te susu i le suāsusu o nuu ese, e te susu foi i susu o tupu; e te iloa foi o aʻu o Ieova o lou Faaola, ma le na faatauina oe, o le Malosi o Iakopo.” (Isaia 60:16) E faapefea ona fafaga Siona i le “suāsusu o nuu ese” ma susu i “susu o tupu”? E ala i le faaaogāina e Kerisiano faauuina ma a latou aumea o “isi mamoe” ia alagāʻoa tāua mai i nuu ese e faaauiluma ai le tapuaʻiga moni. (Ioane 10:16) O meaalofa tautupe o loo foaʻi tauofo o loo fesoasoani ina ia mafai ai ona faataulauina se galuega tele o le talaʻiga ma le aʻoaʻo atu i le tele o atunuu. O le faaaogāina tatau o le malamalamaga faatekinisi faaonapōnei, lea ua mafai ai nei ona latou lomia Tusi Paia atoa ma lomiga faale-Tusi Paia i le faitau selau o gagana. I aso nei, ua faateleina le aofaʻi o tagata ua mafai ona maua le upu moni o le Tusi Paia na i lo se isi lava taimi i le talafaasolopito. Ua aʻoaʻoina e tagatānuu mai le anoanoaʻi o atunuu e faapea o Ieova, o Lē na faatauina ana auauna faauuina mai i le saisaitia ai faaleagaga, o ia moni lava o le Faaola.
Agaʻigaʻi i Luma Faalefaalapotopotoga
7. O le ā se faaauilumaina maoaʻe ua oo i fanau a Siona?
7 Ua faamatagofieina e Ieova ona tagata i se isi auala. Ua ia faamanuiaina i latou i le agaʻigaʻi i luma i auala e faamaopoopo ai faalefaalapotopotoga. E tatou te faitau i le Isaia 60:17 e faapea: “Ou te aumaia le auro e sui aʻi le ʻapa memea; ou te aumaia foi le ario e sui aʻi le uamea, ma le ʻapa memea e sui aʻi laau, ma uamea e sui aʻi maa; e avea foi e aʻu ou alii ia filemu, ma ou faipule ia amiotonu.” O le suia o le ʻapa memea i le auro o lona uiga ua faaleleia atili, ma o le tulaga lava lenā e tasi pe a manatu i isi mea e pei ona taʻua. I le ōgatusa ma lenei, ua oo i le Isaraelu a le Atua ni faaleleiga atili faalefaalapotopotoga i aso e gata ai. Seʻi manatu i nai faaaʻoaʻoga nei.
8-10. Ia faamatala mai ni faaleleiga faalefaalapotopotoga ua iai talu mai le 1919.
8 A o lumanaʻi le 1919, sa pulea faapotopotoga o tagata o le Atua e toeaina ma tiakono, o i latou uma lava ia sa palotaina lava e tagata o le faapotopotoga. Amata mai i le tausaga lenā, sa tofia ai e “le auauna faamaoni ma le mafaufau” se tagata e avea ma faatonu o le auaunaga e vaavaaia gaoioiga o le auaunaga i le fanua i faapotopotoga taʻitasi. (Mataio 24:45-47) Peitaʻi, sa lē sologa lelei lenā fuafuaga i le tele o faapotopotoga ona sa iai nisi toeaina na palotaina e leʻi lagolagoina atoatoa le galuega faaevagelia. O lea la, i le 1932, sa faatonuina ai loa faapotopotoga ina ia taofia le toe palotaina o toeaina ma tiakono. Na i lo lenā, e ao ona filifilia e le faapotopotoga ni tane e auauna i se komiti o le auaunaga faatasi ma le faatonu o le auaunaga. Sa pei lenā mea o le “ʻapa memea” na i lo “laau”—e telē se faaleleiga ua fai!
9 I le 1938, na talia ai se iʻugāfono e faapotopotoga i le lalolagi atoa mo se faatulagaga ua faaleleia, o se faiga sa sili ona ōgatasi ma faaaʻoaʻoga a le Tusi Paia. Sa tuu atu le vaaiga o le faapotopotoga i sē sa avea ma le auauna o le faapotopotoga ma isi o ē sa fai ma auauna, ma na tofia uma lava i lalo o le vaavaaiga a le auauna faamaoni ma le mafaufau. Ua lē o toe faia se palota! O le faia faapea, sa tofia ai auauna uma lava i le faapotopotoga i le auala faatiokarate. Sa pei lenā mea o le “uamea” na i lo “maa” po o le “auro” na i lo le “ ʻapa memea.”
10 Talu mai lenā taimi, o loo faaauau pea ona agaʻigaʻi i luma. Mo se faaaʻoaʻoga, i le tausaga e 1972 na iloa ai e faapea o le vaavaaia o faapotopotoga e se vaega autasi o toeaina e filifilia faatiokarate, ae lē o le pulea uma o isi e se toeaina e toʻatasi, e sili atu lea ona latalata i le auala sa faagaoioia ai faapotopotoga Kerisiano i le uluaʻi senituri. E lē gata i lenā, pe tusa o le lua tausaga ua mavae, sa iai foʻi se isi laasaga agaʻi i luma. Sa fai ai se fetuunaʻiga i le puleaina o nisi o faalapotopotoga faaletulafono, lea ua mafai ai e le Vaega Pule ona taulaʻi atu atoatoa i mea tāua faaleagaga mo tagata o le Atua, na i lo le faalavelaveina ai i aso faisoo i mataupu faaletulafono.
11. O ai o loo māfua ai suiga faalefaalapotopotoga o loo faia i tagata o Ieova, ma o le ā ua iʻu i ai nei suiga?
11 O ai o loo māfua ai nei suiga auiluma? E lē o se tagata ua pogai ai, ae o Ieova le Atua lava ia. O ia o lē na fetalai mai: “Ou te aumaia le auro.” O ia foʻi o lē na tulei mai: “E avea foi e aʻu ou alii ia filemu, ma ou faipule ia amiotonu.” Ioe, o Ieova o loo gafa ma le vaavaaia o ona tagata. O le agaʻigaʻi i luma faalefaalapotopotoga sa valoia mai, o se tasi lea o auala ua ia faamatagofieina ai ona tagata. O le iʻuga, ua faamanuiaina ai Molimau a Ieova i le tele o auala. I le Isaia 60:18, tatou te faitau ai e faapea: “E le toe lagona le sauaga i lou laueleele; o le faatafunaina ma le lepetia o mea e le lagona ia i lou nuu; a e faaigoaina e oe ou pa, O le olataga, ma ou puipui, O le viiga.” Maʻeu le matagofie o na afioga! Peitaʻi o faapefea ona faataunuuina?
12. Ua faapefea ona lauolaola le filemu i Kerisiano moni?
12 E vaavaai atu Kerisiano moni iā Ieova mo faatonuga ma le taʻitaʻiga, ma o le iʻuga ua pei ai lava ona valoia mai e Isaia: “E aʻoaʻoina lau fanau uma lava e Ieova; e tele foi le manuia o lau fanau.” (Isaia 54:13) E lē gata i lenā, o loo galue le agaga o Ieova i ona tagata, ma o se vaega o fua o lenā agaga o le filemu. (Kalatia 5:22, 23) Ona o le fifilemu o tagata o Ieova ua avea ai i latou o se mea e maua ai le mapusaga i lenei lalolagi sauā. O lo latou tulaga filemu, e faavae i le fealofani lea o loo faaalia e Kerisiano, o se faataʻimuaga lea o le soifuaga i le lalolagi fou. (Ioane 15:17; Kolose 3:14) E mautinoa lava le faagaeetia ai o i tatou taʻitoʻatasi e olioli ma saosaolaumea i lenā filemu, lea ua aumaia ai le viiga ma le mamalu i lo tatou Atua ma ua avea lea o se vaega iloga o lo tatou parataiso faaleagaga!—Isaia 11:9.
O le a Faaauau Ona Susulu Atu le Malamalama o Ieova
13. Aiseā e mafai ai ona tatou mautinoa o le a lē taitai ona taofia mai le susulu atu o le malamalama o Ieova i ona tagata?
13 Pe o le a faaauau ea ona susulu atu le malamalama o Ieova i ona tagata? Ioe! I le Isaia 60:19, 20, e tatou te faitau i ai e faapea: “E le toe faia le la mou malamalama i le ao; e le faamalamalama foi ia te oe le masina i lona susulu mai; a e faia Ieova mou malamalama e faavavau, e fai foi lou Atua mou matagofie. E le toe goto lou la, e le toe mavae atu foi lou masina; auā e faia Ieova mou malamalama e faavavau; e uma foi aso o lou faanoanoa.” O le taimi lava na uma ai le “faanoanoa” i le faafalepuipuiina ai faaleagaga i le 1919, na amata ai ona susulu atu le malamalama o Ieova iā i latou. I le silia i le 80 tausaga mulimuli ane ai, o loo faaauau pea ona latou olioli i le finagalo malie o Ieova a o faaauau pea ona susulu lona malamalama. Ma o le a lē taofia. E faatatau atu i ona tagata tapuaʻi, o le a lē mafai ona “goto” lo tatou Atua e pei o le lā pe “mavae atu” e pei o le masina. Na i lo lenā, o le a ia faasusulu atu le malamalama e oo i le faavavau. Maʻeu se faamautinoaga matagofie mo i tatou a o tatou ola ai i aso e gata ai i lenei lalolagi pogisa!
14, 15. (a) I le ā le auala e “amiotonu” ai tagata uma lava o le Atua? (e) E tusa ai o le Isaia 60:21, o le ā le faataunuuga tāua o loo tepa taulaʻi atu i ai isi mamoe?
14 Peitaʻi, seʻi faafofoga atu nei i le isi folafolaga lea ua tulei mai ai Ieova e faatatau i le sui faalelalolagi o Siona, le Isaraelu a le Atua. Fai mai le Isaia 60:21: “O lou nuu foi e amiotonu i latou uma lava; e fai mo latou le nuu e faavavau; o le tātupu o laʻu faatoaga, o le galuega a oʻu lima, e fai moʻu viiga.” Ina ua toe amata galuega a Kerisiano faauuina i le 1919, sa ese le tulaga sa iai nei vaega o tagata. I totonu o se lalolagi ua tumu i le amioleaga, sa “taʻuamiotonuina” ai i latou e faavae i lo latou faatuatua lē maluelue i le taulaga togiola a Iesu Keriso. (Roma 3:24; 5:1) I lenā taimi, i le pei o tagata Isaraelu na faasaʻoloto mai i le faaaunuua ai i Papelonia, sa fai mo i latou se “nuu,” o se nuu faaleagaga, po o se nofoaga o gaoioiga, lea o loo latou olioli ai i se parataiso faaleagaga. (Isaia 66:8) O le matagofie pei o se parataiso o lenā nuu o le a lē mafai ona mou atu auā, i le lē pei o Isaraelu anamua, o le a lē mafai ona oo i se tulaga lē faamaoni le Isaraelu a le Atua i lona tulaga o se nuu. O le a lē mafai ona taofia mai lo latou faamaoni, lo latou tumau, ma lo latou maelega i le faamamaluina o le Atua.
15 O sui uma lava o lenā nuu faaleagaga ua iai i se feagaiga fou. Ua tusia le tulafono i o latou loto, ma e faavae i le taulaga togiola a Iesu ua faamagaloina ai e Ieova a latou agasala. (Ieremia 31:31-34) Ua ia taʻuamiotonuina i latou e avea o ni “atalii” (NW ) ma feutagaʻi ma i latou e pei ua latou lelei atoatoa. (Roma 8:15, 16, 29, 30) O a latou aumea o isi mamoe ua faamagaloina foʻi a latou agasala e faavae i le taulaga a Iesu, ma i le pei o Aperaamo, ua taʻuamiotonuina i latou e avea ma uō a le Atua e ala i le faatuatua. “Ua ta foi o latou ofu, ma ua faasinasinaina o latou ofu i le toto o le Tamai mamoe.” Ma o nei aumea o isi mamoe o loo tepa taulaʻi atu i le lumanaʻi i le isi faamanuiaga matilatila. Pe a mavae le faasaoina atu nai “le puapuaga tele” po o le mavae foʻi ona toe faatutūina mai, o le a latou vaai i le faataunuuga faaletino o upu o le Isaia 60:21 pe a avea le lalolagi atoa ma parataiso. (Faaaliga 7:14; Roma 4:1-3) I lenā taimi, “o e agamalu, e fai mo latou le nuu; e faafiafia foi i latou ia te i latou ona o le manuia e tele.”—Salamo 37:11, 29.
O Loo Faaauau Pea le Faatelega
16. O le ā le folafolaga mataʻina na faia e Ieova, ma ua faapefea ona faataunuuina?
16 I le fuaiupu mulimuli o le Isaia 60, tatou te faitau ai i le folafolaga faaiʻu a Ieova o loo i lenei mataupu. Ua ia fetalai atu iā Siona: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.” (Isaia 60:22) I o tatou aso, ua tausisi ai Ieova i ana afioga. Ina ua toe amataina galuega a Kerisiano faauuina i le 1919, e leʻi toʻatele lo latou faitau aofaʻi—sa “toeitiiti.” Sa faateleina lo latou faitau aofaʻi a o aumaia i totonu nisi o le Isaraelu faaleagaga. Mulimuli ane ona amata ai lea ona lolofi mai iā i latou le aofaʻiga o loo faateleina pea o isi mamoe. O le tulaga toʻafilemu o tagata o le Atua, le parataiso faaleagaga o loo iai i lo latou “nuu,” ua tosina mai ai le anoano o tagata lotofaamaoni ma ua avea moni ai lava “le ua faatauvaa” ma “nuu malosi.” I le taimi nei, o lenei “nuu”—le Isaraelu a le Atua ma le sili atu i le ono miliona o “tagata ese” tuuina atu—e sili atu lo latou faitau aofaʻi na i lo le tele o malo faalelalolagi o loo iai nei. (Isaia 60:10) O loo auai ona tagatānuu uma i le faasusuluina atu o le malamalama o Ieova, ma o le faia faapea ua faamatagofieina ai i latou i ona fofoga.
17. Ua faapefea ona aafia ai oe i lenei talanoaga o le Isaia mataupu e 60?
17 E mautinoa lava, ua faamalosia ai lo tatou faatuatua i le iloiloina o manatu autū o le Isaia mataupu e 60. O se mea e faalaeiauina ai le iloaina e faapea na muaʻi silafia mai lava e Ieova, o le a faaaunuuaina faaleagaga ona tagata ma toe faafoʻisia mai ai. E tatou te maofa i le muaʻi silafia mamao mai e Ieova, o le faatelega tele o le faitau aofaʻi o tagata tapuaʻi moni i o tatou aso. E lē gata i lenā, maʻeu le faamāfanafanaina ai i le manatua e faapea o le a lē tuua i tatou e Ieova! Maʻeu le agalelei o le faamautinoaga e faapea o le a tatala pea faitotoʻa o “le aai” ina ia talia ai ma le agalelei i latou ua “saunia i le ola e faavavau”! (Galuega 13:48) O le a faaauau pea ona faasusulu mai e Ieova le malamalama i ona tagata. O le a faaauau ona avea Siona ma mea e mitamita ai a o faasusulu atu e ana fanau lo latou malamalama ua matuā malamalama lava. (Mataio 5:16) E mautinoa lava ua atili ai ona tatou maumauaʻi na i lo se isi lava taimi e auaufaatasi ma le Isaraelu a le Atua ma faatāua lo tatou faaeaga o le faasusulu atu o le malamalama o le Atua!
Pe Mafai Ona E Faamatala?
• O le ā ua tatou mautinoa ai e faatatau i teteega?
• Ua faapefea ona ‘susu e fanau a Siona susu o nuu ese’?
• I ā auala ua ‘aumaia ai e Ieova ʻapa memea e sui aʻi laau’?
• O ā uiga e lua o loo faamatilatila i le Isaia 60:17, 21?
• Ua faapefea ona avea “le ua faatauvaa” ma “nuu malosi”?
[Fesili mo le Suʻesuʻega]
[Pusa/Ata i le itulau 18]
LE VALOAGA A ISAIA—O le Malamalama mo Tagata Uma
O manatu o loo talanoaina i lenei mataupu sa tauaaoina i se lauga i le Tauaofiaga Itumalo “O Faiaʻoga o le Afioga a le Atua” i le 2001 ma le 2002. I le faaiʻuga o le lauga, sa tatala aloaʻia ai e le failauga i le tele o nofoaga se lomiga fou ua faamatuaina Isaiah’s Prophecy—Light for All Mankind, Tusi e Lua. (Le Valoaga a Isaia—O le Malamalama mo Tagata Uma) I le tausaga na muamua atu, sa tatala aloaʻia ai le Isaiah’s Prophecy—Light for All Mankind, Tusi Muamua. I le tatalaina o lenei lomiga fou, o lea la ua iai nei se talanoaga o le toetoe lava o fuaiupu uma o le tusi o Isaia i lona malamalamaga o loo iai nei. Ua faamaonia le avea o nei tusi o se fesoasoani lelei i le faalolotoina o lo tatou malamalamaga ma le talisapaia o le tusi faavaloaga a Isaia e faagaeeina ai le faatuatua.
[Ata i le itulau 15]
I le feagai ai ma teteega sauā, ‘ua faamatagofieina e Ieova ona tagata i le olataga’
[Ata i le itulau 16]
O loo faaaogā e tagata o le Atua alagāʻoa tāua mai nuu ese e faaauilumaina ai le tapuaʻiga moni
[Ata i le itulau 17]
Ua faamanuiaina e Ieova ona tagata i le agaʻigaʻi i luma faalefaalapotopotoga ma le filemu