E Tapua‘i Kerisiano i le Agaga ma le Upu Moni
E Tapuaʻi Kerisiano i le Agaga ma le Upu Moni
“O le Atua o se Agaga ia, ma o ē tapuaʻi ia te ia e ao ona tapuaʻi atu i le agaga ma le upu moni.”—IOANE 4:24, NW.
1. O le ā le ituaiga o tapuaʻiga e finagalo malie i ai le Atua?
SA MATUĀ faaalia manino e Iesu Keriso, le Alo pele e toʻatasi o Ieova le ituaiga o tapuaʻiga e finagalo malie i ai lona Tamā faalelagi. A o avatu se molimau faamāfanafana loto i se fafine Samaria i se vaieli e latalata ane i le aai o Sukara, na fetalai atu Iesu: “Tou te tapuai ma le le iloa; a ua matou tapuai ma le iloa, auā mai ia Iutaia le faaolataga. A e oo mai ona aso, ua oo nei foi i ai, o e tapuai faamaoni latou te tapuai i le Tamā i le agaga ma le [upu moni], auā o loo saili le Tamā i e tapuai faapena ia te ia. O le Atua o le agaga lava ia; o e tapuai ia te ia, e tatau ona tapuai atu ai i le agaga ma le [upu moni].” (Ioane 4:22-24) O le ā ua taʻu mai iā i tatou e na upu?
2. O le ā sa faavae ai le tapuaʻiga a tagata Samaria?
2 Sa iai i tagata Samaria manatu sesē faaletapuaʻiga. Na latou taliaina e faapea e na o uluaʻi tusi lava e lima o Tusitusiga Paia e faagaeeina—ma o nei tusi e tusa ai o la latou lava faauigaga, sa taʻua o le Penetatuka faa-Samaria. E ui lava la e leʻi iloa lelei e tagata Samaria le Atua, ae sa tuuina atu i tagata Iutaia le poto faale-Tusi Paia. (Roma 3:1, 2) Sa mafai e tagata Iutaia faamaoni ma isi ona olioli i le finagalo malie o Ieova. Peitaʻi, ina ia maua le finagalo malie o Ieova o le ā sa manaʻomia mai iā i latou?
3. O le ā e manaʻomia ina ia tapuaʻi ai i le Atua “i le agaga ma le upu moni”?
3 Ina ia faamalie le finagalo o Ieova, o le ā sa ao ona fai e tagata Iutaia, Samaria, ma isi sa iai i aso ua mavae? Sa tatau ona latou tapuaʻi atu iā te ia “i le agaga ma le upu moni.” E ao foʻi ona faapena i tatou. E ui lava e ao ona faia ma le filiga po o le maelega la tatou auaunaga i le Atua, ma ia uunaʻia e se loto ua tumu i le alofa ma le faatuatua, ae o le tapuaʻi i le Atua i le agaga e manaʻomia faapitoa ai lava le iai iā i tatou o lona agaga ma ia tuu atu i lea agaga e taʻitaʻia i tatou. E ala i le suʻesuʻe ma le faatatauina o le Afioga a le Atua, o le a mafai ai ona galulue faatasi o tatou agaga po o le malosi e mafaufau ai ma le agaga o le Atua. (1 Korinito 2:8-12) Ina ia taliaina e Ieova la tatou tapuaʻiga, e ao foʻi ona avatu iā te ia ma le upu moni. E ao ona faafetaui atu i mea o fai mai ai le Afioga a le Atua le Tusi Paia, e uiga iā te ia ma ana fuafuaga.
E Mafai Ona Maua le Upu Moni
4. Pe faapefea ona manatu nisi i le upu moni?
4 E iai nisi tagata aʻoga o filosofia ua latou ati aʻe le manatu e faapea e lē mafai ona ausia e le fanau a tagata le upu moni aʻiaʻi. E pei ona tusia e le tusitala Suisilani o Alf Ahlberg e faapea: “O le tele o fesili faafilosofia o fesili e lē mafai ona maua i ai ni tali saʻo.” E ui lava e faapea mai nisi e na o se upu moni faalēatoa e mafai ona maua, pe e saʻo ea lenā? E lē saʻo auā e leʻi manatu faapena Iesu.
5. Aiseā na afio mai ai Iesu i le lalolagi?
5 Seʻi manatu faapea ua tatou iai ma molimauina lenei tulaga i le taimi na tupu ai: O le amataga o le tausaga 33 T.A., ma o loo tulaʻi Iesu i luma o le Kovana Roma o Ponotio Pilato. Na taʻu atu e Iesu iā Pilato e faapea: “O le mea foi lenei na ou sau ai i le lalolagi, ina ia ou molimau i le upu moni.” Na fesili Pilato: “Po o le a le upu moni?” Peitaʻi na te leʻi faatali atu i isi faamatalaga a Iesu.—Ioane 18:36-38.
6. (a) Ua faapefea ona faamatalaina le “upu moni”? (e) O le ā le tofiga na tuu mai e Iesu i ona soo?
6 E faamatalaina le “upu moni” e faapea “o le tuufaatasiga o mea moʻi, mea na tutupu, ma faamaoniga.” (Webster’s Ninth New Collegiate Dictionary) Peitaʻi, pe sa molimau ea Iesu i se upu moni i le tulaga e masani ai? E leai. Sa manino lava le upu moni sa i lona finagalo. Sa ia tofia ona soo ina ia faalauiloa atu lenā upu moni, auā na ia fetalai atu iā i latou: “Fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) A o lumanaʻi le faaiʻuiʻuga o lenei faiga o mea, ua ao ona faalauiloa atu e soo faamaoni o Iesu “le upu moni a le tala lelei” i le lalolagi aoao. (Kalatia 2:14) O le a faia lenei mea ina ia faataunuuina ai afioga a Iesu: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) E tāua tele la ona tatou mātauina i latou o loo aʻoaʻoina nuu uma i le upu moni e ala i le talaʻia o le tala lelei o le Malo.
Le Auala e Mafai Ona Tatou Aʻoaʻoina ai le Upu Moni
7. Pe faapefea ona e faamaoniaina o Ieova o le Puna o le upu moni?
7 O Ieova o le Puna o le upu moni faaleagaga. O le mea moni lava ia, na taʻua e le faisalamo o Tavita ia Ieova o “le Atua faamaoni.” (Salamo 31:5; 43:3) Na faailoa mai e Iesu e faapea o le Afioga a lona Tamā o le upu moni, ma na ia faalauiloa mai foʻi: “Ua tusia i le au perofeta, E aʻoaʻoina i latou uma lava e le Atua [Ieova]. O lenei, o i latou uma o e faalogo i le Tamā, o e aʻoaʻoina foi, e o mai i latou ia te au.” (Ioane 6:45; 17:17; Isaia 54:13) E manino mai lava la, o i latou e saʻili i le upu moni e ao ona aʻoaʻoina e Ieova, le Aʻoaʻo Silisili. (Isaia 30:20, 21) E ao iā i latou e saʻilia le upu moni ona maua “le poto i le Atua.” (Faataoto 2:5) Ma ua aʻoaʻoina ma le agalelei e Ieova po ua faaoo mai le upu moni i auala eseese.
8. O ā auala ua aʻoaʻoina pe ua faaoo mai ai e le Atua le upu moni?
8 Mo se faaaʻoaʻoga, e ala mai i agelu sa faaoo mai ai e le Atua le Tulafono iā Isaraelu. (Kalatia 3:19) E ala mai i miti, sa ia folafola mai ai faamanuiaga i augātamā o Aperaamo ma Iakopo. (Kenese 15:12-16; 28:10-19) Sa fetalai mai foʻi le Atua mai i le lagi, e pei o le taimi na papatiso ai Iesu sa faalogoina ai nei upu mataʻina i le lalolagi: “O loʻu Atalii pele lena, ua ou fiafia lava ia te ia.” (Mataio 3:17) E mafai foʻi ona tatou lotofiafia ona ua faaoo mai e le Atua le upu moni e ala i le faagaeeina o tusitala o le Tusi Paia. (2 Timoteo 3:16, 17) O lea la, e ala i le aʻoaʻoina i le Afioga a le Atua, e mafai ai ona tatou “faatuatua i le upu moni.”—2 Tesalonia 2:13, LF.
Le Upu Moni ma le Alo o le Atua
9. Ua faapefea ona faaaogā e le Atua lona Alo e faailoa mai le upu moni?
9 E faapitoa lava le faaaogāina e le Atua o lona Alo, o Iesu Keriso e faailoa mai le upu moni i le fanau a tagata. (Eperu 1:1-3) O le mea moni, e leai se isi na tautala i le upu moni e pei ona sa faia e Iesu. (Ioane 7:46) E oo lava ina ua mavae lona afio aʻe i le lagi, sa ia faaalia mai le upu moni mai lona Tamā. O se faaaʻoaʻoga, na maua e le aposetolo o Ioane se “faaaliga a Iesu Keriso, na tuuina atu e le Atua ia te ia ina ia faaali mai i ana auauna o mea e tusa ona vave oo mai.”—Faaaliga 1:1-3.
10, 11. (a) O le ā e fesootaʻi atu iai le upu moni lea sa molimau i ai Iesu ? (e) Pe na faapefea ona māfua iā Iesu le avea o le upu moni ma mea moni?
10 Na taʻu atu e Iesu iā Ponotio Pilato o Ia na sau i le lalolagi ina ia molimau i le upu moni. I le taimi o lana faiva, sa faaalia ai e Iesu e faapea o lenā upu moni e fesootaʻi atu i le faasilisiliina o le pule silisili ese a Ieova, e ala i le Malo o le Atua lea e avea ai Keriso ma Tupu. Peitaʻi o le molimau atu i le upu moni e sili atu mea na manaʻomia ona fai e Iesu na i lo o lana talaʻiga ma aʻoaʻo atu. Na avea lenā upu moni ma mea moni ina ua faataunuuina iā Iesu. E tusa ai o lenei mea, na tusi le aposetolo o Paulo e faapea: “Aua neʻi faamasino atu se tasi ia te outou i mea e aai ai, po o mea e inu ai, po o mea ia o tausamiga, po o masina faatoa vaaia, po o sapati; o ata lava ia o mea atali, a o le tino [mea moni], e a Keriso lava lea.”—Kolose 2:16, 17.
11 O se tasi o auala na avea ai le upu moni ma mea moni e ala lea i le valoiaina mai o le soifua mai o Iesu i Peteleema. (Mika 5:2; Luka 2:4-11) Na oo foʻi ina avea le upu moni ma mea moni i le faataunuuina o upu faavaloaga a Tanielu e faatatau i le oo mai o le Mesia i le iʻuga o le 69 ‘vaiaso o tausaga.’ Na tupu lenā mea ina ua ofoina atu e Iesu ia lava i le Atua i le papatisoga ma faauuina ai i le agaga paia, i le taimi tonu lava e pei ona valoia mai, i le 29 T.A. (Tanielu 9:25; Luka 3:1, 21, 22) Sa avea atili le upu moni ma mea moni e ala i le faiva na faamalamalamaina ai sa faia e Iesu o sē e faalauiloa le Malo. (Isaia 9:1, 2, 6, 7; 61:1, 2; Mataio 4:13-17; Luka 4:18-21) Sa avea foʻi ma mea moni e ala i lona maliu ma toetū mai.—Salamo 16:8-11; Isaia 53:5, 8, 11, 12; Mataio 20:28; Ioane 1:29; Galuega 2:25-31.
12. Aiseā ua mafai ai ona faapea mai Iesu, ‘o aʻu nei le upu moni’?
12 Talu ai e faaautū atu le upu moni iā Iesu Keriso, ua mafai la ona ia faapea mai: “O aʻu nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.” (Ioane 14:6) Ua mafai ona faasaʻolotoina tagata mai tapuaʻiga sesē pe a latou lagolagoina “le upu moni” e ala i le taliaina o le matafaioi a Iesu i fuafuaga a le Atua. (Ioane 8:32-36; 18:37) Ona ua talia e i latou e pei ni mamoe le upu moni ma mulimuli atu iā Keriso i le faatuatua, o le a latou maua ai le ola e faavavau.—Ioane 10:24-28.
13. O ā vala e tolu o le a tatou iloiloina ai upu moni o le Tusi Paia ?
13 Ua avea le upu moni atoa lea sa folafola atu e Iesu ma ona aposetolo faagaeeina o le faatuatuaga moni faa-Kerisiano. O i latou la e “anaana . . . i le faatuatua” e “savavali . . . i le upu moni.” (Galuega 6:7; 3 Ioane 3, 4) O ai la o loo savavali i le upu moni i aso nei? O ai moni lava o loo aʻoaʻoina nuu uma i le upu moni? I le talanoaina o na fesili, o le a tatou uaʻi atu ai i uluaʻi Kerisiano ma iloilo upu moni a le Tusi Paia e faatatau i (1) talitonuga, (2) le auala sa faia ai le tapuaʻiga, ma (3) amioga sa amioaʻi ai tagata.
Le Upu Moni ma Talitonuga
14, 15. O le ā sou manatu e faatatau i le vaaiga a uluaʻi Kerisiano ma Molimau a Ieova agaʻi i le Tusi Paia?
14 Sa matuā faatāuaina lava e uluaʻi Kerisiano le Afioga tusia a Ieova. (Ioane 17:17) Sa avea ma fua i o latou talitonuga ma mea e fai. Na faapea mai Clement o Alesania, o lē sa iai i le senituri lona lua ma lona tolu: “O i latou o ē tōʻaaga i le mauaina o le malamalamaga e sili ona lelei e lē mafai ona gata mai lo latou saʻilia o le upu moni, seʻia oo ina latou maua faamaoniga faale-Tusi Paia o o latou talitonuga.”
15 E pei lava o uluaʻi Kerisiano, e faatāua foʻi e Molimau a Ieova le Tusi Paia. Latou te talitonu “o Tusi Paia uma lava e mai le Agaga o le Atua ia, e aoga foi ia e aʻoaʻo ai.” (2 Timoteo 3:16) O lea la seʻi o tatou iloiloina ni nai talitonuga o uluaʻi Kerisiano ma faatusatusa i mea ua aʻoaʻoina e Molimau a Ieova i aso nei, auā latou te faaaogāina le Tusi Paia e fai ma a latou tusi autū.
Le Upu Moni e Faatatau i le Tulaga o Ē ua Maliliu
16. O le ā le upu moni e faatatau i le tulaga o ē ua maliliu?
16 Talu ai sa latou talitonu i mea o taʻua i le Tusi Paia, sa aʻoaʻoina e uluaʻi Kerisiano le upu moni e faatatau i le tulaga o le tagata pe a maliu. Sa latou talitonu na faatoʻā iai le tagata ola ina ua foafoaina o ia e le Atua. (Kenese 2:7) E lē gata i lenā, na latou taʻutino mai e faapea pe a maliliu tagata e toe foʻi atu i le tulaga ua leai se ola. (Kenese 3:19) Sa latou iloa foʻi e ‘lē o toe iloa se mea e i latou ua maliliu.’—Failauga 9:5, 10.
17. Pe faapefea ona e faamatalaina le faamoemoe mo ē ua maliliu?
17 Peitaʻi, sa i uluaʻi soo o Iesu le faamoemoe mautinoa e faapea o ē ua maliliu o loo i le finagalo o le Atua o le a toe faatutūina mai, po o le toe faafoʻisia i le ola. Sa manino ona faaupu mai lenā talitonuga e Paulo, o lē na taʻutino mai: “O loo ia te au le faamoemoe i le Atua . . . o le a toe tutū mai e ua amiotonu atoa ma e ua amioletonu.” (Galuega 24:15, LF ) E oo lava i se taimi mulimuli ane, na tusia ai e sē na faapea mai o ia o se Kerisiano e suafa iā Minucius Felix e faapea: “O ai se tagata valea e faauliulitō pea ma faapea mai o le tagata lea na faia e le Atua i le amataga, e lē mafai foʻi ona ia toe faia e pei ona sa iai?” E pei lava o uluaʻi Kerisiano, e taofi foʻi Molimau a Ieova i le upu moni faale-Tusi Paia e faatatau i le tulaga o ē ua maliliu, ma le faamoemoe o le toetū. Seʻi tatou iloiloina nei le tulaga o le Atua ma Keriso.
Le Upu Moni ma le Tolutasi
18, 19. Aiseā e mafai ai ona faapea atu o le Tolutasi e lē o se aʻoaʻoga a le Tusi Paia?
18 E leʻi manatu uluaʻi Kerisiano i le Atua, o Keriso, ma le agaga paia o se Tolutasi. Fai mai le Encyclopædia Britannica: “E lē gata e lē o maua le upu Tolutasi, ae faapena foʻi i le aʻoaʻoga i le Feagaiga Fou, e leʻi feteenaʻi foʻi Iesu ma ona soo i le Shema [o se tatalo faa-Eperu] i le Feagaiga Tuai: ‘Isaraelu e, faalogologo mai ia, o le Alii lo tatou Atua, o le Alii e toatasi lava ia’ (Teu. 6:4).” E leʻi tapuaʻi Kerisiano i atua tolutasi o Roma po o nisi lava atua. Na latou talia le faamatalaga a Iesu e na o Ieova lava e ao ona tapuaʻia. (Mataio 4:10) E lē gata i lenā, sa latou talitonu i le fetalaiga a Keriso: “E sili loʻu Tamā ia te au.” (Ioane 14:28) O le talitonuga lava foʻi lenā o loo i Molimau a Ieova i aso nei.
19 Sa manino lelei i uluaʻi soo o Iesu le eseesega o le Atua, ma Keriso, ma le agaga paia. O le mea moni, sa latou papatisoina soo (1) i le suafa o le Tamā, (2) i le suafa o le Alo, ma (3) i le suafa o le agaga paia, ae lē o le suafa o le Tolutasi. O loo faapena foʻi ona aʻoaʻo atu e Molimau a Ieova le upu moni o le Tusi Paia ma faaeseese ai le Atua, mai lona Alo, ma le agaga paia.—Mataio 28:19.
Le Upu Moni ma le Papatisoga
20. O le ā le malamalamaga e manaʻomia e i latou o loo sauni e papatiso?
20 Na tofia e Iesu ona ʻausoo e fai ni soo e ala i le aʻoaʻoina o tagata i le upu moni. Ina ia agavaa mo le papatisoga, e manaʻomia ona iai so latou malamalamaga faavae o le Tusi Paia. Mo se faataʻitaʻiga, e ao ona latou iloa lelei le tulaga ma le pule a le Tamā ma lona Alo, o Iesu Keriso. (Ioane 3:16) E manaʻomia foʻi ona iloa e i latou o le a papatiso e faapea o le agaga paia e leai se tino ae o le malosi galue o le Atua.—Kenese 1:2.
21, 22. Aiseā e te fai mai ai o le papatisoga e mo i latou ua talitonu?
21 Sa papatisoina e uluaʻi Kerisiano na o tagata taʻitoʻatasi sa aʻoaʻoina ma salamō ma ua tuuina atu i latou lava i le Atua e fai lona finagalo. O tagata Iutaia ma ē liulotu sa faapotopoto i Ierusalema i le Penetekoso i le 33 T.A., ua uma ona iai se malamalamaga o Tusitusiga Eperu. Ina ua faalogo atu i le aposetolo o Peteru o talanoa mai e faatatau iā Iesu le Mesia, e tusa o le 3,000 “na talia lana upu ma le fiafia” ma “papatisoina.”—Galuega 2:41; 3:19–4:4; 10:34-38.
22 O le papatisoga faa-Kerisiano e mo ē ua talitonu. Na talia e tagata Samaria le upu moni, ma ina “ua talitonu i latou ia Filipo o folafola le tala lelei i mea a le malo o le Atua, ma le suafa o Iesu Keriso, ona papatisoina lea o i latou, o tane atoa ma fafine.” (Galuega 8:12) I le avea ai o se tagata liulotu tuutoina atu o lē sa iai se poto e uiga iā Ieova, na talia muamua ai e le eunuka Aitiope faamatalaga a Filipo e faatatau i le faataunuuga o le valoaga a le Mesia ona papatisoina ai loa lea o ia. (Galuega 8:34-36) Mulimuli ane, na taʻu atu e Peteru iā Konelio ma isi tagata o Nuu ese e faapea o le tagata e “mataʻu ia te ia [le Atua] i nuu uma lava, ma fai le amiotonu, ua talia i latou e ia” ma o i latou uma e faatuatua iā Iesu Keriso e maua le faamagaloga o agasala. (Galuega 10:35, 43; 11:18) O nei mea uma ua talafeagai ma le poloaʻiga a Iesu ina ia ‘fai ni soo, aʻoaʻo i latou ina ia tausi i mea uma ua ia faatonu mai.’ (Mataio 28:19, 20; Galuega 1:8) O loo tausisi Molimau a Ieova i le faatulagaga lava lenā, i le taliaina i le papatisoga na o i latou lava ua iai se malamalamaga faavae o le Tusi Paia ma ua uma ona faia se tuuina atu i le Atua.
23, 24. O le ā le faiga saʻo o le papatisoga faa-Kerisiano?
23 O le faatofu atoa i le vai o le faiga saʻo lenā o le papatisoga o ē talitonu. Ina ua uma ona papatisoina Iesu i le vaitafe o Ioritana, na “maliu ae o ia nai le vai.” (Mareko 1:10) Sa papatisoina le eunuka Aitiope “i le vai.” O i laʻua ma Filipo na “o ifo o i laua uma i le vai,” ma na “o ae laua nai le vai.” (Galuega 8:36-40) O le fesootaʻiga faale-Tusi Paia o le papatisoga ma le tanumia faafaatusa o loo faailoa mai foʻi e ao ona faatofuina atoatoa i le vai.—Roma 6:4-6; Kolose 2:12.
24 Na faapea mai le Oxford Companion to the Bible e faapea: “O faamatalaga i papatisoga patino o loo i le Feagaiga Fou ua faaalia ai e faapea o le tagata e papatisoina e faatofu atoa i le vai.” E tusa ai ma ni tusitusiga faa-Falani o le Larousse du XXe Siècle (Pale, 1928), “sa papatisoina uluaʻi Kerisiano e ala i le faatofuina i so o se mea lava sa maua iai ni vai.” Ae na mātauina e le tusi After Jesus—The Triumph of Christianity e faapea: “O le faiga autū lava o le [papatisoga], sa manaʻomia ai se taʻutinoga o le faatuatua e le tagata o le a papatiso, ona sosoo ai lea ma le faatofuina atoatoa i le vai i le suafa o Iesu.”
25. O le ā o le a talanoaina i le mataupu o loo sosoo mai?
25 O manatu ua uma ona taʻua e faatatau i talitonuga e faavae i le Tusi Paia, atoa ai ma mea na fai a uluaʻi Kerisiano ua na o ni faaaʻoaʻoga. E mafai foʻi ona taʻua nisi mea e tutusa ai o latou talitonuga ma talitonuga a Molimau a Ieova. I le mataupu o mulimuli mai, o le a tatou talanoaina ai isi auala e faamautinoa ai i latou o loo aʻoaʻoina tagata i le upu moni.
E Faapefea Ona E Tali?
• O le ā le ituaiga o tapuaʻiga e manaʻomia e le Atua?
• Na faapefea ona avea le upu moni ma mea moni e ala iā Iesu Keriso?
• O le ā le upu moni e faatatau i le maliu ma le tulaga o ē ua maliliu?
• E faapefea le faiga o le papatisoga faa-Kerisiano, ma o le ā le mea e manaʻomia mai iā i latou o loo sauni e papatiso?
[Fesili mo le Suʻesuʻega]
[Ata i le itulau 16]
Na taʻu atu e Iesu iā Pilato: ‘Na ou sau ina ia ou molimau i le upu moni’
[Ata i le itulau 17]
Pe e mafai ona e faamatala le māfuaaga na fetalai ai Iesu: ‘O aʻu nei le upu moni’?
[Ata i le itulau 18]
O le ā le upu moni e faatatau i le papatisoga faa-Kerisiano?