Fesili Mai le ʻAufaitau

O ā tulaga e talafeagai ai mo se fafine Kerisiano ona fai se ufiulu ona o āiāiga faaleagaga?

Na tusi mai le aposetolo o Paulo e faapea: “Ai se fafine foi e tatalo pe perofeta ma lona ulu e le ufiufitia, ua faalemigao ia i lona lava ulu.” Aiseā? Ona o le mataupu silisili faale-Tusi Paia e faatatau i le tulaga ulu: “O le ulu o le avā o le tane lea.” O le tatalo la po o le lauga atu i le faapotopotoga Kerisiano, e masani lava o le matafaioi a le tamāloa . O lea la, pe a vaaia e se fafine Kerisiano ia tiute faatatau i le tapuaʻiga na e masani ona faia e lana tane, po o se tamāloa ua uma ona papatiso, e tatau la ona faia sona ufiulu.—1 Korinito 11:3-10.

I tulaga e tatau ai i se fafine Kerisiano ona faia sona ufiulu, e ono mafai ona tulaʻi mai i lana faiā faalefaaipoipoga. Mo se faaaʻoaʻoga, pe a potopoto faatasi le aiga mo se suʻesuʻega faale-Tusi Paia po o se taumafataga, e masani lava ona taʻimua le tane i le aʻoaʻoina o i latou ma avea ma o latou sui e tatalo atu i le Atua. Ae peitaʻi, afai o ia o se tane lē talitonu, e mafai ona paʻū atu le tiute tauave lenei i lana avā. O le mea lea, pe a tatalo leo tele o ia e fai ma sui o ia ma isi, pe e faia foʻi se suʻesuʻega faale-Tusi Paia ma lana fanau a o iai lana tane, e tatau la i le tuafafine Kerisiano ona fai sona ufiulu. Ae afai e lē o iai lana tane, e lē manaʻomia ona fai se ufiulu o le avā, talu ai ua tofia o ia e le Atua e aʻoaʻoina le fanau.—Faataoto 1:8; 6:20.

Ae faapefea la pe afai e iai se atalii  laʻitiiti i le aiga ua uma ona avea o se auauna tuuina atu ma papatisoina a Ieova le Atua? Talu ai ua avea le atalii o se sui o le faapotopotoga Kerisiano, e tatau ona maua e le atalii faatonuga mai tane o le faapotopotoga. (1 Timoteo 2:12) Afai o lona tamā o se tagata talitonu, e tatau la i le tamā ona ia aʻoaʻoina lona atalii. Ae peitaʻi, afai e lē o iai le tamā, e tatau la i le tinā ona fai sona ufiulu pe afai na te faia le suʻesuʻega faale-Tusi Paia a le aiga a o iai le atalii laʻitiiti ua papatisoina faatasi ma isi tamaiti. Pe na te valaaulia le atalii laʻitiiti e tatalo i le suʻesuʻega po o le taimi o meaʻai, o lana lava lenā filifiliga. Atonu e lagona e le tinā e faapea, e leʻi lava le agavaa o le atalii, ma filifili ai o ia na te faia le tatalo. Afai e manaʻo o ia e tatalo i tulaga faapena, e tatau ona fai sona ufiulu.

A o auai i nisi o galuega a le faapotopotoga, e manaʻomia ona fai ufiulu o fafine Kerisiano. Mo se faaaʻoaʻoga: I se feiloaʻiga i le vaiaso mo le auaunaga i le fanua, atonu pe na o tuafāfine Kerisiano o iai ae leai ni tane papatisoina. Atonu e iai foʻi nisi taimi e leai ni tane papatisoina e iai i le sauniga a le faapotopotoga. Afai o se tuafafine lea o le a na faatinoina ia tiute e masani ona fai e se uso i se feiloaʻiga na fuafuaina e le faapotopotoga, po o se faatasiga mo le auaunaga i le fanua, e tatau ona fai se ufiulu o le tuafafine.

Pe tatau ona fai ni ufiulu o fafine Kerisiano pe afai latou te faamatalaina pe faaliliuina foʻi i le gagana e faaaogā ai taga mo le lauga lautele faale-Tusi Paia, pe faitauina palakalafa o se tusi o loo faia ai le suʻesuʻega faale-Tusi Paia i sauniga a le faapotopotoga? E leai. O tuafāfine o loo faatinoina nei tiute, e lē o taʻimua pe aʻoaʻo atu. E lē manaʻomia foʻi ona faia ni ufiulu mo tuafāfine o loo faia ni faataʻitaʻiga, faamatala mai ni mea na tutupu, po o le fai foʻi o lauga i le Aʻoga o le Faiva Faatiokarate.

O le aʻoaʻo atu i le faapotopotoga, e faia lea e tane papatisoina, a o le talaʻi ma le aʻoaʻo atu i fafo atu o le faapotopotoga, o le tiute tauave lea a tane ma fafine uma. (Mataio 24:14; 28:19, 20) O lea pe a talanoa atu se tuafafine Kerisiano e uiga i le Afioga a le Atua i tagata e lē o ni Molimau a o iai se uso Molimau a Ieova, e lē manaʻomia ona fai sona ufiulu.

Ae peitaʻi, e ese le tulaga lea pe afai e faia se suʻesuʻega faale-Tusi Paia e lē aunoa e pei ona faatulagaina i se fale o se aiga a o iai se tane tuuina atu ma papatisoina. O le toe faatulagaina lenei o se vaega o le aʻoaʻoga pe afai e iai le tagata lea na te faia le suʻesuʻega. E tusa ai o nei faatulagaga, o le suʻesuʻega lea ua avea o se vaega o le faapotopotoga. Afai la e fai e se tamaʻitaʻi Molimau papatisoina le suʻesuʻega a o iai se tane Molimau papatisoina, e tatau i le tuafafine ona faia se ufiulu. Ae peitaʻi, o le uso tuuina atu e ao ona ia faia le tatalo. E lē tatalo se tuafafine a o iai se uso tuuina atu seʻi vaganā ua iai ni māfuaaga lē maʻalofia, pe a faapea e lē mafai ona tautala pe gūgū le uso.

I se isi taimi, atonu e ō ai se tuafafine ma se uso talaʻi o le Malo e leʻi papatisoina i se suʻesuʻega faale-Tusi Paia. Afai e manaʻo iai le tuafafine, e mafai ona ia talosaga atu i le uso na te faia le suʻesuʻega. Ae peitaʻi, e lē tatau ona fai o ia ma sui o le tuafafine ua papatisoina i le faia o se tatalo iā Ieova, e tatau la i le tuafafine ona tatalo i le suʻesuʻega. Afai e faia le suʻesuʻega pe faia foʻi le tatalo i ni tulaga faapea, e tatau la i le tuafafine ona ufiufi lona ulu. E tusa lava pe leʻi papatisoina le uso talaʻi lea, ae ua iloa o ia e tagata i fafo o se tasi o le faapotopotoga ona o lea ua talaʻi.

Na tusia e le aposetolo o Paulo e faapea: “O le mea lea e tatau ai i le fafine ina ia i ai le ufiufi i lona ulu, ona o agelu.” Ioe, ua iai i tuafāfine Kerisiano le faaeaga e avea o ni faaaʻoaʻoga lelei mo le faitau miliona o agelu o ē o loo faaauau pea ona auauna faamaoni iā Ieova. Maʻeu la le talafeagai mo fafine amio Atua ona manatunatu mamafa ina ia fai sona ufiulu pe a manaʻomia i nisi o taimi.

[Ata i le itulau 26]

O le faia o se ufiulu o se faailoga o le faaaloalo mo le tulaga ulu