Ia Faaopoopo le Amio Atua i Lou Onosai
Ia Faaopoopo le Amio Atua i Lou Onosai
‘Ia faaopoopoina i lo outou faatuatua le onosai, o le amio Atua foi i le onosai.’—2 PETERU 1:5, 6.
1, 2. (a) O le ā le ituaiga o tuputupu aʻe e faatalitalia i le tulaga o se tamaitiiti? (e) O le ā le tāua o le tuputupu aʻe faaleagaga?
E TĀUA le tuputupu aʻe i se tamaitiiti, peitaʻi e sili atu mea e manaʻomia na i lo le tuputupu aʻe faaletino. E faatalitalia foʻi le tuputupu aʻe i le mafaufau ma faalogona. E oo mai le taimi e tuuesea ai e le tamaitiiti ona ala faatamaitiiti ae avea ma se tagata matua. Sa faasino atu le aposetolo o Paulo i le mea lenei ina ua ia tusi: “O ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti; a ua oo ina ou tagata matua, ona ou tiai lea o mea a tamaiti.”—1 Korinito 13:11.
2 Ua faailoa mai e upu a Paulo se manatu tāua e faatatau i le tuputupu aʻe faaleagaga. E manaʻomia e Kerisiano ona agaʻigaʻi i luma mai i le avea o ni pepe faaleagaga ina ia avea ma “tagata matutua i le mafaufau.” (1 Korinito 14:20) E ao ona latou aapa atu ma taumafai malosi ina ia ausia “le fua o le ua matua, e tatau ma le tumu o Keriso.” Ona lē toe avea ai lea o i latou ma “tama ninii . . . o loo felafoaiina e pei o peau, ma feaveaiina i matagi uma lava o matāupu.”—Efeso 4:13, 14.
3, 4. (a) O le ā e ao ona tatou faia ina ia avea ai ma tagata matua faaleagaga? (e) O ā ni uiga faale-Atua e ao ona tatou faaalia, ma o le ā le tāua o ia uiga?
3 E faapefea ona avea i tatou ma ē e matutua faaleagaga? E ui ina faasolosolo malie le tuputupu aʻe faaletino e tusa ai ma tulaga masani, ae o le tuputupu aʻe faaleagaga e manaʻomia ai ni taumafaiga maumauaʻi. E amata i le ave i fale o le poto saʻo o le Afioga a le Atua ma gaoioi e ōgatusa ma mea ua tatou aʻoaʻoina. (Eperu 5:14; 2 Peteru 1:3) O le iʻuga, ua mafai ai ona tatou faaalia uiga faale-Atua. E pei lava ona tuputupu aʻe faatasi le tino ma ona suiga, e masani foʻi ona tutupu faatasi mai uiga eseese faale-Atua i le taimi e tasi. Na tusi le aposetolo o Peteru e faapea: “O le mea lava lea ia outou matuā faamalosi ai lava, ina ia faaopoopoina le amio lelei i lo outou faatuatua, ia faaopoopo foi le iloa i le amio lelei, ia faaopoopo foi le loto mama i le iloa, ma ia faaopoopo le onosai i le loto mama, o le amio Atua foi i le onosai, ia faaopoopo foi le fealofani o le au uso i le amio Atua, o le alofa foi i le fealofani o le au uso.”—2 Peteru 1:5-7, LF.
4 E tāua uma lava uiga ia e pei ona lisiina mai e Peteru, ma e lē mafai ona tuuesea se tasi o nei uiga. Na ia faaopoopo mai: “Pe a maua e outou ia mea, ma ua faateleina, ona avea ai lea o outou ma e ua le paie, a o e fua mai le iloa lelei o lo tatou Alii o Iesu Keriso.” (2 Peteru 1:8) Seʻi tatou taulaʻi atu i le manaʻoga e faaopoopo le amio Atua i lo tatou onosai.
Le Manaʻoga mo le Onosai
5. Aiseā tatou te manaʻomia ai le onosai?
5 Sa taufai faafesootaʻi uma e Peteru ma Paulo le amio Atua i le onosai. (1 Timoteo 6:11) O le iai o le onosai e sili atu mea e uiga i ai na i lo le na ona iai o le malosi e tauivi ai i lalo o faigatā ma faaauau ona tumau ai. E aofia ai le lavātia, lototele, ma le tū mausalī, e lē mou atu le faamoemoe pe a fesagaʻi ma tofotofoga, toʻatugā, faaosoosoga, po o sauāga. Ona o loo tatou ola ma le “amio Atua ia Keriso Iesu,” tatou te faatalitalia e sauaina i tatou. (2 Timoteo 3:12) E ao ona tatou onosai pe afai e tatou te mananaʻo e faamaonia atu lo tatou alofa mo Ieova ma atiina aʻe uiga manaʻomia mo le faaolataga. (Roma 5:3-5; 2 Timoteo 4:7, 8; Iakopo 1:3, 4, 12) A aunoa ma le onosai, tatou te lē maua le ola e faavavau.—Roma 2:6, 7; Eperu 10:36.
6. O le ā e uiga iai le tumau seʻia oo i le gataaga?
6 E tusa lava po o le ā le lelei tatou te amata ai, o le mea e tāua o lo tatou onosai po o le tumau. Na fetalai Iesu: “A o lē tumau seia oo i le gataaga, e faaolaina lea.” (Mataio 24:13) Ioe, e ao ona tatou tumau seʻia oo i le iʻuga, o lona uiga o le iʻuga o o tatou ola i le taimi nei, po o le iʻuga foʻi o lenei faiga amioleaga o mea. Po o le ā lava le tulaga e iai, e ao ona tatou tausia lo tatou faamaoni i le Atua. Peitaʻi, a aunoa ma le faaopoopo atu o le amio Atua i lo tatou onosai, e lē mafai ona tatou faafiafiaina Ieova, ma o le a tatou lē maua ai le ola e faavavau. Peitaʻi o le ā le amio Atua?
Le Uiga o le Amio Atua
7. O le a le amio Atua, ma o le ā ua faamalosia i tatou e le amio Atua e fai?
7 O le amio Atua o le migao o le tagata lava ia, o lana tapuaʻiga, ma lana auaunaga iā Ieova le Atua ona o le alofa faamaoni i lana pule silisili ese i le aoao o mea. Ina ia faatino le amio Atua ma le faaaloalo iā Ieova, tatou te manaʻomia le poto saʻo e uiga iā te ia ma ona ala. E ao ona tatou mananaʻo ia iloa moni le Atua, i se tulaga vavalalata. O le a uunaʻia i tatou e lenei mea ina ia ati aʻe ai se alofa mai le loto iā te ia, lea e faaalia e ala i a tatou gaoioiga ma le auala e ola ai. E ao ona tatou faanaunau ina ia pei o Ieova, i le mea e oo i ai le mafai —ia faaaʻoaʻo i ona ala ma faaali atu ona uiga. (Efeso 5:1) O le mea moni lava ia, e uunaʻia i tatou e le amio Atua ina ia mananaʻo e faamalie le Atua i mea uma tatou te faia.—1 Korinito 10:31.
8. E faapefea ona soosootauʻau le amio Atua ma le tuutoina atu atoatoa?
8 Ina ia faatino le amio Atua moni, e ao ona tatou tapuaʻi atu tau lava o Ieova, ia aua lava neʻi iai se mea i o tatou loto e faalavelaveina ai lo tatou faamuamuaina o ia. Ona o ia o Lē na Foafoaina i tatou, e iā te ia le aiā e faatalitalia ai i tatou e alolofa ma tuutoina atu atoatoa iā te ia. (Teuteronome 4:24; Isaia 42:8) Ae ui lava i lea, e lē faamalosia i tatou e Ieova e tapuaʻi iā te ia. E finagalo o ia i lo tatou tuutoina atu ma le lotomalie. O lo tatou alofa la mo le Atua, e faavae i le poto saʻo e uiga iā te ia, lea e uunaʻia ai i tatou e faamamā o tatou olaga i le faaletino ma le faaleagaga ma fai se tuuina atu atoatoa iā te ia ma ia ola e tusa o lenā tuuina atu.
Ati Aʻe se Faiā ma le Atua
9, 10. E faapefea ona tatou ati aʻe ma faatumauina se faiā ma le Atua?
9 Pe a uma ona faailogaina lo tatou tuuina atu i le Atua e ala i le papatisoga, e manaʻomia pea ona tatou atiina aʻe se faiā matuā vavalalata ma ia. O lo tatou faanaunauga e fai lenei mea ma ia auauna ma le faamaoni iā Ieova o le a uunaʻia ai i tatou e faaauau ona suʻesuʻeina lana Afioga ma manatunatu loloto i ai. A o galue le agaga o le Atua i o tatou mafaufau ma loto, o le a atili ona faalolotoina ai lo tatou alofa mo Ieova. O le a faaauau ona avea la tatou faiā ma ia o se mea e aupito sili ona tāua i o tatou olaga. Tatou te manatu iā Ieova o la tatou uō sili ona lelei ma mananaʻo e faamalie lona finagalo i taimi uma. (1 Ioane 5:3) O le a tupu aʻe lo tatou fiafia i la tatou faiā lelei ma le Atua, ma tatou te fiafia ona o loo ia faatonuina ma le alofa ma faasaʻo i tatou i tulaga e manaʻomia ai.—Teuteronome 8:5.
10 Seʻi vaganā lava ua tatou faia taumafaiga maumauaʻi e uia laasaga e faamalosia ai la tatou faiā tautele ma Ieova, e mafai ona faavaivaia. Afai e tupu le tulaga lenā, e lē o le Atua la ua pogai ai, auā “e le mamao o ia ma i tatou taitoatasi.” (Galuega 17:27) Maʻeu lo tatou fiafia e lē o faafaigatāina e Ieova ona faalatalata atu iā te ia! (1 Ioane 5:14, 15) O le mea moni lava ia, e ao ona tatou fai ni taumafaiga e faatumauina se faiā totino vavalalata ma Ieova. Peitaʻi, ua ia fesoasoani mai iā i tatou e faalatalata atu iā te ia e ala i le tuuina mai iā i tatou o sauniuniga uma e manaʻomia e ati aʻe ma faatumauina ai le amio Atua. (Iakopo 4:8) E faapefea ona tatou faaaogāina atoatoa nei sauniuniga agalelei uma?
Ia Faaauau Ona Malolosi Faaleagaga
11. O ā nisi o faailoaga o lo tatou amio Atua?
11 O lo tatou alofa loloto ua mauaa mo le Atua, o le a uunaʻia ai i tatou ina ia faailoa atu le tele o lo tatou amio Atua, ina ia ōgatusa ma le fautuaga a Paulo: “Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te talaʻitonuina le upu moni.” (2 Timoteo 2:15, LF ) O le faia o lenei mea e manaʻomia ai le tausia o se faasologa lelei o suʻesuʻega faale-Tusi Paia, auai i sauniga, ma le auai i le faiva i le fanua. E mafai foʻi ona tatou faalatalata atu iā Ieova e ala i le ʻtatalo e le aunoa.’ (1 Tesalonia 5:17) O faailoaga uigā nei o lo tatou amio Atua. O le lafoaʻia o se tasi o nei faailoaga e ono faapogaia ai le maʻi faaleagaga ma faafaigofie ai ona maileia tatou i togafiti a Satani.—1 Peteru 5:8.
12. E faapefea ona tatou faafetaiaʻia ma le manuia tofotofoga?
12 O le malosi pea faaleagaga ma ia maelega e fesoasoani foʻi iā i tatou e fesagaʻia ai le tele o tofotofoga e oo mai iā i tatou. E ono mapuna mai tofotofoga i vala eseese lea e mafai ona matuā tofotofoina ai lava i tatou. E mafai ona faafaigatā ona onosaia le lē manatu mamafa mai, o teteega, ma sauāga, pe afai e faapogai mai i tagata vavalalata o le aiga, o tauaiga, po o tuaoi. E ono tulaʻi mai i nofoaga tatou te faigaluega ai po o le aʻoga ia omiga e faifai malie ona faaleagaina ai a tatou mataupu silisili faa-Kerisiano. O le faavaivai, o maʻi, ma le lotomafatia, e mafai ona faavaivaia ai i tatou i le itu i le tino ma faafaigatā ai ona feagai ma tofotofoga o le faatuatua. Peitaʻi e mafai ona tatou fesagaʻia ma le manuia tofotofoga uma pe a tatou finafinau “i le amio lelei ma le amio Atua; o loo faatalitali ma naunau atu ia aulia mai le aso o le Atua.” (2 Peteru 3:11, 12) E mafai ona tatou faatumauina lo tatou olioli i le faia faapea, i le talitonu i faamanuiaga a le Atua.—Faataoto 10:22.
13. O le ā e ao ona tatou fai pe afai e manaʻomia ona tatou faaauau ona faia le amio Atua?
13 E ui lava o loo taulaʻi osofaʻiga a Satani iā i latou o loo faia le amio Atua, ae e lē manaʻomia ai fua ona tatou matataʻu ai. Aiseā? Auā ‘ua silafia e Ieova se mea e laveai mai ai i e amio Atua ai le tofotofoga.’ (2 Peteru 2:9) Ina ia onosaia tofotofoga ma maua lea laveaʻiga, e ao ona tatou “teteʻa ese ma le faalematau atoa ma tuʻinanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga.” (Tito 2:12) Ona o ni Kerisiano, e ao ona tatou mataala ina ia aua lava neʻi pisia ma faaleagaina ai la tatou amio Atua i so o se vaivaiga e aofia ai gaoioiga ma tuʻinanauga o le tino. Seʻi o tatou iloiloina nisi o nei faamataʻuga.
Ia Faaeteete i Faamataʻuga i le Amio Atua
14. O le ā e ao ona tatou manatua pe a faatosina i tatou e le mailei o le manaʻo tele i meafaitino?
14 O le manaʻo tele i meafaitino o se mailei i le toʻatele. Tatou te ono faasesēina i tatou lava e “manatu o le amio Atua o le ala lea e maua ai le oloa [meafaitino].” O lea la, e ono mafai ona faamalosia ai i tatou e faaaogā ma le lē tusa le maufaatuatuaina o loo faaalia mai e aumea talitonu. (1 Timoteo 6:5, LF ) Tatou te ono faia ai foʻi se faaiʻuga sesē e faapea e lē āfaina le faatauanauina o se Kerisiano e tamaoaiga ina ia fai ai se nonogatupe lea atonu o le a lē mafai ona tatou toe totogia. (Salamo 37:21) Peitaʻi o le amio Atua, ae lē o le mauaina o meafaitino, lea “o loo i ai le mea ua folafolaina mai i la le olaga nei atoa ma lē atali.” (1 Timoteo 4:8) Talu ai ‘tatou te lei au mai lava se mea e tasi i le lalolagi ma tatou te le mafai ona ave ese ai o se mea,’ seʻi tatou faamalolosi nei loa e tuliloaina le “amio Atua ma le loto mālie” ma ia ‘lotomalie i mea e aai ai ma mea e oofu ai.’—1 Timoteo 6:6-11.
15. O le ā e mafai ona tatou fai pe afai o le a āfaina la tatou amio Atua i le saʻilia o mea faafiafia?
15 O le saʻilia o mea faafiafia e mafai ona āfaina ai le amio Atua. Faamata e manaʻomia ona fai faanatinati ni fetuutuunaʻiga e faatatau i lenei tulaga? E moni, e iai ni nai aogā e maua mai i toleniga faaletino ma faafiafiaga. Peitaʻi, o na taui e faatauvaa pe a faatusatusa ma le ola e faavavau. (1 Ioane 2:25) I aso nei, e toʻatele ua avea ma ē “ua tele le manao i mea faafiafia a e leai se manao i le Atua; o e ua peiseai ua toaga i lotu, a o le mana ua i lea mea ua latou teena,” ma e manaʻomia ona tatou ʻalofia tagata faapena. (2 Timoteo 3:4, 5, LF ) O i latou ua faamamafaina le amio Atua ua “faapea ona latou teua oloa mo i latou lava, o le faavae lelei mo aso atali, ina ia latou fetagofi atu i le ola moni lava.”—1 Timoteo 6:19, LF.
16. O ā faanaunauga agasala ua taofia ai nisi mai i le ola e tusa ma tapulaa amiotonu a le Atua, ma e mafai faapefea ona tatou faatoʻilaloina nei manaʻoga?
16 E mafai e le faaaogāsesēina o le ʻava malosi ma fualaau faasāina, amioga lē mamā, ma faanaunauga agasala ona faaleagaina ai la tatou amio Atua. O le lolo atu i nei mea e mafai ona taofia ai i tatou mai i le ola e tusa ma tapulaa amiotonu a le Atua. (1 Korinito 6:9, 10; 2 Korinito 7:1) E oo lava iā Paulo sa ao ona onosaia feteenaʻiga faaauau pea o lona lava tino agasala. (Roma 7:21-25) E manaʻomia gaoioiga maumauaʻi ina ia aveeseina ai faanaunauga sesē. O se tasi o mea e manaʻomia, e ao ona tatou maumauaʻi e tumau i le mamā tau amio. Na taʻu mai e Paulo iā i tatou e faapea: “Ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeapea, o le ifo i tupua lava lea.” (Kolose 3:5) O le fasiotia o o tatou itu tino e faatatau i nei gaoioiga agasala, e manaʻomia ai le maumauaʻi ina ia faateʻa ese ma tafiesea nei mea. O le tatalo faatauanau mo le fesoasoani a le Atua o le a mafai ai ona tatou ʻalofia faanaunauga leaga ae tausisi i le amiotonu ma le amio Atua a o ola i lenei faiga o mea amioleaga.
17. E faapeʻī lo tatou manatu e ao ona iai i aʻoaʻiga?
17 E mafai e le lotovaivai ona faavaivaia ai lo tatou onosai ma iai ni āuga e faaleagaina ai la tatou amio Atua. E toʻatele auauna a Ieova ua oo iai le lotovaivai. (Numera 11:11-15; Esera 4:4; Iona 4:3) E faapitoa lava ona aumaia iā i tatou e le lotovaivai āuga e faaleagaina ai pe afai e vaavaalua ma le ita faamoemoe, ona o se mea faatigā loto ua tupu iā i tatou po ua matuā faasaʻoina i tatou pe ua aʻoaʻia. Peitaʻi, o le faasaʻoina ma le aʻoaʻia o faamaoniga o le naunau ma le manatu mamafa mai o le Atua. (Eperu 12:5-7, 10, 11) E ao ona manatu i aʻoaʻiga e lē o se faasalaga ae o se auala o le toleniga o i tatou i ala o le amiotonu. Pe afai tatou te lotomaulalo, o le a tatou faatāuaina ai ma talia fautuaga, ma amanaʻiaina e faapea “o aoaiga foi e aʻoaʻoina ai, o le ala o le ola lea.” (Faataoto 6:23) O le a mafai e lenei mea ona fesoasoani iā i tatou ina ia faia se agaʻigaʻi lelei i luma faaleagaga i le tausisia o le amio Atua.
18. O le ā la tatou tiute tauave pe a oo ina faatigā mai se tasi iā i tatou?
18 O le lē femalamalamaaʻi ma le faatigā mai o se isi iā i tatou e mafai ona avea ma luʻitau i la tatou amio Atua. E ono faapogaia ai le lē toʻafilemu o le mafaufau po o le uunaʻia ai o nisi e uia le laasaga lē atamai o le faaesea o i latou mai i o latou uso ma tuafāfine faaleagaga. (Faataoto 18:1) Peitaʻi e lelei ona tatou manatua o le iai pea o ni faalogona ita po o le fia tauimasui i isi e mafai ona iai ni aafiaga leaga i la tatou faiā ma Ieova. (Levitiko 19:18) O le mea moni lava ia, “o le le alofa i lona uso ua ia vaai atu i ai, e le mafai ona alofa o ia i le Atua ua ia le vaai atu i ai.” (1 Ioane 4:20, LF ) I lana Lauga i luga o le Mauga, sa faamamafa ai e Iesu le manaʻoga ina ia vave ona uia laasaga ina ia faaleleia ai ni feeseeseaʻiga e tulaʻi mai. Na ia fetalai atu i lana ʻaufaalogologo e faapea: “Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, a e alu oe ia muai faalelei i lou uso, i le e sau ai, ma avatu lau taulaga.” (Mataio 5:23, 24) E ono fesoasoani se faatoesega e faaleleia ai se manuʻa na māfua i ni upu po o ni gaoioiga lē agalelei. O se faalētonu e tulaʻi mai i le mafutaga e mafai ona faaleleia ma toe maua se faiā filemu, pe afai tatou te talosaga atu mo le faamagaloga ma taʻutino atu e faapea, sa lē saʻo ona tatou taulimaina mataupu na tulaʻi mai. Sa aumaia foʻi e Iesu isi fautuaga i le taulimaina o faafitauli. (Mataio 18:15-17) Maʻeu lo tatou fiafia pe a oo ina taulau a tatou taumafaiga e foʻia faafitauli!—Roma 12:18; Efeso 4:26, 27.
Ia Mulimuli i le Faaaʻoaʻoga a Iesu
19. Aiseā e matuā tāua ai le mulimuli i le faaaʻoaʻoga a Iesu?
19 E mautinoa lava le lofitūina ai o i tatou i tofotofoga, peitaʻi e lē tatau ona faalavelaveina ai i tatou mai i le taufetuliga mo le ola e faavavau. Ia manatua e laveaʻiina i tatou e Ieova mai i tofotofoga. A o tatou “tuu ese . . . o mea mamafa uma” ma “taufetuli ma le onosai i le ala tanu o i o tatou luma,” ia tatou “vaavaai atu ia Iesu, o lē na te taʻitaʻiina ma le na te faaatoatoaina le faatuatua.” (Eperu 12:1-3) Ia matuā iloilo totoʻa le faaaʻoaʻoga a Iesu ma taumafai malosi e faaaʻoaʻo iā te ia i upu ma gaoioiga, o le a fesoasoani lea iā i tatou e atiina aʻe ai le amio Atua ma faailoa atu i le tele e mafai ai.
20. O ā taui e iʻu i ai i le tausisia o le onosai ma le amio Atua?
20 E galulue vaavaalua le onosai ma le amio Atua i le fesoasoani e faamautinoa lo tatou faaolataga. E ala i le faaalia o nei uiga tautele, e mafai ai ona tatou faaauau i la tatou auaunaga paia i le Atua. E tusa lava pe e i lalo o tofotofoga, e tatou te maua lava le fiafia a o tatou mauaina le alofa mutimutivale ma le faamanuiaga a Ieova ona o lo tatou onosai ma lo tatou faia o le amio Atua. (Iakopo 5:11) E lē gata i lenā, na faamautinoa mai e Iesu lava ia e faapea: “O lo outou onosai tou te maua ai lo outou ola.”—Luka 21:19, LF.
O le a Faapefea Ona E Tali?
• Aiseā e tāua ai le onosai?
• O le ā le amio Atua, ma e faapefea ona faaalia?
• E faapefea ona tatou ati aʻe ma faatumauina se faiā vavalalata ma le Atua?
• O ā nisi o faamataʻuga i lo tatou amio Atua, ma e faapefea ona tatou ʻalofiaina?
[Fesili mo le Suʻesuʻega]
[Ata i le itulau 12]
E tele auala e faaalia ai le amio Atua
[Ata i le itulau 14]
Ia faaeteete i faamataʻuga i lou amio Atua