Ia Lūlū le Amiotonu, Selesele Mai le Agalelei o le Atua

“O E matuā tigaina le ua fai ma moni o le tagata ese; a o le ua ʻinoʻino i e fetagofi i lima mo isi, e filemu lava o ia.” (Faataoto 11:15) Maʻeu le moni o lenei faataoto puupuu ua faalaeiauina ai le faia o se gaoioiga e ō faatasi ma ni tiute tauave! O le faaune atu o se nonōgātupe i se tagata ese, e foliga mai o le a faateleina ai faafitauli tau tupe. ʻAlofia le fetagofi [lulu lima ma] isi, o se tāga e faailoa ai le sainia o se maliega i Isaraelu anamua, ma ʻsao ai mai le pagatia i se lamatiaga tau i le maileia i tulaga tau tupe.

E manino lava, o le faatatauina moni lenei o lea mataupu silisili: “O le mea e luluina e le tagata, o le mea lava lea e seleseleina mai ai e ia.” (Kalatia 6:7) Na taʻua e le perofeta o Hosea e faapea: “Ia outou lulu saito mo outou ma le amiotonu, ia outou selesele mai ma le amio lelei.” (Hosea 10:12) Ioe, ia lūlū le amiotonu e ala i le faia o mea i le auala a le Atua, ona tatou selesele mai ai lea o lona agalelei. O le faaaogāina pea lava pea o lenei mataupu silisili, ua faalaeiau malosi mai ai e le tupu o Isaraelu o Solomona le faia o gaoioiga saʻo, tautalaga saʻo, ma se manatu saʻo. O le suʻesuʻe loloto i ana upu atamai, o le a faalaeiauina moni ai i tatou ina ia lūlū fua o le amiotonu mo i tatou lava.—Faataoto 11:15-31.

Lūlū le “Matagofie,” Selesele Mai le “Mamalu”

Ua faapea mai le tupu poto: “E maua le mamalu e le fafine matagofie; a o tane malolosi e maua le oloa.” (Faataoto 11:16) Ua faia e lenei fuaiupu se faaeseesega i le va o le mamalu e tumau atonu e maua e se fafine matagofie, “o se fafine amiolelei” ma le oloa e faalētumau e maua e se tane malosi.

E faapefea ona maua e se tasi le matagofie e iʻu ai i le mamalu? Ua fautua mai Solomona e faapea: “Ia e taofi mau i le poto ma le mafaufau, e fai ia mea . . . ma mea matagofie i lou ua.” (Faataoto 3:21, 22) Ma na tautala le faisalamo e uiga i le ‘masaa ifo i laufofoga [laugutu] o le tupu o upu alofa.’ (Salamo 45:1, 2) Ioe, o le poto aogā, le tomai e mafaufau ai, ma le faaaogāina tatau o le laulaufaiva, ua faaopoopo atu i le tāua ma le matagofie o se tagata. O le mea mautinoa lea e faatatau i se fafine mafaufau. O se tasi o faaaʻoaʻoga, o Apikaila le avā a le tagata finauvale o Napalu. O ia o se fafine “mafaufau lelei, ma le lalelei” sa viiviia o ia e le Tupu o Tavita ona o lona “mafaufau” lelei—1 Samuelu 25:3, 33.

O se fafine amio Atua o lē e matagofie moni, e mautinoa lava lona mauaina o le mamalu. O le a taʻuleleia o ia e isi tagata. Afai e faaipoipo, o le a ia mauaina le mamalu mo ia lava i le vaavaai atu a lana tane. O le mea moni, o le a faamamaluina ai foʻi le aiga atoa  ona o ia. Ma o lona mamalu e lē mo na o sina taimi. “Ia sili le manao [i le igoa] ina ia taʻuleleia i le manao i le oloa e tele; ma le agalelei, ia sili le manao i lea i le ario ma le auro.” (Faataoto 22:1) O le igoa taʻulelei lea na te faia ma le Atua, e tumau e faavavau.

E matuā tuufaafeagai lava le tulaga lea ma se tane sauā, ‘se tagata lē alofa.’ (Faataoto 11:16, New International Version) O se tane sauā, ua tutusa ma tane amio leaga ma i latou ua ita i tagata tapuaʻi o Ieova. (Iopu 6:23; 27:13) O se tagata faapena ‘e na te lē manatua le Atua.’ (Salamo 54:3) E ala i le sauāina ma le faoa ma le manatu faapito o mea a tagata e lē sala, atonu o lea tagata ua ia ‘faafaupue o ario e pei o le efuefu.’ (Iopu 27:16) Peitaʻi, a o faagasolo taimi, atonu o le a taoto o ia ma lē toe tulaʻi, ma i se aso e pupula ona mata, ae ua leai o ia.’ (Iopu 27:19) O le a leai uma lava ana oloa ma mea na ia faia.—Luka 12:16-21.

Maʻeu se lesona tāua ua aʻoaʻo mai e le Faataoto 11:16! E ala i le otooto mai po o ā mea o le a selesele mai e le matagofie ma le malosi, ua uunaʻia malosi ai i tatou e le tupu o Isaraelu ina ia lūlū le amiotonu.

O le “Alofa” e Maua ai Taui

I le aʻoaʻo atili mai ai foʻi o se isi lesona tāua i faiā faaletagata, ua faapea mai ai Solomona: “O le tagata alofa ua agalelei o ia ia te ia lava; a o le ua saua, na te faatigaina lona lava tino.” (Faataoto 11:17) Ua fai mai se tasi tagata aʻoga, “O le manatu o le faataoto e faapea, o amioga a se tasi agaʻi i isi, e tusa lava pe lelei pe leaga, e iai iʻuga e leʻi mafaufauina pe faatalitalia e maua e lea tagata.” Seʻi manatu i se fafine talavou e igoa iā Lisa. * E ui lava i faanaunauga lelei, ae e tuai pea lava o ia mo ni fuafuaga na te faia ma isi. E masani pea lava ona tuai o ia a lē o le 30 minute ua sili atu foʻi i ni fuafuaga na latou faia ina ia feiloaʻi ma isi tagata folafola o le Malo mo le galuega talaʻi. E lē o maua ai e Lisa ni aogā mo ia lava i lea uiga. Pe e na te tuuaʻia isi pe afai ua lē lava lo latou onosai ona o le maʻimau o le taimi tāua ma ʻalofia ai le toe faia o ni fuafuaga ma ia?

O se tagata e na te faataatitia ni tapulaa e matuā maualuluga ma manatu e saʻo lava o ia i mea uma, e lē alofa foʻi o ia iā te ia lava. E tauivi pea lava pea ina ia ausia ni sini e lē mafai ona faataunuuina, ua tuu ai e ia o ia lava i se tulaga e iʻu ai i le matuā vaivai ma le lē fiafia. I le isi itu, e mafai ona tatou maua taui lelei mo i tatou lava pe afai e tatou te faataatitia ni sini e aogā moni. Atonu e tatou te lē vave maua ni manatu e pei o isi. Pe atonu ona o se maʻi po o le olaga matua ua taofia ai i tatou. Aua lava neʻi o tatou tigā ona o le tulaga ua iai lo tatou agaʻigaʻi i luma faaleagaga, ae ia faaalia pea lava le magafagafa i le feagai ai ma mea ua lē mafai ona tatou gafatia. Amuia i tatou pe afai e tatou te faia le mea aupito sili e tatou te mafaia e tusa ai ma o tatou tulaga.—2 Timoteo 2:15; Filipi 4:5.

I le faamatalaina auʻiliʻili o le auala e mafai ai e se tagata amiotonu ona maua aogā mo ia lava ae o loo faatigāina e le tagata sauā o ia lava, ua faapea mai le tupu poto: “O lē amio leaga ua fai e ia le galuega pepelo; a o le totō le amiotonu e ia te ia le taui faamaoni. E pei ona iu o le amiotonu i le ola, e faapea foi le ua tausisi i le leaga, e iu lea i lona lava oti. Ua inosia e Ieova e ua faapiopio o latou loto; a o e ua sao a latou amio, e fiafia i ai o ia. E tago lea lima i lea lima, a e le faasaoina le ua amio leaga; a o le fanau a e amiotonu, e sao i latou.”—Faataoto 11:18-21.

E eseese auala ua faamamafa ai e nei fuaiupu lenei manatu autū: Ia lūlū le amiotonu ma selesele mai lona taui. Atonu ua faia e le tagata amioleaga le taufaasesē po o le pelē tupe ina ia maua fua ai se mea. Talu ai o na galuega e sesē, atonu e iʻu ai i lona lē fiafia. O lē e faamaoni i le faia o se galuega, e maua e ia taui moni ma e saogalemu foʻi o ia. O le mauaina o le faamaoniga a le Atua, e maua ai e lē ua lē ponā le ola. Ae o le ā le taui o le tagata amio leaga? E ui “e tago lea lima i lea lima” i le faia o taupulepulega faaoleole, o le a lē sao lava le tagata amioleaga mai le faasalaga. (Faataoto 2:21, 22)  Maʻeu se apoapoaʻiga lelei ina ia lūlū le amiotonu!

Matagofie Moni mo Lē ua Mafaufau

Ua faaauau mai Solomona e faapea:“O le mama auro i le isu o le puaa, o le fafine lalelei lea ua teʻa ma le mafaufau.” (Faataoto 11:22) O mama i isu, o teuga na sa lauiloa i taimi o le Tusi Paia. O se mama auro sa tui i autafa o le isu po o le pou o le isu , o se maatāua lea o le a faigofie lava ona mātauina ai se fafine. Maʻeu se lē talafeagai ona iai sea maatāua matagofie i le isu o se puaa! E talitutusa lava ma se tagata e aulelei mai i fafo, ae leai se “mafaufau.” E lē fetaui lea teuga manaia ma se tagata faapena, e tusa lava po o se tamaʻitaʻi po o se alii. E lē talafeagai, e lē fetaui ma manatu o tagata uma lava.

Ioe, o le manatu mamafa i le vaaiga mai a isi tagata iā i tatou, o se uiga masani. Ae aiseā e soona popole ai pe lē lotomalie ai i o tatou foliga vaaia? E lē mafai ona tatou pulea le tele o tafa o o tatou foliga. Ma e lē tāua ia foliga vaaia. Pe e lē moni ea o le toʻatele o tagata tatou te fiafia i ai ma viiviia o foliga masani lava? O le aulelei faaletino e lē o le auala sili lenā e maua ai le fiafia. O le mea e sili ona taulia, o le matagofie lea o le tagata lilo o le loto e tumau ona atagia atu ai uiga o le Atua. Seʻi o tatou mafaufau ia ma atiina aʻe na uiga.

“E Faatamaoaigaina le Tagata Matamau”

“O le manao o e amiotonu, ua na ona lelei lea,” (LF) ua faapea mai le Tupu o Solomona, “o le faamoemoe o lē amio leaga, o le toʻasa lea,” (NW). I le faataʻitaʻia o lenei mea, ua ia faaopoopo mai: “O i ai le na te faasalalauina ana mea, a e atili ai ona mau mea, o i ai foi le ua taofi mai le faia o le mea tonu, e mativa ai o ia.”—Faataoto 11:23, 24, NW.

A o tatou faasalalauina atu ma le filigā, ma aʻoaʻo i isi le poto o le Afioga a le Atua, e mautinoa lava lo tatou faaleleia ai o lo tatou lava malamalama i “le uiga o le lautele, ma le umi, ma le loloto, ma le maualuga” o le Afioga a le Atua. (Efeso 3:18) I le isi itu, o se tasi e na te lē o faaaogāina lea poto, ua iai o ia i se tulaga lamatia i le lē iloa o le mea ua iā te ia. Ioe, “o le ua itiiti ana saito e lulu, e itiiti foi ana e selesele mai; a o le ua tele ana e lulu, e tele foi ana e selesele mai.”—2 Korinito 9:6.

Ua faaauau mai le tupu e faapea: “E faatamaoaigaina le tagata matamau; o ia foi le faasusu i nisi, e faasusuina [manuia] lava o ia.” (Faataoto 11:25) E matuā fiafia lava Ieova iā i tatou pe afai e tatou te faaaogāina ma le matamau lo tatou malosi ma a tatou alāmanuia e faaauilumaina ai le tapuaʻiga moni. (Eperu 13:15, 16) O le a ia ‘toina pupuni o le lagi mo [i tatou], ma sasaa [mai[ le manuia mo [i tatou], ina seia silisili ona tele.’ (Malaki 3:10) Seʻi vaai atu ia i le tamaoaiga faaleagaga o ana auauna i aso nei!

I le tuuina mai o se isi faaaʻoaʻoga e iloa ai le eseesega o faanaunauga o ē amiotonu ma ē amioleaga, ua faapea mai Solomona: “O le na te taofia saito, e fetuuina o ia e le nuu; a e i ai le faamanuia i luga o le ulu o le na te faatauina mai ai.” (Faataoto 11:26) O le faatauina mai o oloa siiatoa pe a oo ina paʻū le tau ma taofi seʻia oo ina tau leai na oloa, ma toe faatau atu pe a oo ina sii i luga le tau, e ono tele ni tupe faasili e maua ai. E ui lava e mafai ona iʻu i se lelei pe a faatapulaaina mea e faaaogā, ma tausisia le faasaoina o nisi mea, e masani lava ona faitioina e tagata se tasi na te faia lenei mea  ona o lona manatu faapito. I le isi itu, o se tagata na te lē faataugatāina ana mea pe a tulaʻi mai se manaʻoga faafuaseʻi, e matuā fiafia i ai tagata.

I le faalaeiauina o i tatou ina ia faaauau ona naunau i mea lelei, po o le amiotonu, ua faapea mai ai le tupu o Isaraelu: “O le na te sailiili i le lelei, na te sailia le alofa; a o le na te sailia le leaga, e oo lava lea ia te ia. O le na te faatuatua i lona oloa, e paʻū lava o ia; a o e amiotonu, e tupu matagofie i latou, pei o lau laau.”—Faataoto 11:27, 28.

E Maua Mai Nisi e le Tagata Amiotonu

I le faaalia o iʻuga leaga ona o le faia o gaoioiga valea, ua taʻua ai e Solomona e faapea: “O le na te faatigaina lona aiga, e fai mona tofi le matagi.” (Faataoto 11:29a) O le mea sesē na faia e Akana, ʻna puapuagatia ai o ia,’ ma na fetogia o ia ma tagata o lona aiga uma i maa ma feoti ai. (Iosua, mataupu e 7) I aso nei, e ono aafia le ulu o se aiga Kerisiano ma tagata o lona aiga i le faia o se mea sesē ma iʻu ai ina faateʻaina i latou mai le faapotopotoga Kerisiano. O lona lava lē ōgatusa ma poloaʻiga a le Atua ma lona faatagaina o le faia o le mea sesē matuiā i lona aiga, ua faatigāina ai e se tasi lona lava aiga. Ua vavaeesea ai o ia ma atonu o nisi o lona aiga fai mea sesē e lē salamō mai le auaufaatasi ma le faapotopotoga Kerisiano. (1 Korinito 5:11-13) Ma o le ā o le a ia maua? E na o le matagi, o se mea e leai sona uiga po o se tāua moni.

Ua faaauau mai le fuaiupu: “E auauna foi le vale i le ua poto lona loto.” (Faataoto 11:29e) Talu ai e leai se poto aogā o iai i le tagata valea, e lē mafai ona faatuatuaina o ia i tiute tauave tetele. E lē gata i lea, o le lē lelei ona ia puleaina o ana lava mataupu, e ono faapogaia ai o ia e faia matafaioi a isi tagata. O se tagata valea e ono avea ma “auauna i le ua poto lona loto.” E manino lava la, e tāua tele le faaaogā o le mafaufau lelei ma le poto aogā i a tatou feutagaʻiga uma ma isi.

Ua faamautinoaina i tatou e le tupu poto e faapea: “O le fua o le amiotonu, o le laau o le ola lea; ma le na te maua agaga, e poto ia.” (Faataoto 11:30) Ua faapefea ona tupu o lenei mea? Ioe, e ala i lana tautala ma lana amio, e fafagaina ai faaleagaga e se tagata amiotonu isi. E faalaeiauina ai i latou e auauna iā Ieova ma iʻu ai i le mauaina o le ola ua faaavanoa mai e le Atua mo i tatou.

‘O le a Sili Foʻi ona Tauia o Lē Agasala’

Maʻeu le faatauanau mai o le faataoto lea na taʻua i le amataga, ua apoapoaʻi mai ai iā i tatou ina ia lūlū le amiotonu! O le faatatauina o lea faataoto i se isi foʻi auala, ua taʻua ai e Solomona le mataupu silisili lea e faapea, “o le mea e luluina e le tagata, o le mea lava lea e seleseleeina mai e ia,” ua faapea mai ai Solomona: “Faauta, e tauia le amiotonu i le lalolagi; e sili foi ona tauia o lē amio leaga ma lē agasala!”—Faataoto 11:31.

E ui lava e taumafai le tagata amiotonu e faia le mea saʻo, ae e sesē lava o ia i nisi o taimi. (Failauga 7:20) Ma o le a “tauia” ana amioleaga i le aʻoaʻia o ia. Ae faapefea le tagata amio leaga ua filifili ma le loto iai se ala leaga ae leai se taumafaiga o faia e liliu atu i le ala saʻo? Pe e lē tatau ea ona ia maua se ‘taui’ e sili atu, se faasalaga mamafa? Na tusi mai le aposetolo o Peteru e faapea: “Pe afai foi e toe ina le mafai ona faaolaina o lē amiotonu, po o ifea e tu mai ai o le faalematau ma le agasala?” (1 Peteru 4:18) O le mea lea, seʻi o tatou filifili pea ia ina ia lūlū saito o le amiotonu mo i tatou lava.

[Faamatalaga pito i lalo]

[Ata i le itulau 28]

O le “matagofie“ na maua ai e Apikaila le “mamalu”

[Ata i le itulau 30]

‘O lē amio leaga ua fai e ia le galuega pepelo; a o lē totō le amiotonu e ia te ia le taui faamaoni’

[Ata i le itulau 31]

‘O le ua tele ana e lulu, e tele foi ana e selesele mai’