“Ia Outou O Mai ia te Au, . . . o Aʻu Foi e Malolo ai Outou”

“Ia Tatou Agalelei i Tagata Uma Lava”

O LE talai ma le aʻoaʻo atu o le tala lelei o le Malo o le Atua, o le galuega autū lenā a Iesu. (Mare. 1:14; Luka 8:1) Talu ai le naunau o soo o Keriso e faataʻitaʻi iā te ia, ua latou manatu ai i le galuega o le aʻoaʻo atu o le feʻau a le Tusi Paia e uiga i le Malo o le Atua, o se galuega aupito sili i o latou olaga. (Luka 6:40) O se faamāfanafanaloto moni i Molimau a Ieova le vaai atu i le auala ua maua ai e tagata o ē ua taliaina le feʻau o le Malo le mālōlōga tumau, e pei lava ona faia i taimi na iai Iesu i le lalolagi.—Mataio 11:28-30.

E lē gata i le aʻoaʻoina o le Afioga a le Atua, ae na faia foʻi e Iesu isi galuega lelei, e pei o le faamālōlōina o maʻi ma le fafagaina o ē na matelāina. (Mataio 14:14-21) Ua faapena foʻi ona faaopoopo e Molimau a Ieova i la latou galuega o le aʻoaʻo atu o le Tusi Paia ia isi galuega e fesoasoani atu ai i tagata o loo iai le manaʻomia. O le mea moni, ua faaauupegaina e le Tusi Paia ia Kerisiano mo “galuega lelei uma lava” ma faamalosia i latou ina ia “agalelei i tagata uma lava.”—2 Timoteo 3:16, 17; Kalatia 6:10.

“Sa Iai i Inā o Tatou Uso”

Iā Setema 1999, na lūlūina ai Taiwan i se mafuiʻe mataʻutia. I ni nai masina mulimuli ane ai, na faapogaia ai e timuga mamafa ma lologa se mala faalenatura e sili ona leaga i le talafaasolopito o Venezuela. Talu ai nei lava, na faatamaʻia ai e se lologa mataʻutia le atunuu o Mozambique. I nei tulaga uma e tolu, na vave lava ona taunuu atu Molimau a Ieova i ia nofoaga ma meaʻai, vai, vailaau, lavalava, faleʻie, ma ogaumu mo le kukaina o meaʻai a tagata na lavevea ai. Sa faatutūina e tagata faigaluega tauofo e iai ia tomai faafomaʻi ia ni nofoaga e togafitia ai ē na manunuʻa, ma sa fausia foʻi e tagata faigaluega tauofo ia fale fou mo i latou na faatamaʻia o latou fale.

Na faagaeetia loto o tagata uma lava na lavevea i ia mala ona o le fesoasoani talafeagai na vave ona latou maua. Ua faapea mai Malyori o lē na faaleagaina lona fale i lologa i Venezuela, “I le taimi na sili ona matou mafatia ai, sa iai i inā o tatou uso.” Ina ua uma ona fausia e le ʻaufaigaluega tauofo se  fale fou lava mo lona aiga, na faapea mai ma le ofo Malyori: “E lē lava a matou upu e faafetai tele atu ai iā Ieova mo mea uma ua ia faia mo i matou!” Ma ina ua tuuina atu i tagata na lavevea i lologa i Mozambique ia ki mo o latou fale fou faatoʻā uma ona fausia, na faafuaseʻi lava ona usu leo tetele e le vaega atoa lea le pese o le Malo “O Ieova lo Tatou Malu.” *

Sa avea foʻi o se mea e faafouina ai mo le ʻaufaigaluega tauofo le fesoasoani atu i tagata sa iai le manaʻomia. Na faapea mai ia Marcelo, o lē sa auauna o se tausimaʻi i se nofoaga o tagata sulufaʻi i Mozambique: “Sa ou lagona le fiafia ona ua iai soʻu aogā mo nei uso o ē sa matuā mafatia.” Na faapea mai Huang, o se tagata faigaluega tauofo i Taiwan: “Sa avea o se fiafiaga sili le auai i le aauina atu o meaʻai ma faleʻie i uso sa iai le manaʻomia. Sa avea o se mea e faamalosia ai le faatuatua.”

Se Polokalame o ʻAufaigaluega Tauofo na Maua ai Aogā

O galuega tauofo, na maua ai foʻi e le faitau sefulu afe o pagota i le lalolagi atoa le malosi faaleagaga. E faapefea? I nai tausaga na seʻi mavae atu, na saunia ai e Molimau a Ieova lomiga faale-Tusi Paia mo le sili atu i le 30,000 tagata na taofia i nisi o falepuipui e 4,000 i na o le Iunaite Setete lava. E lē gata i lea, pe afai e mafai, sa asiasi atu ai Molimau a Ieova lava latou i falepuipui ina ia faia ai suʻesuʻega faale-Tusi Paia ma pagota ma faia foʻi sauniga faa-Kerisiano. Po o maua ai e pagota ni aogā?

Ua amata ona talaʻi atu e nisi o pagota na suʻesuʻeina le Tusi Paia ia aʻoaʻoga e faafouina ai o le Afioga a le Atua i isi uso pagota. O le iʻuga ua iai nei ia vaega o pagota ua tapuaʻi faatasi iā Ieova, i le tele o isi falepuipui i le lalolagi. Na lipotia mai e se pagota i se falepuipui i Oregon i le Iunaite Setete o Amerika i le 2001 e faapea: “Ua matuā olaola la matou vaega. Ua toʻa 7 a matou tagata talaʻi o le Malo, ma e 38 suʻesuʻega faale-Tusi Paia o loo faia. E sili atu i le 25 tagata na auai i le lauga lautele ma le Suʻesuʻega o le Olomatamata, ma e toʻa 39 na auai i la matou Faamanatuga [o le maliu o Keriso]. E toʻatolu foʻi isi tagata ua lē o toe umi se taimi ae papatisoina!”

O Aogā ma Fiafiaga

Ua mātauina e pule o falepuipui le aogā o lenei polokalame o le ʻaufaigaluega tauofo. O le mea e sili ona faafiafiaina ai ia tagata maualuluga, o le umi ona tumau o le aogā o lenei polokalame o le ʻaufaigaluega tauofo. Ua mātauina e se tasi lipoti e faapea: “I le sefulu tausaga talu ona faagaoioia lenei polokalame, e leai lava se tasi o pagota ia ua magalo o ē na papatisoina i le falepuipui e avea ma Molimau a Ieova na toe foʻi atu i le falepuipui—pe a faatusatusa atu i le 50 i le 60 pasene o isi vaega na toe foʻi atu i le falepuipui.” I le faagaeetia i iʻuga na maua e ala i le ʻaufaigaluega tauofo a Molimau, na taʻua ai e se failotu i le falepuipui i Idaho i lana tusi na avatu i le ofisa ulu o Molimau a Ieova e faapea: “E ui ou te lē ioe lava aʻu i o outou talitonuga, ae ou te matuā fiafia lava i la outou faalapotopotoga.”

O le fesoasoani atu iā i latou i falepuipui, sa aogā foʻi mo le ʻaufaigaluega tauofo. Ina ua uma se sauniga na faia ma se vaega o pagota o ē na usuina mo le uluaʻi taimi se pese o le Malo, na tusi mai ai se tagata tauofo e faapea: “O se mea na faalaeiau ai le vaai atu i tane e toʻa 28 o aufaatasi i le usuina o viiga iā Ieova. Ma sa latou pepese leo tetele! Maʻeu se avanoa lelei e auai ai i sea faatasiga!” Na faapea mai se tagata tauofo na asiasi atu i falepuipui i Arizona: “Maʻeu se faaeaga o le auai i lenei galuega faapitoa!”

E ioe faatasi le ʻaufaigaluega tauofo o Molimau i le lalolagi aoao i upu a Iesu e faapea: “E sili le manuia o le na te foai atu, i lo le na te talia mai.” (Galuega 20:35) Ua latou taʻutino mai foʻi e faapea, o le mulimuli i apoapoaʻiga a le Tusi Paia ina ia agalelei i tagata uma, e matuā faafouina moni ai lava.—Faataoto 11:25.

[Faamatalaga pito i lalo]

[Ata i le itulau 8]

Venezuela

[Ata i le itulau 8]

Taiwan

[Ata i le itulau 8]

Mozambique