O le ā Moni le Mea e Taʻu o Seoli?

TUSA lava po o le ā le faauigaga o “seoli” i lou mafaufau, ua masani ona manatu tagata o seoli o se nofoaga e faasalaina ai mo agasala. E tusa ai o le agasala ma lona iʻuga, ua faapea mai le Tusi Paia: “[Ua] oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) Ua taʻua foʻi i le Tusi Paia e faapea: “O le oti, o le totogi lea o le agasala.” (Roma 6:23) Talu ai o le faasalaga o le agasala o le oti, o le fesili tāua la e faamautinoa ai le tulaga moni o seoli: O le ā e tupu iā i tatou pe a tatou feoti?

Pe e faaauau ona ola pea se tasi i se isi tino po ose isi auala pe a mavae le oti? O le ā lea mea e taʻu o seoli, ae o ā ituaiga o tagata e ō ai i inā? Pe e iai ea se faamoemoe mo i latou o loo i seoli? Ua aumaia e le Tusi Paia tali faamaoni ma le faamalieloto i nei fesili.

Pe e Ola Pea pe a Mavae le Oti?

Pe e iai se mea i totonu iā i tatou, e pei o se agaga e ola pea pe a mavae ona oti le tino? Seʻi iloilo le auala na tuuina atu ai le ola i le uluaʻi tagata o Atamu. Ua faapea mai le Tusi Paia: “[Na] faia lea e Ieova le Atua o le tagata i le efuefu o le eleele, ma ua mānava i ona pogaiisu o le mānava ola.” (Kenese 2:7) E ui o le mānava na faatumauina ai ona ola, ae na aofia ai ni mea e sili atu i le tuuina atu o le “mānava ola” i totonu o ona pogaʻiisu na i lo le tau ina mānavaina atu o se ʻea i ona māmā. O lona uiga, na tuuina e le Atua le malosi e faaola ai le tino sa aunoa ma se ola na iai o Atamu—“le [“malosi,” NW] o le ola,” lea o loo iai i meafaiola uma o le lalolagi. (Kenese 6:17; 7:22) Ua faasino atu le Tusi Paia i lenei malosi e ola ai o le “agaga.” (Iakopo 2:26) E mafai ona faatusaina le agaga i ave o le uila lea e faaolaina ai se masini po o se mea e alu i le eletise ma mafai ai ona faatino se galuega. E pei lava ona lē mafai e ave o le uila ona maua uiga o le meafaigaluega o loo ia faaolaina, e faapena foʻi ona lē mafai e le malosi o le ola ona maua ni uiga o meafaiola o loo ia faaolaolaina. E leai ni ona uiga faaletagata ma se tomai faalemafaufau.

O le ā e tupu i le agaga pe a maliu le tagata? Ua faapea mai le Salamo 146:4: “E alu ese lona agaga, e foi atu i le eleele na i ai o ia; e faaumatia i lea lava aso ona manatunatu.” Pe a maliu se tagata, e lē mafai ona ola pea lona agaga lea e leai ni ona uiga faaletagata i se isi nofoaga o se meafaiola agaga. E “toe foi atu le agaga i le Atua [moni] o le na foaiina mai ai.” (Failauga 12:7) O lona uiga o le faamoemoe mo le ola  i le lumanaʻi mo lenā tagata, ua faalagolago atoatoa atu lea i le Atua.

O lea, o le ā la le tulaga o tagata ua maliliu? Ina ua faailoa atu iā Atamu lona faasalaga, na fetalai Ieova: “O le efuefu oe, e te toe foi atu lava i le efuefu.” (Kenese 3:19) O fea na iai Atamu a o leʻi foafoaina e le Atua o ia mai le efuefu o le eleele ma tuuina atu iā te ia le ola? O le mea moni, sa leʻi ola o ia! Ina ua maliu la o ia, na toe foʻi atu Atamu i lenā lava tulaga o le lē ola lava. Ua faamanino mai le tulaga o ē ua maliliu i le Failauga 9:5, 10, lea tatou te faitau ai faapenei: “O e ua oti, latou te le iloa se mea . . . e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” I le Tusi Paia, o le oti o se tulaga o le lē iai lava o se ola. E leai se mea e toe iloa, ua aunoa ma ni faalogona, ma ua leai ni mafaufauga.

Po o le Faapuapuagatia e Faavavau po o le Tuugamau?

Talu ai e lē toe iloa se mea pe a maliu, e lē mafai la ona avea seoli ma nofoaga e iai se afi e faapuapuagatiaina ai, lea o le a faatigāina ai tagata amioleaga pe a mavae le oti. O lea, o le ā la le mea e taʻu o seoli? O le suʻesuʻeina o le mea na tupu iā Iesu ina ua maliu, e fesoasoani i le taliina o lenā fesili. Ua faapea mai le tusitala o le Tusi Paia o Luka: “Ua le tuua [Iesu] i Seoli, ua le oo foi le pala i lona tino.” (Galuega 2:31, LF ) O fea le seoli lea na alu atu foʻi i ai Iesu? Na tusi e faapea le aposetolo o Paulo: “Na ou tuuina atu ia te outou . . . na maliu Keriso mo a tatou agasala, pei ona tusia; na tanu foi o ia, ma toe tu mai i le aso tolu, pei o upu ua i Tusi.” (1 Korinito 15:3, 4, LF) O lea sa iai Iesu i seoli, le tuugamau, ae e leʻi tuua ai o ia i inā, auā na toe faatūina o ia, pe na toetū mai.

Seʻi iloilo foʻi le tulaga o le tagata amiotonu o Iopu, o lē na matuā puapuagatia. I le faanaunau e sola ese mai ona puapuaga, na ia ole atu ai: “E! fia natia aʻu e oe i [Seoli] ma ia e faaliloina aʻu, seia mavae atu lou toasa.” (Iopu 14:13, Douay Version) Pagā se lē talafeagai ona manatu faapea na faanaunau Iopu e alu atu i se nofoaga e iai se afi aasa ina ia malupuipuia ai! Na iloa e Iopu, o “seoli” o le tuugamau lea o le a faaiʻuina ai ona puapuaga. O seoli la i le Tusi Paia, o le tuugamau mo tagata uma, lea e ō atu i ai i latou e lelei faapea foʻi ma tagata leaga.

Po o Seoli o le Faaumatiaga Atoatoa?

Pe e lē o faatusaina le afi i seoli i le faaumatiaga atoatoa, po o se faatamaʻiaga aʻiaʻi? I le faaeseeseina o le afi ma seoli, ua faapea mai ai le Tusi Paia: “Ua lafoina foi le oti ma seoli i le lepa afi.” “O le lepa afi” lea o loo taʻua i inei e faafaatusa, ona o le oti ma seoli lea o le a lafoina i ai e lē mafai ona susunuina moni. ‘O le lepa afi; o le oti faalua lea—le oti lea e leai se faamoemoe e toe ola mai ai.—Faaaliga 20:14.

O le lepa afi e iai lona uiga e talitutusa ai ma le “afi o Kēna” lea na fetalai i ai Iesu. (Mataio 5:22; Mareko 9:47, 48) E 12 taimi o loo aliali mai ai le upu Kena i Tusitusiga  Kerisiano Eleni, ma e faasino atu i le vanu o Hinoma, sa i tuapa o Ierusalema. A o iai Iesu i le lalolagi, na faaaogāina ai lenei vanu o se nofoaga e lafo i ai lapisi, “lea na lafoina i ai tino maliu o tagata solitulafono, ma tino mate o manu, ma so o se ituaiga lapisi lava.” (Smith’s Dictionary of the Bible) Na ola pea le afi e ala i le faapaʻū ifo i ai o le teio e susunuina ai lapisi. Na faaaogāina e Iesu lenā vanu o se faailoga talafeagai o le faaumatiaga e faavavau.

E pei o Kena, ua faatusaina ai foʻi le lepa afi i le faaumatiaga e faavavau. O le ‘⁠lafoina i ai’ o le oti ma seoli e faauiga atu i le lē toe iai pe a faasaʻolotoina tagata mai le agasala ma le faasalaga o le oti. O tagata e agasala ma le loto i ai ae e lē salamō, o le a fai foʻi mo o latou “tofi” lenā lepa afi. (Faaaliga 21:8) O le a faaumatia foʻi i latou e faavavau. I le isi itu, o loo iai se faamoemoe matagofie mo i latou o loo i seoli po o le tuugamau o ē e manatuaina e le Atua.

O le a Faagaogaoina Seoli!

Ua faapea mai le Faaaliga 20:13: “Ua avae foi e le sami e na oti sa i ai, ua avae foi e le oti ma seoli e na oti sa i ai.” Ioe, o seoli lea o loo taʻua i le Tusi Paia o le a faagaogaoina. E pei ona folafolaina mai e Iesu, ‘e oo mai le aso e faalogo ai i le leo o Iesu e i latou uma ua i tuugamau, ma latou o mai ai.’ (Ioane 5:28, 29) E ui lava e lē o ola i soo se tino i le taimi nei, o le a toe faatutūina mai pe toe faafoʻisia mai i le ola i se parataiso i le lalolagi, le faitau miliona ua maliliu o loo manatua pea e Ieova le Atua.—Luka 23:43; Galuega 24:15.

I le lalolagi fou a le Atua, o le a lē taitai ona toe maliliu ai ē e toe faatutūina mai pe afai latou te usiusitai i ana tulafono amiotonu. (Isaia 25:8) O le a “sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga.” O le mea moni o le a “mavae atu mea muamua.” (Faaaliga 21:4) Maʻeu se faamanuiaga ua iai mo i latou o loo i seoli—i “tuugamau”! E mautinoa ona o lenei faamanuiaga ua talafeagai ai mo i tatou ona aʻoaʻoina atili le poto e uiga iā Ieova le Atua ma lona Alo, o Iesu Keriso.—Ioane 17:3.

[Ata i le itulau 5]

Na tatalo Iopu ina ia malupuipuia i seoli

[Ata i le itulau 6]

O le afi i Kena—o se faatusa o le faaumatiaga e faavavau

[Ata i le itulau 7]

‘⁠E o mai ai i latou ua i tuugamau’