O le ā ua Tupu i le Aʻoaʻoga o le Afi i Seoli?

O LE ā le manatu e oso aʻe i lou mafaufau e tusa ai o “seoli”? Pe e te mafaufau o seoli o se nofoaga moni e iai se afi ma le teio, e faaauau ona faapuapuagatia ma faatigāina ai? Pe e mafai ona faauiga atu seoli i se faamatalaga faafaatusa o se uiga, po o se tulaga o loo iai?

Mo le tele o senituri, na manatu faapea ai taʻitaʻi lotu o lotu ua faapea mai o Kerisiano, o le iʻuga mautinoa o tagata agasala o le matuā faapuapuagatiaina lea i se afi i seoli. O lenei talitonuga o loo taatele pea i le tele o ituaiga o lotu. Ua faapea mai le U.S. News & World Report: “Atonu ua avea seoli ma upu e masani tele ai ona o le Faa-Kerisiano, ae e lē na o i latou ua iai lenā aʻoaʻoga. O le faamataʻuina i se faasalaga tigāina pe a mavae le oti, e toetoe lava o lotu tetele uma o le lalolagi, faapea ma nisi lotu laiti e talitonu tutusa uma i ai.” O tagata lotu Hinitū, Puta, Musalimi, Jains, ma Tao e talitonu eseese e faatatau i seoli.

E ui i lenā, ua iai foʻi se isi faauigaga o seoli e tusa ai o manatu faaonapōnei. Ua faapea mai le mekasini na taʻua muamua: “A o iai pea i latou e talitonu i le aʻoaʻoga tuai o le iai o se afi i seoli, ua amata ona aliaʻe mai ni manatu faaonapōnei i le faasalaga e faavavau e faapea, o seoli e lē o se afi moni, ae o se tulaga sili ona lē lelei e saisaitia ai se tasi na o ia.”

Na faapea mai le nusipepa a le ʻau Jesuit o le La Civiltà Cattolica: “E taufaasesē . . . le manatu e faapea o le Atua, e ala mai i temoni, ua faaooina mai i ē agasala se faasalaga mataʻutia e faapuapuagatiaina ai e pei o se afi.” Ua faapea mai atili: “O seoli, e lē o se nofoaga ae o se tulaga, o le tulaga lea o le olaga o se tagata o loo puapuagatia i tigā ona o le vavaeesea mai le Atua.” Na faapea mai Pope Ioane Paulo II i le 1999: “Na i lo o se nofoaga, ua faailoa mai i seoli le tulaga o loo iai i latou ua lotomalilie e vavaeese atoatoa i latou mai le Atua, le puna o le ola ma le olioli.” Na ia faapea mai e tusa ai o faamatalaga e uiga i seoli o se nofoaga e iai se afi: “Ua faaalia ai le matuā augapiu o se fiafia ma se uigā o le ola e aunoa ma le Atua.” Ana faapea na faamatalaina e le pope ia seoli i ni faaupuga e pei o “le afi ma le tiapolo e ofu mūmū ma se tui, e lē taitai talitonu moni i ai tagata.” O le faamatalaga lea a Martin Marty o se tagata faamaumauina talafaasolopito faalelotu.

O fesuiaʻiga lava ia ua faia foʻi i isi faalapotopotoga o lotu. Na faapea mai se lipoti mai i ē e pulea ma faatonutonuina aʻoaʻoga a le Lotu Egelani: “O seoli e lē o se mea e faapuapuagatiaina ai e faavavau, ae o le filifiliga maumauaʻi lē masuia i se olaga ua tetee atoatoa i le Atua, ma o le mea mautinoa e pau lava le iʻuga, o le lē toe iai lava.”

O le aʻoaʻoga a le Lotu Episcopal i le Iunaite Setete ua faamatalaina ai seoli o le “oti e faavavau ona o lo tatou tetee i le Atua.” Ua faapea mai le U.S. News & World Report, ua faatuputeleina le faitau aofaʻi o tagata o loo faaauilumaina le manatu lea “o le iʻuga o le tagata amioleaga o le faaumatiaga, ae lē o le faapuapuagatiaina e faavavau. . . . Ua [latou] finau mai e faapea o ē e tetee atu i le  Atua o le a faaumatia e faavavau i le ‘afi e mū uma ai’ o seoli.”

E ui lava ina tele ina teena i aʻoaʻoga faaonapōnei le mafaufau i seoli o se afi moni ma le teio, ae toʻatele o loo faaauau pea ona mulimuli i le talitonuga o seoli o se afi moni lava e faapuapuagatiaina ai. Ua faapea mai Albert Mohler o le Seminario Faafaifeʻau a le Lotu Papatiso i Saute i Louisville i Kentucky, i le Iunaite Setete o Amerika: “Ua tautala ma le manino le Tusi Paia o seoli o se nofoaga moni faaletino e faapuapuagatiaina ai i le afi.” Ae ua faapea mai le lipoti a le Nature of Hell, na saunia e le Evangelical Alliance Commission: “O seoli o le iloaina lelei o le tulaga teena ma le faapuapuagatiaina.” Ua faapea mai atili: “E faalagolago le ogaoga o se faasalaga ma le faapuapuagatiaina i seoli i le matuiā o agasala na faia i le lalolagi.”

O lea, pe o seoli ea o se nofoaga e iai se afi e faapuapuagatia ai e faavavau po o se nofoaga e faatamaʻia ai atoatoa? Po ua na o se tulaga o le vavaeesea mai le Atua? O le ā moni lava seoli?

[Pusa/Ata i le itulau 4]

O se Talaaga Puupuu o le Afi o Seoli

O ANAFEA na taliaina ai e i latou ua faapea mai o Kerisiano le talitonuga o le afi i seoli? Ina ua mavae se vaitaimi umi talu ona maliliu Iesu Keriso ma ona aposetolo. Ua faapea mai le Encyclopædia Universalis faa-Falani: “O le Faaaliga a Peteru (senituri lona lua T.A.) le uluaʻi tusitusiga [e lē faagaeeina] a Kerisiano lea na faamatalaina ai le faasalaga ma le faataugāina o tagata agasala i seoli.”

Peitaʻi, na iai se finauga a uluaʻi Faatamā o le Lotu e faatatau i seoli. Na talitonu Iasona Maturo, o Clement o Alesania, Tetuliano, ma Cyprian e faapea o seoli o se nofoaga e iai se afi. Na manatu Origen ma le faifeʻau o Kelekolio o Nyssa e faapea o seoli ua pei o se tulaga o le vavaeesea mai le Atua—e faapuapuagatiaina ai faaleagaga. I le isi itu, na taofi Aokusotino o Hippo, o le faapuapuagatiaina i seoli e faaleagaga ma faaletino—o se manatu na iʻu ina taliaina e le toʻatele. Na tusi mai le polofesa J.N.D. Kelly e faapea: “I le senituri lona lima na salalau atu ai i nofoaga uma le aʻoaʻoga matuiā e faapea e lē toe mauaina e tagata agasala se isi avanoa pe a mavae lenei olaga, ma o le afi lea o le a faapuapuagatia ai i latou o le a lē taitai ona pe.”

I le senituri lona 16, o tagata ia na amataina le lotu Porotesano e pei o Matini Luteru ma Ioane Kalavini, na malamalama o le afi i seoli e faatusa atu lea i le vavaeesea mai le Atua e faavavau. Peitaʻi, i senituri e lua mulimuli ane na toe foʻi mai ai le talitonuga, o seoli o se nofoaga e faapuapuagatia ai. O le faifeʻau Porotesano o Ionatana Eteuati sa masani ona ia faamataʻuina tagata sa nonofo faa-Kolone ai i Amerika i le senituri lona 18 i faamatalaga taufaafefe iā seoli.

E ui i lea, e leʻi umi lava mulimuli ane, ae amata loa ona fai ifo ma galo atu le talitonuga i le afi i seoli. Ua faapea mai le U.S. News & World Report: “O le senituri lona 20 sa toetoe lava a mou atu ai le aʻoaʻoga o le afi i seoli.”

[Ata]

Na talitonu Iasona Maturo o seoli o se nofoaga e iai se afi

Na aʻoaʻoina e Aokusotino o Hippo e faapea o le faapuapuagatiaina i seoli e faaleagaga ma faaletino