Aafiaga o le Pulea e Talitonuga Faanuupō

O LE lua fetaui tutū ma se tasi a o e alu ese atu ma lou fale. O le tuʻia o lou tamatamaʻivae i se maa. O le tagi o se manu patino i le pō. O sau miti ua fai soo. Ua na o ni mea masani ma e lē leaga ia i le toʻatele. Ae e iai ni tagata patino o Aferika i Saute, e manatu i nei mea o ni faailoga, o ni sāsā, po o ni feʻau mai le nofoaga o agaga. E faalagolago le lelei po o le leaga o se mea o le a tupu, i le faailoga ma lona faauigaga.

O le mea moni, ua iai foʻi talitonuga faanuupō maumaututū i isi nofoaga e ese mai ma Aferika. E ui i le tele o tausaga na ola aʻe ai i atunuu ua aloaʻia ai le lē talitonu i se Atua, ae ua iai se aofaʻiga tele o tagata i Saina ma malō sa avea muamua ma le Soviet Union o loo maumauaʻi pea i talitonuga faanuupō. I atunuu i Sisifo, e saʻili ai tagata i o latou fetu, e matuā popole pe a paʻū tonu se Aso Faraile i le aso 13 o se masina, ma e ʻalofia le latalata i se pusi lanu uliuli. O nisi tagata o loo nonofo i Mātū Mamao e manatu i le malama o le itu i mātū o se faailoga o taua ma oge. I Initia, ua salalau atu ai le AIDS ona o le talitonuga o ave loli e faapea, e manaʻomia ona latou faia feusuaʻiga faaleituaiga e faamālū ai o latou tino i aso vevela. I Iapani, e talitonu tagata e eliina auala i lalo o le palapala e faapea e leaga le ui o se fafine i le auala a o leʻi māeʻa ona faia. Ua taatele foʻi talitonuga faanuupō i taaloga faapolofesa. Na manatu se tasi tagata taaalo voli polo o le faia o ona totini lanu uli ae lē o totini lanu papaʻe na māfua ai ona mālō faalausosoo. E anoanoaʻi foʻi isi mea.

Ae e faapefea oe? Po o iai se mea o e mataʻu ai e lē o faailoa pe e lē mafai ona faamatalaina? Po o e aafia i se “talitonuga, sina talitonuga, po o se tū masani lea ua lē mafai e se isi ona faamatalaina”? E mafai ona iloa i lau tali, auā o le faauigaga lenā o le faaupuga talitonuga faanuupō.

O se tasi e lotomalie e faaaafia ana filifiliga ma lona olaga masani i faiga faanuupō, ua ia faatagaina o ia e pulea e se mea e lē o malamalama i ai. Pe e atamai ea lenā mea? Pe e tatau ona tatou gauaʻi atu i na taaʻiga e lē malamalama i ai ma atonu e leaga? Po o faiga faanuupō ua na o se vaivaiga e faalētāua po o se faamataʻuga mataʻutia?