Fesili Mai le ʻAufaitau

Pe na iloa e Apelu sa manaʻomia ona faia se taulaga i se manu ina ia mauaina ai le finagalo malie o le Atua?

E puupuu lava le faamatalaga a le Tusi Paia e faatatau i le ofoina atu o taulaga a Kaino ma Apelu. I le Kenese 4:3-5, e tatou te faitau ai e faapea: “Ua oo ina atoa o aso, ona avatu ai lea e Kaino o le fua o le fanua o le taulaga ia Ieova. A o Apelu, ua ia avatu foi uluai tama a lona lafu, o e pepeti ai lava. Ua silasila mai Ieova ia Apelu, atoa ma lana taulaga; a e peitai o Kaino ma lana taulaga, ua ia le silasila i ai.”

E lē o taʻua i le Tusi Paia e faapea sa taʻuina atu muamua e Ieova ni faamatalaga patino e faatatau i taulaga, po o le ā foʻi le ituaiga o taulaga o le a ia taliaina a o leʻi oo ina faia lenā mea. O lea, e foliga mai ai na faia e Kaino ma Apelu a laʻua lava taulaga e tusa ma mea na la filifili e fai ai. Na taofia i laʻua mai le oo atu i le Parataiso na avea ma aiga o o laʻua mātua; na amata ona la faalogoina āuga o le agasala; ma sa vavaeesea i laʻua mai le Atua. I lo la tulaga agasala ma le lē fiafia, atonu na la lagona ai le matuā manaʻomia ona la liliu atu i le Atua mo se fesoasoani. O le ofoina atu i le Atua o se meaalofa sa pei o sa laʻua lava galuega tauofo e mauaina ai le finagalo malie o le Atua.

O le iʻuga, na taliaina le taulaga a Apelu e le Atua, ae e leʻi taliaina le taulaga a Kaino. Aiseā? Pe ona sa ofoina atu e Apelu mea e talafeagai ae sa leʻi faia faapea e Kaino? E lē mafai ona tatou mautinoa pe na aafia ai le ituaiga o taulaga, talu ai e leai se isi o i laʻua na taʻu atu i ai po o le ā le taulaga sa taliaina ae o le ā le taulaga sa lē taliaina. Peitaʻi, e foliga mai sa taliaina uma lava taulaga. I le tulafono lea na mulimuli ane avatu e Ieova i le nuu o Isaraelu, o taulaga na taliaina sa aofia ai e lē gata o taulaga sa faia i manu po o vaega o manu, ae faapea foʻi meaʻai na tunuina, o fusi saito, o le falaoa lelei, meaʻai na taoina, ma le uaina. E foliga mai la, e lē na o mea ia na faia ai taulaga na māfua ai ona taliaina e le Atua le tasi taulaga ae teena le isi.—Faatusatusa Isaia 1:11; Amosa 5:22.

I senituri mulimuli ane ai, na taʻua ai faapea e le aposetolo o Paulo: “O le faatuatua na avatu ai e Apelu i le Atua le taulaga e sili ona lelei i lo Kaino; ona o lea ua taʻua ai o ia ua amiotonu, o loo taʻuleleia ana taulaga e le Atua.” (Eperu 11:4) O lea, ona o le faatuatua o Apelu na iloa ai o ia o sē ua taʻuamiotonuina e le Atua. Ae o le faatuatua i le ā? O le faatuatua i le folafolaga a Ieova o le a ia saunia le Fanau, lea o le a na ‘tuʻimomomoina le ulu o le gata,’ ma toe faafoʻisia le filemu ma le lelei atoatoa lea na mauaina muamua e le tagata. I le fuaitau o le a ‘tuimomomoina le mulivae’ o le Fanau, atonu na manatu ai Apelu sa manaʻomia se taulaga e aofia ai le faamasaaina o le toto. (Kenese 3:15) E ui i lea, o le mea moni lava ia o le faaalia o le faatuatua o Apelu na avea ai lana taulaga ma “taulaga e sili ona lelei i lo Kaino.”

I le teenaina foʻi o Kaino, e lē ona e faapea na ia ofoina atu se ituaiga o taulaga sa lē talafeagai, ae ona sa leai sona faatuatua, e pei ona faaalia i ana gaoioiga. Na faamanino atu e Ieova iā Kaino e faapea: “Pe afai e te amio lelei e te le maua ea le fiafia?” (Kenese 4:7) Sa leʻi teena e le Atua Kaino ona o se lē fiafia i lana taulaga. Na i lo lenā, “ona o lana amio ina leaga,” e faailoa mai i lona fuā, le ʻinoʻino, ma fasiotia le tagata mulimuli ane ai, na teena ai e le Atua Kaino.—1 Ioane 3:12.