Ia Faagaeeina e Ala i “Mea Matagofie a le Atua”

“Ua tatou faalogo atu ia te i latou o loo tautala mai i a tatou lava gagana e uiga i mea matagofie a le Atua.”—GALUEGA 2:11, NW.

1, 2. O le ā le mea e maofa ai na tupu i Ierusalema i le Penetekoso 33 T.A.?

I SE tasi o taeao i le tau e totogo ai mea i le tausaga e 33 T.A., na tupu ai se mea uiga ese i se vaega o tane ma fafine, o soo o Iesu Keriso sa faapotopoto i se fale o se aiga i Ierusalema. “Ona faafuaseʻi mai lea o le taalili mai le lagi, peiseai o le matagi ua agi tele mai, ua tumu uma ai le fale sa latou nonofo ai. Ua iloa foi e i latou o laulaufaiva peiseai o le afi . . . , Ua faatutumuina foi i latou uma i le Agaga Paia, ua afua ai ona tautala i gagana eseese.”—Galuega 2:2-4, 15.

² Sa potopoto atu se vaega toʻatele o tagata i luma o le fale. Sa aofia ai iā i latou na, ia ni tagata Iutaia sa fananau i isi atunuu, o “e ua matatau i le Atua” o ē na o mai i Ierusalema e faamanatu le tausamiga o le Penetekoso. Sa latou maofa auā na latou taʻitoʻatasi ma faalogo atu i le ʻausoo o tautatala mai i a latou gagana “e uiga i mea matagofie a le Atua.” Sa faapefea ona mafai o lenā mea ae o ē sa tautatala mai o tagata Kalilaia?—Galuega 2:5-8, 11.

3. O le ā le feʻau sa momoliina atu e le aposetolo o Peteru i le Penetekoso?

³ O se tasi o na tagata Kalilaia o le aposetolo o Peteru. Sa ia faamatala atu e faapea i ni nai vaiaso muamua atu, sa fasiotia ai Iesu Keriso e tagata  faalētaupulea. Peitaʻi, ua toe faatūina e le Atua lona Alo mai i le oti. Ina ua mavae lenā, sa faaali atu Iesu i le tele o ona soo, e aofia ai Peteru ma isi o loo faatasi ai i lea aso. I le na o le sefulu aso muamua atu, na toe afio aʻe ai Iesu i le lagi. O ia lea na liligiina ifo le agaga paia i luga o ona soo. Pe sa iai ea se uiga o lenei mea iā i latou sa faamanatuina le Penetekoso? Ioe, sa iai moni lava. O le maliu o Iesu na faataatia ai le faavae mo i latou e maua ai le faamagaloga mo a latou agasala ma ia maua “le mea foai fua mai, o le Agaga Paia lea” pe a latou faatuatua iā te ia. (Galuega 2:22-24, 32, 33, 38) Sa faapefea la ona tali mai i latou sa matamata ane i “mea matagofie a le Atua” sa latou faalogo i ai? E mafai faapefea i lenei mea ona fesoasoani iā i tatou e toe fetuunaʻi ai la tatou lava auaunaga iā Ieova?

Na Uunaʻia e Faia ni Gaoioiga!

4. O le ā le valoaga a Ioelu sa faataunuuina i le aso o le Penetekoso 33 T.A.?

⁴ Ina ua latou maua le agaga paia, sa vave lava ona gaoioi soo sa i Ierusalema i le taʻuina atu o le tala lelei o le faaolataga i isi, na amata lava i le motu o tagata sa potopoto ai i lenā taeao o le Penetekoso. O le latou talaʻiga sa faataunuuina ai se valoaga mataʻina, sa tusia i le valu senituri muamua atu e Ioelu, le atalii o Petuelu: “E iu ina ou liligi ifo ai loʻu Agaga i luga i tagata uma; ona perofeta ai lea o outou atalii ma o outou afafine, e fai miti o outou toeaina, e iloa faaaliga e o outou taulelea. Ou te liligi ifo foi loʻu Agaga i auauna ma auauna fafine . . . i le oo ai i le aso tele ma le silisili o Ieova.”—Ioelu 1:1; 2:28, 29, 31; Galuega 2:17, 18, 20.

5. I le ā le uiga sa vavalo ai Kerisiano i le uluaʻi senituri? (Tagaʻi i le faaopoopoga.)

⁵ Pe o le uiga ea o lenei mea e faapea o le a toe faatutū mai e le Atua ia perofeta uma, o tamāloloa atoa ma fafine, e pei o Tavita, Ioelu, ma Tepora, ma faaaogā i latou e valoiaina mea e tutupu i le lumanaʻi? E leai. O ‘atalii ma afafine Kerisiano, ma auauna tane ma auauna fafine’ o le a perofeta ane i le uiga e faapea, o le a uunaʻia i latou e le agaga o Ieova e faalauiloa “mea matagofie” ua faia e Ieova ma o le a faaauau pea ona ia faia. O lona uiga o le a latou auauna o ni fofoga taumomoli mo Lē e Silisili Ese. * Sa faapefea la ona tali mai le motu o tagata?—Eperu 1:1, 2.

6. Ina ua faalogo atu i le lauga a Peteru, o le ā na uunaʻia ai le toʻatele e fai?

⁶ Ina ua uma ona faalogologo atu le toʻatele i le faamalamalamaga a Peteru, na uunaʻia ai le toʻatele o i latou e gaoioi. Sa latou “talia lana upu ma le fiafia” ma “papatisoina . . . o lea aso foi ua faaopoopoina ai pe tolu afe o tagata.” (Galuega 2:41) I le avea ai o ni tagata Iutaia faaletino ma ni Iutaia liulotu, ua uma la ona iai so latou poto faale-Tusi Paia. O le poto la lenā ua faaopoopo i ai ma le faatuatua i mea sa latou aʻoaʻoina mai iā Peteru, na saunia ai mo i latou le faavae ina ia papatiso ai “i le suafa o le Tamā, ma le Atalii, ma le Agaga Paia.” (Mataio 28:19) Ina ua mavae lo latou papatisoga sa latou “tumau pea . . . i le aʻoaʻoga a le au aposetolo.” I le taimi lava e tasi, na amata ai ona latou taʻu atu i isi lo latou faatuatuaga fou ua maua. O le  mea moni lava ia, na “latou nonofo pea ma le loto gatasi i le malumalu i lea aso ma lea aso, . . . vivii atu i le Atua, ma ua alofaina e le nuu uma lava.” O le iʻuga o lenei galuega molimau atu, “ua faaopoopoina i le ekalesia e le Alii [Ieova] i aso fai soo o e ua faaolaina.” (Galuega 2:42, 46, 47) Sa vave ona faatutū aʻe faapotopotoga Kerisiano i le tele o vaipanoa sa iai nei tagata faatoʻā talitonu. E lē taumatea o se tasi o māfuaaga o lenei faatelega, i sona vaega, ona o a latou taumafaiga maelega e talaʻi le “tala lelei” ina ua latou toe foʻi i o latou aiga.—Kolose 1:23.

O Loo Ola le Afioga a le Atua

7. (a) O le ā ua tosina ai tagata o nuu uma i le faalapotopotoga a Ieova i aso nei? (e) O ā ni avanoa mo ni faatelega atili o loo e iloa i le fanua i le lalolagi atoa, faapena ma lou vaipanoa? (Tagaʻi i le faaopoopoga.)

⁷ Ae faapefea i latou o loo faanaunau e avea ma auauna a le Atua i aso nei? E manaʻomia foʻi e i latou na ona suʻesuʻeina ma le faaeteete le Afioga a le Atua. A o latou faia faapea, o le a latou iloa ai Ieova o ia o se Atua o lē e “alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6; Galuega 13:48) O le a latou aʻoaʻoina ai e faatatau i le sauniuniga agalelei a Ieova o le togiola e ala iā Iesu Keriso, lea o lona toto maligi e mafai ona faamamāina ai i latou mai i a latou agasala. (1 Ioane 1:7) O le a faafiafiaina foʻi i latou i lo latou iloaina o le fuafuaga a le Atua o le a “toe tutū mai e ua amiotonu atoa ma e ua amioletonu.” (Galuega 24:15) E faatumulia o latou loto i le alofa mo lē e Pogai mai ai nei “mea matagofie” ma uunaʻia ai i latou e talaʻi atu nei upu moni tautele. Ona avea ai loa lea o i latou ma auauna tuuina atu ma papatisoina a le Atua, ma faaauau ai ona ‘tupu pea lo latou iloa lelei o le Atua.’ *—Kolose 1:10e; 2 Korinito 5:14.

8-10. (a) E faapefea i le mea na tupu i se tasi fafine Kerisiano ona faamaonia ai e faapea “o loo matua galue” le Afioga a le Atua? (e) O le ā ua aʻoaʻoina ai oe mai lenei mea na tupu, e faatatau iā Ieova ma le auala e feutagaʻi ai ma ana auauna? (Esoto 4:12)

⁸ O le poto lea e maua mai e auauna a le Atua i lo latou suʻesuʻeina o le Tusi Paia, e lē na o se poto e faataʻetaʻealuga. O lenā poto ua uunaʻia ai o latou loto, ua suia ai o latou ala e mafaufau ai, ma o lenā poto ua tumau iā i latou. (Eperu 4:12) Mo se faaaʻoaʻoga, o se fafine e suafa iā Camille sa faigaluega o sē e tausia tagata matutua. O se tasi o tagata sa ia tausia o Mareta, o se tasi o Molimau a Ieova. Talu ai sa matuā aafia lava Mareta i le dementia [po o le maʻi e faaletonu le mafaufau], sa manaʻomia ai ona vaavaaia o ia e lē aunoa. Sa manaʻomia ona faamanatu iā te ia e ʻai—e oo lava i le foloina o meaʻai. Peitaʻi, e tasi le mea sa leʻi faigofie ona galo i le mafaufau o Mareta, lea o le a seʻi o tatou uaʻi atu i ai.

⁹ I se tasi aso sa mātauina ai e Mareta ia Camille o maligi ona loimata i le mafatia i ni ona faafitauli. Sa tago atu Mareta ua opo mai Camille ma valaaulia o ia la te suʻesuʻeina ma ia le Tusi Paia. Peitaʻi pe e mafai e se tagata e pei ona iai Mareta ona faia se suʻesuʻega faale-Tusi Paia? Ioe, na te mafaia! E ui lava ua ia lē toe manatuaina le tele o mea, e leʻi galo iā Mareta lona Atua matagofie; e na te leʻi faagaloina foʻi upu moni tautele sa ia aʻoaʻoina mai i le Tusi Paia. Pe a fai le suʻesuʻega, e fai atu Mareta iā Camille e faitau palakalafa taʻitasi, faitau uma ma mau o loo sii mai, faitau le fesili i le pito i lalo o le itulau, ona tali lea o le fesili. Sa la faia faapea mo sina taimi, ma e ui lava e tapulaa mea e mafai ona fai e Mareta, ae na mafai ona agaʻigaʻi i luma Camille i le poto o le Tusi Paia. Sa iloa e Mareta e manaʻomia ona faatasitasi Camille ma isi o ē o loo fiafia i le auaunaga i le Atua. Ona o lenā tulaga, sa ia avatu ai i lana tagata aʻoga se ofu ma se pea seevae, ina ia iai ni laʻei talafeagai e laʻeiina e Camille a o auai atu i lana uluaʻi sauniga i le Maota o le Malo.

¹⁰ Sa faagaeetia Camille i le alofa naunau o Mareta, o lana faaaʻoaʻoga, ma lona talitonuga maumauaʻi. Na tonu i le manatu o Camille e  faapea o mea o loo taumafai Mareta e aʻoaʻo ai o ia mai le Tusi Paia e matuā tāua lava, auā ua matuā galo lava iā Mareta toetoe lava o mea uma seʻi vaganā ai mea na ia aʻoaʻoina mai le Tusi Paia. Mulimuli ane, ina ua siitia atu Camille i se isi nofoaga mo tagata matutua e faigaluega ai, sa ia iloa ua oo i le taimi mo ia e fai ai sana gaoioiga. O le avanoa muamua lava na ia maua, na ia savali atu ai i totonu o le Maota o le Malo, o loo ia laʻeiina le ofu ma seevae ia sa avatu e Mareta iā te ia, ma talosaga atu mo se suʻesuʻega faale-Tusi Paia. Sa lelei le agaʻigaʻi i luma o Camille ma iʻu ai ina papatiso.

Ua Faagaeeina e Faaali Atu Tapulaa a Ieova

11. E faaopoopo atu i le maelega i le galuega talaʻi, e faapefea ona tatou faataʻitaʻiina atu ua uunaʻia i tatou e le feʻau o le Malo?

¹¹ I aso nei, e sili atu i le ono miliona Molimau a Ieova o ē e pei o Mareta ia ma Camille e pei ona iai i le taimi nei, o loo talaʻia le “tala lelei o le Malo” i le lalolagi atoa. (Mataio 24:14; 28:19, 20) E pei lava o Kerisiano i le uluaʻi senituri, ua matuā faagaeetia lava i latou i “mea matagofie a le Atua.” Ua latou talisapaia le faaeaga o le tauaveina o le suafa o Ieova ma ua ia liligiina mai lona agaga i luga iā i latou. I le ōgatasi ai ma lea tulaga, ua latou faia ai taumafaiga uma lava ina ia “savavali e tusa ma le Alii, ina ia fiafia mai o ia,” ma faatatauina ana tapulaa i vala uma o o latou olaga. E aofia ai i mea o loo manaʻomia, o le iai lea o le faaaloalo i tapulaa a le Atua e faatatau i laʻei ma teuga.—Kolose 1:10a; Tito 2:10.

12. O le ā le fautuaga patino i laʻei ma teuga o loo faamauina i le 1 Timoteo 2:9, 10?

¹² Ioe ua faatulaga e Ieova tapulaa e faatatau i o tatou foliga vaaia. Na taʻua e le aposetolo o Paulo nisi o mea e faafinagaloina e le Atua i lenei tulaga. “Ia faapea foi fafine, ia latou teuteu ia i latou i ofu e onomea, ma ia le teuanoai, a ia faamatuāfafine; aua neʻi teteu ma le lauulu  fili, po o auro, po o penina, po o ofu tau tele, a o galuega lelei, o le mea lea e tatau i fafine ua taʻua latou e i latou o e amio Atua.” * O le ā tatou te aʻoaʻoina mai i nei upu?—1 Timoteo 2:9, 10.

13. O le ā le uiga o le “ofu e onomea”? (e) Aiseā tatou te fai atu ai e lē faigatā ona mulimuli i tapulaa a Ieova?

¹³ Ua faaalia i upu a Paulo e ao i Kerisiano ona “teuteu ia i latou i ofu e onomea.” E latou te lē faatalalē, po o le tupalapalā, pe lē teua lelei o latou foliga vaaia. E mafai e tagata uma lava, e oo lava iā i latou e lē tagolima, e mafai ona latou ausia na tapulaa e ala i le faamautinoa ua mamā o latou laʻei, teuteu lelei, ma ia i se tulaga talafeagai. Mo se faaaʻoaʻoga, i tausaga taʻitasi i se tasi o atunuu i Amerika i Saute, e savavali ai Molimau a Ieova mo le tele o maila e ui atu i se vaomatua ona toe malaga lea mo ni itula i ni paopao ina ia auai i la latou tauaofiaga itumalo. O ni tulaga e masani ai le ono paʻū o se tasi i le vaitafe po o le lāvea ma masae se ofu o se tasi i le togāvao aʻo alu le malaga. E oo ane la i le taimi e taunuu ai le ʻauusufono i le mea e fai ai le tauaofiaga, e masani lava o le taimi lea ua veʻuveʻua ma lē teua o latou foliga. Latou te faaalu le taimi e suʻi ai ni faamau o o latou ofu, o ni sipi ua matala, ma tatā ma auli ia laʻei o le a latou faaaogāina i le tauaofiaga. Latou te faatāuaina lo latou valaaulia e aai i le laoʻai a Ieova, ma latou te mananaʻo ia laʻei e talafeagai ai.

14. O le ā lona uiga o le oofu ma le “le teuanoai, a ia faamatuāfafine”? (e) O le ā e aofia ai pe a tatou oofu e ‘pei o tagata o e amio Atua’?

¹⁴ Sa faaalia atili e Paulo e faapea e ao ona tatou “ le teuanoai, a ia faamatuāfafine” pe a fai laʻei. O le uiga o lenei mea e lē tatau ona faalialiavale o tatou foliga vaaia, soona fai pe faatosina, e faaaliali uma atu nisi vaega o le tino ia po o le teu anoaʻi. E lē gata i lenā, e ao ona tatou oofu i se uiga e atagia atu ai le ‘faamamalu i le Atua.’ Ua taʻu mai e lenei mea iā i tatou se manatu e tomanatu i ai, a ea? E lē faapea seʻiloga e auai i sauniga a le faapotopotoga ona fai faalelei lea o laʻei ae faatalalē iai i le tele o taimi. E ao i o tatou foliga vaaia ona atagia atu ai e lē aunoa se mataʻu i le Atua, se uiga faamamaluina ona o i tatou o faifeʻau Kerisiano mo le 24 itula i le aso. E manino lava la, pe tatou te ō e faigaluega pe ō i le aʻoga e ao ona tatou laʻei e talafeagai ai. Peitaʻi, e ao lava ona tatou laʻei ia onomea ma i se tulaga mamalu. Afai e atagia atu i o tatou laʻei i taimi uma o tatou talitonuga i le Atua, o le a tatou lē faatalatū e molimau atu lē fuafuaina ona o le māasiasi i o tatou foliga vaaia.—1 Peteru 3:15.

“Aua Tou te Mananao i le Lalolagi”

15, 16. (a) Aiseā e tāua ai lo tatou ʻalofia o le faataʻitaʻi atu i le lalolagi i laʻei ma teuga? (1 Ioane 5:19) (e) O ā māfuaaga aogā e ao ai ona tatou ʻalofia āʻega i laʻei ma teuga?

¹⁵ O loo iai foʻi taʻiala i a tatou filifiliga o laʻei ma teuga i le fautuaga o loo faamauina i le 1 Ioane 2:15, 16. Tatou te faitau ai e faapea: “Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi,  e le o ia te ia le alofa i le Tamā. Auā o mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia, a e mai le lalolagi.”

¹⁶ Maʻeu le talafeagai o lenā fautuaga! I lenei vaitau ua matuā malosi ai tele omiga mai i ē e tupulaga faatasi, e lē tatau lava ona tatou faatagaina le lalolagi e pulea a tatou filifiliga o laʻei. Ua matuā paʻū maulalo lava le tulaga o laʻei ma teuga i tausaga talu ai nei. E oo lava i laʻei e faaaogā e le aufaipisinisi ma tagata faigaluega lelei e lē atagia mai ai i taimi uma tulaga e talafeagai mo Kerisiano. O se isi lenei māfuaaga e ao ai ona tatou manatu mamafa i le manaʻoga ina ia “aua . . . tou te amio faatasi ma lenei lalolagi” pe afai o le a tatou ola e tusa ma tapulaa a le Atua ma “viia ai i mea uma lava . . . le aʻoaʻoga a le Atua lo tatou Faaola.”—Roma 12:2; Tito 2:10.

17. (a) O ā fesili e ao ona tatou iloiloina pe a tatou faatauina ni laʻei po o le filifilia o se sikaili? (e) Aiseā e ao ai i ulu o aiga ona manatu mamafa i foliga vaaia o sui taʻitasi o le aiga?

¹⁷ A o leʻi faia se faaiʻuga pe e faatau se ituaiga o laʻei, e atamai le fesili ifo iā te oe: Aiseā ua ou fiafia ai i lenei ituaiga o laʻei? Pe o mātaulia ai ea se tagata faafiafia lauiloa—se tasi ou te fiafia i ai? Pe o mātauina ai ni tagata o se keni faatupu faalavelave, po o se vaega o ni tagata o loo faaauilumaina se agaga fia tutoʻatasi ma le fouvale? E ao foʻi ona tatou tagaʻi totoʻa i ofu. Afai o se ofu i luga po o se sakete, o faapefea mai le umī? E faapefea lona fua? Pe e onomea le ofuina, e i se tulaga talafeagai ma faaaloalogia, pe e fufusi, faatosina, pe matagā foʻi? Fesili ifo iā te oe, ‘Pe e faapogaia ai ea le tausuai i loʻu ofuina o lenei ofu?’ (2 Korinito 6:3, 4) Aiseā e ao ai ona tatou manatu mamafa i lenā mea? Auā fai mai le Tusi Paia: “O Keriso lava e lei faafiafia o ia i lona lava finagalo.” (Roma 15:3) E ao la i ulu o aiga Kerisiano ona manatu mamafa i foliga vaaia o tagata o le aiga. Ona o le faaaloalo i le Atua mamalu lea o loo latou tapuaʻi i ai, e ao i ulu o aiga ona aua neʻi faatalatū mai i le ofoina atu o fautuaga maumauaʻi, ma le alofa pe a manaʻomia le faia faapea.—Iakopo 3:13.

18. O le ā ua uunaʻia ai oe e matuā uaʻi atu ma le faaeteete i ou laʻei ma teuga?

¹⁸ O le feʻau lea o loo tatou tauaveina e sau mai iā Ieova, o se e mamalu ma paia. (Isaia 6:3) Ua pulunaunauina i tatou e le Tusi Paia ina ia faaaʻoaʻo iā te ia “faapei o le fanau pele.” (Efeso 5:1) E mafai e o tatou laʻei ma teuga ona iai ni āuga lelei po o le leaga i lo tatou Tamā faalelagi. E mautinoa lava tatou te mananaʻo e faafiafia lona finagalo!—Faataoto 27:11.

19. O ā aogā e maua mai i le faalauiloaina o “mea matagofie a le Atua” i isi?

¹⁹ O le ā sou manatu e faatatau i “mea matagofie a le Atua” lea ua e aʻoaʻoina? O le mea moni lava ia, maʻeu se manuia ua tatou maua ona ua aʻoaʻoina le upu moni! Ona ua tatou faatuatua i le toto maligi o Iesu Keriso, ua faamagaloina a tatou agasala. (Galuega 2:38) O le iʻuga, ua tatou maua ai le saʻolotoga e tautala ai i luma o le Atua. Tatou te lē fefefe i le oti e pei ona iai iā i latou e leai se faamoemoe. Na i lo lenā, ua iā i tatou le faamautinoaga a Iesu e faapea i se aso “e faalogo ai i lona leo o i latou uma ua i tuugamau, ma latou o mai ai.” (Ioane 5:28, 29) Ua agalelei mai Ieova e ala i le faailoaina mai o nei mea uma iā i tatou. E faaopoopo atu i lenā, ua ia liligiina mai lona agaga paia iā i tatou. O lea la, o le lotofaafetai mo nei meaalofa lelei uma e ao ona uunaʻia ai i tatou e faaaloalogia ana tapulaa maualuluga ma vivii iā te ia ma le maelega, i le faalauiloaina o nei “mea matagofie” i isi.

[Faamatalaga pito i lalo]

O le a Faapefea Ona E Tali?

• O ā “mea matagofie” sa faalogo i ai tagata i le Penetekoso 33 T.A., ma sa faapefea ona latou tali atu?

• E faapefea ona avea se tasi ma soo o Iesu Keriso, ma o ā mea e aofia ai i le avea ma soo?

• Aiseā e tāua ai mo i tatou ona uaʻi totoʻa atu i o tatou laʻei ma teuga?

• O ā mea e ao ona iloiloina pe a filifili pe talafeagai se ofu po o se sikaili?

[Fesili mo le Suʻesuʻega]

[Ata i le itulau 15]

Na folafola atu e Peteru ua toe faatūina mai Iesu na i le oti

[Ata i le itulau 17]

Pe e faaatagia atu ea ma le talafeagai i ou foliga vaaia ia le Atua o loo e tapuaʻi i ai?

[Ata i le itulau 18]

E ao i mātua Kerisiano ona manatu mamafa i foliga vaaia o tagata o le aiga