Lipoti a Ē Faalauiloa le Malo

‘O Loo Matuā Galue Malosi le Afioga a le Atua’

I LE motu e susulu ai pea le lā i le Karipeane, o Jamaica, o le toʻatele o tagata e masani i le Tusi Paia. O le mea moni, e toetoe lava tofu aiga uma ma se kopi o le Tusi Paia faa-Peretania o le King James Version, ma ua iloa e nisi tagata e faapea, “o loo ola le afioga a le Atua, o loo matuā galue [malosi] foi.” (Eperu 4:12) O lenei malosi e mafai ona suia ai olaga, e pei ona faaalia mai i le mea lenei na tupu.

Na seʻi faatoʻā foʻi atu lava i lona aiga mai le galuega se tamāloa e suafa iā Cleveland, ae asiasi atu loa i ai se tasi o Molimau a Ieova. Ina ua uma ona talanoa i ni manatu mai le Tusi Paia, ona alu loa lea o le Molimau ae tuu ai se tusi faale-Tusi Paia o Le Poto e Taʻitaʻia ai i le Ola e Faavavau. Sa matuā lē iloa lava e Cleveland i lenā taimi le tele o le a suia ai e le malosi o le Afioga a le Atua lona olaga.

Sa masani ona tatalo Cleveland e faatolu i le aso, e talosaga atu ai i le Atua ina ia fesoasoani iā te ia e mauaina le auala saʻo e tapuaʻi atu ai iā te Ia. Na mautinoa e Cleveland e faapea, e leʻi saʻo le auala na tapuaʻi ai ona mātua, ae ina ua uma ona suʻesuʻe i isi lotu, sa lē faamalieina ai o ia. E ui lava sa faalogo o ia e uiga i Molimau a Ieova, ae sa masalosalo o ia pe faamata o loo iā i latou le upu moni. E ui lava i ona lagona lē mautonu, ae na ioe Cleveland e suʻesuʻe le Tusi Paia ma Molimau ia na asiasi atu i lona fale. Aiseā? Talu ai sa manaʻo o ia e faamaonia le sesē o Molimau!

E leʻi pine lava ae iloa e Cleveland e faapea, o faiā lē mamā sa ia faia ma ni fafine se toʻalua, sa lē fiafia i ai le Atua. (1 Korinito 6:9, 10) Ina ua uma le na o le lua o suʻesuʻega, na maua ai loa e Cleveland le lototele e faamutaina ai ana faiā ma nei fafine. Sa amata foʻi ona ia auai i sauniga faa-Kerisiano i le Maota o le Malo. Ae sa avea foʻi lenei mea o se isi tofotofoga.

Sa matuā aafia lava ia Cleveland i le ʻausoka a lo latou nuu, ma o ana taaloga sa faalavelavea ai lona auai i sauniga. O le ā se mea o le a ia faia? E ui lava i le matuā tele o omiga mai ana aumea i le ʻau, le faiaʻoga, ma uō, ae na filifili lava Cleveland e faamavae mai le ʻausoka. Ioe, sa amata ona avatu e le Afioga a le Atua le malosi na taaʻina ai o ia e faia mea lelei!

Sa oo ina toe faaalia foʻi le malosi o le Afioga a le Atua ina ua amata ona talaʻi atu e Cleveland le poto o le Tusi Paia i isi. (Galuega 1:8) O le iʻuga, sa amata ona auai i sauniga a Molimau a Ieova isi o ana uō muamua e toʻalua i le ʻau. Ina ua agavaa Cleveland e avea ma tagata talaʻi o le tala lelei, sa matuā olioli o ia i le faiva i le faaaogāina o le Afioga a le Atua e fesoasoani ai i isi.

I le faaauau pea ona uunaʻia e le malosi o le Afioga a le Atua, na iʻu ai ina faailogaina e Cleveland lona tuuina atu iā Ieova e ala i lona papatisoga i le vai ma maua le faaeaga e auauna ai o se faifeʻau faataimi atoa, ma avea foʻi o se auauna o le faiva i le faapotopotoga.

I Jamaica ma le lalolagi atoa, e faitau afe tagata ua latou aʻoaʻoina e faapea, e moni lava, “o loo ola le afioga a le Atua, o loo matuā galue [malosi] foi.”

[Faafanua/Ata i le itulau 8]

(Tagaʻi i le lomiga mo le ata atoa)

JAMAICA

[Faamatalaga i Ata]

Faafanua ma le kelope: Mountain High Maps® Copyright © 1997 Digital Wisdom, Inc.