E Faapefea e le Tomai e Mafaufau ai Ona Puipuia Oe?

O SE vaaiga e maofa ai le fafati maualuluga mai o galu, ae i seila e latou te manatu e mataʻutia. O na galu tetele e mafai ona maumau ai o latou ola.

E faapena ono fesagaʻia e auauna a le Atua ni omiga tugā e mafai ona lofitūina ai i latou. Atonu ua e mātauina le faalausosoo mai o faafitauli ma tofotofoga ua lofia ai Kerisiano. E mautinoa e te manaʻo e faafetaiaʻia ma le tonu, le maumauaʻi lea e ʻalofia ai le faavaatuʻia faaleagaga. (1 Timoteo 1:19) O se vaega tāua la o lau tali atu, o le iai lea o le tomai e mafaufau ai. O le ā lenā tomai, ma e faapefea ona maua?

O le upu Eperu mezim·mah,ʹ lea ua faaliliuina i le “tomai e mafaufau ai,” (NW) e sau mai le upu autū o lona uiga o le “fuafua po o le fafau.” (Faataoto 1:4) O lea, ua faaliliuina ai e faaliliuga o le Tusi Paia le mezim·mahʹ i le “faautauta” po o le “tofāmamao.” Ua faamatalaina e ni tagata tomai faapitoa i le Tusi Paia o Jamieson, Fausset, ma Brown le upu mezim·mahʹ o le “nofouta lea e sola ese mai le leaga ae saʻili i le lelei.” E faauiga atu lenei i le tilofaʻia o āuga e tuai ona oo mai, ma āuga e vave oo mai o a tatou gaoioiga. O le iai o le tomai e mafaufau ai, o le a tatou iloiloina ai ma le faaeteete a tatou filifiliga a o leʻi faatinoina, aemaise lava pe afai ua tatau ona faia ni filifiliga tāua.

Pe a faia e se tagata o loo iai le tomai e mafaufau ai ni filifiliga mo le lumanaʻi po o tulaga o loo iai o ia i le taimi nei, e muamua ona ia tilofaʻia lamatiaga ma mailei e ono tulaʻi mai. E na te mātauliaina loa ni lamatiaga e mafai ona oo iai, ona gaoioi loa lea o ia e saʻili se auala e mafai ona foʻia ai, ma iloilo po o ā aafiaga mai lona siʻomaga ma ana aumea. O lea e mafai ai ona ia fuafua se auala e aumaia ai se iʻuga lelei, pe atonu foʻi o ni faamanuiaga tauatua. Seʻi o tatou iloilo nisi o faataʻitaʻiga aogā e faataʻitaʻia ai lenei auala.

‘Alofia le Maileia i Faiga Lē Mamā Faaleituaiga

Pe afai e agi faasaga mai le matagi agaʻi i le taumua o le vaa, e taʻua lenā tulaga o le taumuaaʻi i matagi. O le lamatiaga e oo i seila, o le saʻe lea o lo latou vaa vaganā ai ua latou taumafai e faafetaui ma le tomai galu o loo latou feagai.

Ua tutusa lenā ma le tulaga o loo tatou fesagaʻia, a o tatou ola ai i se lalolagi o loo pupū i feusuaʻiga faaleituaiga. O aso uma lava tatou te feagai ai ma taaʻiga o manatu ma mafaufauga o le lalolagi. E lē mafai ona tatou ʻalofia aafiaga e latou te faaaafia ai o tatou faanaunauga masani faaleituaiga. E tatau la ona tatou faaaogā le tomai e mafaufau ai ma faafetaiaʻia ma le maumauaʻi le tofotofoga, na i lo le na ona faatafetafea atu i tulaga mataʻutia.

Mo se faaaʻoaʻoga, o tane Kerisiano e masani ona galulue faatasi ma i latou o ē e itiiti se faaaloalo mo fafine, e manatu i ai ua na o nisi e aogā mo faiga faaleituaiga. O talanoaga a ē latou te faigaluega faatasi e filogia lea ma tausuaga leaga ma faiga matagā faaleituaiga. O lenei siʻomaga e mafai ona iʻu ina totō ai mafaufauga lē mamā i loto o Kerisiano.

 Atonu e faigaluega se fafine Kerisiano i se galuega totogi, ma o loo fesagaʻi ma ni tulaga faigatā. E ono faigaluega faatasi ma ni tamāloloa ma ni fafine e eseese a latou tapulaa tau amio. Pe atonu o se tasi o alii latou te faigaluega faatasi e faaali ane lona naunau iā te ia. I le amataga, e na te faaali lona manatu mamafa iā te ia, e oo lava i le faaaloalogia o ia ma ona talitonuga faalelotu. O lona uaʻi ane pea ma le faifai mea faatasi e mafai ona uunaʻia ai le tuafafine e manaʻo ina ia sili atu ona vavalalata.

I le avea la o ni Kerisiano, e mafai faapefea ona fesoasoani iā i tatou le tomai e mafaufau ai i tulaga faapea? Muamua, e mafai ona tatou mataalia ai i lamatiaga faaleagaga, ma lona lua, e mafai ona uunaʻia ai i tatou e fuafua se gaoioiga e talafeagai ona fai. (Faataoto 3:21-23) I tulaga e pei o lenei, atonu e tatau ai i se tasi ona faailoa atu ma le manino i ē latou te faigaluega faatasi e faapea, e ese mai a tatou tapulaa ona o o tatou talitonuga faale-Tusi Paia. (1 Korinito 6:18) O la tatou tautala ma amio e mafai ona faamalosia ai lenā feʻau. E lē gata i lenā, o le faifaimea faatasi ma nisi tou te faigaluega faatasi atonu e sili ona faatapulaaina.

Peitaʻi, e lē na o falefaigaluega e aafia ai i omiga tau i amioga lē tatau. E mafai foʻi ona tulaʻi mai pe afai e faataga e se ulugalii faaipoipo faafitauli e faaitiitia ai lo la autasi. Na taʻua faapea e se faifeʻau femalagaaʻi: “O le tatalaina o se faaipoipoga e lē teʻi lava ua tupu. Atonu e faasolosolo malie atu ina valavala tau i faalogona se ulugalii, e seāseā ona talanoa le tasi i le isi pe faaaluina faatasi se taimi na o i laʻua. Atonu ua la saʻilia meafaitino e faapaleni ai le mea lea ua faalētonu i le la faaipoipoga. Ona ua seāseā ona viiviia e le tasi ni mea lelei e uiga i le isi atonu ai ua tosina atu ai le avā i se isi tamāloa faapena foʻi i le tane i se isi fafine.”

Na faapea mai atili lenei faifeʻau ua iai le poto masani: “Ia lē aunoa le ulugalii faaipoipo ona nonofo i lalo ma iloilo pe iai se mea o faalavelavea ai le la faiā. E tatau ona la fuafua le auala e mafai ai ona la suʻesuʻe, tatalo, ma talaʻi faatasi ai. O le a matuā aogā iā i laʻua le talanoa faatasi ‘i le fale, i le ala, pe a taoto, pe e tulaʻi foʻi,’ e pei lava ona faia e matua ma fanau.”—Teuteronome 6:7-9.

Le Faafetaiaʻia o Amioga e Lē Faa-Kerisiano

E ese mai le fesoasoani iā i tatou e faafesagaʻia ma le taulau tofotofoga tau amio, e mafai foʻi e le tomai e mafaufau ai ona fesoasoani iā i tatou i le faafetaiaʻia o faafitauli i le va ma isi uso Kerisiano. Pe a agi mai le matagi i le taumuli, e na te faapogaia galu ina ia fafati mai tua o le vaa ma maua ai le tulaga e taʻua ua taumuliai. E mafai e na galu ona sii i luga le taumuli ma sipa ai le alu. E oo ina ū atu ai le autafa o le vaa i le mea o loo agaʻi mai ai galu ma āfaina ai.

E mafai foʻi ona tatou aafia i se lamatiaga e sau mai i se itulagi sa leʻi faatalitalia. E tatou te auauna i le “loto gatasi” ma le toʻatele o o tatou uso ma tuafafine Kerisiano faamaoni. (Sefanaia 3:9) Pe afai e faia e se tasi o i latou se gaoioiga e lē faa-Kerisiano, e ono foliga mai o le a lē toe faatuatuaina, ma e faapogaia ai le matuā lotomafatia. E faapefea i le tomai e mafaufau ai ona taofia i tatou mai le lē paleni o le vaai ma le loto tigā?

Ia manatua, “e leai se tagata e le agasala.” (1 Tupu 8:46) O lea, e lē tatau ai ona faateʻia i tatou i nisi o taimi atonu e faatigā pe faalumaina ai i tatou e so tatou uso Kerisiano. O le iloaina o lenei mea, e mafai ona tatou sauniuni ai i se mea e tupu mulimuli ane, ma mafaufau loloto i le auala e tatau ona tatou tali atu ai. Na faapefea i le aposetolo o Paulo ona tali atu ina ua tautala faatigā ma le manatu faatauvaa se tasi o uso Kerisiano e faatatau iā te ia? Na i lo le lē iloa o lona tulaga paleni faaleagaga, na ia faia se faaiʻuga e faapea e sili atu le tāua o le mauaina o le finagalo malie o Ieova na i lo se tagata. (2 Korinito 10:10-18) O se uiga faapena o le a fesoasoani iā i tatou e ʻalofia ai le vave ona tali atu pe a faatigā mai se isi.

E tai pei lava o le tuʻia o so tatou tamatamaʻivae. Pe a tupu lenei mea, atonu e lē toʻa lelei lou mafaufau i se minute se tasi pe lua. Ae pe a toe teʻa le tigā, e mafai ona toe sagatonu le mafaufau ma gaoioi e pei ona masani ai. O le tulaga lava lea e tasi, e lē tatau ona tatou vave tali atu i ni faaupuga po o se gaoioiga lē alofa e fai mai. Na i lo lenā, ia faatali ma tilofaʻia āuga e oo i ai pe a toe taui atu e aunoa ma se mafaufau lelei.

Ua faamatala mai e Malcolm, o se misionare mo le tele o tausaga le mea na te faia pe a faamasiasiina  o ia: “O le laasaga muamua ou te faia, o le siaki faasolosolo lea o se lisi o fesili: “Po o loʻu ita ea i lenei uso e māfua ona o le feteenaʻi o o ma uiga? Pe o se mea e tāua lea sa fai mai ai o ia? Pe e lē o le aafiaga o oʻu neula i le malaria lea ua faatetele ai ia lagona iā te aʻu? Pe o le a suia laʻu vaai i mea pe a mavae ni nai itula?” O le tulaga masani na mātauina e Malcolm, o se mea na la lē femalilieaʻi ai, sa leai sona tāua ma e mafai ona lē amanaʻiaina. *

Ua faapea mai atili Malcolm: “I nisi o taimi, e ui lava i aʻu taumafaiga uma e foʻia le faafitauli, ae e tumau pea ona faaalia mai uiga lē fiafia o le isi uso. Ou te taumafai lava ia lē avea lea ma mea e faalavelave ai iā te aʻu. O le taimi lava e uma ai taumafaiga e mafai ona ou faia, ona ese loa lea o laʻu vaaiga i le mataupu. Ou te faateʻaese ma loʻu mafaufau ma atonu o le a foʻia a o faagasolo taimi na i lo o loʻu manatu e tatau ona ou foʻiaina. Ou te lē faatagaina e faaleagaina ai aʻu faaleagaga po o le faaaafia ai o la ma faiā ma Ieova faapea ma isi oʻu uso.”

I le pei o Malcolm, e lē tatau ai ona tatou faatagaina amioga lē lelei a isi tagata taʻitoʻatasi e faapopoleina ai fua i tatou. I faapotopotoga uma, e toʻatele ai uso ma tuafafine tauagafau ma faamaoni. O se fiafiaga le savavali “faatasi” ma i latou i le auala faa-Kerisiano. (Filipi 1:27) Ia manatua o le a fesoasoani foʻi iā i tatou le lagolagosua agaalofa a lo tatou Tamā faalelagi, ina ia tatou tausia ai se vaaiga saʻo i mea.—Salamo 23:1-3; Faataoto 5:1, 2; 8:12.

E Lē o le Naunau i Mea a le Lalolagi

O le tomai e mafaufau ai e mafai ona fesoasoani iā i tatou e faafesagaʻia ai se tasi o omiga iloagatā. Pe a agi mai le matagi i se itu po o le autafa o le vaa, e fafati mai ai ma galu i le itu lenā. Pe a tulaga lelei le tau, e faifai malie ona uunaʻi ese e ia galu le vaa mai lona alāvaa. Peitaʻi, a agi se matagi malosi, e mafai e galu na ona mafuli ai le vaa.

 O le tulaga lava e tasi pe afai e tatou te lolo atu i omiga o le saʻilia o mea o loo ofo mai e le lalolagi amioleaga, e mafai e lenei ituaiga o olaga ona unaʻiesea i tatou mai le ala faaleagaga. (2 Timoteo 4:10) Pe a lē taofiofia, e mafai e le tuʻinanau i le lalolagi ona faapogaia i tatou e lafoaʻia atoatoa lo tatou ala faa-Kerisiano. (1 Ioane 2:15) E mafai faapefea e le tomai e mafaufau ai ona avea ma o tatou fesoasoani?

Muamua, o le a fesoasoani iā i tatou e fefuafuataʻi po o ā lamatiaga tatou te ono fesagaʻia. Ua faaaogāina e le lalolagi faatosinaga tau fefaatauaʻiga uma e maileia ai i tatou. Ua ia faaauilumaina e lē aunoa le ituaiga o olaga lea e faapea e ao i tagata uma ona saʻilia—le olaga faalialiavale i le tele o mea, le faatosina, ma le foliga mai o loo taulau “manuia.” (1 Ioane 2:16) Ua folafola mai iā i tatou le viiviia ma le taliaina e tagata uma o i tatou, aemaise lava i a tatou aumea ma tuaoi. O le tomai e mafaufau ai o le a fesoasoani lea e teena nei faamatalaga taufaasesē, ma faamanatu mai ai iā i tatou le tāua o le ‘aunoa ma le matapeapea,’ ona ua folafola mai e Ieova o le a “ia le tuua lava i tatou.”—Eperu 13:5.

O lona lua, o le tomai e mafaufau ai o le a taofia ai i tatou mai le mulimuli atu iā i latou o ē ua ‘liliuese ma le upu moni.’ (2 Timoteo 2:18) E ese le faigatā ona ʻalofia o i latou na tatou fiafia i ai ma faatuatuaina. (1 Korinito 15:12, 32-34) E tusa lava pe e itiiti so tatou aafiaga mai ia i latou ua lafoaʻia le ala faa-Kerisiano, e mafai ona gese ai lo tatou agaʻigaʻi i luma faaleagaga ma mulimuli ane tuua ai i tatou i se tulaga mataʻutia. E mafai ona pei i tatou o se vaa ua see laʻitiiti ese ma lona auala saʻo. I se malaga umi, e mafai ai ona telē se sē ese mai le nofoaga sa tatau ona taunuu i ai.—Eperu 3:12.

O le tomai e mafaufau ai e mafai ona fesoasoani iā i tatou e faamautinoa ai le tulaga faaleagaga o loo tatou i ai, ae po o fea foʻi o loo tatou agaʻi i ai. Atonu tatou te mātauina le manaʻoga o le faia o se sao atoatoa i gaoioiga faa-Kerisiano. (Eperu 6:11, 12) Mātau le auala na faaaogā ai e se tasi Molimau talavou lona tomai e mafaufau ai e fesoasoani iā te ia e tuliloaina sini faaleagaga: “Na iai le avanoa ou te mauaina ai se galuega o le tusitala. Na fetaui lelei ma aʻu, ae na ou manatua le fuaitau o le Tusi Paia lea e faapea mai o le a ‘mavae atu lenei lalolagi’ ae ‘o le fai le finagalo o le Atua, e tumau lea e faavavau.’ (1 Ioane 2:17) Na ou mafaufau e faapea o loʻu olaga e tatau ona faaatagia atu ai oʻu talitonuga. Na lafoaʻia e oʻu mātua le faatuatua faa-Kerisiano, ma sa ou lē manaʻo e mulimuli atu i la laʻua faaaʻoaʻoga. O lea na ou filifili ai loa e ola i se olaga e iai se fuafuaga ma auai i le faiva faataimi atoa o se paeonia sauatoa. Ina ua mavae tausaga e fā o oʻu auauna ma le faamalieina, na ou iloaina ai sa ou faia se filifiliga saʻo.”

Faafetaiaʻia ma le Manuia Afā Faaleagaga

Aiseā e vave ai ona faagaoioi o tatou tomai e mafaufau ai i aso nei? E tatau i seila ona mataalia i faailoilo mo lamatiaga, aemaise lava pe a tau agiagi mai ni matagi malolosi. Pe afai e faafuaseʻi ona mālūlū, ma faatetele le malosi o le agi o matagi, e tapunia ai e i latou le ana o le vaa ma sauniuni mo tulaga e sili atu ona loulouā. I se uiga faapena, e tatau ai ona sauniuni e faafetaiaʻia omiga e sili atu ona faigatā a o taulata atu i le iʻuga o lenei faiga o mea. O tulaga tau amioga tatau a le lalolagi ua lē maopoopo, ma ua “alualu pea lava lo latou leaga.” (2 Timoteo 3:13) E pei lava ona faalogologo e lē aunoa seila i le tala o le tau, e tatau foʻi ona tatou amanaʻiaina lapataʻiga faavaloaga o le Afioga faagaeeina a le Atua.—Salamo 19:7-11.

Pe a tatou faaaogāina le tomai e mafaufau ai, ua tatou faatatauina le poto e taʻitaʻia ai i le ola e faavavau. (Ioane 17:3) E mafai ona tatou faatalitalia faafitauli ma filifili po o le ā le auala e foʻiaina ai. O lea tatou te sauniuni ai ma le lē maluelue ina ia lē see ese ma le ala faa-Kerisiano, ma mafaia ona tatou faataatia se “faavae lelei mo aso atali” e ala i le faatū ma tuliloaina o sini faaleagaga.—1 Timoteo 6:19.

Pe afai e puipuimaluina i tatou e le poto e aogā ma le tomai e mafaufau ai, e lē manaʻomia la ona tatou “mataʻu i le fefe faafuasei.” (Faataoto 3:21, 25, 26) Na i lo lenā, e mafai ona faamāfanafanaina tatou i le folafolaga a le Atua: “A oo le poto i lou loto, ma ua mālie ia te oe le atamai; e faafeao le [“tomai e mafaufau ai,” NW] ia te oe.”—Faataoto 2:10, 11.

[Faamatalaga pito i lalo]

[Ata i le itulau 23]

O fesootaʻiga e lē aunoa e atiina aʻe ai le faaipoipoga