Fesili Mai le ʻAufaitau

O ā taʻiala ua saunia e le Tusi Paia e faatatau i le toleniina o tamaiti pe afai o le tasi o matua o se Molimau a Ieova ae lē faapena le isi?

E lua mataupu silisili autū faale-Tusi Paia ua aumaia ai taʻiala e faatatau i le toleniina o se tamaitiiti a se matua Molimau ae lē Molimau lana paaga. O le tasi, e faapea: “E tusa ona sili o lo matou anaana i le Atua i lo matou anaana i tagata.” (Galuega 5:29) O le isi e faapea: “O le tane o le ulu ia o le avā, pei o Keriso foi o le ulu ia o le ekalesia.” (Efeso 5:23) O le mataupu silisili mulimuli e mafai ona faatatau e lē gata i avā o ni Molimau a latou tane, ae iā i latou foʻi e iai paaga e lē o ni Molimau. (1 Peteru 3:1) E mafai faapefea e se matua Molimau ona faapaleni nei mataupu silisili pe a aʻoaʻoina lana fanau?

Pe afai o le tane o se Molimau a Ieova, o lona tiute la o le sauniunia o mea faaleagaga ma mea faaletino mo lona aiga. (1 Timoteo 5:8) E ui lava atonu e tele le taimi e faaalu e le tinā lē talitonu ma la laʻua fanau, ae e tatau i le tamā Molimau ona aʻoaʻo lana fanau e ala i le tuuina atu o toleniga faaleagaga i le aiga ma le aveina o i latou i sauniga faa-Kerisiano, o inā o le a latou maua ai aogā e ala i faatonuga tau amio ma aufaatasiga e atoatoa ona mamā.

Ae faapefea pe afai e maumauaʻi pea le avā e lē o se Molimau e ave tamaiti i lana lotu pe aʻoaʻo foʻi i ai ona talitonuga? I le tulafono a le atunuu, atonu e na te maua le aiā e faia ai faapea. Pe atonu e tofotofoina tamaiti i le faia o ni gaoioiga tau tapuaʻiga i na nofoaga, e mafai ona faalagolago tele atu lea tulaga i le uigā o aʻoaʻoga faaleagaga a le tamā. A o faasolo ina matutua tamaiti, e ao ona fesoasoani le aʻoaʻoga faale-Tusi Paia a lo latou tamā iā i latou e mulimuli ai i le upu moni o le Afioga a le Atua. Maʻeu le fiafia o le a iai i le tane talitonu pe afai e tutū lana fanau mo le upu moni!

Afai o le tinā o se Molimau a Ieova, e tatau ona ia faaaloalo i le mataupu silisili o le tulaga ulu, a o manatu mamafa foʻi o ia mo le lelei e faavavau o lana fanau. (1 Korinito 11:3) I le tele lava o tulaga, atonu o le a lē āfaina i le paaga lē talitonu pe afai e aʻoaʻo e lana avā Molimau la laʻua fanau i amioga tatau ma le faaleagaga, ma o fesoasoani mo lenā mea o loo mafai ona maua i sauniga a tagata o Ieova. E mafai e le tinā ona fesoasoani i lana tane lē talitonu ina ia iloa le aogā o aʻoaʻoga e faalaeiau ai, ia e maua e la laʻua fanau e ala mai i le faalapotopotoga a Ieova. E mafai ona ia faamamafa ma le tomai le aogā o le tāmauina o mataupu silisili tau amio i loto o la laʻua fanau, a o fesagaʻi i latou ma se olaga ua faasolo ina matuā leaga ai amioga a lenei lalolagi.

Ae peitaʻi, atonu e tausisi mai le tane lē talitonu e faapea, e fai e lana fanau mea e fai i lana lotu, ma ave i latou i le falesā e tapuaʻi ai ma aʻoaʻo i latou i talitonuga faalelotu e tusa ma lona faatuatuaga. Pe atonu foʻi e tetee le tane i lotu uma ma faapea mai e lē tatau ona aʻoaʻoina lana fanau i ni aʻoaʻoga faalelotu. Ona o ia o le ulu o le aiga, o ia lava la e faia le faaiʻuga. *

Ona o le faaaloalo i le tulaga ulu o lana tane, e pei ona tatau ai i se Kerisiano tuuina atu, e tatau ona manatua e le avā talitonu ia uiga faaalia o aposetolo o Peteru ma Ioane, ia na faapea mai: “Auā ma te le mafaia ona le tautala i mea ua ma vaai i ai ma faalogo i ai.” (Galuega 4:19, 20) Ona o le manatu  mamafa mo le lelei faaleagaga o tamaiti, o le a maua ai e se tinā Molimau ni avanoa e saunia ai taʻiala tau amio mo i latou. O loo iā te ia le tiute tauave mai iā Ieova ina ia aʻoaʻo isi e uiga i mea ua ia iloa e moni, ma e tatau foʻi ona faaaofia ai ma lana fanau. (Faataoto 1:8; Mataio 28:19, 20) E faapefea ona feagai se tinā Molimau ma lenei tulaga faigatā?

Seʻi fai ma faaaʻoaʻoga le mataupu i le talitonuga e uiga i le Atua. Atonu e lē mafai ona faia e se avā Molimau se suʻesuʻega faale-Tusi Paia e fuafuaina ma lana fanau ona e faasā e lana tane. Pe e ao ea i lenei māfuaaga ona ia ʻalo ese ai mai le faamatalaina atu i lana fanau o se mea e uiga iā Ieova? E leai. O ana upu ma gaoioiga e ao ona atagia atu ai lona talitonuga masani e uiga i Lē na Foafoaina Mea. E lē taumatea, o le a iai ni fesili a lana fanau e uiga i le mataupu. E ao ona saʻoloto o ia e faatinoina lona saʻolotoga tau tapuaʻiga e ala i le faailoa atu o lona talitonuga e uiga i Lē na Foafoaina Mea, e aofia ai ma lana fanau. E tusa lava pe lē mafai ona ia faia se suʻesuʻega faale-Tusi Paia ma tamaiti pe ave e lē aunoa i latou i sauniga, e mafai lava ona e faamatala atu iā i latou le poto e uiga iā Ieova le Atua.—Teuteronome 6:7.

E tusa ai ma le faiā i le va o se Molimau ma sana paaga lē talitonu, na tusi mai ai le aposetolo o Paulo e faapea: “E faapaiaina le tane le talitonu i le avā; e faapaiaina foi le avā le talitonu i le tane; ana le o lea po ua leaga a outou fanau; a o lenei, e paia i latou.” (1 Korinito 7:14, LT) E silasila Ieova i le faiā faalefaaipoipoga e paia ona o paaga talitonu, ma e paia foʻi la tamaiti i le silafaga a Ieova. E tatau i le avā Molimau ona faia le mea e aupito sili na te mafaia e fesoasoani ai i lana fanau ina ia malamalama i le upu moni ma tuu atu faaiʻuga uma iā Ieova.

A o faasolo ina matutua tamaiti, e filifili lava e i latou le itu e tutū ai e faavae i faamatalaga na latou maua mai i o latou mātua. Atonu e latou te filifili e gaoioi e ōgatusa ma upu a Iesu e faapea: “O le ua tele lona alofa i lona tamā po o lona tinā, a e itiiti ia te au, e le aoga lea ia te au.” (Mataio 10:37) Ua poloaʻiina foʻi i latou e faapea: “O outou le fanau, ia outou faalogo i o outou mātua i le Alii.” (Efeso 6:1) E toʻatele talavou ua filifili e ‘usiusitai i le Atua o le pule’ na i lo o le matua e lē o se Molimau, e ui lava i mafatiaga ma faigatā e aumaia e lenā matua. Maʻeu se taui o le a maua e lenā matua Molimau i le vaai atu ua filifili tamaiti e auauna iā Ieova e ui lava i teteega!

[Faamatalaga pito i lalo]